John 6
6
1Naŋ me paso o ike i Jesus me levegao tavala qilo ta Galilea, o qilo ta Tiberias. 2Wa o sul we qoqo me tataga ineia, o manigiu ineira me ilo mora o vaglala ŋaŋ ni me ge ti munra gopae. 3Wa i Jesus me kalo sage i vawo tauwe, wa tara tiŋqoro me pute siwo aia. 4Wa o rowolagau o lakalaka nora ta Judea me noga. 5Wa i Jesus me ate laŋ, ti sagarag o sul we qoqo we mule ma suria, ti vet mun i Philip wa, Nina te wol o sinaga avea aganragai ŋaŋ iloke? 6Pa ni me vet tamaike si a meregalea, ape ni me gilala mona o sava ni te ge. 7Naŋ i Philip ti valuia wa, Ta wol o bread mun o som melnol vagarua tete ninile val tanun. 8Tuwale nanra tiŋqoro anana, i Andrew, tasin i Simon Peter, ti vet munia wa, 9O lumagav iake, o bread tavelima amaia, o barley, wa o iga nirua; pa te tira gasei ape neira we qoqo? 10Naŋ i Jesus wa, Tur vapteg o sul. Wa o valis we lolo alo vatine. Naŋ o rereata me pute siwo tama tar vagatavelima. 11Naŋ i Jesus me taur o bread, ti wievavae, ti tirag munra tiŋqoro, wa ira tiŋqoro mun o tanun ŋaŋ me pute siwo; wa o iga mulaŋ tama isei qe maros. 12Wa neira me toqo qet, ni me vet munra tiŋqoro anana wa, Vilerag o garate sinaga me tuqe ti, nan o sava wa tagea. 13Wa neira me vilerag, wa me sogon ura o gete saŋavul tuwale o numei nirua mun o garate sinaga tape bread tavelima ilone neira me ganagana matila ti. 14Wa o manigiu o ine iragai me ilo o vaglala i Jesus me ge ti, qara vet wa, We nun, i gene iloke i prophet te mule ma ilo marama.
15Wa i Jesus we ilo vaglala ape neira te mule ma we wosagia, wa we ge ineia sin maranaga, ni me toa kel mulaŋ magesena i tauwe.
16Wa me ravrav veta, ira tiŋqoro we taqel siwo i lau; 17we rap vawo aka, we gamo siwo tavala qilo i Kapernaum. Wa me qoŋ, wa i Jesus gate mule tiqa surira, 18wa o rep we kalokalo ma ape laŋ liwoa we vus. 19Wa ineira me sua o masaoi saŋavul rua o numei tavelima si saŋavul tol, qara ilo i Jesus ti mulemule avune pei, ti rivtag o aka, wa neira we gogolo. 20Pa ni me vava muneira wa, Inau iloke; turpea gogogolo. 21Wa ineira me maros we lav vasgotia ilo aka; wa o aka ti olo gaplot salilina ineira me sua aia.
