Luk̆a 3
3
Yanik Mances Gza Uxazirams
1K̆aysar Tiverişi mapobaşi mavit̆oxutani ʒ̆ana rt̆u. Pontius Pilate Yudeas vali rt̆u. Mapaşi iznite Galileas İrodis, İturea do Traxonitis İrodişi cuma Filip̆es, Avilini na coxons svasti Lisanias xukmi uğut̆u. 2Anasi do Kayafa P̆ap̆aşumçanepe rt̆esşi, çolis na rt̆u Zaxariaşi skiri Yanişa Ğormotişi nena kogextu. 3Hemuti Yordanişi Ğalis gomti k̆ala na ren mteli svas gulut̆u do k̆oçepes k̆rimaşen oxat̆iruşeni Ğormotişa goktinu do vaft̆izişa ucoxamt̆u. 4İsaya ambayocişi kitabis haşo ç̆arut̆u:
“Çolis ar xomak,
‘Mances gza uxazirit,
Na mek̆ilasen gzalepe uduzanit’-ya do icoxoms.
5K̆at̆a skuri yipşasen
K̆at̆a rak̆ani do germa geinç̆asen
İisanasen drik̆eri gzalepe
P̆et̆ra gzalepe iduzanasen
6Şuri na udgin irik,
Ğormotik xalk̆i muşi na moşletinasen z̆iranoren.”
7Yanik, vaft̆izi oxenuşeni na moxtes xalk̆is haşo uʒ̆umert̆u: “Ç̆e k̆antxaşi skirepe! Na moxtasen ğezebişen omt̆inuşeni tkva ambai mik mekçes? 8Haʒ̆işk̆ule Ğormotişa goktinus na nomskun dulyape vit. Ti tkvani k̆ala ‘Baba çkuni Avraami ren’-ya do mot zop̆ont. Haya giʒ̆umert: ‘Ğormotik, Avraamis kvaşi skirepeti aç̆k̆aden.’ 9Haʒ̆i arguni ncaşi cicis ren. Na var içanen ncalepe geik̆vatinasen do daçxuris meşint̆orinasen”-ya.
10Xalk̆ikti Yanis “Heşo renna, çku mu p̆at?”-ya do k̆itxes.
11Yanik hentepes haşo uʒ̆u: “Ar mitxanis jur porça kuğunna, ar tane, porça na var uğuns komeças; oç̆k̆omale na uğunti xolo haşo vas.”
12Bazi taxsildarepeti vaft̆izi ovapuşeni komoxtes do “Mamgurapale, çku mu p̆at?”-ya do k̆itxes.
13Yanik hentepes haşo uʒ̆u: “Tkva na gekçinadvanşen dido vergi mot k̆orobumt.”
14Bazi askerepekti xolo hemus: “Çku mu p̆at?”-ya do k̆itxes.
Hentepes: “Miti zorişa varna mʒudişi suçi eondvat do para mot goʒ̆umert. Tkva na mekçanoren tuteri para ink̆ilarit”-ya uʒ̆u.
15Mteli xalk̆ik Xrist̆es meşvent̆es, Yanişeni “P̆ea Xrist̆e haya reni?”-ya do guris dolingonamt̆es.
16Yanik mtelis haşo uʒ̆u: “Ma tkva ʒ̆k̆arite vaft̆izi k̆ʒ̆opxumt. Mara çkimi ucgine ar mitxani mulun. Ma kalamani muşi moʒ̆k̆imus var bğir. Hemuk tkva Şuriʒ̆k̆onda do daçxurite vaft̆izi k̆ʒ̆opxanoren. 17Xarmanişi sva ok̆alu do dik̆a bağus ok̆obğuşeni ʒafi xes okaçun. Mara ğeri, na var meskurun daçxurite ç̆vasen.” 18Yanik xalk̆is dido nosepe meçamt̆u do Xrist̆eşi k̆ai ambaiti ognapamt̆u.
19Hem svalepeşi mapa na ren İrodi, cuma muşişi çili İrodia k̆ala diçiludort̆un. Çkva p̆at̆obapeti ikomt̆u. Yanik hemus elaçamt̆u. 20İrodik dido p̆at̆obape muşis arçkva p̆at̆oba keluk̆atu do Yani cixas komolat̆k̆oçu.
Yanik, Yeso Vaft̆izi Ʒ̆opxums
21Xalk̆i vaft̆izi ivet̆uşi, Yesoti vaft̆izi divu; oxvamus gyoç̆k̆uşi ʒa kok̆iʒ̆k̆u. 22Şuriʒ̆k̆onda xurate, ar t̆orocisteri ʒaşen hemuşa kogextu do ʒaşen haşo ar xoma ignu: “Si opodrage skiri mionur, k̆ai miʒ̆onur.”
Yesoşi Soi
23Yeso, dulya muşis gyoç̆k̆uşi mexola eçidovit ʒ̆aneri rt̆u. Yosifişi skiri ren-ya daʒ̆onet̆es. Yosifiti Eliş skiri, 24Eli Matat̆iş skiri, Matat̆i Leviş skiri, Levi Melşiş skiri, Melşi Yanaiş skiri, Yanai Yosifiş skiri, 25Yosifi Mat̆atiaş skiri, Mat̆atia Amosiş skiri, Amosi Naumiş skiri, Naumi Esliş skiri, Esli Nangaiş skiri, 26Nangai Maatiş skiri, Maati Mat̆atiaş skiri, Mat̆atia Semeiniş skiri, Semeini Yosixiş skiri, Yosixi Yodaş skiri, 27Yoda Yoananiş skiri, Yoanani Risaş skiri, Risa Zorovaveliş skiri, Zorovaveli Salatieliş skiri, Salatieli Neriş skiri, 28Neri Melşiş skiri, Melşi Adiş skiri, Adi K̆osamiş skiri, K̆osami Elmadamiş skiri, Elmadami Eriş skiri, 29Eri Yeşuş skiri, Yeşu Eliezeriş skiri, Eliezeri Yorimiş skiri, Yorimi Matat̆iş skiri, Matat̆i Leviş skiri, 30Levi Simeoniş skiri, Simeoni Yudaş skiri, Yuda Yosifiş skiri, Yosifi Yonamiş skiri, Yonami Eliakimiş skiri, 31Eliakimi Meleaş skiri, Melea Menaş skiri, Mena Mat̆ataş skiri, Mat̆ata Natamiş skiri, Natami Davidiş skiri, 32Davidi Yesaiş skiri, Yesai Ovediş skiri, Ovedi Voesiş skiri, Voesi Salaş skiri, Sala Naasoniş skiri, 33Naasoni Aminadaviş skiri, Aminadavi Adminiş skiri, Admini Arniş skiri, Arni Esromiş skiri, Esromi Faresiş skiri, Faresi Yudaş skiri, 34Yuda Yak̆oviş skiri, Yak̆ovi İsaak̆iş skiri, İsaak̆i Avraamiş skiri, Avraami Taraş skiri, Tara Naxoriş skiri, 35Naxori Seruxiş skiri, Seruxi Rağaviş skiri, Rağavi Falek̆iş skiri, Falek̆i Everiş skiri, Everi Salaş skiri 36Sala Kainamiş skiri, Kainami Arfaksadiş skiri, Arfaksadi Simiş skiri, Simi Noeş skiri, Noe Lamexiş skiri, 37Lamexi Matusalaş skiri, Matusala Enoxiş skiri, Enoxi Yaret̆iş skiri, Yaret̆i Maleleiliş skiri, Maleleili Kainamiş skiri, 38Kainami Enosiş skiri, Enosi Sitiş skiri, Siti Adamiş skiri, Adami Ğormotiş skiri rt̆u.
Currently Selected:
Luk̆a 3: LZZ
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Laz Luke © Bible Society in Turkey (Kitabı Mukaddes Şirketi) 2020