ÏOANNIS 11
11
Ka jingïap u Lasaros
1 #
Mrk. 11:1; Luk. 10:38,39. La don te uwei uba la pang, u Lasaros na Bethania, na ka shnong jong ka Mari bad ka Martha ka para jong ka. 2#Ïoan. 12:3; Luk. 7:38; Mrk. 14:3.(Ka la long te kata ka Mari kaba la pynsleh ïa U Trai da ka jingsleh bad kaba la ñiad ïa ki kjat jong U da u 'ñiuh khlieh jong ka, kaba u para jong ka, u Lasaros u la pang.) 3Namar kata, kita ki para kynthei ki la ïaphah ha U, ki ong, “Ko Trai, ha khmih, uta uba me ieit u pang.” 4#Ïoan. 9:3.Haba U Jisu te U la ïohsngew, U la ong, “Kane ka jingpang kam long sha ka ban ïap, hynrei, na ka bynta ka burom U Blei, ba yn pyndonburom ïa U Khun U Blei da ka.”
5Te U Jisu u la ieit ïa kata ka Martha, bad ïa kata ka para jong ka, bad ïa uta u Lasaros. 6Namar kata, mynba U la ïohsngew ba u pang, U la nang sah sa ar sngi ha kata ka jaka ha kaba U la don. 7Hadien kata te, U ong ha ki synran, “Ïa ngin ïaleit pat sha Judia.” 8#Deu. 15:11; Ïoan. 8:59; 10:31.Kita ki synran ki la ïa-ong ha U, “Ko Kynrad, dang shibit kita ki Jiw ki la ïawad dong ban lynthem ïa me; te men sa leit hangta pat?” 9#Ïoan. 9:4; 12:35; Luk. 13:33.U Jisu u la ïathuh, “Ym don khat-ar kynta shi sngi? Lada uno uno ruh u ïaid mynsngi, um jynthut satia, naba u ïohi ïa ka jingshai jong kane ka pyrthei; 10hynrei, lada uno uno ruh u ïaid mynmiet, u jynthut, naba kata ka jingshai kam don ha u.” 11#Mrk. 5:39; Ki Kam. 7:60.U la kren ïa kine kiei kiei ruh, hadien kata, U ong ruh ha ki, “U lok jong ngi, u Lasaros u ïohthiah; hynrei, ngan sa leit ba ngan kyrsiew ïa u.” 12Ynda kumta, ki synran jong U ki la ïa-ong, “Ko Trai, lada u ïohthiah, un ïoh khiah bha.” 13Hynrei, U Jisu u la kren shaphang ka jingïap jong u; ki te ki la ïamut ba U ong shaphang kaba jahthait na kaba ïohthiah. 14Ynda kumta, U Jisu u la ïathuh shynna ha ki, “U Lasaros u la ïap noh; 15te na ka bynta jong phi nga sngewkmen ba ngam shym la don hangta, ba phin ïoh ngeit; hynrei, ïa, ngin ïaleit sha u.” 16#Mat. 10:3; Ïoan. 20:24-28.Ynda kumta, u Thomas, ïa uba la khot “Didimos”, u la ong ha ki para synran jong u, “Ïa, ngin ïaleit ma ngi ruh, ba ngin ïaïap noh lem bad U.”
