متا 5
5
کوه جؤر موعیظه کودن
1ایتأ روج عیسا بیدِه ایتأ پیله جِمئیت جمَ بوستٚد. بأزون ایتأ کوه جؤر بوشؤ و بینیشت، و اونی شأگردأنٚم اونی دؤر جمَ بوستٚده. 2بأزین شورو بوکوده اوشأنَ آمؤختٚن و بٚفرمأسته:
خوشبختی رأز
3«خوشأ بحألٚ فِقِرأن بٚبه کی خودایَ ایحتیأج دأرٚده #5:3 یونأنی: خوش بحألٚ اوشأن کی روحٚ دورون فِقِرٚد.چون آسمأنٚ ملکوت اوشأنی شینه.»
4«خوشأ بحألٚ غم بیدِکأن، چون دیلدأری گیرده.»
5«خوشأ بحألٚ اوشأنی کی فروتن ایسٚد، چون زیمینٚ ارث بٚرٚده.»
6«خوشأ بحألٚ اوشأنی کی عیدألت و اینصأفٚ رِه تشنه ایسٚد و اوشأنَ ویشتأیه، چون سِئرَ بٚده.»
7«خوشأ بحألٚ اوشأنی کی دیگرأنٚ رِه رحم کونٚده، چون اوشأنٚ رِه رحم بِه.»
8«خوشأ بحألٚ او دیلأن کی پأک ایسٚد، چون خودایَ تأنٚد بیدینٚد.»
9«خوشأ بحألٚ اوشأنی کی مردومٚ میأن صولح دکفتنٚ رِه تلاش کونٚده، چون اوشأن خودا زأکأن دؤخأده بٚده.»
10«خوشأ بحألٚ اوشأنی کی عیدألتٚ رأ دورون اَذِت و آزأر دینٚده، چون آسمأنٚ ملکوت اوشأنی شین بِه.»
11«خوشأ بحألٚ شومأن، وختی کی مردوم می خأطرٚ وأسی شٚمٚره رخشنَ گیرده و شٚمٚره جفا کونٚد و در موردٚ شومأن دورُغ بٚگد و هر جور نأجورٚ گب در موردٚ شومأن، خوشأنٚ زٚوأنٚ رو بأوٚرٚد. 12شأد و خوشحأل بیبید، چونکی آسمأنٚ دورون ایتأ پیله پأدأش شیمی رأفأ ایسأ. بدأنید کی قدیمٚ انبیأ اَمرأیم هطو بوکودٚده.»
نمک و نور رِه آمؤختٚن
13«شومأن جهانٚ نمکیدی. ولی اگه نمک خو خأصیت و مزه‌یَ جٚه دٚس بٚده، چوطو وأستی اونی خأصیت و مزه‌یَ اونَ وأگردأنِن؟ دِه هیچی رِه بٚکأر نأیِه، جغرز اَنکی فیشأده بٚبه و مردوم اونَ لقد دٚمٚج بوکونٚد.
14«شومأن جهانٚ نوریدی، هچین ایتأ شهرٚ مأنستَن کی ایتأ تپّه رو نٚهأ و نشأ اونَ چومأنٚ جَا، جیگأ دٚئنٚ. 15هطویم چرأغَ روشن نوکونٚده کی ایتأ کأسه جیر بٚنٚد، بلکی اونَ چرأغ‌پأیه رو نَهَد کی خأنه دورون همٚتأنٚ رِه، نور دتأوٚه. 16اَطویی، وئألید شیمی خورومٚ کردکأرأن نورٚ مأنستَن مردومٚ رو دتأوٚه، کی اوشأن اَ کردکأرأنٚ بیدینٚد و شیمی آسمأنی پئرَ ستأیٚش بوکونٚد.
