Ubutukilo 1
1
Zambi yatanga yuma yeswe
1Ha Ubutukilo Mukulu Zambi yatanga lilu ni hashi. 2Hashi habwile te hahululu kanda hamokomoko. Kalunga lwiji yoze te wakufuka yuma yeswe yabwa mu milima bwii, ni fuji#1:2 FUJI hanji mwiku wa Zambi. ya tachi ya kuli Mukulu Zambi yiihuhwa ha meya. 3Mukulu Zambi yamba ngwenyi: “Pangu libwe.” Mba pangu yilibwa. 4Mukulu Zambi yamona ngwenyi, pangu linabeme. Mba yahandununa pangu ni milima. 5Yaluka pangu ngwenyi: mwalwa, ni milima ngwenyi: ufuku. Muze hikwacha yilibwa lie tangwa litangu.
6-7Mukulu Zambi yamba nawa ngwenyi: “Kuzazuluka chibwe hanga chihandunune meya.” Necho yichibwa. Chenacho Mukulu Zambi atangile kuzazuluka. Necho yichihandununa meya kwilu ni hashi. 8Mukulu Zambi yaluka kuzazuluka ngwenyi: lilu. Muze hikwacha yilibwa tangwa lia muchaali.
9Mba Mukulu Zambi yamba ngwenyi: “Meya waze ali kushi lia lilu aswile muma mumuwika hanga mavu asoloke.” Yichibwa chenacho. 10Mavu yaaluka ngwenyi: hashi, kuswa cha meya yachiluka ngwenyi: kalunga lwiji. Mukulu Zambi yachimona ngwenyi, chinabeme. 11Mba yamba ngwenyi: “Hashi hasoke yambu ni mitondo ya milali yeswe, yize yakwima mbuto ni yize yakwima mawundu nikulita ni milali yayo.” Yichibwa chenacho. 12Chenacho hashi hasokele yambu ni mitondo ya milali yeswe yize yakwima mbuto ni yize yakwima mawundu nikulita ni milali yayo. Mukulu Zambi yamona ngwenyi, yize yeswe yinabeme. 13Muze hikwacha yilibwa tangwa lia muchitatu.
14Mukulu Zambi yamba nawa ngwenyi: “Mapangu abwe mu che kuzazuluka cha lilu ha kuhandununa mwalwa ni ufuku, ni kulweza yinyingi ya yanga, ni matangwa, ni miaka. 15Yibwe mapangu kwilu ha kupangulwisa hashi.” Yichibwa chenacho. 16Chenacho Mukulu Zambi atangile mapangu anene aali: tangwa ha kupangulwisa mu mwalwa, kakweji ha kupangulwisa mu ufuku. Yatanga nawa matongonoshi. 17Mukulu Zambi yaasa mwilu ha kupangulwisa hashi 18mu mwalwa ni mu ufuku, ni kuhandununa pangu ni milima. Mukulu Zambi yamona ngwenyi, yize yeswe yinabeme. 19Muze hikwacha yilibwa tangwa lia muchiwana.
20Mukulu Zambi yamba nawa ngwenyi: “Mu meya muzale ni tushitu a milali yeswe, ni tujila endangane kwilu.” 21Mukulu Zambi yatanga tushitu anene anene a mu kalunga lwiji, ni tushitu a milali yeswe akwo a mu meya, yatanga nawa tujila a milali yeswe. Yamona ngwenyi, yino yeswe yinabeme. 22Mba Mukulu Zambi yawahisa tushitu, yaamba akaliokese hanga akazalise kalunga lwiji, ni tujila nawa akaliokese. 23Muze hikwacha yilibwa tangwa lia muchitano.
24Mba Mukulu Zambi yamba ngwenyi: “Hashi hokese tushitu a milali yeswe, a ha chihunda ni a mu yambu, anene anene ni akepe akepe, azalise hashi.” Mba yichibwa chenacho. 25Chenacho atangile tushitu eswe. Yamona ngwenyi, eswe kaanabeme.
26Mukulu Zambi yamba nawa ngwenyi: “Haliabwila tutangenu atu abwe ngwe yetu ni alifwe ni yetu. Akayule yishi a mu meya, ni tujila, ni tushitu eswe a ha chihunda, ni a mu yambu, anene anene ni akepe akepe.” 27Mba Muluku Zambi yatanga atu, e atu yaalifwa nenyi. Yaatanga lunga ni pwo. 28Yaawahisa, yaamba ngwenyi: “Semenu, nuliokese, nuzalise hashi heswe ni kuyula ho. Nuyule yishi a mu kalunga lwiji, ni tujila a mu tetela, ni tushitu eswe akwenda hashi. 29Mba Mukulu Zambi yamba ngwenyi: “Talenu, ngunanwehe milali yeswe ya mbuto ni ya mawundu, yibwe yakulia yenu. 30Alioze tushitu eswe a mu yambu, ni tujila eswe, yakulia yo mwambu ni mafwo a wisu.” Yichibwa chenacho. 31Mukulu Zambi yatala yuma yeswe yize atangile, yamona ngwenyi, yinabeme kuhiana. Muze hikwacha yilibwa tangwa lia muchisambano.
Currently Selected:
Ubutukilo 1: CHK1970
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.