Maariko 8
8
Yeesu kaayaana abhaanu bhiwumbi bhina ebhyokurya
(Mataayo 15:32-39)
1Mu-kabhaga kayo, okuriingʼaana na kutyo kweki abhaanu ꞉bhaariga bhari bhaafu, na bhatari na kiinu kya okurya, Yeesu ˆnaabhirikira abheeyigira bhaaye, ˆnaabhabhwira ati, 2“Enifwira ekigongo abhaanu bhanu, kwa okubha kyeekaaye nabho nsiku esatu, woori bhatari na bhyakurya. 3Nikabharaga bhagende eweebhwe na omweko, abhatura okurambukira mu-njira, na abhandi bhasookere areera.”
4Abheeyigira bhaaye mbamusubhya ati, “Anu kiri iibhara, atariwo muunu unu kaatura okunyoora emikaate gya okwisa abhaanu bhanu bhoone kutyo.” 5Yeesu ˆnaabhabhuusha ati, “Muri na mikaate eringa?” Mbamusubhya ati, “Kiri na mikaate mungati.”
6Yeesu ˆnaabhwira abhaanu bhoone kutyo bheekare ansi. ˆNaagega emikaate mungati giyo, ˆnaakumya Nyamuwanga, ˆnaabhuturabhutura, ˆnaayaana abheeyigira bhaaye, bhagabhire abhaanu. 7꞉Bhaariga bhari na bhiswi bhitooto, Yeesu ˆnaabhigega, ˆnaakumya Nyamuwanga ˆnaabhwira abheeyigira bhaaye ati bhyone bhagabhire abhaanu.
8Abhaanu mbarya, mbeeguta. Abheeyigira mbakumanya ebhisaaga bhya emikaate, bhikapo mungati. 9Abhaanu bhanu ꞉bhaariiye ebhyokurya ꞉bhaariga bhari bhaanu bhiwumbi bhina kutya. Yeesu ˆnaabharaga. 10꞉Aamarire okubharaga era, ˆneengira mu-bhwato na abheeyigira bhaaye, mbagenda mu-kyaro kya Darimanuta.
Abhafarisaayo abheenda ebhigwa okusooka ku-Yeesu
(Mataayo 12:38-42, 16:1-4)
11Bhunu Yeesu na abheeyigira bhaaye ꞉bhaayikire Darimanuta, Abhafarisaayo mbaaja ku-Yeesu. Mbaamba okubhambashaanya nawe insonga bhamuteganye. ꞉Bhaariga mbeenda abhakorere ekimenyegesho kinu ekyeresha ati asookere ku-Nyamuwanga.
12Yeesu ˆnaakema, ˆnaabhabhwira ati, “Kubhaki emwe abhaanu bha orwibhuro runu omwenda okurora ekimenyegesho? Kimari enibhabhwira ati, nitakubheeresha kimenyegesho kyonekyone.” 13ˆNaabhasiga, ˆneengira kweki mu-bhwato na abheeyigira bhaaye. Mbaamba orugendo rwa okwambukira ngʼambu.
Insaangʼarasha ya Abhafarisaayo na eya Yerode Antipa
(Mataayo 16:5-12)
14Abheeyigira bha Yeesu ꞉bhaariga bharabhiiywe okugega emikaate. Mu-bhwato ꞉bhaariga bhari na mukaate gumwi era. 15Yeesu ˆnaabhagonya ati, “Mwiyangarire na insaangʼarasha#8:15 Insaangʼarasha. Yeesu kaariingʼaanya insaangʼarasha iyo na obhusooyeresha bhunu Abhafarisaayo na Yerode Antipa ꞉bhaariga mbakora ku-bhaanu. Obhusooyeresha bhwa Abhafarisaayo ꞉bhwariga bhuri ameeyigisho ga orubheeyi. Yerode Antipa ꞉aariga ˆnaasooyeresha abhaanu bhabhe ku-njira mbiibhi. ya Abhafarisaayo na eya omukama Yerode Antipa.”
16Abheeyigira bhaaye mbaamba okwaikana abheene na abheene ati, “Kaaika kutyo, kwa okubha kitari na mikaate.” 17Yeesu ˆnaamenya ganu ꞉bhaariga mbaaikana, ˆnaabhabhuusha ati, “Kubhaki omwaika ati, mutari na mikaate? Mukyari okusombookerwa kiinu? Ndora emitima gyemwe ni mikomeeye? 18Muri na ameeso nawe mutakurora? Muri na amatwi nawe mutakuungwa? Na mutakuyiita kiinu? 19Bhunu ꞉naabhutuuyebhutuuye emikaate etaanu girya niiyaana abhaanu bhiwumbi bhitaanu, ꞉mwakumanyiishe bhikapo bhiringa ebhya ebhisaaga?” Mbamusubhya ati, “꞉Kyakumanyiishe bhikapo ekumi na bhibhiri.”
20“Na emikaate mungati girya okuyaana abhaanu bhiwumbi bhina, ꞉mwakumanyiishe bhikapo bhiringa ebhya ebhisaaga?” Mbamusubhya ati, “Bhikapo mungati.”
