Jenesis Nuarin-tas alupas 2.
Nuarin-tas alupas 2.
1 Nadiat atumop uhup. 4 Nago vaig itai. 8 Er ago nahapol Itena, 10 im nofowai iran. 17 Er atapnes incai er ato itai vaig. 19, 20 Et anvi nidai niji itai umumoh, asega a Atam. 21 Et ago intakata a Atua, um ati natmehgan.
1Eris ago ehni nohatag im nobohtan, im niji itai asega amen iran is uce.
2Is ago ehni nauritai o un a Atua, ja par lahlah an nadiat sevend; is atumop aien an nadiat sevend va niji auritai asega is ago aien.
3Is acis yi alwai nadiat sevend a Atua, um ika yi itap: is idim atumop iran a Atua va niji auritai asega is atupun aien um ago.
4IS um uce nago vaig nohatag im nobohtan an nopan iyehki is ago nobohtan im nohatag a Ihova Atua uja,
5im lep nahtaicai asega an nobohtan an nopan iyehki is pam eti eteuc an nobohtan, im inceslum asega an nobohtan an nopan iyehki is pam eti ededel: is pam eti ati incopda an nobohtan a Ihova Atua uja an nopan iyehki, is ti tah natimi par auritai an nobohtan.
6Ja is ahes inmoso an nobohtan um aridjai, um opoh nobohtan asega.
7Is leh nuarin nobohtan a Ihova Atua uja um ago Atam iran, um ahlai inmun gidjin; is um umoh a Atam.
8Is ago nahapol a Ihova Atua uja Itena an ridjai o un; is ati eahki aien natimi inig is ago aien.
9Is ika a Ihova Atua uja, Etmu ededel an nobohtan niji obotpot cai asega inyi upene nalmoi vaig, um upene incaig vaig; im lep nauincai umumoh vaig juju anliin nahapol, im nauincai uhpu ato nitai upene vaig im nitai has.
10Is ahes Itena nofowai um ahec pan u nahapol; is atiakoai um for nauiwai iran.
11Nidan nofowai uhup Paison: et arehed mihtag an pece Havila asega, et amen colt eahki;
12et esjilid colt an pece iyehki: etamen eahki telyum im inhat oniks.
13Im lep nidan nofowai sekunt Caihon: et arehed mihtag an pece Idiopia.
14Im lep nidan nofowai dirt Hitekel: et yah an nahaijin Asiria an ridjai o un. Im lep nidan nofowai ford Yufretes.
15Is leh Atam a Ihova Atua uja, um ati yin u nahapol Itena, mika yi ahapol iran aien um aminjinaig.
16Is tas alep ehele Atam a Ihova Atua uja, um ika, Namu tup hegaig nohwaicai asega aiek an nahapol:
17jam jim caig nohwancai er ato nitai upene im nitai has vaig: napu idim mas aiek an nadiat inig an caig aiek.
18Is ika a Ihova Atua uja, Et eti upene vai Atam nechim amen vaig; ekpu ago natimi atau imi yin ainyak.
19Is ago niji itai eklim edo irai pece asega an nobohtan a Ihova Atua uja, im niji obotpot man asega an nauanohatag; is imiapan ra ehele Atam aien mika yi anvi nidara aien: is anvi nidai niji itai umumoh asega a Atam.
20Is anvi nidai niji itai eklim edo irai pece auata upene asega a Atam, im niji man an nauanohatag, im niji itai eklim edo irai pece aleg asega; ja is pam eti eteuc tah par atau imi Atam.
21Is ika a Ihova Atua uja yi umjeg asega a Atam, is umjeg aien: is atipagki neduon ritin is ethi aien, um lep adgai iran;
22is ago natahig a Ihova Atua uja an neduon ritin is atipagki aien irai Atam, is imiapan yin ehele Atam aien.
23Is ika a Atam, Neduon an neduok nigki, im nohun an nohuk: uhmu anvi nidan par ika natahig, vaig inig nikavaig, eris atipagki yin an natamaig.
24Va nitai inigki etmu udei etman im risin a natamaig, um amen se ehele ehgan: etmu ethi ache nohurau arau.
25Erus tup atga a Atam im ehgan, ja erus eti ehcamai arau.
Currently Selected:
Jenesis Nuarin-tas alupas 2.: ABO
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)