मत्ती 10
10
ईशूए बारा च़ेल्लै
(मरकुस 3:13-19; लुका 6:12-16)
1ईशू आपणैं बारा च़ेल्लै आप्पू सेटा लै शादै और तिन्नां लै दैनअ भूता काढणेंओ हक और बल, ताकि तिंयां लोगे हरेक दाह-खिज़ा दूर करी सके। 2तिन्नां बारा शधाणूं नांअ तै इहै,
शमौन ज़हा लै पतरस बोला, पतरसो भाऊ आन्दरू, जबदीओ शोहरू याकूब, और याकूबो भाऊ युहन्ना,
3फिलिप्पुस, बरतुल्मैं, थोमा, कारै गराहणै आल़अ मत्ती, हलफीओ शोहरू याकूब, तदैई,
4शमौन कनानी और करोती गराऊंओ यहूदा ज़ुंणी ईशू लै छ़ल़ किअ त।
बारा शधाणूंए सेऊआ
(मरकुस 6:7-13; लुका 9:1-6; 10:4-12)
5ईंयां बारा च़ेल्लै छ़ाडै ईशू इहअ खोज़ी बोली करै कि “यहूदी छ़ाडी होरी ज़ातीए लोगा सेटा निं डेऊई और सामरी नगरी लै बी निं डेऊई। (यिर्मयाह 50:6) 6इस्राएली लोगा सेटा डेओऐ। तिंयां आसा एही भेडा ज़िहै ज़ुंण आपणैं फुआला का दूर आसा हुई दी।
7 “बाता हांढदी करै इहअ प्रच़ार कि स्वर्गो राज़ गअ नेल़ एछी। 8बमार मणछे बमारी करै दूर ता मूंऐं दै करै ज़िऊंदै और कोल़्हे बमारी आल़ै करै राम्बल़ै। भूत काढै दूर, तम्हां आसा मुफ्त भेटअ द और लोगा लै बी दैऐ एता मुफ्त।
9 “आपणीं गांठल़ी निं सुंन्नअ रुपअ और चाम्बअ डाही। 10बाता हांढणा लै नां झ़ोल़ी डाही, नां ता दूई कुर्तै डाही, नां ता पोलल़े ज़ोल़ी, नां हाथै शोठअ, किल्हैकि मज़दूरा लोल़ी तेऊए मज़दूरी भेटी।
11 “ज़हा नगरी और गराऊंऐं बी तम्हैं डेओए, एसा गल्लो थोघ लणअ पैहलै करी कि तम्हां लै रहणैं जोगी घर कुंण आसा। ज़ेभै तैणीं तम्हैं तिधा का नांईं निखल़े तेभै तैणीं रहै तम्हैं तिधी। 12घरा भितरी डेऊंदी दैऐ तम्हैं तेऊ लै बर्गत। 13ज़ै तेऊ घरे लोग थारी बर्गता जोगी होए, तै पल़णीं थारी शांती तिन्नां लै।
“पर ज़ै तिंयां तेता जोगी नांईं होए, तै एछणी सह शांती तम्हां लै बापस फिरी 14तेखअ ज़ुंण तम्हां नांईं मनें और थारी गल्ला नांईं शुणें, तेऊ घरा या तेसा नगरी का निखल़दी बारी ठुल़्हकै आपणैं खूरा का धूल़अ बी पोर्ही।
15 “हुंह खोज़ा तम्हां का सत्त कि ज़ेभै परमेशरा सोभिओ न्याय करनअ तेभै दैणीं तेऊ सदोम और अमोरा नगरीए पापी लोगा लै सज़ा। पर ज़ुंण लोग तम्हां नांईं मनें, तिन्नें हणीं तेता का बी खास्सी बूरी दशा।
एछणैं आल़अ सांगट
(मरकुस 13:9-13; लुका 21:12-17)
16 “हेरा, मंऐं आसा लाऐ दै तम्हैं भेडा ज़िहै धेल़णै च़िरनैं आल़ै भेड़ियै ज़िहै लोगा मांझ़ा लै छ़ाडी। तम्हैं रहै दानुईं ज़िहै च़लाक और पालल़ी ज़िहै भोल़ै।
17 “पर लोगा का रहै बच़दै। किल्हैकि तिन्नां निंणै तम्हैं माहा सभा दी और आपणीं आराधना सभा दी च़िकणैं तम्हैं कोल़ै करै। 18तम्हैं निंणै मेरी तैणीं प्रधाना और राज़ैए सम्हनै, तिन्नां लै और होरी ज़ाती लै गवाह हणें तैणीं। 19ज़ेभै तिंयां तम्हां ढाके, तेभै निं तम्हैं एही फिकर करी कि हाम्हां किहअ करै बोल़णअ और किज़ै बोल़णअ?
“ज़ुंण बी तम्हां तिधी बोल़णअ होए, सह हेरनअ तम्हां लै तेसा ई घल़ी तम्हां का पबित्र आत्मां खोज़ी। 20किल्हैकि बोल़णैं आल़ै निं तम्हैं आथी; पर बाप्पू परमेशरो पबित्र आत्मां बोला तम्हां बाती।
21 “कई भाई-बैहणी पाणै आपणैं भाई-बैहण धोखै करै मारी और बाप्पू दैणैं शोहरू मारना लै। शोहरू हणैं आपणैं आम्मां-बाप्पूए खलाफ खल़ै ताकि लोग तिन्नां मारी पाए। (मीका 7:6)
22 “मेरै नांओंआं करै हणैं सोभ लोग थारै दुशमण, पर ज़ुंण खिरी तैणीं सबर करे, तेऊओ हणअ उद्धार। 23ज़ेभै तिंयां एकी नगरी दी तम्हां तंग करे, ता तम्हैं ठुर्है दुजी नगरी लै। हुंह खोज़ा तम्हां का सत्त कि तम्हैं निं इस्राएले सारी नगरी हांढी मुकणीं कि तेभै तैणीं जाणअ हुंह मणछो शोहरू एछी।
24 “च़ेल्लअ निं आपणैं गूरू का बडअ हंदअ और नां टैहलू आपणैं मालक का बडअ हंदअ। 25च़ेल्लेओ गूरू और टैहलूओ मालका बराबर हणअ आसा बडी भारी बडी गल्ल। ज़ै तिन्नैं घर मालका लै राख्स बोलअ ता तिन्नां तेऊए घरा आल़ै लै किल्है निं बोल़णअ?
