ILOOWALI 6
6
Ololeeto manusia
1Lapatao̒ manusia helebe oduhenga daatalio wau loloo̒polo mola to ngoilanggubu dunia, wau walao̒ mongobua pilotutulio mai, 2mamaa-halukuwalo ilahi boito loo̒onto deu̒ mongo dulahu boito higaagawa. Tulusi timongolio malo diilea wolo mongo dulahu tao̒tohilaa limongolio. 3Yi malo tahuda mai Eeya, “Wau̒ diila mopoluasi manusia tumumulo ohiheo-hiheolo mao̒; timongolio mahaluku panaa, tamusi mate. Tumulalo mai botia umulu limongolio diila talebe tou̒ ngohetuto dulo pulu lotaunu.” 4To jamani boito, wau olo lapatio mao̒ leeto, woluo tau-tauwalo taduduulaa̒ daa̒ todunia. Timongolio wali mai lomongo dulahu manusia tahe lonika wolo mamaa-halukuwalo ilahi. Tau-tauwalo taduduulaa̒ leidaa̒ boito yito mongo pahalawani daa̒ wau tahi masaahulua to jamani muloololio mai daa̒.
5 Eeya loo̒onto mai mailaba leetio tau-tauwala todunia; ngoa̒amila pikilangi limongolio laito moleeto. 6Tio olo malolee̒e lopowali olimongolio wau lopo tambati olimongolio todunia. Tio malo ilokikiio̒ hilao, 7tilinggula Tio lotahuda, “Mapo binasaa-U̒ manusia tamaa pilopowali-U̒ mai boito, wau olo totoonulalo bulungi wau binatangi wewolio, sababu Wau̒ malolee̒e lopowali mai olimongolio.” 8Bo tei Noho loe̒engahe hilaa lo Eeya.
Tei Noho
9-10Uti-utieelo riwayati lei Noho. Tio owalao̒ mongo lolai̒ toulota, deu̒yito-yito tei Sem, Yapet, Ham. Tei Noho diila helohutu totala, wau tio tuwa-tuwaulo taa u mopiohe to jamaniilio. Tio tumu-tumulo modudula daa̒ wolo Allahu Taa̒ala. 11Bo ngoa̒amila taa wewolio hileeta todelomo bibilohu lo Allahu Taa̒ala, wau diila omanusia odungga boli tou̒toonu. 12Allahu Taa̒ala lomilohei dunia boito wau bo loo̒onto ololeeto wambao̒, sababu ngoa̒amila manusia hileeta tutumulio.
13Lapatao̒ malo tahuda mai Allahu Taa̒ala odelei Noho, “Wau̒ malolantu mai u mopoo̒pulito tutumulo ngoa̒amila mahaluku. Wau̒ mamopo binasa mai olimongolio pee̒-pee̒enta wolo dunia, sababu dunia malopolu wolo opopalangi limongolio. 14Pohutua mao̒ kapali tuwau olemu monto ayu u motoheeto; pohutua mao̒ hihuwa-huwalia to delomio, wau wolude mao̒ wolo teri monto delomio wau monto bulemengio. 15Kapali boito hayai̒o musi ngohetuto tolo pulaa tolo meeteri, tanggalio dulo pulaa dulo meeteri, wau langgatio mopulaa tolo meeteri. 16Pohutua mao̒ watopo tokapali boito, pohutua mao̒ antadelio wopato pulaa pato senti meeteri towolotio lowatopo wau didii-ngingio. Pohutua mao̒ kapali boito tolo belebelea, wau popohulia mao̒ huhebu tuwau to biihio. 17Wau̒ mamopo woluo mai taluhee daa̒ u mopobinasa mai timii̒du mahaluku u hitumula to dunia. Totoonulalo u hitua-tuawua to dunia maamate, 18bo wolemu Wau̒ ohilaa mohutu mai daantia. Tuwotoolo ode delomo kapali boito pee̒-pee̒enta woli dilemu, wau mongo walau̒mu mongodile tabua limongolio. 19-20Podelo mao̒ ode delomo kapali boito bulungi bangge tuwau wau bulungi teelo tuwau monto timii̒du bulungi hidala-dalaala wau binatangi wewolio, alihu timongolio diila modudua̒ binasa. 21Podelo mao̒ olo ua̒alo hidala-dalaala olemu wau duo̒lo bibii-natangiyalo boito.” 22Tei Noho helo pohutu mao̒ totoonulalo u pilomalenta lo Allahu Taa̒ala olio.
Currently Selected:
ILOOWALI 6: LAIGOR
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo