Lúkas 22
22
Dimb lí Yésus
(Mat 26.1-5, 14-16; Mlk 14.1-2, 10-11)
1Ŋgand nyí bikɔgá bí ŋgíla esaŋɛ nyí bí ŋga yáŋa ki nɛ́ Páska ɛ ɓɛ́ɛ́ ɓɛ́ɓɛ. 2Ɓakanʼyɛ ɓatíi-nsúlé la ɓayí-mbéndá bí ŋgí somo nzen á li ól lí Yésus, átɔm nɛ́ bí ŋgí kɔn lilóm woŋ. 3Váŋ nɛ́ Sátan a níŋgléé á nyúū Yúdas nyɔ́ bí ŋga yáŋa nɛ́ Iskáliot; a ɓɛ́ɛ́ á táŋga nyí Jóom lí ɓáōmɓɛ la bíɓáa. 4Yúdas ɔ kɛ́ li ámblán la ɓakanʼyɛ ɓatíi-nsúlé la ɓakanʼyɛ ɓatát ndáá-ēcɛ́ŋ-Ɔlolómɛ̄ á li yíhɛ lí ɓɔ́ nɛ̄-láá a ŋga nūŋlɛ ɓɔ́ Yésus. 5La ɓɔ́ bú kɔn mívag tɔláá, bú súgɛ nɛ́ bíg tíi nyɛ́ ŋkuh. 6Yúdas ɔ yéɓe, ɔ ɓōtlé lí somo lí elɔ́ŋgɔ eceg á li byelhanɛ lí Yésus á nsɔlɓɛ́.
Yésus ag ɓoŋhanɛ Páska
(Mat 26.17-19; Mlk 14.12-16)
7Ɛnɛ́ ɔlɔ́ ví ŋgand bikɔgá bí ŋgíla esaŋɛ, ví bí ŋgí ól mɔɔ́n ntómbɛ́ ányúū lidí lí Páska vá kɔlan, 8Yésus ɔ óm Pétlos la Yohánɛs, a byɛ́la ɓɔ́ nɛ́: «Kɛnán, miní ɓōŋhán ɓɛ́hɛ Páska, nɛ́ bi díélán.» 9La ɓɔ́ bú ɓāt nyɛ nɛ́: «Á véé ɔ ŋgɔ sómo nɛ́ bi ɓóŋhán yɔ é?» 10Ɔ pélē ɓɔ nɛ́: «Á míníŋgi máná mí tísɔn, miníg kɛ li ɓoman la mut a ɓɛ́gɛ elógá míndīm, oŋán nyɛ́ á ndáá a ŋga kɛ́ li níŋgi. 11Miní lagá ɛsáŋɛ́ a nyúŋ atán nɛ́: ‹Etāa ag ɓat wa nɛ́, voóm á ndáá mi ŋga díéle Páska la ɓayége ɓáma a lɛ véé é?› 12Nyɔ́ŋ mut ag kɛ ɓɛ́nɛ li étɛ lí étun ɛ́ ndáá likɔgɔ, yé lɛ ecɛ́ŋɛ́, m̀ɓoŋhágan. Váŋ nɛ́ miní ɓoŋhán lidí.» 13La ɓɔ́ bú kɛ bú kɔ́p mam mísɛ yɛɛ́yɛ́ɛ̄ ákaa Yésus a lága ɓɔ, bú ɓoŋhán lidí lí Páska.
Esaa-líat ɛ́ péná
(Mat 26.26-29; Mlk 14.22-25; 1Kɔ 11.23-26)
14Ɛnɛ́ ŋgɛ́ŋ ɛ kɔláán, Yésus ɔ tɔ́ɔ̄ á téɓeli elɔŋ la ɓaómɓɛ ɓɛ́ɛ́. 15Ɔ lága ɓɔ nɛ́: «Kóó ecɛ́ŋ ɛ mɓɛ́ ma nɛ́ mi dí nyí Páska elɔŋ la ɓɛ́nɛ sɔ́kágánɛ́ mag kuh esɔghe. 16Ánsī nɛ́, la mbálɛ, mag laga ɓɛ́nɛ nɛ́ mi ŋgá dí ɓé pɛ ma Páska nɛ́-tɛ́ɛ ndembye yɛ́ɛ̄ ya ɛ́ni á Ékombo Ɔ́lolómɛ̄.» 17La nyɛ́ ɔ nyɔ́ŋ líɓondó, ámbúh li tíi lí Ɔlolómɛ̄ mítamlan, ɔ yó nɛ: «Nyɔŋán miní nyú ɓɛ́nɛ bísɛ. 18Átɔm nɛ́ mag yíhɛ ɓɛ́nɛ nɛ́: m̀ɓá-mɓá, mi ŋgá nyú ɓé pɛ ma bínyūnyú bí ŋga sɔ́le á ǹdíí á bínyɛŋgɛ́n bí wáany nɛ́-tɛ́ɛ Likanʼyɛ lí Ɔ́lolómɛ̄ lá sɔ́.»
