Mateo 13
13
Hanhu hane hahandigwe
1Siku didija Yesu kalawa mngʼanda, kakala hasi behibehi na ibahali. 2Wamulundila matinghanilo bwando, na heyo kakwena mngalawa kakala; auja umtinghanilo wose wema wima muufuko. 3Kawalongela mbuli bwando mmafumbo, yolonga, “Lola mlimi kalawa kagenda kuhanda. 4Aluja luyakalile yohanda, mbegu zimonga zigwila behi-behi na inzila, ndege weza wazija. 5Ziyagwe zigwila hana gamabwe, hali na ludongo ludodo, mhunde zota, kilumbo didongo dodo; 6avija zuwa vidilawile zilukula, kilumbo zabule mizizi, zifa. 7Ziyagwe zigwila hana imizomola; aija imizomola ikula, ikasesela. 8Ziyagwe zigwila haludongo lunogile, zilela, imonga muzo, imonga milongo sita, imonga milongo midatu. 9Mwene magutwi nayahulike!”
Nyongʼonyo za Undewa
10Weza iwanahina wamuuza, “Habali gweye ulonga nawo mmafumbo?”
11Kedika kawalongela, “Mweye mmota kuzitanga nyongʼonyo zili mundewa wa Kuulanga, bali hewo hawamonile. 12Kilumbo munhu yahawa na kinhu, kogwelelwa imala kongezelwa, kimeme dubwa; bali munhu yahawa bule kinhu, mpaka kija kiyali nacho kobokigwa. 13Kileka hivo nilonga nawo kuno nifumba, kilumbo wahalola hawavona, hebu wotegeleza hawahulika, kabili hawavitanga. 14Avo longa ja mtula ndagu Yesaya dovikizwa kumwawo dilonga:
‘Kuhulika mohulika, hondamvitange.
Kulola molola, hondamvone.
15Kumbe miyoyo ya wanhu wano midala,
na magutwi gawo hawahulika goya,
na meso gawo wafimiliza,
sikuweze walole na meso gawo,
bule kuhulika na magwiti gawo,
bule kuvimanya na miyoyo yawo, sikuwagaluke niwahonye.ʼ
16Bali gamota meso genu, kilumbo golola, na magwiti genu kilumbo gohulika. 17Kingongongo nomulongelani, walaguzi bwando na wene ihoko wagalonda kugona gomkona mweye, hawagawene, hebu kuhulika gomuhulika mweye, hawagahulike.
Hala ja mlimi jofumbulwa
18Avo tegelezeni hala ja mlimi. 19Ayuja imunhu yohulika Longa ja Undewa, bali hadigoga, kokwiza yuja Imndumu, kodisola dija dihandigwe mmoyo mmwake, ayo yuyo yahandigwe behibehi na nzila. 20Ayuja yahandigwe hali gamabwe, yuyo yodihulika dija dilonga, kadibokela mbwisa na kudenghelela. 21Bali kabule mizizi mmoyo mmwake, kokala najo mhunde; zihalawilila zihilo hebu sonza muna inzila iija ya dilonga, mhunde hehilwa. 22Ayuja yahandigwe hali mizomola, hiyo yuyo yadihulike Longa, bali mzahizahi wa ulumwengu hamonga na uzenzeleganye wa mali usongezela dija Longa, dokula bule, hadilela. 23Ayuja yahandigwe haludongo lunogile, hiyo yuyo yadihulike Longa na kudikolela, ayo yuyo yolela umujo, yuno mzo, yuno milongo sita, ayuno milongo midatu.”
Milolo hagati ya umuhunga
24Kawalavila lugano luyagwe yolonga, “Undewa wa Mulungu ulingana na munhu yahandile mbegu inogile mumgunda wake. 25Avija wanhu vuwawasile, keza mndumu wake, kahanda milolo hagatigati ya umuhunga, yomala kachola. 26Imala baho umuhunga vukulile na kukungʼunha, yoneka na imijani. 27Nyakadala wa mwene ngʼanda wagenda, wa-mulongela, Mndewa, huhandile mbegu inogile mumgunda wako? Kumbe izaze imilolo? 28Kawalongela, Mndumu yuyo yasanghane hivo. Baho nyakadala wamulongele, Avo kolonda tuchole, tukaingʼole? 29Kalonga, ‘Aka, sukumwisegeze mijani, bule kwiza moungʼola na muhunga! 30ilekeni vyose vikule mpaka ikikomo cha ukuhuna; avo ikikomo hicho nowalongela waja wohuna: Isegezeni tanhu imijani, mwibande vikinza vikinza mkavisome; bali umuhunga ulundizeni kukano jangu!”