U Jisu u long ka Jingmihpat bad ka Jingim de
17Haba U Jisu u la wan te, U la shem ïa u ba u la don lypa saw sngi hapoh jingtep. 18Ka Bethania te ka la long hajan Jerusalem, jngai kumba ar mail: 19#Job. 2:11.te shibun na ki Jiw ki la lah poi ha ka Martha bad ka Mari, ïa ka ban pyntngen ïa ki shaphang uta u para jong ki. 20Ynda kumta, ka Martha, katba ka la ïohsngew ba U Jisu u wan, ka la leit tan ïa u; hynrei, ka Mari ka la shong khop ha ïing. 21Ynda kumta, ka Martha ka la ong ha U Jisu, “Ko Trai, lada me la don hangne, u para jong nga un ym da la ïap: 22hynrei, mynta ruh, nga tip ba kiei kiei ruh kat kiba men pan na U Blei, U Blei un ai ha me.” 23U Jisu u ong ha ka, “U para jong pha un ïoh mihpat.” 24#Dan. 12:2; Ïoan. 5:28; Ki Kam. 24:15.Ka Martha ka ïathuh ha u, “Nga tip ba un mihpat ha kata ka jingmihpat ha ka sngi khatduh.” 25#Ïoan. 1:4; 5:26; Jpw. 1:18.U Jisu u la ong ha ka, “Nga long kata ka jingmihpat bad kata ka jingim: uta uba ngeit ha nga, la u la ïap, un ïoh im: 26#Ïoan. 6:47; 8:51.bad u briew baroh uba im bad uba ngeit ha nga, un ym ïap noh lano lano ruh. Pha ngeit ïa kane?” 27#Mat. 16:16.Ka la ïathuh ha u, “Ho-oid, ko Trai, nga la ngeit ba me, me long U Khrist, U Khun U Blei, u ban sa wan sha ka pyrthei.”
U Jisu u ïam
28Ynda ka la lah ong kumta, ka la leit noh bad ka la khot kyrpang ïa ka Mari ka para jong ka, ka da ong, “U Nonghikai u la wan, bad u khot ïa pha.” 29Ka, haba ka la ïohsngew, ka la ïeng kumne kumne ruh, bad ka la leit ha u. 30U Jisu te um pat shym la poi ha kata ka shnong, hynrei, u la don ha kata ka jaka sha kaba ka Martha ka la leit tan ïa u. 31Ynda kumta, kita ki Jiw kiba la don lem bad ka ha ka ïing, bad kiba pyntngen ïa ka, haba ki la ïohi ïa ka Mari ba ka la ïeng kyrkieh, bad ba ka la mih noh, ki la ïabud ïa ka, ki ïa-ong, “ka leit sha ka jingtep ïa ka ban ïam hangta.” 32#Ïoan. 11:22.Te ka Mari ynda ka la poi sha kaba U Jisu u la don, bad ka la ïohi ïa u, ka la dem ngon ha ki kjat jong u, ka da ong ha u, “Ko Trai, lada me la don hangne, u para jong nga un ym da la ïap.” 33Te U Jisu haba u la ïohi ïa ka, ba ka da ïam, bad ba ïam kita ki Jiw ruh kiba la ïawan lem bad ka, u la ud noh ha la ka mynsiem, bad u la khuslai; 34bad u la kylli, “Hangno phi la ïabuh ïa u?” Ki la ïathuh ha u, “Ko Trai, to wan, to khmih ruh.” 35#Luk. 19:41.U Jisu u la ïam. 36Namar kata, kita ki Jiw ki la ïa-ong, “Ha khmih, katno u la ieit ïa u!” 37#Ïoan. 9:7.Hynrei, kiwei na kita ki la ïa-ong, “Une uba la pynpeit ïa ki khmat jong uta u bamatlah, hato um don bor wat ban pynlong ruh ba une un ym ïap!”
La pynim pat ïa u Lasaros
38 #
Mat. 27:60; Mrk. 15:46; Luk. 24:2; Ïoan. 20:1. Namar kata, U Jisu u la ud noh pat ha lade, bad u la wan sha kata ka jingtep. Te ka la long ka krem, bad ïa u mawkhang la buh ha ka. 39U Jisu u ong, “To khyllie noh ïa uto u mawkhang.” Ka Martha, ka para jong uta uba la ïap, ka ong ha u, “Ko Trai, katta u la iwtung; naba kane ka long ka basaw sngi.” 40U Jisu u ong ha ka, “Ngam shym la ong ha pha, ba lada phan ngeit, phan ïohi ïa ka burom jong U Blei?” 41#Ïoan. 17:1; Mat. 11:25.Ynda kumta, ki la ïakhyllie noh ïa uta u mawkhang, uba la don ha kaba la buh ïa uta uba la ïap. U Jisu te u la khmied la ki khmat, bad u la ong, “Ko Kpa, nga nguh ïa me ba me ju sngew ïa nga. 42#Ïoan. 12:30.Nga te nga tip ba me sngew ïa nga ha la ka sngi, hynrei, nga la kren na ka bynta une u paidbah uba ïeng baroh sawdong, ba kin ïoh ngeit ba la phah ma me ïa nga.” 43Te haba u la lah kren ïa kine kiei kiei ruh, u la pyrta da ka ktien bajam, “Ko Lasaros, to mih noh!” 44#Ïoan. 19:40; 20:7.Bad uta uba la ïap u la mih noh, ba la teh bad kti bad kjat da ki jaiñsop, bad ïa ka khmat jong u la teh sawdong da ka rumar. U Jisu u ong ha ki, “To loit noh ïa u, bad to ai ba un leit noh.”
Ka jingïasylla pyrshah ïa U Jisu
(Mat. 26:1-5; Mrk. 14:1-2; Luk. 22:1-2)
45Namar kata, shibun na kita ki Jiw, kiba la ïawan sha kata ka Mari, haba ki la ïohi ruh ïa kiei kiei ruh ïa kiba U Jisu u la leh, ki la ngeit ha u. 46Hynrei, kiwei pat na ki, ki la ïaleit noh sha ki Pharisi, bad ki la ïathuh ha ki, ïa kiei kiei ruh kiba U Jisu u la leh. 47Ynda kumta, ki rangbah lyngdoh bad kita ki Pharisi, ki la ïalang dorbar, bad ki la ïa-ong, “Ngi leh aïu? naba une u briew u leh shibun ki dak khyllah; 48lada ngin shah ïa u kumne, baroh kin ïangeit ha u, te ki Roman kin ïawan bad kin ïa-pynjot noh ïa ka jaka bad ïa ka kynja jong ngi ruh.” 49#Mat. 26:3.Uwei te na ki, u Kaïaphas, uba la long u rangbah lyngdoh ha kata ka snem, u la ong ha ki, “Phi phim tip ei ei ruh em, 50lymne phim puson ba ka long kaba myntoi ïa ngi, ba uwei u briew un ïap na ka bynta u paidbah, bad ba yn ym pynjot noh ïa kane ka kynja bynriew baroh kawei.” 51Ïa kane te um shym la kren na lade, hynrei, ba u da long u rangbah lyngdoh ha kata ka snem, u la ïathuhlypa keiñ, ba U Jisu un sa ïap na ka bynta kata ka kynja bynriew; 52#Ïoan. 10:16; 17:21.bad ym tang na ka bynta kata ka kynja bynriew hi, hynrei, ba un ïoh ïalum lang ruh ha kawei, ïa kita ki khun U Blei kiba la sakma. 53Namar kata, naduh kata ka sngi ki la ïasylla lang, ba kin ïoh pynïap noh ïa u.
54Kumta, U Jisu um ïaid shuh ha kaba paw hapdeng ki Jiw, hynrei, u la leit noh nangta sha kata ka ri ba hajan ka ri khlaw, sha ka shnong kaba khot “Ephraim”; bad hangta u la ïaisah lem bad ki synran jong u.
55 #
Mat. 26:1; Mrk. 14:1; Luk. 22:1; Ïoan. 13:1. Te Ka Niam Ka Jinglait jong ki Jiw ka la jan, shibun te ki la ïaleit kiew sha Jerusalem na ka ri bri, mynshuwa kata Ka Niam Ka Jinglait, ba kin ïoh pynkhuid ïa lade. 56#Ïoan. 7:11.Ynda kumta, ki la ïawad ïa U Jisu bad ki la ïakren paralok hi, katba ki da ïeng ha ka templ, “Kumno phi mut? Ba un ym wan sha Ka Jingkhawai Niam?” 57Te ki rangbah lyngdoh bad ki Pharisi ki la lah ïa-ai ka hukum, ba lada uno uno ruh u ïoh tip hangno U don, un ïathuh, ba kin ïoh kem ïa U.
Currently Selected:
ÏOANNIS 11: KHB
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
The Bible Society of India