यूहन्ना भूमिका
भूमिका
यूहन्ना रचित सुसमाचारो रे यीशुए खे परमेशरो रे अनन्त वचनो रे रूपो रे दखाई राखेया, जिने आसा बीचे शरीर तारण करी की डेरा कित्तेया। एते कताबा रे ये साफ गल्ला ए कि ये सुसमाचार इजी री तंईं लिखेया राखेया ताकि इजी खे पढ़ने वाल़े विश्वास करो कि यीशु ई प्रतिज्ञा कित्ते रा उद्धारकर्ता ए मतलब परमेशरो रा पुत्र ए और सेयो यीशुए पाँदे विश्वासो रे जरिए जिन्दगी पाई सको 20:31।
भूमिका रे यीशुए खे परमेशरो रे अनन्त वचनो रे रूपो रे दखाई राखेया। तिजी ते बाद सुसमाचारो रे पईले पाअगो रे सात अचम्बे रे काम या चिह्नो रा वर्णन ए, तिना ते ये प्रगट ओआ कि यीशु प्रतिज्ञा कित्ते रा उद्धारकर्ता ए मतलब परमेशरो रा पुत्र ए। दूजा पाअग उपदेश ए। तिदे ये समजयाई राखेया कि इना अचम्बे रे कामा रा क्या मतलब ए। एते पाअगो रे ये बी बताई राखेया कि किंयाँ कई लोके यीशुए पाँदे विश्वास कित्तेया और तेसरे तारीफ करने वाल़े बणी गे, जबकि कुछ लोके तेसरा बिरोद कित्तेया और विश्वास करने ते ना करी ती। 13-17 पाठो रे यीशुए खे पकड़वाणे री राती रे यीशुए री तेसरे चेलेया साथे पक्की सहभागिता, क्रूसो पाँदे चढ़ाणे ते पईलके दिनो रे साँजके बखते चेलेया खे त्यार करने और तिना खे उत्साहित करने वाल़े यीशुए रे वचनो रा विस्तारो रे वर्णन ए। आखरी रे पाठा रे यीशुए रे पकड़वाणे, मुकद्दमे, तेसरा क्रूसो पाँदे चढ़ाणे, दबाणे, दुबारा जिऊँदा ऊणा और दुबारा जिऊँदा ऊणे ते बाद चेलेया पाँदे प्रगट ऊणे रा वर्णन ए।
यूहन्ना मसीह रे जरिए अनन्त जिन्दगिया रे दानो पाँदे बल देओआ। ये एक एड़ा दान ए जो एबु शुरू ओआ और तिना खे मिलोआ जो यीशुए खे बाट, सच्चाई और जिन्दगिया रे रूपो रे ग्रहण करोए। आत्मिक गल्ला खे दखाणे रिया तंईं हर रोज की जिन्दगिया री सादारण चीजा रा चिह्नो रे रूपो रे इस्तेमाल यूहन्ने रा एक खास गुण ए, जिंयाँ-पाणी, रोटी, जोति, ग्वाल़ा और तेसरी पेडा और दाखा री बेल और तिजी रे फल़।
रूप-रेखा
भूमिका 1:1-18
यूहन्ना बपतिस्मा देणे वाल़ा और यीशुए रे शुरूआतो रे चेले 1:19-51
यीशुए री जनसेवा 2:1-12:50
यरूशलेमो रे आखरी रे कुछ दिन 13:1-19:42
प्रभुए रा दुबारा जिऊँदा ऊणा और तिना रा दिशणा 20:1-31
निचोड़ : गलीलो रे तेबु दिशणा 21:1-25
Currently Selected:
यूहन्ना भूमिका: BGHNT
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
This work is licensed under Creative Commons Attribution-ShareAlike 4.0 License.