Matíe Bháàda

Bháàda

Matíe a wɔlɩ́ɛ́, à nɩ́ɩ́ námasa yì. Mà cémʋ́ á cí ɔ́ zà a, ɩ́mɩ́ ŋwɔ́ɔ mà Matíe ɔ́mɔ́ ɔ̀ jɩ́jrà Lagɔ a Námadìè a bɔ́gʋ̀ɔ̀ lɩ̀à. Á wlele sáà Matíe Levíi. Á anɩ́ ɔ tʋ́ a ŋnɩ́ ɩ̀ ŋwɔ́ɔ Afée (Málɩ́kɩ 2.14; Lúkɩ 5.27). Matíe, Zozíi a cíecíenyʋaá kʋ́gbá sɔ́ɔ́ a nyièdɩ a nyɔɔ́ kʋ̀ʋ. Ɔ́ ŋwɔ́ɔ lapóo a kʋbhlinyɔ. Wlɔmɛ́ɛnyʋa à kámalɛ wá bhʋ́ a tányɩɛ́ a lapóo Matíe bhlie wá kʋ́ a. Zozíi mɔ̀glʋ̀ anɩ́, lapóo a kʋbhlinyɔ ŋwɔ́ɔ mónyùmònyɔ, ɩ́ ka ŋnɩ́ a, Zúfʋnyʋa á kla wá nyʋa lé a ká wá a lapóo kʋ́ bhli. Lapóo a kʋbhlinyʋaá, Zúfʋnyʋa a mónyùmònyʋa àna gà á zrɩlɛ wá. Mà Zozíi ŋazɩdùò ɔ́ bhá lé ɔ́ wle Matíe ɔ ká ɔ́ kʋjɩ̀nyɔ plɩ́, bhè ɔ ká lapóo nɔnʋɔ́ sá cíè.

Bɔ́gʋ̀ɔ̀ lɩ̀à a mnɩ́ɛ́, Matíe srʋ àmɔ̀ mà, Zozíi ŋwɔ́ɔ Lóò, ɔ́ɔ yi Izrayɛ́lɩnyʋa a pʋ́pʋ́ɛ́ a zà. Ɔ́ ŋwɔ́ɔ lóo Davídɩ a lɔ́lɔ́kpa a mnɩ́ a nyɔɔ́. Matíe anɩ́, Zozíi a wɔlɩ́ɛ́ Lagɔ a nékʋ́cinyʋa cí wá a, ɩ́mɩ́ ŋwɔ́ɔ mà, yruú yi ʋ́ kʋ lé Izrayɛ́lɩnyʋa a ʋ́ neésanyɔ yi yi.

Matíe cíe lɛ́ bɔ́gʋ̀ɔ̀ lɩ̀à kʋ́ a, ɔ́ srʋ àmɔ̀ dɛ́ɛ́ Zozíi a kɔ́ bháa a, lé ɔ́ pápa àmɔ̀ ɔ lɔ́lɔ́kpaá fɩ́ɛ́, lé ɔ́ cí yɩ́ cɩɩ́ ɔ́ galɔ̀wɔ̀lɩ̀ɛ̀ (1–2). Matíe cí cémʋ́ Zán Batísɩ ŋwʋ́ Zozíi nyú wlú lé Dɩ́blʋ̀ɔ̀ sɔɔ́ zɔ̀ a (3.1–4.11). Zozíi a lɛ̀wɔ̀lɩ̀ɛ̀ fɩ́ɛ́ ɔ́ nɩ a, lé wɔlɩ́ɛ́ fɩ́ɛ́ ɔ́ cí Galiléebhlɩɛ́ mnɩ́ a. (4.12–18.35).

Námadìè lɩ̀à a zɔ̀bhɩ̀àdàà, cémʋ́ Zozíi mʋ Zelízalɛ́mʋ lé á bhlálɔɔ́ mɔ̀ɔ a, Matíe srʋ àmɔ̀ ɩ́mɩ́. Ɔ́ anɩ́, Zozíi kú, lé ɔ́ galɔ̀ tayruó kʋ́ (19.1–28.15). Ɔ́ galɔ̀ a, Galilée a kíké wlú ɔ yà ɔ́ kʋjɩ̀nyʋ̀àà sɔ́ yɛ́yɛ sɔ́kʋ́ (28.16‑20).