آمؤختٚن تورأتٚ جَا
17«خیأل نوکونید کی بأمؤم موسا تورأت و قدیمٚ انبیأ بینیویشته‌یأنَ جٚه بین ببرم و بأطیلَ کونم، بلکی بأمؤم تأ اوشأنَ انجأم بدم. 18رأس‌رأسِی شٚمٚره گم کی آسمأن و زیمین جٚه بین نٚشٚده، مگه هو زمأت کی تورأتٚ همّه، حتّا اونی کوجه‌دأنه قیسمت، دأنه بٚه دأنه انجأم بوبوسته بی. 19بأزین اگه اینفر کوجه‌ترین حوکمَ توجه نوکونٚه و البأقیأنٚم بأموجه کی هوطو بوکونٚد، اون آسمأن ملکوتٚ دورون جٚه همه کوجه‌دأنه‌تر دؤخأده بِه. ولی هرکی خودا حوکمأنَ ایطأعت بوکونٚه و اوشأنٚ بأموجه، آسمأنٚ ملکوتٚ دورون پیله‌دأنه دؤخأده بِه.
20«شٚمٚره‌یٚم اَ هوشدأرَ دٚهٚم: تأ شیمی دیندأری، یوهودٚ دین عُلمأ و فریسیأنٚ دیندأری جَا بِیتر نٚبه، هیوخت آسمأنٚ ملکوتٚ دورون نتأنید بیشید.
آمؤختٚن در موردٚ زرخٚ بوستنٚ
21«بشتأوسته دأرید کی اَمی قدیمٚ نسلأنَ بوگفتٚده کی " قتل نوأکودٚن و هر کی‌یٚم قتل بوکونه، موحأکمه بِه". 22ولی من گم کی حتّا اگه تی برأرٚ جَا برزخَ بی، موحأکمه بی؛ و اگه کسی‌یَ شانتِه دؤخأنی، دادگأ دورون وأ جوأب پس فأدی. اگه تی ریفِقَ بی‌حورمتی گب بزنی، جهندمٚ آتش تی حقه.
23«بأزین اگه قوربأنی فأدأنٚ موقع #5:23 یونأنی: پیشکشی؛ هطویم ۲۴:۵ دورونمعبدٚ قوربأنی جیگأ رو، تٚرَه بٚخأطر بأیِه کی تی ریفِق تی جَا دیلخوره، 24تی قوربأنی‌یَ هویه قوربأنی جیگأ سٚر وِلَ کون و اوّل بوشو تی ریفِقٚ جَا معذرت خأیی و آشتی بوکون؛ بأزین بیأ تی قوربأنی‌یَ خودایَ پیشکش بوکون. 25وختی اینفر تی جَا شأکیه و تٚرَه دادگأ بردأندره، رأ دورون، تی موشکیلٚ اونی اَمرأ فیصله بٚدٚن، نوکونه کی تٚرَه قأضی‌یَ بیسپأره، و قأضی‌یٚم تٚرَه مأمورٚ دٚس فأدٚه، و زندأن دکفی؛ 26و اگه اَطو بٚبه، زندأنٚ دورون وأ بئیسی، و تأ دینأرٚ آخرَ فأندی، نتأنی بیرون بأیی.
آمؤختٚن در موردٚ زٚنأ کودن
27«بشتأوستید کی بوگفتٚده "زٚنأ نوکون." 28ولی من گم کی حتّا اگه شهوت و هوسٚ اَمرأ ایتأ زنأکٚ فأندٚری، هو موقع تی دیلٚ دورون اونی اَمرأ زٚنأ بوکودی. 29پس اگه تی رأستٚ چوم بأعیث بِه لغزش بوخوری، اونَ بٚکن و فیشأن، چون بِیتره تی جأنٚ ایتأ قیسمتَ، جٚه دٚس بدی، تأ اَنکی تومأمٚ تی وجود جهندمٚ میأن تأودأ بٚبه. 30و اگه تی رأستٚ دٚس بأعیث به لغزش بوخوری، اونَ وأوین و فیشأن، چون بِیتره تی جأنٚ ایتأ قیسمتَ، جٚه دٚس بدی، تأ اَنکی تومأمٚ تی وجود جهندمٚ میأن تأودأ بٚبه.
