Logo ya YouVersion
Elilingi ya Boluki

Lukàrzɛ̀ 14

14
Yerzù à mà wɔ̀wìrzɛ̀ mòtò ema à ma òhva hwehvimba
1Wùnya wɔ̀kɔ wò lì Arzìyòlɛ̀, Yerzù à mà ɛ̀ndɛ lì leeya ò ndawò yà Hvàlìrzàyì mɔ̀kɔ wà wòlìtò. È hvònda ema a mà ùke aŋga, hwatò hwa mà hwɛ lì mò ɔŋgɔ̀ lòŋgòlòŋgò. 2Mòtò mɔ̀kɔ à mà hwɛ aŋga ema à ma ònda hwehvimba ò nyò. 3Yerzù rzìi a ijòwa hwà-òkòlèlì hwa mbenda nà Ihvàlìrzàyì ema hwà mà hwɛ aŋga nanù ema, “È hvòmɛ̀nɛ̀ ò lì wɔ̀wìrzɛ̀ mòtò ò Wùnya wò lì Arzìyòlɛ̀ ŋgà ò rzà hvòmɛ̀nɛ̀ e?” 4Tɔ̀ mòtò à rzi mò alàhwɛ̀. Yerzù rzìi a lɛ̀mbɛ òŋgò mòtò ema a mò ònda e nyò hwehvimba lìya la eni, a mò wɔ̀wìrzɛ̀, a mò òma ò ndawò. 5Yerzù rzìi a hwa ijòwa nanù ema, “Ima mɔ̀ wà ànyu ema è ŋmanà wà èni, tɔ̀ è nyàkà yà èni e undì tɛ ò èhvɔ̀ndi ò Wùnya wò lì Arzìyòlɛ̀ rzìi a rzì ɛ̀ndɛ lì è ulɛ̀ ŋgèlì hvɔ̀kɔ e?” 6Ndi hwa rzi òhvè hvɛ tɔ̀ eyà ò lì òhwà.
Mòjeŋgà na lì karzɛ̀ la hwàyɛ̀nì
7Nà òmà Yerzù a mà ɛ̀nɛ hwatò ema hwà mà yòhwɛhwɛ ò èki ya hwèlèèlì, nà òma hwa mà kpèeyà, hwa wòteya lì hvɔ̀rzɔ̀ ìmbòkò ja hwèki hwe hwèluhwe, rzìi a hwa kpɛ̀ɛyà mònò ŋmàna nanù ema, 8“Ò yòhwɛhwɛyi tɛ ndèma yà lìhwa, ò rzì kèka lì aneya iŋgi mbòkò ema ì rzèkahwɛlɛyi hwatò hwa hwèluhwe, èhwanja e tànɛyi lì hwɛ ema hwa yòwɛyi mɔ̀kɔ à òhvi èluhwe lì ò akà. 9È mɔ̀ ema à e yòhwɛ inyɔ hwa arzɛ à jà lì e ò òhweyà nanù ema, ‘Ŋgbàà ònò mòtò ène mbòkò.’ Nàŋgɛ rzɔ ò mà ò ma tìmba ndi lì lìya nà irzɔ̀nì ò mbòkò ema è rza hwɛnɛ̀yi èluhwe. 10O èŋgànɛ̀lɛ̀ ò yòhwɛhwɛyi tɛ ène nyayi yà èki, wòwa mbòkò ema è rza hwɛnɛ̀yi èluhwe. Aŋgà ndi è mòhwɛnɛ wà ndèma, à ò eni tɛ, à ò òhweyà nanù ema, ‘Ìi ŋmàyi! Tɛmɛ ò àgbè ò lìyà ò mbòkò yà èluhwe.’ Aŋgà ndi ò hwɛnɛ̀yi èluhwe ò ìtììtènì yà hwaŋga ema hwa yòhwɛhwɛyi ò ndèma. 11O èŋgànɛ̀lɛ̀ e hwiye ema, tɔ̀ ima mòtò ema à akàrzɛ mɔ̀ ŋmìti Lohwɛ̀ à mò rzìhwìrzɛ̀. Òŋgò hvɛ ema à arzìhwìrzɛ̀ mɔ̀ ŋmìti, Lohwɛ̀ à mò kàrzɛ̀.”