Cémʋ́ Zozíi cɩ́a wá kpanyɩ Lagɔ a Léyibhlɩɛ́ a wɔlɩ́ɛ́ a, Matíe srʋ àmɔ̀ ɩ́mɩ́. Ɔ́ pápa sáà àmɔ̀ cémʋ́ Zozíi cɩ́a a, ɩ́ wɔlɩdrì a gbɩ́, mà ɩ́ trʋ̀ sáà kpanyɩ mʋ́.

1. Zozíi cɩ́a ɔ́ kʋjɩ̀nyʋ̀àà dɛ́ zɩkpa zɔ̀ lé Lagɔ a Léyibhlɩɛ́ a wɔlɩ́ kɔ́kɔ́mnɩ́. Matíe, ɔ́ɔ jɩ́jrà wɔlɩ́ɛ́ lɩ̀à lé ɔ ká àmɔ̀ pápa cémʋ́ Zozíi ɔ́ɔ yi bhè Lagɔ a niwɔlɩ ká neé sralɔɔ̀. (5–7).

2. Cémʋ́ Zozíi a cíecíenyʋaá kʋ́gbá sɔ́ɔ́ na ká Lagɔ a Léyibhlɩɛ́ a wɔlɩ́ɛ́ bie, lé a kɩ́ɩ́ nyʋa cɩ́a a, (10.5‑42), ɔ́ anɩ́ Zozíi pápa à mɩ́.

3. Matíe anɩ́ Zozíi pá sáà Lagɔ a Léyibhlɩɛ́ a wɔlɩ́ɛ́ níní kʋ́ (13).

4. Ɔ́ anɩ́, Zozíi cí sáà nyumosa niníé lé ciecú a wɔlɩ́ (18).

5. Ɔ́ cí sáà kɔ́ a bhɩàda a wɔlɩ́. Ɔ́ anɩ́, bɩ́kʋ́bhɩayruó, Zozíi na ká yrúkanyʋa tɩ́tɩ́ ŋwʋ́ (24–25).

Kpɔkpláá nyʋa ŋwʋ́ lé á bhlá Zozíi a, (26.1‑5) Matíe cí a wɔlɩ́. Lé mɛnʋ́ a lelilɩɛ́ Zozíi yà ɔ́ kʋjɩ̀nyʋ̀àà sɔ́ li a, Matíe cíí (26.17‑30). Gesemaníi a zɩkpaá mnɩ́ Zozíi bhibhie Lagɔ a, Matíe cí a wɔlɩ́ (26.36‑46). Ɔ́ anɩ́, Zudáa nyɩ́glɩ̀ Zozíi lé ɔ́ ŋwʋ́ ɔ́ pɛ́lʋ́ (26.14‑16). Ɔ́ anɩ́, kʋjɩ̀nyɔ Simɔ́ Pɩ́ɛ́lɩ zie Zozíi a zà cémʋ́ ɔ nɩ́ ɔ́ yì a, (26.31‑35). Ɔ́ cí sáà mà á bhli Zozíi kʋ́ lé á ŋwʋ́ ɔ́ tɩ́tɩ́ (27.1‑2). Matíe cí Zudáa a kwɩ́ a wɔlɩ́ (27.3‑10). Lé cémʋ́ Zozíi a kwɩ́ɛ́ a wɔlɩ́ɛ́ plɩ́plɩ mʋ́ a, ɔ́ sɩɩ́ mɔ̀ɔ (27.45‑64).

Zɔ̀ bhɩa dà a, Matíe anɩ́, Zozíi kú lɛ́ a, ɔ́ galɔ̀ (28.1‑15), lé ɔ yà ɔ́ kʋjɩ̀nyʋ̀àà sɔ́ yɛ́yɛ sɔ́kʋ́ lé ɔ́ cɩ́a á. Ɔ́ anɩ́, a mʋ daá fɩ́ɛ́, lé a sa mɔ̀ɔ Lagɔ a Léyibhlɩɛ́ a Námadìè (28.16‑20).

Currently Selected:

Matíe Bháàda: NEY

Tya elembo

Copy

Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo

Yekola Koleka na Ntina ya Neyo

Matíe Bháàda

Baverset oyo Eyebani Mpenza ewuti na
Matíe Bháàda

Biblia:

Neyo

Libongoli: Neyo - NEY

Matíe Bháàda

Matíe Bháàda

Baverset oyo Eyebani Mpenza ewuti na Matíe Bháàda

Biblia:

Neyo

Libongoli: Neyo - NEY

Matíe Bháàda

Baverset oyo Eyebani Mpenza ewuti na
Matíe Bháàda