آمؤختٚن در موردٚ طلأقَ گیفتن
31«هطویم بوگفتٚده کی "هر کی خو زنَ طلأقٚ ده، وأستی اونَ ایتأ طلأقنأمه فأدٚه" 32ولی من شٚمٚره گم، هر کی خو زنَ جغرز خیأنٚت#5:32 یونأنی وأژه میأن تأنه زٚنأ، نأپأکی جینسی، زنأشوئی دورون خیأنٚت کودن و یا نأمشروع ایزدوأج کودن مأنی بٚده. هر چی دِه وأسی طلأقَ ده، او زنأکٚ زٚنأ کودنَ بأعیث بِه. و هرکی ایتأ طلأقٚ دأ زنأکٚ اَمرأ ایزدوأج بوکونه، اونم زٚنأ بوکوده.
آمؤختٚن در موردٚ قسم خوردن
33«وأزم بشتأوسته دأرید کی اَمی قدیمٚ نسلأنَ بوگفتٚده:" دورُغٚ قسم نوأخوردن و هر زمأت خودا نأم اَمرأ قسم بوخوردی، اونَ وفأ بوکون." 34ولی من گم: هیوخت قسم نوأخوردن، نه آسمأنَ کی خودا تخته، 35و نه زیمینٚ کی اونی پأ جیر نِهِه، و نه اورشلیمَ کی او پیله پأدیشأ شهر ایسه؛ هیتأ جٚه اَشأنَ قسم نوخورید. 36خودتٚ سٚرم قسم نوخور، چونکی نتأنی ایتأ مویَ سیأ یا سیفیدَ کونی. 37"بله" یا "نه" فقد او چی ایسه کی وأستی بیگی. جٚه اَن ویشتر گب زِئن، شیطان کأره.
آمؤختٚن در موردٚ اینتقأم فأگیفتن
38«بشتأوستید کی بوگفتٚده خطأکأرٚ آدمٚ موجأزأت، وأستی، او آسیبی کی فأرٚسأنه بو اَمرأ، موطأبٚق بٚبه، ینی "چوم، چومٚ عوض، و گأز، گأزٚ عوض". 39ولی من گم کی شریرٚ آدمٚ روبرو نوأ ایسأن! اگه اینفر تی رأستٚ دیمٚ چٚک بٚزِه، او وٚرم وأگردأن اونی طرف. 40اگه اینفر تٚرَه دادگأ فأکشأنِه کی تی قٚبأیَ تی جَا فأگیره، تی عبأیم اونَ فأدٚن. 41اگه ایتأ رومی سروأز تٚرَه دستور بٚدأ کی ایتأ بأرَ ای مأیل اونٚ رِه حمل بوکونی، تو دو مأیل حمل بوکون. 42اگه کسی تی جَا چیزی بٚخأسته، اونَ فأدٚن؛ و اگه تی جَا قرض بٚخأسته، اونَ دٚسٚ خألی اوسه نوکون.
آمؤختٚن در موردٚ دوشمنأنَ محبت
43«بشتأوستید کی گده: " تی همسأده‌یَ دوس بٚدأر" #5:43 لاویأن ۱۸:۱۹و تی دوشمن اَمرأ دوشمنی بوکون. 44ولی من گم کی شیمی دوشمنأنَ دوس بٚدأرید، و اوشأنی رِه کی شٚمٚره جفا کونٚد، دوعأیٚ خیر بوکونید. 45اگه اَطو بوکونید، آسمأنی پئرٚ رأس‌رأسِی زأکأنٚ مأنستَن انجأم بدأیید. چونکی اون خو آفتأبَ هم بدأن و هم خُبأنٚ رو دٚتأوأنه و خو وأرشٚم هم دوروستکأرأن و هم شرورأنٚ سٚر وأرأنه. 46اگه فقد او آدمأنی‌یَ دوس بٚدأرید کی شٚمٚره دوس دأرٚده، اَ کأرٚ رِه چی جأیزه‌یی فأگیرید؟ حتّا خرأبٚ بأجگیرأنٚم هه کأرَ کونٚده. 47اگه شیمی ریفِقأنٚ اَمرأ فقد مهرٚوأن بیبید، الباقیأنٚ اَمرأ چی فرقی کونید؟ حتّا بُت‌پرستأنم هه کأرَ کونٚده. 48پس شومأن وأستی کأمیل بیبید، هوطویی کی شیمی آسمأنی پئر کأمیله.
Currently Selected:
متا 5: GLK_NT
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2024 Transform Iran