12Yerzù rzìi a òhweyà òŋgò mòtò ema à ma mò yòhwɛ nanù ema, “Ò hwɛlìrzɛ tɛ ndèma, ò rzì yòhwɛ ndi ìmbunda ja aŋgɔ̀, wònyanyɔ̀ŋgɔ̀, lìtumba lì aŋgɔ̀ nà hwèwàŋgì ema ò hwi. Ò gbèyi tɛ nanù wɔ̀ hvɛ hwa hwɛnì tɛ ndèma, ò ma hwà mà ò yòhwɛ̀. O lì hwa lɛɛ wɔ̀ hvɛ. 13Ndi ò òŋgòlɛ tɛ ndèma, ò yòhwɛ ndi mèlìrza me hwatò, ìmbòkò, e hwa njɛmbu na ìndima ja hwatò. 14O gbèyi tɛ nanù, aŋga ndi Lohwɛ̀ a ò nàmìrzɛ̀, èhwanja hwaŋga hwatò hwa rzà tanɛ ò lì ò lɛ̀ɛ̀. È hvònda hwatò hwa gbamù hwa ò hvùmùwɛ, Lohwɛ̀ a ò rzaweyà.”
Ŋmàna mò è Ndema Ndɛnɛ̀
(Mat 22.1-10)
15Mòtò mɔ̀kɔ ema à mà lìya ò hwèleèlì nà Yerzù, a mà hweye ène mbɔrzi rzìi a òhweyà Yerzù nanù ema, “Mònàmɛ̀ mò ò hwɛ nà è wɔ̀ ema hwa ò lɛɛ mòlelì ò ndèma ò Lìkànèyà là ama Lohwɛ̀!” 16Yerzù rzìi a tìmbirzɛlɛlɛ nanù ema, “Mòtò mɔ̀kɔ, à mà òŋgòlɛ ndèma ndɛnɛ̀, rzìi a yòhwɛ lìmùtì là hwatò. 17È hvònda yà hwèleèlì e mà ùke, rzìi òŋgò mòtò, a òma mògbèèlì wa eni mɔ̀kɔ, ò ma hwaŋga hwatò a mà yòhwɛ nanù ema, ‘È jèe, è ndèma e ma wòŋgìrzɛ̀nɛ̀.’ 18Wɔ̀ hwa àrzɛ, hwa mà wòteya ndi lì àhwàŋgɛ̀lɛ̀ mɔ̀kɔ nà ɔ̀nɛyi. È wà wòrzò à mà òhwa nanù ema, ‘Nà àndi etò, nà àrza lì ɛ̀ndɛ lì e ɔŋgɔ̀. Nà ò rzòrzòmelì nà rza ùkeya.’ 19Ɔ̀nɛyi mɔ̀ hvɛ a òhwa nanù ema, ‘Nàŋgɛ̀ mɛnɛ ndi nà àndi mààhvà ma nyàkà mata, ò lì nò tììya è wàŋga. Nà àrza lì ɛ̀ndɛ lì ma kèkìrzɛ̀, rzònì na rza ùkeya.’ 20Ohvɛhvɛ mɔ̀ hvɛ rzìi a òhwa nanù ema, ‘Nàŋgɛ mɛnɛ ndi na hwààyi. O èŋgànɛ̀lɛ̀ rzɔ nà rza ò tànɛyi lì jà.’ 21Òŋgò mògbèèlì à mà tìmba lì òhweyà è rzàŋgò yà èni yà èwòlò hwenè hweyà hwe àrzɛ. È rzàŋgò yà èni yà èwòlò, e ma tata rzayì-rzayì, rzìi a òma òŋgò mògbèèlì wa eni, a mò òhweyà nanù ema, ‘Ɛ̀ndɛ ɔ̀nɛ̀yi mèyòmbò karzi-karzi, nà ò màhvani ma arzɛ ma mbòwà, ò tìmbànè mèlìrzà me hwatò, nà ìmbòkò, nà ìndima, nà e hwaa njɛmbu.’ 22O rzì a ikòlɛnɛ, rzìi òŋgò mògbèèlì a tìmba lì òhweyà rzàŋgò wa èwòlò nanù ema, ‘Rzàŋgò ee! Nà ma gbeyà nà òmà ò òhwì, ndi èki ya hwèlìyelì e rzà òndì.’ 23Òŋgò rzàŋgɛ wà èni wà ndawò rzìi a mò òhweyà nanù ema, ‘Ɛ̀ndɛ ò meyòmbò me mbòwà mà arzɛ, nà ò njuka ja mànjiyɛ ma wàŋga mà arzɛ, ò yòhwɛ̀ tɔ̀ njɛnɛ ò ùŋma ema a jèe. Aŋgà nanù, òma è ndawò yà amì e ma òndà. 24Nà è òhweyà nà è jɔ̀kɛ̀ ema, tɔ̀ mòtò tɔ̀ mɔ̀kɔ hwà hwaŋga hwatò ema nà ma lòme lì yòhwɛ̀, hwà rza ò kèka tɔ̀ teŋyi ò ndèma ya ami.’”
O lì hwɛ è Mòòkòwèlì wà ama Yerzù
(Mat 10.37-38)
