Kananet 8
8
Uuddai tawani lo̱o̱ta̱
1I̱no̱n zin Ta̱mu̱ta̱dde̱n zoz ci Nowa ki ollinne ki kaal ki elegje balik aavtte ki nonno i̱ba̱ ke̱, kar zin ki̱tto̱na̱ ngoot ku̱vu̱wa̱n lo̱o̱c, kar zin maama koot lo̱o̱ta̱ todowai. 2Ibiliz zin Ta̱mu̱ta̱dde̱n maam ta̱mu̱-kenga, i̱zze̱c maama cik a̱vvu̱ kar maama balik ibboryai lo̱o̱ta̱ ke̱ iróng ngen erenane. 3I̱mi̱rtte̱ maama oot lo̱o̱ta̱ todowai. Baling izeto i̱i̱nya̱ o̱bo̱n co̱de̱ ki moten tu̱r (150), uuddai maama. 4Ma̱i̱je̱ i̱i̱nya̱we̱ wak e̱e̱ggi̱n omoto ki turgerem nye̱lo̱we̱ wa een turgerem, atakade i̱bo̱ biyene cik azi zar ne Ararat ta̱dde̱na̱! 5I̱mi̱rrte̱ zin maama idicilim zee rok nye̱lo̱k ci een omoto. I̱ye̱ltta̱i̱ zin biyena o̱o̱tti̱ kicinnet ol do̱o̱k.
6Baling edeccai i̱i̱nya̱ cik e̱e̱ggi̱n moten we̱c, oo Nowa lopilding bali adimanek enne i̱bo̱ ke̱ 7kar zin enne ki̱tto̱na̱ tu̱we̱ kuk koroota lo̱o̱c icima aruba nginti odoi. A̱ku̱l ucca tu̱we̱ zee, kuuddai maama todowai. 8I̱tto̱n zin bo̱do̱k Nowa lo̱be̱ru̱k kuk kicin maam ming uuddai lo̱o̱ta̱. 9Ma̱i̱je̱ lo̱be̱ru̱i̱ iróng ngen amuda nginti abilne eci maama abbize lo̱o̱c do̱o̱k; obodak zin enne Nowa i̱ba̱. I̱tto̱n zin Nowa a̱zzi̱t cinne kar kanyahak lo̱be̱ru̱k i̱bo̱ ecito. 10Erewo zin bo̱do̱k arrak Nowa i̱i̱nya̱ turgerem kar zin bo̱do̱k ki̱tto̱n lo̱be̱ru̱k dee. 11Baling okko oboda lo̱be̱ru̱i̱ bali yo̱mo̱na̱, anyaha utuga varanyoc ci i̱ngi̱ro̱co̱ ngen da̱ ettedai jor! A̱gga̱ zin Nowa niko ming izeto maama idice lo̱o̱ta̱. 12Erewo bo̱do̱k Nowa i̱i̱nya̱ turgerem, kar zin bo̱do̱k ki̱tto̱n lo̱be̱ru̱k dee, ma̱i̱je̱ wazin neci, iróng lo̱be̱ru̱i̱ ngen obodak nonno i̱ba̱.
13Baling ovvo e̱rki̱to̱wa̱ cik Nowa e̱e̱ggi̱n obet torkonom ki co̱de̱ (601), i̱i̱te̱n wa o̱de̱ nye̱lo̱we̱ ci een co̱de̱, uuddai maama. Oo zin Nowa i̱bo̱ ta̱dde̱na̱ kar kicin lo̱o̱c odowa. 14Baling izeto i̱i̱nya̱ turgerem nye̱lo̱we̱ ci een rama e̱rki̱ta̱, odok looci ne kak.
15Iizek zin Ta̱mu̱ta̱dde̱n Nowa ne, 16“Iyokta i̱nna̱ ki ngaa cunne ki logoz wagunnek ki ngaai wagge̱k i̱ba̱. 17Nyaha re̱e̱nu̱n kaal cik aruge do̱o̱k cik aavtte ki i̱ge̱ta̱, iballi, elegje, ki ngazengaze bu̱k kar ki̱ti̱rre̱t kibbizitanit lo̱o̱c.”
18Iyokta zin Nowa ki ngaa wainne ki logoz ki ngaai wagge̱k re̱e̱nu̱n. 19Iyokta zin bo̱do̱k elegje do̱o̱k ki kaal cik a̱vu̱vu̱t lo̱o̱ta̱ ki iballi do̱o̱k guulnya do̱ do̱.
I̱di̱ngdi̱nga̱n Nowa Ta̱mu̱ta̱dde̱n talninta
20Idimanek zin Nowa Manyi i̱te̱le̱ kar kalawe nonno. Idima elegje wak abunna adak ol ki iballi bu̱k, kar zin kapahek Ta̱mu̱ta̱dde̱n. 21Ocowa Manyi gi̱i̱ ci ongooli laala kar zin kizek zinin ne, “Iróng bo̱do̱k ngen kotori lo̱o̱c zo̱ze̱ ci obod ki e̱e̱t ci diiri udut, ming nu̱nu̱n i̱no̱n enne zinina kaal cik gerzek nginti meer bali kenycane nonno ngati enne ngen idica ke̱. Iróng bo̱do̱k kadita kaal cik aruge do̱o̱k ki baling ku̱tu̱gu̱ ke̱.”
22“Ki i̱yo̱ko̱ ming aave looci ko̱,
een looci ci e̱e̱vi̱nto̱ ki ci kettede labi
tagiz ki orkic,#8:22 Tagiz: Een icu i̱i̱te̱n ci e̱rki̱to̱ okkomi kak ming olli Israilo orong keronit eci ngatinne̱ng aṯile ta̱mu̱, alali kar bo̱do̱k a̱ppwa̱ ngooti oroot. Iróng i̱bo̱ ngatu owo. Imma Tenneta e̱rki̱te̱ cu, een ci odoi looci.
wazin ki ba̱a̱li̱n
aavtte atin udut.”
Currently Selected:
Kananet 8: tex
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2018, Wycliffe Bible Translators, Inc. All rights reserved.