JENESIS 4
4
U Kain bad u Abel
1Te u Adam u la ithuh ïa ka Im ka tnga jong u; bad ka la punkhun, bad ka la kha ïa u Kain, bad ka la ong, “Nga la ïoh ïa u briew na U Trai.” 2Bad ka la nang kha pat sa ïa u Abel u para jong u; bad u Abel u la long u nongri langbrot, bad u Kain u la long u nongrep ïa ka khyndew. 3Ka la jia te ynda la kham bun sngi, ba u Kain u la wallam na u soh ka khyndew ban long ka jingainguh ïa U Trai. 4#Heb. 11:4.Bad u Abel ruh, u la wallam na kiba la kha nyngkong ka kynhun jong u, bad na kiba kham sngaid na ki ruh. Te U Trai u la khmih hun ha u Abel bad ha ka jingainguh jong u: 5hynrei, ha u Kain bad ha ka jingainguh jong u, um shym la khmih hun keiñ. Te u Kain u la sngewbitar eh bad ka khmat jong u ka la noh liaw. 6Te U Trai u la ong ha u Kain, “Balei ba me la sngewbitar? bad na ka balei ba la noh liaw ka khmat jong me? 7Lada me la leh bha, ym lah ma me? bad lada mem leh bha, ka pop ka shong lyngngeit ha ka jingkhang: bad sha me pleng kan long ka jingkwah jong ka, bad me ruh men synshar halor jong ka#4:7 sha me pleng kan long ka jingkwah jong ka, bad me ruh men synshar halor jong ka: Ha kane ka bynta, ha ki edition Ka Baibl Khasi la don ki kyntien ka jingkwah jong u, bad me ruh men synshar halor jong u kiba pynmih ïa ka jingsngewthuh kumba ka mut ba dei u Abel. Te hynrei hangne, ka jingmut ka thew ïa ka pop, kumta la bujli ïa ka kyntien u da ka kyntien ka..”
8 #
Mat. 23:35; Luk. 11:51; 1 Ïoan. 3:12. Bad u Kain u la kren ha u Abel u para jong u: te ka la jia, mynba ki la ïadon ha ka lyngkha, ba u Kain u la ïeng ban ïaleh ïa u Abel u para jong u, bad u la pynïap ïa u. 9Te U Trai u la ong ha u Kain, “Shaei u Abel u para jong me?” U te u la ïathuh, “Ngam tip: nga long ma nga u nongsumar ïa u para jong nga mo?” 10#Heb. 12:24.U Trai u la ong te, “Me la leh aïu? Ka jingud ka snam u para jong me ka kyang ha nga na ka khyndew. 11Bad mynta keiñ me long ïa uba la tim na kata ka khyndew, kaba la ang ïa la ka shyntur ïa ka ban pdiang ïa ka snam u para jong me na ka kti jong me. 12Haba me rep ïa ka khyndew, kan ym sei ïa la ka bor shuh ïa me; me hi ruh men long u nongïaidwir bad u nongphet ïap ha ka pyrthei.” 13Te u Kain u la ong ha U Trai, “Ka jingpynshitom jong nga ka kham khraw ïa kaba nga lah ban shah. 14Ha khmih, me la beh noh ïa nga ha kane ka sngi na khmat kane ka khyndew; bad na ka khmat jong me ruh yn buhrieh ïa nga; ngan long ruh u nongïaidwir bad u nongphet ïap ha ka pyrthei; kan jia ruh ba jar uba ïoh shem ïa nga un pynïap noh ïa nga.” 15Te U Trai u la ong ha u, “Mano mano ruh namar kata ba pynïap ïa u Kain, yn sa pynhiar kput halor jong u hynñiew shah.” Te U Trai u la buh ka dak ha u Kain, ba ïoh pynïap noh mano mano ruh ïa u haba ïoh shem ïa u. 16Kumta, u Kain u la leit noh na khmat U Trai bad u la shong duh ha ka ri Nod, shaphang mihngi na ka kper Eden.
Kiba hiar pateng na u Kain
17Bad u Kain de u la ithuh ïa la ka tnga; bad ka la punkhun, bad ka la kha ïa u Enokh: te u dang thaw ïa ka nongbah, bad u la khot kyrteng ïa kata ka nongbah ha ka kyrteng “u Enokh”, u khun jong u. 18Bad ïa u Enokh la kha ïa u Irad: bad u Irad u la pynkha ïa u Mehujael: bad u Mehujael u la pynkha ïa u Methusael: bad u Methusael u la pynkha ïa u Lamekh. 19Bad u Lamekh u la shim ha lade ar ngut ki tnga: ka kyrteng jong kawei ka la long “ka Adah”, bad ka kyrteng jong kawei pat “ka Sillah”. 20Bad ka Adah ka la kha ïa u Jabal: une u la long u kpa jong kita kiba shong ha ki ïingtrep, bad jong kiba buh ki jingri. 21Bad ka kyrteng u para jong u ka la long “u Jubal”; bad u la long ma u, u kpa baroh kiba nang ban ktah ïa ka bina bad ïa ka besli. 22Bad ka Sillah ruh ka la kha ïa u Tubal-kain, uba hikai shoh thaw ïa ki kynja atiar banep baroh ha ka tama bad u nar: bad ka para jong u Tubal-kain ka la long “ka Naamah”.
23Te u Lamekh u la ong ha ki tnga jong u, ka Adah bad ka Sillah,
“To sngew ïa ka ktien
jong nga;
phi ki tnga jong u Lamekh,
to shahshkor
ïa ka jingong jong nga:
naba nga la pynïap
ïa u briew
uba la pynmong ïa nga,
bad ïa u samla
uba la pynmynsaw ïa nga.
24Lada ïa u Kain
yn sa pynhiar kput
hynñiew shah,
hynrei ïa u Lamekh te
hynñiewphew hynñiew
sien keiñ.”
Kiba hiar pateng na u Seth
25Bad u Adam u la ithuh pat ïa la ka tnga; te ka la kha ïa u khun, bad ka la khot kyrteng “u Seth” ïa u: “Naba U Blei,” ka la ong, “u la ai ha nga da uwei pat u symbai ha ka jaka u Abel, ïa uba u Kain u la pynïap noh keiñ.” 26Bad ha u Seth hi ruh la kha ïa u khun, bad u la khot kyrteng “u Enosh” ïa u. Te mynkata la sdang ban khot ïa ka kyrteng U Trai.
Currently Selected:
JENESIS 4: KHB
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
The Bible Society of India