Yohanes 4
4
Si Yesus mahsirita karia ni wéwéné tou Samaria
1Si Yesus é nimata'umola i sé sana réwok tou Farisi én timalingamola i sé nimaéndo mahkii-kiit wo sé sinarani ni Yesus é lumouspé'mé ung kalakez né sinarani ni Yohanes Menanarani. (2Un ulitna zéi'kan si Yesus si mahsarani taan sé pahtuzu'en-Na.) 3A Sia mondolé im witi Yudea a mawurima sumaup witi Galilea. 4#Kej. 48:22; Yos. 24:32 Taan ni Sia é léwo'zéi' i lumangkoié witi tana' Samaria. 5A Sia ikaayola witi Sikhar witi tana' Samaria, um witi rété un tana' méiwéhé ni Yakub wia si oki'na Yusuf im puuna. 6Im witu ém wéwéhan um parigi um pahkuan parigi Yakub. Si Yesus én totozo marawoi pahpaan i limapang, niitumo Sia rimumezla witu un tembir um parigi itii. In toro niitu ém woo jam mapulu' wo zua. 7A méyé si wéwéné tou Samaria mésumahap zano. Si Yesus kumuala wia si wéwéné itii, “Wéhanpé'mé zano elepen Aku.” 8In toro niitu sé pahtuzu'en-Na é nimangémo witi wanua tua'na in tumeles ang kakanen.
9 #
Ezr. 4:1-5; Neh. 4:1-2 Si wéwéné tou Samaria itii éng kimuala wia ni Sia, “Kaa ko in tou Yahudi é mahaléi zano elepen wia ni aku in tou Samaria?” (Sé tou Yahudi é soo mahkari-karia sé tou Samaria.)
10Si Yesus nimingkotla, “Sa ko mata'u tumoro an tatambér ni Opo Empung wo séi si mahnuwu'ma wia ni ko im ‘Wéhanpé'mé zano elepen Aku’, tantumo ni ko é nimahaléiola wia ni Sia wo ni Sia é niméhémola wia ni ko un zano katou-touan.”
11Kuan ni wéwéné itii wia ni Sia, “Tuang, ni Ko én zéi'kan siapa sasahap wo um parigi kenu én totoz rarem, wisa ung kailekan-Numé un zano katou-touan itii? 12Si Yakub ama' né nimaopo nai, niméhé um parigi kenu wia ni kai. Ni sia karia né oki'na é mengéngéndo zano pengengelepen néra im wia'i téntu kangkasii sé tatamun anuna. Apa pahgenangela ni Tuang i si Tuang lumousé si Yakub?”
13A si Yesus mingkotla, “Séi si melep un zano kenu, ni sia é maré'o sumaup, 14taan séi uman si melep un zano iwéhé-Ku, ni sia én zéi'mo maré'o makaz ing kauré-uré. Pahpaan un zano iwéhé-Ku é maéndo tanu ung kembu'an witu un touna u mengembu-ngembu' uman wo mahwéhé ung katou-touan makaz ing kauré-uré wia ni sia.”
15Kuan ni wéwéné itii wia ni Sia, “Tuang, iwéhémé wia ni aku un zano itii, wo ni aku zéi'mo maré'o-ré'ola wo zéi'mo mengéyé-ngéyé wia'i i mésumahap.”
16Kuan ni Yesus wia ni sia, “Mangémo, tawahené si mahayomu wo mawurimé wia'i.”
17Kuan ni wéwéné itii, “Ni Aku én zéi'kan siapa mahayo.”
Ang kuan ni Yesus wia ni sia, “Timerang u méikuamumé i ni ko én zéi'kan siapa mahayo. 18Pahpaan ni ko é makalimamo ing kimawéngla wo in tarékan si mahwali-wali kariamu én zéi'kan mahayomu. Ni ko éng kimuamomé un ulit.”
19Kuan ni wéwéné itii wia ni Sia, “Taré kata'uangkula si Tuang é nabi. 20Sé nimaopo nai é mahragés wia si Opo Empung wia um wawona ung kentur kenu, taan ni kamu in tou Yahudi é mahkua u Yerusalem ém peraragésan né tou wia si Opo Empung.”
21Kuan ni Yesus wia ni sia, “Ina', pa'émanela u méikua-Ku kenu, méyé un orasna i ni kamu mérumagés wia si Ama', zéi'kan witi wawona ung kentur kenu wo zéi'kan kangkasii witi Yerusalem. 22Ni kamu in tou Samaria mahragés wia si zéi'kan kata'uan niou, ni kai in tou Yahudi é mahragés wia si kata'uan nai, pahpaan si tou mémilot sé tou im witu un ukuman wana a singkéla' ém wia sé tou Yahudi a méyé. 23Taan un orasna é méyé wo tarékano un orasna i sé tou sé uli-ulit mahragés é marumagés wia si Ama' karia ung kawasa ni Roh Lenas wo ang kaulitan. Pahpaan si Ama' é mahpenéro sé tou mahragés tanu niitu wia ni Sia. 24Si Opo Empung é Roh wo séi uman si mérumagés wia ni Sia é léwo'zéi' i rumagés wia ni Sia karia ung kawasa wo an tutuzu' kaulitan ni Roh Lenas.”
25Kuan ni wéwéné itii wia ni Sia, “Kata'uangku i si Mesias si pahkuan kasii Kristus é méyé, i ni Sia méyé é mémapata'u péléng am péléng wia ni kai.”
26Kuan ni Yesus wia ni sia, “Ni Akumo Sia, si mahsirita kariamu.”