19Ámbúh náŋ ɔ nyɔ̄ŋ ékɔgá, ɔ tí Ɔ́lolómɛ̄ mítamlan, ɔ búg yɔ, ɔ káahánɛ́ ɓɔ yɔ́, ɔ laga nɛ́: «Nyuú yáma nyí, nyí ya tíéɓɛ́ ányúū yaná; ɓɔŋán náŋ á li ɔ́ŋɔ́ɔ lí ma.» 20Ámbúh li dí, ɔ ɓɔ̄ŋ nlemlem á jam la liɓondó a byɛ́ nɛ́: «Jé liɓondó nɛ li lɛ́ Ésaa-líat ɛ́ péná yé mícii máma, mí má kómɓɛ́ ányúū yaná.»
Yésus ag yíhɛ nɛ́ ŋ̀ómɓɛ wa ag núŋu nyɛ́
(Mat 26.20-25; Mlk 14.17-21)
21«Léɓyán sig: mut a ŋga núŋu ma, ág dí la ma vá á téɓeli. 22La mbálɛ, Mɔɔ́n Mut ag nyɛɛ li wú likɔlɓan la bitɛ́ɛ́yéné bí Ɔ́lolómɛ̄. Ndí eɓéé-nyúū la mut a ŋga núŋu nyɛ́!» 23La ɓɔ́ bú ɓōtlé lí ɓatan ɓɔ́ la ɓɔ́ nzáá á póla yaɓá a ŋga kɛ́ li ɓɔŋ lí nyíŋ nyaa jam.
Yésus ag yíhɛ Jóom la Bíɓáa eɓɛ́lé yé ǹcɛ́ŋ
(Mat 18.1; 20.25-28; Mlk 9.34; 10.42-45)
24Ámbúh náŋ, Ɓaómɓɛ bú ɓōtlé nsuŋanɛ́ á lí yí lí nzáá a ŋga kɛ́ li ɓɛ́ á m̀mú wáɓá. 25Váŋ nɛ́ Yésus a yó ɓɔ nɛ́: «Ɓakanʼyɛ mílōm bíg kanʼyɛ mɔ́ la elóh, ɓá ki bí byɛ́ɛ́ bitɛ́l bí likanʼyɛ bíg ɓɔŋ nɛ́ bí yáŋlɛ́ bilɔ́ŋgɔ bí ɓot. 26Ndí ɓɛ́nɛ miníh ɓɛ́ɛ́g ɓé náŋ. Nyɔ́ a ŋga sómo li ɓɛ́ lí ǹcɛ́ŋ á póla yaná a nyɔ̄ŋ etɛ́l yé ntɔ́ga; nyɔ́ ki a ŋga kānʼyɛ a yáánɛ́ nyɛ́-mɛ̄n ŋ̀ɛɛle. 27Nzáá a lɛ ǹcɛ́ŋ; mut nyɔ́ a tɔɔ́ a téɓeli tɔ nɛ́ nyɔ́ a ŋga ɛ́ɛle é? Ɓaá, nyɔ́ a tɔɔ́ á téɓeli ɓé é? Ndí ma mi tɛ́ɛ́ á póla yaná kaa ŋ̀ɛɛle.
(Mat 19.28)
28Ɓɛ́nɛ hɔ́ miní lɛ́ ɓot ɓá tiŋɓé la ma á éceg yáma ndutu. 29Mág, mag nāŋʼyé ɓɛ́nɛ Ekombo ákaa Etāa a nāŋʼyé ma yɔ́. 30La náŋ, miníg kɛ li dí la li nyú á téɓeli á Ékombo yáma. Miníg kɛ li tɔɔ á bítɔɓé-bí-líkanʼyɛ á li kááhɛ lí jóom lí mílōm la míɓáa mí Íslāɛl.»