22Tavala maran o sul me tira ti a tavala qilo i rowo me ilo si tagai o natiaka we sea aia, pa ituwale ilone, wa si i Jesus gate rap mona vawo aka ilone amaira tiŋqoro anana, nava si ra tiŋqoro anana me vanreag magesera. 23Panava o tuan aka mulaŋ me tikarag nan a Tiberias, me olo i rowo arivtag o vatine neira me gana o bread aia, i Jesus me wievavae paso ti apena. 24Wa o sul me ilo tamaine i Jesus tagai aia tara tiŋqoro anana, wa neira we rap kalo mora vawo natiaka ŋaŋ ilone, we niŋa siwo i Kapernaum, we sike i Jesus. 25Wa neira me ilo suaria a tavala qilo siwo, we vava munia wa, Vatogo, ko me van ma anaŋaisa? 26Naŋ i Jesus ti valuira wa, We nun, we nun, nau we vava mun kamiu wa, Kamiu we sike inau pa gate apen kamiu me ilo o vaglala ŋaŋ, nava apen kamiu me gana ti wa me toqo. 27Tur pea mawmawui ape sinaga te tagea, panava ape sinaga te toga ilo esu galava, i Nat tanun te la mun kamiu; apen o Mama, i God, me vatapua. 28Naŋ neira we vet munia wa, Kamam te ge o sava, si kamam a gagapalag lai o gagapalag ŋaŋ mon God? 29Naŋ i Jesus ti valuira wa, Iloke o gagagapalag mon God, si kamiu a nomtup i gene ni me vatraŋ ma. 30Naŋ ineira me vet munia wa, Ko we ge o sava o vaglala, si kamam a ilo wa we nomtupuko? ko we gagapalag o sava? 31Ratupunina me gana o manna alo vanua vanameag, tama me rave ti wa, Ni me le gar o bread ma vunana si a gana. 32Naŋ i Jesus me vet muneira wa, We nun, we nun, nau we vava mun kamiu wa, Gate i Moses me la mun kamiu o bread ma vunana, nava i Tamak we le mun kamiu o tur bread ma vunana. 33Apen o bread mon God iloke we siwo ma vunana, wa we ge esu o marama. 34Naŋ ineira we vava munia wa, Lord, ka la vagae ma mun kamam o bread iloke. 35Naŋ i Jesus ti vet muneira wa, Inau o bread esuva; isei qe van ma sur nau tete maliŋsala, wa isei qe nomtup inau tete marou aŋaisa. 36Pa na me vava veta mun kamiu wa si, Kam me ilo inau, pa kamiu gate nomtup. 37O sava o Mama qe la munau te van qet ma sur nau, wa na tete gevtag reag ilo isei qe van ma sur nau. 38Ape na gate siwo ma vunana si na tataga o sava nau we maros, nava o sava i gene me vatraŋ nau ma we maros. 39Wa i gene me vatraŋ nau ma we maros iloke, si na tete ge vanvanameag o gene tea ni me la ma munau, pa si na ge rakatia alo ulus qoŋ. 40Ape o maros mon Tamak iloke, si isei qe sagarag o Natui, wa we nomtupua, te esu galava, wa na te ge rakatia alo ulus qoŋ.
41Wa ira ta Judea we terevaŋutŋut goroa, ape ni me vava wa, Inau o bread me siwo ma vunana. 42Wa ineira me vet wa, Gate i Jesus iloke, natun Joseph? nina we gilala i tamana tana ravevena. Pa o sava iloke ni we vava wa, Na me siwo ma vunana? 43Naŋ i Jesus ti valuira we vava wa, Turpea var terevaŋutŋut. 44O Mama i gene me vatraŋ nau ma ta tete ramo isei, ni tete van lai ma sur nau: wa na te ge raka kelua alo ulus qoŋ. 45Me rave ti munra prophet ŋaŋ wa, God te vatogora nol. Valsei me roŋotag amen o Mama, wa we lolomaran, te van ma sur nau. 46Na gate vava si isei me ilo o Mama; i gene amen God ma, ineia tuwale me ilo o Mama. 47We nun, we nun, nau we vava mun kamiu wa, Isei qe nomtup we taur o esu galava. 48Inau o bread esuva. 49Ratupumiu me gana o manna alo vanua vanameag, wa me mate. 50Iloke o bread we siwo ma vunana, si o tanun ni gana, wa ni tete mate. 51Inau o bread esu me siwo ma vunana; si isei qe gana o bread iloke ni te esu galava; wa o bread lova iloke na te le navisogok nake na te le, ape esu marama.
52O manigiu ilone ira ta Judea me varleasag, we vet wa, I gene iloke te le gasei navisogona mun ganina? 53Naŋ i Jesus ti vet muneira wa, We nun, we nun, nau we vava mun kamiu wa, Si kam qe tete gana navisogon i Nat tanun wa we ima nanarana, kamiu gate taur o esu alo ikamiu. 54Isei qe gana navisogok, wa we ima nanarak we taur o esu galava; wa na te ge rakatia alo ulus qoŋ. 55Ape navisogok o tur sinaga, wa nanarak o tur gene ima. 56Isei qe gana navisogok wa we ima nanarak we goara alo inau, wa inau alo ineia. 57Tama o Mama i esuesu me vatraŋ nau ma, wa nau we esu o manigiu o Mama, tamaine gina isei qe gana inau, ineia mulaŋ te esu o manigiu inau. 58Iloke o bread me siwo ma vunana; pa gate tama ira tupumiu me gana o manna wa me mate; isei qe gana o bread iloke te esu galava. 59Ni me vava o vavae ŋaŋ iloke alo ima siwotuwale, alo ni we vatogora a Kapernaum.