25Wùnya wɔ̀kɔ mòndèŋge mò ndɛnɛ mò mà hwɛ lì òŋgama Yerzù, rzìi a ayèŋgòwɛ̀, a hwa òhweyà nanù ema, 26“Tɔ̀ ima mòtò ema à òhwi àma à àrza lì nò òŋgama, rzìi a lìŋgàna rzàŋgɛ nà nyàŋgɛ, jòjìyɛ̀ wa eni, nà hwàànà, nà wònyanyàŋgò wa eni, nà ìndòmɛ ja eni. Rzìi à lìŋgàna hvɛ lòŋgɛ la eni lì nò akà, à rza tanɛ̀yi lì hwɛ mòòkòwèlì wà amì. 27Tɔ̀ njɛnɛ hvɛ ema a rza hwanɛ̀yi è mbarzà yà èni, ò lì nò oŋgàmà, à rza tanɛ̀, lì hwɛ è mòòkòwèlì wà amì.
28“Ima mɔ̀ wà ànyu ema, à àrza lì òŋgà yòma ndawò ndɛnɛ̀, rzìi a rzì lòme lì lìya ò rze, ò lì kɔkɔ̀ wòlì wò arzɛ ema wò àrzàhwa ò wònò wòòŋgì. O lì hwiya ŋgà à ò tanɛ ò lì wò kulɛ̀, ŋgà a rza ò tanɛ̀yi lì wò kulɛ e? 29Oŋgò mòtò, à kɔkì tɛ mɔ̀nɔ̀ŋgɔ rzìi à rzì tanɛ lì kulɛ̀ wòòŋgì, tɔ̀ njɛnɛ ema a ɛni mòŋgò mɔ̀nɔ̀ŋgɔ̀, à mò kìkòwà à òhwà 30nanù ema, ‘Ò nò mòtò à wòtelì wòòŋgì ndì wò mò tààyèlì ò lì wò kulɛ̀.’
31“È hwèlì tɛ ema kiŋgɛ̀ è wurzanì tɛ lìtuta la lìyòmɛ̀ la hwèkòlì hwa eni hwe hwàànèlì hwa njùma, ò lì ɛ̀ndɛ lì ànana è hvɛhvɛ kiŋgɛ̀ ema yɔ hvɛ è òhvi lìtuta la mbàŋgɛ̀ yà hwèkòlì la hwàànèlì hwa njùma. À lòmà lì lìya ò rze, ò lì kɔkɔ̀ ŋgà à tanɛ̀yi lì ànana ènɛyi kiŋgɛ̀. 32À rzà ò tànɛyi tɛ, à òmà hwèwàŋgì hwe èŋge mbòwà, ò lì ɛ̀ndɛ lì ùŋmanɛlɛ enɛ̀yi kiŋgɛ̀, ema è rzɔ̀lɛnɛyi hvòhvò, ò lì mò atɛ̀kɛ̀ ema hwa gbèyè ɛ̀yɔ̀lɛ̀. 33Nànù ndi e hwɛnì lì hwɛ nà tɔ̀ njɛnɛ hvɛ ema à rza àrzà lì ulɛ hwèèmà hwe arzɛ ò mèèmà mò eni. Èŋge tumba mòtò e rza kànɛyi lì hwɛ è mòòkòwèlì wà amì.
Ikpa ema ì rza tɛ̀yirzɛ
(Mat 5.13; Mak 9.50)
34“È hwiye ema ikpa ì lɔ̀wu, ndi ì wɔ̀lɛ̀nɛ̀ tɛ wòtɛ̀wu wò eni, nɛ hwa tanɛ̀yi lì gbeyà ema ì tɛ̀ɛ̀ hvɛ e? 35Ì rza òhvì hvɛ tɔ̀ jànda. Èŋge tumba ikpa e rzòwàhwà ndi ò lùutù. È mòtò ema à hwɛnì màtò, inyɛ a rzɔ̀ŋgìtɛ̀nɛ̀ mamɛ ema na òhwì.”

Currently Selected:

Lukàrzɛ̀ 14: bri

Tya elembo

Kabola

Copy

None

Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo

Bibongiseli ya Botangi mpe Mabondeli oyo etali Lukàrzɛ̀ 14

YouVersion esalelaka bacookie mpo na kobongisa experience na yo. Nakosalelaka site na biso, ondimi esaleli ya bacookie ndenge elobami na Politiki ya Bobateli Sekele na biso