कसा का डरनअ?
(लुका 12:2-7)
26 “पर तम्हैं निं तिन्नां का डरी, इहअ बगत एछणअ ज़ेभै ढोपी डाही दी हर च़ीज़ सोभी का शुझणीं और गुप्त च़िज़ो लागणअ सोभी का थोघ। 27ज़ुंण हुंह तम्हां लै पिठी पिछ़ू बोला, तेऊ बोलै तम्हैं सोभी नदरी और ज़ुंण तम्हैं काना पिछ़ू शूणां, तेतो करै तम्हैं कोठी प्रैंदै उखल़ी करै प्रच़ार।
28 “तम्हैं निं तिन्नां का डरी आथी ज़ुंण थारी देही च़ाहा मारनअ, तिंयां निं थारी आत्मां मारी सकदै। पर डरनअ सिधअ तेऊ परमेशरा का ज़ुंण आत्मां और देही दुही सका नरकै बरैबाद करी।
29 “एकी चाम्बे ढबै करै कै दूई च़ेल्ली निं बिकदी? ज़ै तिन्नां मांझ़ै एक बी पृथूई दी पल़ी करै मरे ता परमेशरा हआ तेतो बी थोघ। किल्हैकि परमेशर आसा सोभी गल्ला ज़ाणनै आल़अ। 30इधी तैणीं कि तेऊ आसा थारै मुंडे शराल़ बी सोभ गिणैं दै। (लुका 12:7) 31तैही बोला हुंह डरी निं आथी, तम्हैं आसा तिन्नां च़ेल्ली का खास्सै किम्मती।
ईशू मनणअ या नांईं मनणअ
32 “हुंह बोला तम्हां का कि ज़ुंण मुंह मणछे सम्हनै मनें, सह मनणअ मुंह स्वर्गै आपणैं बाप्पू परमेशरे सम्हनै। 33पर ज़ुंण मेरै बारै होरी मणछा मेरै बारै हुधिए, तेऊ लै हुधणअ मुंह बी स्वर्गै आपणैं बाप्पू परमेशरा सम्हनै।
ईशूए पृथूई एछणेंओ असर
(लुका 12:51-53; 14:26,27)
34 “इहअ निं समझ़ा कि हुंह आसा पृथूई दी मेल़-ज़ोल़ करदअ आअ द, हुंह निं मेल़-ज़ोल़ करदअ आथी पर तिन्नां मांझ़ै ज़ुंण मुंह पिछ़ू एछे तिंयां करनै मुंह ज़ुदै।
35 ‘हुंह आसा आअ द एते तैणीं कि मणछ तेऊए बाप्पू का
शोहरी तेसरी आम्मां का,
नुशा तेसरी शाशुई का ज़ुदी करी सकूं।
36 मणछे दुशमण हणैं तेऊए घरा ई का।’
37 “ज़ुंण आपणैं आम्मां-बाप्पू लै मुखा खास्सी झ़ूरी करा, सह निं मुंह जोगी आथी। ज़ुंण आपणैं लान्हैं लै मुखा खास्सी झ़ूरी डाहा सह बी निं मुंह जोगी आथी। (लुका 14:26) 38ज़ुंण बी आपणअ क्रूस आप्पै आपणीं कान्हा च़की मुंह पिछ़ू नांईं एछे सह निं मुंह जोगी आथी। 39किल्हैकि ज़ुंण बी एसा पृथूई दी आपणीं ज़िन्दगी बच़ाऊंणी च़ाहे, सह करा परमेशरा संघै सदा रहणैं आल़ी ज़िन्दगी बरैबाद, ज़ुंण मुंह दी विश्वास करनै पिछ़ू आपणैं प्राण दैए, तेऊ भेटणीं परमेशरा संघै सदा लै ज़िन्दगी।
तबदल़अ
(मरकुस 9:41)
40 “ज़ुंण थारी कदर करे सह करा मेरी कदर। ज़ुंण मेरी कदर करा, सह करा तेऊए कदर ज़ुंणी हुंह संसारा लै आसा छ़ाडअ द। 41परमेशरे गूरा ज़ुंण परमेशरो गूर समझ़ी करै अदर करे तेऊ भेटणअ तेतो तिहअ ई फल।
“ज़ुंण धर्मीं समझ़ी करै धर्मीं मणछो अदर करे, तेऊ भेटणअ धर्मीं मणछो फल। 42ज़ुंण बी इना होछ़ै मांझ़ै एकी बी मेरै च़ेल्लै समझ़ी करै एक गलास पाणींओ पणैंऊंए, हुंह खोज़ा तम्हां का सत्त कि तेऊ भेटणअ परमेशरा का तेतो फल।”
Currently Selected:
मत्ती 10: OSJNT
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
This work is licensed under Creative Commons Attribution-ShareAlike 4.0 License.