60Wa o tuan tiŋqoro anana we qoqo we roŋotag, we vava wa, O vavae we gona iloke; isei te tiŋqoro lai? 61Nava i Jesus we gilala matapuna ape ra tiŋqoro we terevaŋutŋut, ti vet muneira wa, Iloke we ge kamiu si a tutuag? 62Pa o sava si kam te sagarag i Nat tanun we mule kalo kel ilo vatine ni me toga ti aia we tuai? 63O vui we ge esu, wa o visogoi tete piriŋ ilo; o vavae ŋaŋ na me vava mun kamiu, iloke ŋaŋ o vui, wa o esu. 64Wa o tuanimiu gate nomtup. Apen Jesus me gilala alo qetegiu ma irasei gate nomtup, wa isei te maniriŋia. 65Wa ni me vava wa, O manigiu iloke nau me vava mun kamiu wa, I Tamak ta tete sogov munsei, ni tete van lai ma surinau. 66O manigiu iloke ira tiŋqoro anana we qoqo me toa kel nania, gate mule pulpul mulaŋ amaia. 67Wa i Jesus ti vet munra numei nirua apena wa, Kamiu mulaŋ we maros we toa? 68Naŋ i Simon Peter me valuia wa, Lord, kamam te toa sur isei? amaiko o vavae ŋaŋ we tira ape esu galava. 69Wa ikamam me nomtup veta, wa we gilala apeniko i Roŋo anan God. 70Naŋ i Jesus ti valuira wa, Nau gate ilo raka kamiu ira numei nirua, wa o tuara nan kamiu anan Satan? 71Pa ni me vava apen i Judas Iskariot natun Simon, ape neia gina te maniriŋia, o tuara nanra numei nirua.
Currently Selected:
John 6: MOTA
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
New Testament was published by the British and Foreign Bible Society in 1931.
John 6
6
1Naŋ me paso o ike i Jesus me levegao tavala qilo ta Galilea, o qilo ta Tiberias. 2Wa o sul we qoqo me tataga ineia, o manigiu ineira me ilo mora o vaglala ŋaŋ ni me ge ti munra gopae. 3Wa i Jesus me kalo sage i vawo tauwe, wa tara tiŋqoro me pute siwo aia. 4Wa o rowolagau o lakalaka nora ta Judea me noga. 5Wa i Jesus me ate laŋ, ti sagarag o sul we qoqo we mule ma suria, ti vet mun i Philip wa, Nina te wol o sinaga avea aganragai ŋaŋ iloke? 6Pa ni me vet tamaike si a meregalea, ape ni me gilala mona o sava ni te ge. 7Naŋ i Philip ti valuia wa, Ta wol o bread mun o som melnol vagarua tete ninile val tanun. 8Tuwale nanra tiŋqoro anana, i Andrew, tasin i Simon Peter, ti vet munia wa, 9O lumagav iake, o bread tavelima amaia, o barley, wa o iga nirua; pa te tira gasei ape neira we qoqo? 10Naŋ i Jesus wa, Tur vapteg o sul. Wa o valis we lolo alo vatine. Naŋ o rereata me pute siwo tama tar vagatavelima. 11Naŋ i Jesus me taur o bread, ti wievavae, ti tirag munra tiŋqoro, wa ira tiŋqoro mun o tanun ŋaŋ me pute siwo; wa o iga mulaŋ tama isei qe maros. 12Wa neira me toqo qet, ni me vet munra tiŋqoro anana wa, Vilerag o garate sinaga me tuqe ti, nan o sava wa tagea. 13Wa neira me vilerag, wa me sogon ura o gete saŋavul tuwale o numei nirua mun o garate sinaga tape bread tavelima ilone neira me ganagana matila ti. 14Wa o manigiu o ine iragai me ilo o vaglala i Jesus me ge ti, qara vet wa, We nun, i gene iloke i prophet te mule ma ilo marama.