Yésus ag ɓéhyɛ Pétlos
31Nyɔ́ŋ-Ɛsáŋɛ́ a byɛ́ nɛ́: «Á Símɔn, á Símɔn, Sátan a ɓāt ma ɓɛ́nɛ á li somo nɛ́ a pógɛ́ ɓɛ́nɛ ákaa bí ŋga sɛ́ghe miíh mí kón. 32Ndí má, ma kánɛ́ ányúū yɔ́ɔ nɛ́ ŋyéɓé wɔ́ɔ áh ndɛ́ŋgɛ́g ɓé. Wág hɔ́, eceg ɔ ŋgɔ kɛ́ li timan, ɔ létɛ̄ yéŋé elōgnyɔ̄ŋ.»
(Mat 26.33-34; Mlk 14.29-30)
33Pétlos ɔ lága nyɛ nɛ́: «Ɛtáŋɛ, elɔŋ la wa, mag yéɓe li kɛ ɛ́ ɓɛ́ á m̀ɓog, ɛ́ ɓɛ́ á nyɛmb.» 34Yésus ɔ pélē nyɛ nɛ́: «Mag laga wa, á Pétlos, nyí lɛn nlóm á kúú ag ɓɛ́ ŋgí li ɔ́ŋ kí wu táŋɓán ma ŋgele ɛ́ŋháa.»
Yésus ag yíhɛ ɓaómɓɛ mísɛlan mɛ́ɛ́ la ɓɔ́
35Yésus ɔ lága ɓɔ́ nɛ́: «Eceg mi ómóó ɓɛ́nɛ ŋgíla jom lí mɔní, ŋgíla mpég á duwɛ, ŋgíla bitámbí, ɓaá jam li yɛ́ɛ́léé ɓɛ́nɛ é?» Bú pélē nyɛ nɛ́: «m̀ɓá.» 36A byɛ́la ɓɔ nɛ́: «Nyí Vɔ́ŋɔ́ɔ, á mveŋghanɛ́, nyɔ́ a byɛ́ɛ̄ jom lí mɔní, a nyɔ́ŋ jɔ́; nlemlem la nyɔ́ a byɛ́ɛ̄ mpég á duwɛ. Ndí nyɔ́ ah byɛ́ɛ́ ɓé mboná wélan, a núŋú lógi jɛ́ɛ́ a sóm ɛyɛɛ́. 37Átɔm nɛ́, mag yíhɛ ɓɛ́nɛ nɛ́ ányúū yáma, bí biɓaŋgá bí Lícii-Lipúán nɛ, a níŋgí á nsɔŋgí á mítɔnɓa byá nyɛ́ɛ li yál. Kɔɔ la mbálɛ yé yá ciiɓɛ́ ányúū yama yá nyɛ́ɛ lí yál.» 38Ɓaómɓɛ bú yó nyɛ nɛ́: «Ɛtáŋɛ, mboná wélan ɛ́ɓáa yí.» La nyɛ́ ɔ pélē ɓɔ nɛ́: «Náŋ a kɔ́ɔ.»
Yésus la ɓayége ɓɛ́ɛ́ á Ɔ́kolá ví tín ɛ́ Olíva
(Mat 26.36-41; Mlk 14.32-38)
39Ákaa elɛ́m, Yésus a kɛnɛ́ɛ́ á ɔ́kolá ví tín ɛ́ Olíva, la ɓayége bú óŋ nyɛ. 40Ɛnɛ́ a pámáá átē, ɔ yó ɓɔ nɛ́: «Kánhánɛ á li ɓɔŋ nɛ́ miníh kuág ɓé á míceglan.» 41La nyɛ́ ɔ ɓáglán la ɓɔ́, ɔ kɛ́ puh enɛŋɛ́ jam ákaa muúmítáan mí méta, ɔ úm míɓɔ̄ŋ á sí, ɔ kánɛ́ nɛ: 42«Etāa, kí wá yéɓe, nɛ̄ŋɓɛ́ ma jé liɓondó lí ésɔghe. Ah nsom wáma ɓé, ndí nsom wɔ́ɔ nɛ́ á ɓɔ̄ŋɓɛ́ɛ!» 43Váŋ nɛ́ áŋgɛl ya ɛ sɔ́léé á lóō á li tíi lí nyɛ ŋguu. 44Ɛnɛ́ Yésus a ɔ́ŋɔ́ esɔghe ɛ́ ŋga láaŋke nyɛ́, ɔ kōndyé li kánɛ la ŋguu. Ebibi ŋgí pám nyɛ́ yú yāán ákaa mitɔ́n mí mícii mí ŋgí tɔ́n á sí. 45Ámbúh míŋ mikánɛ, ɔ tɛ́lɛ, ɔ ōŋ ɓayége ɓɛ́ɛ́, ɔ kɔ́p nɛ ntɔghanɛ́ a kɛ́hɛ̄ ɓɔ á ɔ́lɔ̄. 46La nyɛ́ ɔ yó ɓɔ nɛ́: «Yéé! Miníg lál é? Tɛ́lɓán, miní kánɛ̄, miní táág ku á míceglan!»