21ˆNaamara ˆnaabhabhuusha ati, “Na woori mukyari okusombookerwa?”
Yeesu kaawosha omuwofu
22Yeesu na abheeyigira bhaaye mbayika mw-igunguri rya Bheetisayida. Abhaanu abharebhe mbareeta muwofu wumwi. Mbeesaasaama Yeesu amukuunʼye-ko amuwoshe. 23Yeesu ˆnaagwata omuwofu uyo okubhoko, ˆnaamusoosha mw-igunguri riyo. ˆNaamufubhurira ku-meeso, ˆnaamutuurira-ko na amabhoko, ˆnaamubhuusha ati, “Woori, owurora kyonekyone?” 24Omuunu wurya ˆnaaringira, ˆnaaika ati, “Yee, enirora abhaanu, nawe bhari rwa amati ganu agaribhata.”
25Yeesu ˆnaamutuurira-ko kweki amabhoko ku-meeso, omuunu uyo ˆnaagenderera okuringira, ˆnaamba okurora ebhiinu bhyone kutyo kujomu. 26Yeesu ˆnaamubhwira ati, “Subha ewaawo, waasiga okusubha mw-igunguri okubhwira abhaanu.”
Peetero kaaika ati Yeesu niwe Kiriisitu
(Mataayo 16:13-20; Ruuka 9:18-21)
27Yeesu na abheeyigira bhaaye mbeemuka Bheetisayida, mbagenda mu-magunguri ga Kayijaariya-Firipi. Bhunu ꞉bhaariga mbaribhata ku-njira, Yeesu ˆnaabhabhuusha ati, “Angu abhaanu abhaanyaika ati ni anye niga?” 28Mbamusubhya ati, “Abhandi abhaaika ati, ni awe Yowana Omubhatiisha, abhandi abhaaika ni awe omuragi Eriya, abhandi abhaaika ni wumwi wa abharagi bha Nyamuwanga.”
29Yeesu ˆnaabhabhuusha ati, “Woori emwe, omwaika ati ni anye niga?” Peetero ˆnaamusubhya ati, “Ni awe Kiriisitu.”#8:29 Kiriisitu. Okuriingʼaana na okwaika ati Masiya. 30Yeesu ˆnaabhagaanya ati bhaasiga okubhwira omuunu woonewoone amangʼana gayo.
Yeesu kaaikira orwa okwamba okufwa na okusuuka kwaye
(Mataayo 16:21-28; Ruuka 9:22-27)
31Yeesu ˆnaamba okwiyigisha abheeyigira bhaaye ati, eyeendwa Omwana wa Adaamu anyansibhwe muno, aremwe na abhakaruka bha Abhayawudi, abhashengesi abhakuru, na abheeyigisha bha ebhiraagiro bhya Musa, bhakamara mbamwita, na orusuku rwa akasatu asuuke. 32Yeesu ꞉aariga ˆnaabhwira abheeyigira bhaaye riingʼana riyo abhweru. Nawe Peetero ˆnaamusira ku-mbarika, ˆnaamba okumugaanya asige okwaika amangʼana gayo. 33Yeesu ˆneekebhuukira, ˆnaaringira abheeyigira bhaaye. Kimwi ˆnaagonya Peetero ati, “Subha iinyuma Sitaani! Awe utakwiganiirisha aga Nyamuwanga, tari obhwiganiirisha bhwawo ni bhwa abhaanu era.”
34ˆNaabhirikira riisangi rya abhaanu na abheeyigira bhaaye, ˆnaabhabhwira ati, “Omuunu woonewoone akeenda okubha mwiyigira waani, asige okwiyenda omwene eetwike omusarabha gwaye,#8:34 Eetwike omusarabha gwaye. Kuyo ni kwikirisha Nyamuwanga ku-mutima gwawo gyone kutyo, na okubha wiikirisiishe Yeesu kufwira-ko. anseete. 35Omuunu woonewoone akeenda okuwonʼya obhurame bhwaye omwene, aribhubhusha. Na omuunu akabhusha obhurame bhwaye ku-nsonga yaani, na ku-nsonga ya Amangʼana Amajomu, uyo niwe ariwonʼya obhurame bhwaye. 36Omuunu kaabha na muyeeroki, akanyoora ebhiinu bhyone kutyo ebhya ku-kyaro kunu, akamara okubhinyoora, kimwi ˆnaafwa? 37Angu, omuunu kaatura okusooshaki kiyambaarire obhurame bhwaye? Kitariwo kiinu kyonekyone! 38Omuunu woonewoone unu arinyiswaririra anye, na ameeyigisho gaani, mu-rwibhuro rwa abhakosi bha amabhiibhi, na rutari rwitongeeye mu-meeso ga Nyamuwanga, Omwana wa Adaamu woone arimwiswaririra bhunu ariijira mu-bhugungyo bhwa Esemwene, ari amwi na bhaamaraayika abhataakatiifu.”
Currently Selected:
Maariko 8: kya
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2023, Wycliffe Bible Translators, Inc. All rights reserved