15Wa i Jesus we ilo vaglala ape neira te mule ma we wosagia, wa we ge ineia sin maranaga, ni me toa kel mulaŋ magesena i tauwe.
16Wa me ravrav veta, ira tiŋqoro we taqel siwo i lau; 17we rap vawo aka, we gamo siwo tavala qilo i Kapernaum. Wa me qoŋ, wa i Jesus gate mule tiqa surira, 18wa o rep we kalokalo ma ape laŋ liwoa we vus. 19Wa ineira me sua o masaoi saŋavul rua o numei tavelima si saŋavul tol, qara ilo i Jesus ti mulemule avune pei, ti rivtag o aka, wa neira we gogolo. 20Pa ni me vava muneira wa, Inau iloke; turpea gogogolo. 21Wa ineira me maros we lav vasgotia ilo aka; wa o aka ti olo gaplot salilina ineira me sua aia.
22Tavala maran o sul me tira ti a tavala qilo i rowo me ilo si tagai o natiaka we sea aia, pa ituwale ilone, wa si i Jesus gate rap mona vawo aka ilone amaira tiŋqoro anana, nava si ra tiŋqoro anana me vanreag magesera. 23Panava o tuan aka mulaŋ me tikarag nan a Tiberias, me olo i rowo arivtag o vatine neira me gana o bread aia, i Jesus me wievavae paso ti apena. 24Wa o sul me ilo tamaine i Jesus tagai aia tara tiŋqoro anana, wa neira we rap kalo mora vawo natiaka ŋaŋ ilone, we niŋa siwo i Kapernaum, we sike i Jesus. 25Wa neira me ilo suaria a tavala qilo siwo, we vava munia wa, Vatogo, ko me van ma anaŋaisa? 26Naŋ i Jesus ti valuira wa, We nun, we nun, nau we vava mun kamiu wa, Kamiu we sike inau pa gate apen kamiu me ilo o vaglala ŋaŋ, nava apen kamiu me gana ti wa me toqo. 27Tur pea mawmawui ape sinaga te tagea, panava ape sinaga te toga ilo esu galava, i Nat tanun te la mun kamiu; apen o Mama, i God, me vatapua. 28Naŋ neira we vet munia wa, Kamam te ge o sava, si kamam a gagapalag lai o gagapalag ŋaŋ mon God? 29Naŋ i Jesus ti valuira wa, Iloke o gagagapalag mon God, si kamiu a nomtup i gene ni me vatraŋ ma. 30Naŋ ineira me vet munia wa, Ko we ge o sava o vaglala, si kamam a ilo wa we nomtupuko? ko we gagapalag o sava? 31Ratupunina me gana o manna alo vanua vanameag, tama me rave ti wa, Ni me le gar o bread ma vunana si a gana. 32Naŋ i Jesus me vet muneira wa, We nun, we nun, nau we vava mun kamiu wa, Gate i Moses me la mun kamiu o bread ma vunana, nava i Tamak we le mun kamiu o tur bread ma vunana. 33Apen o bread mon God iloke we siwo ma vunana, wa we ge esu o marama. 34Naŋ ineira we vava munia wa, Lord, ka la vagae ma mun kamam o bread iloke. 35Naŋ i Jesus ti vet muneira wa, Inau o bread esuva; isei qe van ma sur nau tete maliŋsala, wa isei qe nomtup inau tete marou aŋaisa. 36Pa na me vava veta mun kamiu wa si, Kam me ilo inau, pa kamiu gate nomtup. 37O sava o Mama qe la munau te van qet ma sur nau, wa na tete gevtag reag ilo isei qe van ma sur nau. 38Ape na gate siwo ma vunana si na tataga o sava nau we maros, nava o sava i gene me vatraŋ nau ma we maros. 39Wa i gene me vatraŋ nau ma we maros iloke, si na tete ge vanvanameag o gene tea ni me la ma munau, pa si na ge rakatia alo ulus qoŋ. 40Ape o maros mon Tamak iloke, si isei qe sagarag o Natui, wa we nomtupua, te esu galava, wa na te ge rakatia alo ulus qoŋ.
41Wa ira ta Judea we terevaŋutŋut goroa, ape ni me vava wa, Inau o bread me siwo ma vunana. 42Wa ineira me vet wa, Gate i Jesus iloke, natun Joseph? nina we gilala i tamana tana ravevena. Pa o sava iloke ni we vava wa, Na me siwo ma vunana? 43Naŋ i Jesus ti valuira we vava wa, Turpea var terevaŋutŋut. 44O Mama i gene me vatraŋ nau ma ta tete ramo isei, ni tete van lai ma sur nau: wa na te ge raka kelua alo ulus qoŋ. 45Me rave ti munra prophet ŋaŋ wa, God te vatogora nol. Valsei me roŋotag amen o Mama, wa we lolomaran, te van ma sur nau. 46Na gate vava si isei me ilo o Mama; i gene amen God ma, ineia tuwale me ilo o Mama. 47We nun, we nun, nau we vava mun kamiu wa, Isei qe nomtup we taur o esu galava. 48Inau o bread esuva. 49Ratupumiu me gana o manna alo vanua vanameag, wa me mate. 50Iloke o bread we siwo ma vunana, si o tanun ni gana, wa ni tete mate. 51Inau o bread esu me siwo ma vunana; si isei qe gana o bread iloke ni te esu galava; wa o bread lova iloke na te le navisogok nake na te le, ape esu marama.
52O manigiu ilone ira ta Judea me varleasag, we vet wa, I gene iloke te le gasei navisogona mun ganina? 53Naŋ i Jesus ti vet muneira wa, We nun, we nun, nau we vava mun kamiu wa, Si kam qe tete gana navisogon i Nat tanun wa we ima nanarana, kamiu gate taur o esu alo ikamiu. 54Isei qe gana navisogok, wa we ima nanarak we taur o esu galava; wa na te ge rakatia alo ulus qoŋ. 55Ape navisogok o tur sinaga, wa nanarak o tur gene ima. 56Isei qe gana navisogok wa we ima nanarak we goara alo inau, wa inau alo ineia. 57Tama o Mama i esuesu me vatraŋ nau ma, wa nau we esu o manigiu o Mama, tamaine gina isei qe gana inau, ineia mulaŋ te esu o manigiu inau. 58Iloke o bread me siwo ma vunana; pa gate tama ira tupumiu me gana o manna wa me mate; isei qe gana o bread iloke te esu galava. 59Ni me vava o vavae ŋaŋ iloke alo ima siwotuwale, alo ni we vatogora a Kapernaum.
60Wa o tuan tiŋqoro anana we qoqo we roŋotag, we vava wa, O vavae we gona iloke; isei te tiŋqoro lai? 61Nava i Jesus we gilala matapuna ape ra tiŋqoro we terevaŋutŋut, ti vet muneira wa, Iloke we ge kamiu si a tutuag? 62Pa o sava si kam te sagarag i Nat tanun we mule kalo kel ilo vatine ni me toga ti aia we tuai? 63O vui we ge esu, wa o visogoi tete piriŋ ilo; o vavae ŋaŋ na me vava mun kamiu, iloke ŋaŋ o vui, wa o esu. 64Wa o tuanimiu gate nomtup. Apen Jesus me gilala alo qetegiu ma irasei gate nomtup, wa isei te maniriŋia. 65Wa ni me vava wa, O manigiu iloke nau me vava mun kamiu wa, I Tamak ta tete sogov munsei, ni tete van lai ma surinau. 66O manigiu iloke ira tiŋqoro anana we qoqo me toa kel nania, gate mule pulpul mulaŋ amaia. 67Wa i Jesus ti vet munra numei nirua apena wa, Kamiu mulaŋ we maros we toa? 68Naŋ i Simon Peter me valuia wa, Lord, kamam te toa sur isei? amaiko o vavae ŋaŋ we tira ape esu galava. 69Wa ikamam me nomtup veta, wa we gilala apeniko i Roŋo anan God. 70Naŋ i Jesus ti valuira wa, Nau gate ilo raka kamiu ira numei nirua, wa o tuara nan kamiu anan Satan? 71Pa ni me vava apen i Judas Iskariot natun Simon, ape neia gina te maniriŋia, o tuara nanra numei nirua.
Currently Selected:
:
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
New Testament was published by the British and Foreign Bible Society in 1931.