Yésus ag byelɓɛ
(Mat 26.47-55; Mlk 14.43-49)
47Kasig Yésus a ɓɛ́ɛ́ a ŋgí pɔ́tɔ́g, edila límut yú nyɛ́g. Yúdas, wa átē a Jóom lí ɓáōmɓɛ la Bíɓáa nɛ́ a ɓɛ́ɛ́ a tɛ́ɛ ɔ́sū. Ɔ sīŋglé Yésus ɓɛɓɛ, la nyɛ́ ɔ óóɓē nyɛ. 48Yésus aá la nyɛ́ nɛ́: «Á Yúdas, la mióóɓan nɛ́ ɔ ŋgɔ núŋu Mɔɔ́n Mut é?» 49Ɛnɛ́ ɓayége ɓɛ́ɛ́ ɓá sɔ́ŋtánɛ́ yéé ɛ́ ŋga sómo li loo, bú ɓāt nyɛ nɛ́: «Ɛtáŋɛ, bi lɛ́ nɛ ɓaá du la mboná yáhá é?» 50La wa á póla yaɓá ɔ lɔ́g m̀ɓɔŋle a ŋ̀kanʼyɛ ǹcɛ́ŋ a ɓatíi-nsúlé, ɔ sɛ́m nyɛ aɔ́ɔ́ á m̀ɓɛ́nlómɛ. 51Váŋ nɛ́ Yésus a pɔ́t nɛ: «Mwahánɛ̄, náŋ a kɔ́ɔ.» Ɔ síiɓán nyɛ aɔ́ɔ́, wú átɓan. 52La Yésus ɔ yó ɓakanʼyɛ ɓatíi-nsúlé, ɓakanʼyɛ ɓatát ndáá-ēcɛ́ŋ-Ɔlolómɛ̄ la ɓacɛ́ŋ bí lílōmɛ ɓá bí sɔ́ɔ́ nyɛ li byee nɛ́: «Maná sɔ́la mboná, la binjéŋ á li byee lí ma kaa ntɔnɓa é? 53Mi mɓɛ́ la ɓɛ́nɛ ɔlɔ́ sig á ndáá-ēcɛ́ŋ-Ɔlolómɛ̄, manáh byee ɓé ma. Ndí nyí vɔ́ŋɔ́ɔ, ŋgɛ́ŋ yaná nyí, la nyí ŋguu livito.»
Pétlos ag táŋɓan Yésus
(Mat 26.57-58; Mlk 14.53-54)
54La ɓɔ́ bú byeé Yésus, bú kɛla nyɛ́, bú níŋgi la nyɛ á nlɛ́ɛ́ á ŋ̀kanʼyɛ ǹcɛ́ŋ a ɓatíi-nsúlé. Pétlos ki a ŋgí oŋ ɓɔ́ puh enɛŋɛ́ á mbúh. 55Kasig ɓáɓɔŋle bí ŋ̀kanʼyɛ ǹcɛ́ŋ a ɓatíi-nsúlé bí koó m̀ɓáláŋ á di lí nzáan á m̀mím-átān, ɓɔ́ bísɛ bú tɔ́ɔ̄ bíg óho váŋ. La Pétlos ɔ sɔ́, ɔ byáŋ elɔŋ la ɓɔ́.
