DEDI 4
4
I Kaïngu dàngu i Hambilu
1Tunaka nu i Andamu angu-nanyaka i Hawa, na papaha-na, ka woru ihi-nanyaka nuna na kawini. Na-paana-nya na haàtu na anakeda mini, hi napanii, “Wàngu pa-ndulangu-na i MIRI ku-ngalangu-ka haàtu anakeda mini,” wàna. Jia-duyaka hi natunya tamu Kaïngu,#Kaïngu; Na tamu yiana la kareuku hilu Imbarani “ngalangu” wàna. wànanya. 2Nyuna i Hawa hilu habola-nanyaka na haàtu na anakeda mini, na tamuna Hambilu-ya. I Hambilu ma-pawangu mbimbiya, tàka i Kaïngu matungu wokaya. 3Ngala mandai-naka la rehi malamiri, piti-nanyaka i Kaïngu ihi wokana hi na-maraku wànya i MIRI. 4Hàla i Hambilu hi napiti-ya na heu kamboka mbimbi, kawunga anana na heu na bai mbimbina hi narupu-ya, hi na-maraku wànya na mahàmu halawàla lai MIRI. I MIRI nahàmu-nya eti i Hambilu dàngu na pa-maraku wàna, 5tàka na-tulaku-ya i Kaïngu dàngu na pa-maraku wàna. Ka mbeni wàngu-nanyaka i Kaïngu, hi na-kaburaü na matana. 6Ka kareuku-nanyaka i MIRI lai Kaïngu, “Nggikina hiu mbeni? Nggikina hi na-kaburaü na matamu? 7Jàka nahàmu na pawàmu, jia làti hi muriki miri,#jia làti hi muriki miri; jàka ndia: jia làti hi ku-kataku-ya na maraku-mu. tàka jàka muwànya na ma-akatu, na njala duna ndengi-nanggau-padua patama la etimu. Na njala ka pa-rajaku-ya wànanggau, na nyuna màtawa nyumu kau taluya,” wànanya.
8Hàla i Kaïngu nawànda-ya i Hambilu, na erina, “Màla ka talua la woka,”#Da manda pirada da pa-haleli weli ndaingu: Màla ka talua la woka, ba wàda; nda nianya na kareuku tungu nu la hilu Imbarani-na. wànanya. Ba datàka-ka lai nu, i Kaïngu na-kaporuku-nya i Hambilu, hi na-pameti-ya i Hambilu.
9Nu i MIRI hi na-paàra-nya i Kaïngu, “Ka nggiya i Hambilu, na erimu?” wànanya.
Nahema i Kaïngu, “Nda kupi-anya. Nyungga-maka bàdi mapawa-nya na eringgu?” wàna.
10Natu liina i MIRI, “Nggikina hiu tuya na pa-maringgingu tungu nu? Na wai riana na erimu nawara-nggaka Nyungga welingu la tana, hama tuna na wara na ma-kaladaku pakarai-ya na pa-himbalungu. 11Nyumu pa-ràtungu-kau hi nda peku-amupa pa-paloku-ya na tana. Na tana ngia pa-mangunungu-na na wai riana na erimu, beringu hanganga-nanya la panggepi-ya na riana erimu bau pameti-ya. 12Jàka mutungu woka nda ana nggàra-apa ihina pawua-nanggau na tana; napa nyumu tau lindingu-kauka na manda ningu ngia pa-ngiangu la pinu tana,” wànanya.
13Napanii i Kaïngu lai MIRI, “Lalu mbotuna na hukungu-nggu, nda kumaka-a patanggu-nya. 14Yaulu-munggaka welingu la tana yiana, pamarau welingu la pangia-mu. Tau lindingu-kaka duku napa manda ningu ngia pa-ngiangu-nggu la pinu tana, dàngu napa pameti-nanggaka tau duku nggamu bia ma-hàmburu-ka,” wàna.
15Tàka natuu liina i MIRI, “Ndia-a, jàka ningu ma-pameti-kau, na himbalu-na tau mapihu wànya na ma-pameti-kau da pa-pameti-mbu napa,” wàna. Tunaka nu tuna-nyaka tanda i MIRI lai Kaïngu, màta jàka nggamu bia ma-hàmburu-ya ka àmbu na-pameti-ya. 16Hàla laku-nanyaka i Kaïngu welingu la hanggana i MIRI, hi na-engangu la tana “Ngia Pa-lindingu” ba wàdanya la pahunga loduna na Endingu.
Da wàla wuana i Kaïngu
17I Kaïngu dàngu papaha-na da-ngalangu anakeda mini, na pa-patamungu Henuku. Tunaka nu i Kaïngu pahadangu-nanyaka paraingu dàngu hi natunya tamuna hama tuna na tamuna na anana. 18I Henuku amana i Iràtu-ya. I Iràtu amana i Mahuyaïlu-ya, i Mahuyaïlu amana i Metuhailu-ya, dàngu i Metuhailu jia-duyaka na amana i Lamiku. 19I Lamiku dadua da papaha-na, i Anda dàngu i Hila. 20I Anda na-paana-nya i Yambàlu, tàka da wàla wuana i Yambàlu jia-duhaka da ma-kabua banda dàngu hi da-ngiangu la maü tera. 21Na erina i Yumbàlu-ya, tàka da wàla wuana i Yumbàlu jia-duhaka da mapingu pajungga dàngu pa-taleli. 22I Hila na-paana-nya i Tumbàlu-Kaingu, tàka da wàla wuana jia-duhaka da mapingu pa-pandoi ma - màtu paràma wàngu#pa-pandoi ma - màtu paràma wàngu; na pa-haleli weli ndaingu: kawunga bokuda mbulu mbutada da maràma bàhi wàna. welingu la wudu dàngu bàhi. Na erina kawini i Tumbàlu-Kaingu jiaya i Naama.
23Ka panii-nanyaka i Lamiku la papaha-na da madua,
“Anda dàngu Hila pa-tingingu!
Ku-pameti haàtu bidi mini lumuna ba mbàda nàhaku-nangga.
24Jàka tau mapihu pa-pameti pa-pahimbalu wànya ba pameti-ya i Kaïngu,
pihu kambulu pihu tau pa-pameti jàka pameti-ka nyungga,” wàna.
I Hetu dàngu i Enuhu
25I Andamu dàngu na papaha-na dahili ngalangu haàtu anakeda mini. Napanii i Hawa, “I Ala nawua-nggaka duku anakeda mini hiluna i Hambilu, na pambàda pameti-na i Kaïngu,” wàna. Jia-duyaka i Hawa hi na-patamu-nya Hetu,#Hetu; na tamu yiana hama linguna na kareuku hilu Imbarani, “mbàda wuangu,” ba wàna. na anana. 26I Hetu ningu haàtu anana mini, na pa-patamungu Enuhu. La rehina nuna-duka na tau ba na-pakiringu patiki-ya na tamuna i MIRI jàka da-lumungu.
Currently Selected:
DEDI 4: KAM
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
@LAI 1995 Indonesian Bible Society (Lembaga Alkitab Indonesia)