Mbeyu ya mvule
31Kawalavila lugano luyagwe yolonga, “Undewa wa Mulungu ulingana na mbeyu ya mvule, yaisolile munhu kaihanda mumgunda wake. 32Na hiyo ndodo kubanza mbegu zose, bali vimalile kukula, igalamka nghulu kubanza vyotile vyose; igalamka biki, hata ndege wa uchana wokwiza na kukala muna imitambi yake.”
Mhumba
33Kawalongela hala diyagwe, “Undewa wa Mulungu ulingana na mhumba, yaisolile mtwanzi, kaihanganya hamonga na mhishi ndatu za usage, ilawa baho usasa wose hamonga.”
Kugesa fumbo
34Ago gose Yesu kakala yowalanguliza wanhu, kuno yofumba, kabili hawalongele mbuli ili bule lugano. 35Giladi divikizwe longa dilongigwe na mtula-Ndagu yolonga:
“Nounanula mlomo wangu ndave mahala,
ngalonge gafisigwe lulawile ichanduso.”
Milolo igamba choni
36Yomala Yesu kawapoza matinghanilo, kengila mngʼanda. Wanahina zake wamgendela wolonga, “Tupetele hala dija ja milolo ya mumgunda.”
37Kedika kalonga, “Yazihandile mbegu zinogile yuyo Mwanage Munhu. 38Auja umgunda uwo ulumwengu. Azija zimbegu zinogile wawo iwana wa Undewa. Aija imilolo wawo iwana wa yuja Imndumu. 39Aija imndumu yazihandile yuyo Mwenembago; ukuhuna kicho kimambukizo cha ulumwengu; awaja wohuna wawo iwamalaika. 40Avo vija imilolo vilundizwa, imala isomigwa hamoto, vivo vondaviwe haikimambukizo cha ulumwengu. 41Mwanage Munhu kowatuma malaika zake, na hewo wolundiza mundewa wake gehile gose na awo watendile gehile. 42Wokwasigwa mditundu ja umoto, kwiza kokuwa na ndilo na kugegeda gameno. 43Baho wene ihoko vondawangʼale kamba zuwa mundewa wa Tata wawo. Mwene magutwi nayahulike!
Bikilo dili mumgunda
44Kabili undewa wa Mulungu ugalamka bikilo diifisile mumgunda; avija munhu viyadiwene, kadifisa kuno yodenghelela, kachola kaviguliza viyali navyo vyose, kaugula umgunda uja.
Lulu inogile
45Kabili Undewa wa Mulungu ugalamka munhu mchuluzi, mwene kuzahila lulu zinogile. 46Na heyo viyaiwene lulu imonga ina mhiya bwando, kachola kaviguliza viyali navyo vyose, kaigula ija ilulu.
Lwavu lutegwa
47Kabili Undewa wa Mulungu ugalamka lwavu lutegelwe mbahali, lulundiza vyosevyose. 48Vulumemile, walubululila muufuko; wakala wasagula waja wanogile muna iviya, bali waja wehile wawasa. 49Vivo vondaviwe haikimambukizo cha ulumwengu. Malaika kwiza wolawa, wowabagula wehile mgati ja wene ihoko. 50Wokwasigwa mditundu ja umoto; kuko kondakuwe ndilo na kugegeda gameno.” 51Yesu kawauza, “Mgamanya higo gose?” Wamulongela, “Wona.” 52Kawalongela, “Avo mwana-Nzuma yoyose yalangukizwe Undewa wa Mulungu, kagalamka mwene ngʼanda, yolava vinhu vya sambi na vya umwaka mdibikilo jake.”
Yesu ukaye Nazareti
53Avija Yesu viyamambukize gamahala higo, kasegela hiko. 54Viyavikile hakiwambo chake Nazareti kuyakulile, kawalanguliza mdingʼanda ja nhambiko, na hewo wakanganya walonga, “Yuno kaipata kwahi fiyuko ino na malolomboto gano? 55Yuno siyo mwanage msongola mibiki? Na mamaake si ija yokemigwa Maria, na ndugu zake kina Yakobo, Yosefu, Simoni na Yuda? 56Na walumbu zake wose hawali bahano hamwetu? Chei kagapata kwahi gano gose?” 57Wehilwa nayo. Yesu kawalongela, “Mlaguzi habezigwa haulilingwa, komu kukiwambo chake hebu mulukolo lwake mwenyecho.” Avo hatendile vilolomboto bwando hiko, kwa vija vuwalekile kumtogola.
Currently Selected:
Mateo 13: ZAM75
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
New Testament in Zaramo © United Bible Societies, 1975.