(Mat 26.69-75; Mlk 14.66-72; Yhn 18.17, 25-27)
56Váŋ nɛ́ m̀ɓɔŋle a mindígá wa a ɛ́n nyɛ a tɔ́ɔ̄ á ŋgwáāg nzáan, ɔ tīŋ nyɛ miíh ɔ yó nɛ: «Nyɔ́ ki a mɓɛ́ elɔŋ la nyɛ́.» 57Ndí, Pétlos ɔ táŋ, a byɛ́ nɛ́: «Á míndīgá, mi ŋgá lem ɓé ma nyɛ́!» 58Ámbúh puh eceg, mut ntám ɔ ɛ́n nyɛ, ɔ yó nɛ: «Wág ɔ lɛ mut waɓá.» Pétlos ɔ pélē nyɛ nɛ́: «Mi sē ɓé ma elɔŋ la ɓɔ́!» 59Ámbúh jam-kaa ŋgɛ́ŋ ya, mut ntám ɔ yó sīg-pɛ nɛ́: «Ah ɓɔ́ɔ́ ɓé, nyɔ́ mut a mɓɛ́ elɔŋ la nyɛ́, la ki nɛ́ a lɛ mɔɔ́n Galiléa.» 60Pétlos ɔ tímānɛ̄ nyɛ nɛ́: «Mi ŋgá yí ɓé ma jam ɔ ŋgɔ sómo li laga.» Kasig a ɓɛ́ɛ́ a ŋgí pɔ́tɔg, á ékūyá-kúyá, nlóm á kúú ɔ ɔ́ŋ. 61Váŋ nɛ́ Nyɔ́ŋ-Ɛsáŋɛ́ a yaán, ɔ légɓé nyɛ, miíh máɓá mú ɓoman, la Pétlos ɔ ɔ́ŋɔ yé Nyɔ́ŋ-Ɛsáŋɛ́ a lagléé nyɛ́ nɛ́: «Nyí lɛn, sɔ́kágánɛ́ nlóm á kúú ag ɔ́ŋ kí wu táŋɓán ma ŋgele ɛ́ŋháa.» 62Náŋ ɔ téeŋgɛ́ Pétlos, ɔ ɓógó váŋ á yéŋ eti, ɔ pám, ɔ kɔ́hɔ́ liwú, ɔ lée taŋ-taŋ.
Bíg óŋo Yésus
(Mat 26.67-68; Mlk 14.65)
63Ɓot bí ŋgí tát Yésus bú ɓōtlé nyɛ li ɔl la li ɓom li nyɛ. 64Bú bútyɛ́ nyɛ asú la ɓɔ́ bú ɓāt nyɛ nɛ́: «Ɔ lɛ yágá m̀pɔ́tle-a-Ɔlolómɛ̄, lagá nzáá a lɔ́g wa!» 65La ɓɔ́ bú óŋo nyɛ patí míōō ɛ́sɛ.
Yésus ɔ́sū ví ɔ́ku-vicɛ́ŋ-ví-bíkāāhɛ́nɛ́
(Mat 26.59, 63-65; Mlk 14.55, 61-64)
66Ɛnɛ́ kítí ya kánda, ɔku ví ɓácɛ̄ŋ bí lílōmɛ, ɓakanʼyɛ ɓatíi-nsúlé la ɓayí-mbéndá bú kóman, la ɓɔ́ bú kɛ́la Yésus á voóm wāɓá á bikááhɛ́nɛ́. 67Bú lagá nyɛ nɛ́: «kíyáɓɛ́nɛ wa nɛ́ ɔ lɛ Nyɔ́-a-Pɔ́hlɛ, lagá ɓɛ́hɛ.» Yésus ɔ tímānɛ ɓɔ nɛ́: «Kí má lágá ɓɛ́nɛ náŋ, miní ŋgá kɛ ɓé ma li yéɓe. 68Tɔ ma bíhī ki ɓɛ́nɛ, miní ŋgá kɛ ɓé ma li pele. 69Ndí li ɓotle Vɔ́ŋɔ́ɔ, Mɔɔ́n Mut ag kɛ li tɔɔ á m̀ɓɛ́nlómɛ a Ɔlolómɛ̄ a Ŋguu-Mísɛ.» 70Ɓɔ́ bísɛ bú yó nɛ: «Ɔ lɛ hɔ́ pɔ́n Mɔ́ɔ̄n Ɔ́lolómɛ̄!» Yésus ɔ tímānɛ̄ ɓɔ́ nɛ́: «Ɓɛ́nɛ-mɛ̄n miní lɛ́ li yó nɛ́ mi lɛ nyɛ́.» 71Váŋ nɛ́ ɓá lagá nɛ: «Yɔɔ́yɔ́ɔ nyaa mbóŋ pɛ bi ŋgí somlág! Ɓɛ́hɛ-mɛ̄n ɓaá ámblé yéé a pámɛ á ányu wɛ́ɛ́!»
Currently Selected:
Lúkas 22: NTB
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2023, CABTAL