27In toro niitu a mawurimé sé pahtuzu'en-Na. Sé pahtuzu'en-Na é mengompo' i nimilekla si Yesus mahsirita karia ni wéwéné. Taan zéi'kan siapa zozo' in esa si limigaula wia si wéwéné itii, “Apa ung kapaazmu?” Kaapa wia si Yesus, “Apa um pahsiritan-Nu karia ni wéwéné itii?”
28Si wéwéné itii én timula'uma im witu un tampayangna a sia mangé witi wanua tua'na wo mahkua wia sé tou witu, 29“Méyémo, méileken si tou si kimua wia ni aku péléng a nimualikumola. Woo ni Siamo si Kristus?” 30A sé witi wanua tua'na mangé witi ondolé um wanua tua'na itii i mangé wia si Yesus.
31Karegas niitu sé pahtuzu'en-Na é mahtawah ni Sia, “Méster, méyémo kuman.”
32Taan si Yesus kimuala wia ni séra, “Wia ni Aku ém wéwéhan ung kakanen zéi'kan kata'uan niou.”
33Pahpaano niitu ni séra mahliligauan, “Apa wéwéhano si nimahalimé ung kakanen wia ni Sia?”
34Kuan ni Yesus wia ni séra, “Ung kakaneneng-Ku é mahwangun um paaz-Na si nimatumé ni Aku wo sumampet um paayangen-Na. 35Zéi'kankuaa ni kamu é mahkua in téntii, ‘Epatna loloho'enokan é mupu'mo.’ Taan ikua-Kuma wia ni kamu: ilekela u makaliklikmu wo werenala a méitanem wana an uma a meririhmo wo lutu'mo toromo upu'en. 36In tarékan si mengungupu' éng karegaso im pahwaéran. Am wua'na pahréwokenna é sé tou ma'éman sé makailek ung katou-touan makaz ing kauré-uré. Niitumo si mahkeroz wo si mahupu' é mahpaa-paaz mahwali-wali. 37Pahpaan ulito ung kukuan kenu: si esa mahkeroz wo sé walina é mahupu'. 38Ni Aku nimatuma ni kamu i mupu' witi uma un zéi'kan winendu niou; sé tou walina sé nimendu wo ni kamu sé mémupu' um winendu néra.”
39Lakez sé tou Samaria sé witi wanua tua'na itii a méyé é nima'éman wia si Yesus pahpaan si wéwéné itii mahkua, “Ni Sia éng kimuamé wia ni aku péléng a nimualikumola.” 40I sé tou Samaria itii méikaayomola wia si Yesus, ni séra é mahaléi wia ni Sia i mento'ma karia néra, a Sia mento' witu zuana endo.
41Wo kalakezna sé tou ma'éman ni Sia pahpaan timalinga a méikua-Na. 42A séra kumuala wia si wéwéné itii, “In tarékan ni kai ma'éman én zéi'kan uman pahpaan a méikuamu, taan pahpaan ni Sia si tinalinga naimo in esa wo kata'uan nai i ni Sia si uli-ulit milot sé tou wia ung kaayahan im witu un ukuman wana a singkéla'.”
Si Yesus nimawuri witi Galilea
43In zuana endomo si Yesus nimento' witi tana' Samaria a Sia mangé witi Galilea. 44#Mat. 13:57; Mrk. 6:4; Luk. 4:24 Si Yesus in esa éng kimuamo tumoro ung kata'uan-Na i si nabi én zéi'kan pahsigi'en im witi wanuana in esa. 45#Yoh. 2:23 I méikaayomola witi Galilea, sé tou wana é simungkul ni Sia pahpaan ni séra é nimileko um winangun-Na witi pésta lumé'os um Paskah né tou Yahudi im witi Yerusalem pahpaan ni séra kangkasii é nimangé witi pésta itii.
Si oki' ni memamaayang witi istana liné'os ni Yesus
46 #
Yoh. 2:1-11
A si Yesus mawurima witi Kana um witi Galilea. I makasa si Yesus é nimanguné un zano maéndo anggor im witu.
Im witi Kapernaum ung karétékan ung Kana ém wéwéhan si mahpaayang witi istana, si oki'na tuama é saki. 47Ing kinatalingaanala si Yesus im witi Yudea niméyé witi Galilea, a sia mangé wia si Yesus mahaléi wia ni Sia i méyé witi Kapernaum wo lumé'osé si oki'na, pahpaan si oki'na én tawimo maté. 48Kuan ni Yesus wia ni sia, “Sa kamu zéi'kan nimilek a makakompo'en, ni kamu én zéi'kan ma'éman.”
49A si mahpaayang witi istana itii kumuala wia ni Sia, “Tuang, tulungempé' ndootuumé, méyépé' ilekena si oki'ku taa sia matéla.”
50Kuan ni Yesus wia ni sia, “Mangémo, si oki'mu é lé'oso.” Si tou itii é ma'éman u méikuamé ni Yesus, a sia mawurima.
51Im witipé' lalan sé atana niméyé wia ni sia ang kumua i si oki'na é lé'oso.
52A sia meligau wia ni séra sa jam pira si oki'na itii i mahlé'osoma. Kuan néra, “Kahwii lolambot in jam kataré um pasu'na é nimazéi'moma.”
53A si ama' ni oki' saki itii ikagenanga in toro niitu kangkasii si Yesus kimua wia ni sia, “Si oki'mu é lé'oso.” A sia karia né mahento' witu um waléna ma'éman wia si Yesus.
54Niitu u makakompo'en kazua um winangun ni Yesus witi Galilea i ni Sia nimawurimé im witi Yudea.
Currently Selected:
Yohanes 4: LAITOM
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo