John 7
7
1Paso nan i Jesus me mule kelkel a Galilea, ape ni gate maros we mule kelkel a Judea, apenra ta Judea me sike si a ge mateia. 2Wa o lakalaka nora ta Judea, o lakalaka paito, me noga. 3O manigiu o ine ira tasina we vava munia wa, Vareag, mule i Judea, si ra tiŋqoro mulaŋ anama a ilo mora o gagapalag ŋaŋ ko we ge. 4Ape tagai o tanun we gagapalag pata, pa we maros mona o tanun sul neira gilala ineia alo maea. Ko ta ge tamaike, ka ge ŋaŋalue ko mun o marama. 5Ape ra tatasina gai gate nomtup mora neia. 6O manigiu ilone i Jesus ti vet muneira wa, Naqoŋik gate wesu tiqa, nava naqoŋimiu we taurmate vagae apena. 7O marama tete ŋustup lai kamiu; nava we ŋustup nau, ape nau we gaganag we tira apena si mon o gagapalag we malkeke. 8Tur mule kalo momiu ape lakalaka; na tete mule kalo tiqa ape lakalaka iloke, ape qoŋik gate wesu vunvun tiqa. 9Ni me vava tamaike muneira, paso nan ni qale toga a Galilea.
10Nava ira tatasina me mule kalo veta ape lakalaka, paso nan ni qara mule kalo mona, nava ni gate mule lue pa me viro. 11O manigiu ilone ira ta Judea me sikea alo lakalaka, we vet wa, Avea ineia? 12Wa me terevaŋutŋut vaga qoqo alo sul ape neia; o tuaniu me vava wa, Ineia we wia: wa o tuaniu wa, Tagai, ni we ge lera o sul. 13Panava isei gate wawaŋ lue ape neia, ape neira we gogolo ra ta Judea.
14Wa alo tine lakalaka i Jesus we mule kalo ilo vatine we roŋo, ti vatvatogo. 15Wa ira ta Judea me mamakei apena we vet wa, I gene iloke we lolomaran gasavai, pa ni gate toga ilo amen i vatogo? 16Naŋ o manigiu ilone i Jesus ti valuira wa, Nok o lea vatogoa gate mok, nava amon i gene me vatraŋ nau ma. 17Si isei qe maros we ge non o maros, ni te gilala ape lea vatogoa, si amon God, si nau we vava matapuk. 18Isei we vava matapuna we sike sin ge ronoga kelua, nava isei we sike sin ge ronoga i gene me vatraŋia, ilone we nun, wa o liŋe variava gate toga alo ineia. 19I Moses wun me la mun kamiu o lea? wa isei tuwale nan kamiu gate gagapalag qalo o lea. Ape sa kam we sike si a ge mate inau? 20O sul we valui goro, si, O vui we tatas amaiko; isei we sike si a ge mate iniko? 21Naŋ i Jesus ti valui gorora we vava wa, Nau me ge o gagapalag tuwale, wa ikamiu nol me mamakei apena. 22O manigiu iloke i Moses me le mun kamiu o teve vaglala apena; (pa gate qeteg amen Moses nava amera tupunina;) wa kamiu we teve vaglala o tanun alo qoŋ mapsag. 23Si o tanun qe lav mona o teve vaglala alo qoŋ mapsag, nan o lea non i Moses wa tatavaul, ape sa kam we lologagara inau ape nau teve ge esu nol o tanun alo qoŋ mapsag? 24Turpea veveg vires nagoi: tur veveg o lea veveg we taniniga gese.
25Wa o tuan ta Jerusalem me vava wa, I gene wun iloke neira we sike si a ge mateia? 26Pa ilo, ni we wawaŋ lue, wa ineira gate gatogoroa. We nun, ira vatvatraŋ me lolomaran wun ape iloke i Christ? 27Nava i tagai; apen kamam we gilala ape iloke ma avea; nava i Christ ta van ma, isei tete gilala ape neia ma avea. 28O manigiu o ine i Jesus me vava eleele alo vatine we roŋo, we vatvatogo ti vet wa, Kamiu we gilala inau, wa kamiu we gilala ape nau ma avea; wa na gate van matapuk ma, nava i gene me vatraŋ nau ma we nun, kamiu gate gilala ineia. 29Nau we gilala ineia, ape na me van ma amaia, wa ni me vatraŋ nau ma. 30O manigiu o ine ineira me sike si a takulia; nava isei gate map napanena avunana, ape qoŋina gate wesu tiqa. 31Wa o tanun ŋaŋ we qoqo amaira me nomtupua, we vet wa, I Christ ta van ma aŋaisa, pa ni te ge o vaglala we qoqo nan o vaglala ŋaŋ i gene iloke me ge ti? 32Ira Pharise we roŋotag o sul we terevaŋutŋut tamaike ape neia; wa ira oloolo liwoa wa ira Pharise me vatraŋ o tuan gagapalag si a takulia. 33O manigiu o ine i Jesus ti vet wa, O qoŋ gate purat ti na te qale toga amen kamiu, wa na te mule sur i gene me vatraŋ nau ma. 34Kamiu te sike inau, wa ikamiu tete ilo suar; wa ikamiu tete mule lai ilo vatine na we toga aia. 35Ira ta Judea we varvava apena wa, I gene iloke te va ivea wa inina tete ilo suaria? Ni te mule surira salsaleŋa amera ta Grekia, si a vatogo ira ta Grekia? 36O sava vavae iloke ni we vava wa, Kamiu te sike nau, wa ikamiu tete ilo suar inau; wa, Kamiu tete mule lai ilo vatine nau we toga aia?
37Naŋ alo paspasoane qoŋ, o qoŋ we poa tape lakalaka, i Jesus me tira, ti vet wa, Si isei qe marou, ni van ma surinau, ni ima. 38Isei qe nomtup inau, o pei lava ŋaŋ te tiqar lue nan natoqana, o pei maur, tama me rave ti. 39Wa ni me vava ape Vui ira sei te nomtupua te la; ape tagai tiqa o Vui we Roŋo, ape gate ge ronoga tiqa i Jesus. 40Wa o tuan sul we roŋotag mon o vavae ŋaŋ iloke, we vet wa, We nun i gene iloke o prophet. 41Naŋ rasei we sea wa, Iloke i Christ. Naŋ o tuaniu wa, I Christ te rowo lue ma a Galilea? 42O raverave gate vava si i Christ we van ma nan o veve i David, wa nan Bethlehem o vanua i David me toga ti aia? 43Wa me qeteg raka tamaine o vilewora amaira sul. 44Naŋ o tuaniu we maros we takulia; nava isei gate map napanena avunana.
45Wa ira gene vatraŋ me kel surira oloolo liwoa tara Pharise. Naŋ neira wa, Apesava kamiu gate lavia ma? 46Naŋ ira gene vatraŋ we valui gorora wa, O tanun gate vava we tuai tama i gene iloke. 47Naŋ ira Pharise we valui gorora wa, Me valera mulaŋ kamiu? 48Isei nanra moe tanun, si isei nanra Pharise, me nomtupua? 49Pa o sul iloke we loloqoŋ o lea, o sul vivnag. 50Naŋ i Nikodemus ti vet muneira wa (i gene me mule ti suria amoa, ineia ituwale nan neira), 51Nonina o lea si nina a veveg gap o tanun, wa gate roŋotag amoa ineia, wa gate gilala ape sava ni we ge? 52Naŋ ineira we valuia we vet munia wa, Iniko mulaŋ we ta Galilea? Ka sike waririag, ko qara ilo si o prophet gate wot ma a Galilea.
53[Wa ineira we mule tuwatuwale ilo imara:
Currently Selected:
John 7: MOTA
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
New Testament was published by the British and Foreign Bible Society in 1931.
John 7
7
1Paso nan i Jesus me mule kelkel a Galilea, ape ni gate maros we mule kelkel a Judea, apenra ta Judea me sike si a ge mateia. 2Wa o lakalaka nora ta Judea, o lakalaka paito, me noga. 3O manigiu o ine ira tasina we vava munia wa, Vareag, mule i Judea, si ra tiŋqoro mulaŋ anama a ilo mora o gagapalag ŋaŋ ko we ge. 4Ape tagai o tanun we gagapalag pata, pa we maros mona o tanun sul neira gilala ineia alo maea. Ko ta ge tamaike, ka ge ŋaŋalue ko mun o marama. 5Ape ra tatasina gai gate nomtup mora neia. 6O manigiu ilone i Jesus ti vet muneira wa, Naqoŋik gate wesu tiqa, nava naqoŋimiu we taurmate vagae apena. 7O marama tete ŋustup lai kamiu; nava we ŋustup nau, ape nau we gaganag we tira apena si mon o gagapalag we malkeke. 8Tur mule kalo momiu ape lakalaka; na tete mule kalo tiqa ape lakalaka iloke, ape qoŋik gate wesu vunvun tiqa. 9Ni me vava tamaike muneira, paso nan ni qale toga a Galilea.
10Nava ira tatasina me mule kalo veta ape lakalaka, paso nan ni qara mule kalo mona, nava ni gate mule lue pa me viro. 11O manigiu ilone ira ta Judea me sikea alo lakalaka, we vet wa, Avea ineia? 12Wa me terevaŋutŋut vaga qoqo alo sul ape neia; o tuaniu me vava wa, Ineia we wia: wa o tuaniu wa, Tagai, ni we ge lera o sul. 13Panava isei gate wawaŋ lue ape neia, ape neira we gogolo ra ta Judea.
14Wa alo tine lakalaka i Jesus we mule kalo ilo vatine we roŋo, ti vatvatogo. 15Wa ira ta Judea me mamakei apena we vet wa, I gene iloke we lolomaran gasavai, pa ni gate toga ilo amen i vatogo? 16Naŋ o manigiu ilone i Jesus ti valuira wa, Nok o lea vatogoa gate mok, nava amon i gene me vatraŋ nau ma. 17Si isei qe maros we ge non o maros, ni te gilala ape lea vatogoa, si amon God, si nau we vava matapuk. 18Isei we vava matapuna we sike sin ge ronoga kelua, nava isei we sike sin ge ronoga i gene me vatraŋia, ilone we nun, wa o liŋe variava gate toga alo ineia. 19I Moses wun me la mun kamiu o lea? wa isei tuwale nan kamiu gate gagapalag qalo o lea. Ape sa kam we sike si a ge mate inau? 20O sul we valui goro, si, O vui we tatas amaiko; isei we sike si a ge mate iniko? 21Naŋ i Jesus ti valui gorora we vava wa, Nau me ge o gagapalag tuwale, wa ikamiu nol me mamakei apena. 22O manigiu iloke i Moses me le mun kamiu o teve vaglala apena; (pa gate qeteg amen Moses nava amera tupunina;) wa kamiu we teve vaglala o tanun alo qoŋ mapsag. 23Si o tanun qe lav mona o teve vaglala alo qoŋ mapsag, nan o lea non i Moses wa tatavaul, ape sa kam we lologagara inau ape nau teve ge esu nol o tanun alo qoŋ mapsag? 24Turpea veveg vires nagoi: tur veveg o lea veveg we taniniga gese.
25Wa o tuan ta Jerusalem me vava wa, I gene wun iloke neira we sike si a ge mateia? 26Pa ilo, ni we wawaŋ lue, wa ineira gate gatogoroa. We nun, ira vatvatraŋ me lolomaran wun ape iloke i Christ? 27Nava i tagai; apen kamam we gilala ape iloke ma avea; nava i Christ ta van ma, isei tete gilala ape neia ma avea. 28O manigiu o ine i Jesus me vava eleele alo vatine we roŋo, we vatvatogo ti vet wa, Kamiu we gilala inau, wa kamiu we gilala ape nau ma avea; wa na gate van matapuk ma, nava i gene me vatraŋ nau ma we nun, kamiu gate gilala ineia. 29Nau we gilala ineia, ape na me van ma amaia, wa ni me vatraŋ nau ma. 30O manigiu o ine ineira me sike si a takulia; nava isei gate map napanena avunana, ape qoŋina gate wesu tiqa. 31Wa o tanun ŋaŋ we qoqo amaira me nomtupua, we vet wa, I Christ ta van ma aŋaisa, pa ni te ge o vaglala we qoqo nan o vaglala ŋaŋ i gene iloke me ge ti? 32Ira Pharise we roŋotag o sul we terevaŋutŋut tamaike ape neia; wa ira oloolo liwoa wa ira Pharise me vatraŋ o tuan gagapalag si a takulia. 33O manigiu o ine i Jesus ti vet wa, O qoŋ gate purat ti na te qale toga amen kamiu, wa na te mule sur i gene me vatraŋ nau ma. 34Kamiu te sike inau, wa ikamiu tete ilo suar; wa ikamiu tete mule lai ilo vatine na we toga aia. 35Ira ta Judea we varvava apena wa, I gene iloke te va ivea wa inina tete ilo suaria? Ni te mule surira salsaleŋa amera ta Grekia, si a vatogo ira ta Grekia? 36O sava vavae iloke ni we vava wa, Kamiu te sike nau, wa ikamiu tete ilo suar inau; wa, Kamiu tete mule lai ilo vatine nau we toga aia?
37Naŋ alo paspasoane qoŋ, o qoŋ we poa tape lakalaka, i Jesus me tira, ti vet wa, Si isei qe marou, ni van ma surinau, ni ima. 38Isei qe nomtup inau, o pei lava ŋaŋ te tiqar lue nan natoqana, o pei maur, tama me rave ti. 39Wa ni me vava ape Vui ira sei te nomtupua te la; ape tagai tiqa o Vui we Roŋo, ape gate ge ronoga tiqa i Jesus. 40Wa o tuan sul we roŋotag mon o vavae ŋaŋ iloke, we vet wa, We nun i gene iloke o prophet. 41Naŋ rasei we sea wa, Iloke i Christ. Naŋ o tuaniu wa, I Christ te rowo lue ma a Galilea? 42O raverave gate vava si i Christ we van ma nan o veve i David, wa nan Bethlehem o vanua i David me toga ti aia? 43Wa me qeteg raka tamaine o vilewora amaira sul. 44Naŋ o tuaniu we maros we takulia; nava isei gate map napanena avunana.
45Wa ira gene vatraŋ me kel surira oloolo liwoa tara Pharise. Naŋ neira wa, Apesava kamiu gate lavia ma? 46Naŋ ira gene vatraŋ we valui gorora wa, O tanun gate vava we tuai tama i gene iloke. 47Naŋ ira Pharise we valui gorora wa, Me valera mulaŋ kamiu? 48Isei nanra moe tanun, si isei nanra Pharise, me nomtupua? 49Pa o sul iloke we loloqoŋ o lea, o sul vivnag. 50Naŋ i Nikodemus ti vet muneira wa (i gene me mule ti suria amoa, ineia ituwale nan neira), 51Nonina o lea si nina a veveg gap o tanun, wa gate roŋotag amoa ineia, wa gate gilala ape sava ni we ge? 52Naŋ ineira we valuia we vet munia wa, Iniko mulaŋ we ta Galilea? Ka sike waririag, ko qara ilo si o prophet gate wot ma a Galilea.
53[Wa ineira we mule tuwatuwale ilo imara:
Currently Selected:
:
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
New Testament was published by the British and Foreign Bible Society in 1931.