ลามูลา 16
16
ลาฆู บือฌาดี นะ อิซมาเอน
1โซะ ซารัย_ บีนี นะ อับราม เตอ_ ฮอย นานะ ลาฆี. ญา อาดา ปราโซฮ นีบีนี ซืออูรัก_ นู ฌาดี ซือมียา ลูมอฮ นังฆรี อียิบ_ ปือนามา จะ_ ฮาฆา. 2กะฆีเตอ_ ซารัย มือเลา ฌางัน อับราม จะ_ “ลีฮัจ เลอ_ ตูฮัด บือซัยํ เดะ อาตัซ ตีเมา บรี กู อาดา นานะ ซืออูรัก โปด. บรี เกา ปี มาโซะ ซารี_ ปราโซฮ นีบีนี นะ กู. ดักกาดัก_ กู นะ บือเลฮ นานะ_ นู บือโปรจ มาแรฮ ดาตัก เดะ ปราโซฮ เลอ.”
อับราม โปด_ ญา ตูโรจ มูโลจ กะ ซารัย. 3กาลา อับราม ดูโดะ เดะ นังฆรี คานาอัน_ ซือปูโลฮ ตาโฮด ดัฮ_ ซารัย นู ฌาดี บีนี นะ อับราม_ ญา อาเกะ ฮาฆา_ ซือมียา ลูมอฮ นังฆรี อียิบ_ นู ฌาดี ปราโซฮ นีบีนี นะ ญา_ บรี ฌาดี บีนี นะ อับราม_ ลากี นะ ญา. 4อับราม มาโซะ ปี บือซามา ฌางัน ฮาฆา. กะฆีเตอ ฮาฆา บือโปรจ ดัฮ. กาลา ญา ลีฮัจ จะ_ ญา บือโปรจ ดัฮ_ ญา มือฌัฮ กะ ซารัย_ นู ฌาดี ตกเก นะ ญา.
5กะฆีเตอ_ ซารัย บือซูงุจ ฌางัน อับราม จะ_ “นู กู ซูซัฮ ปายัฮ กะฆีนี_ ฌาดี ลาฆู ซาลัฮ นะ เกา เลอ. กู บรี ปราโซฮ นีบีนี นะ กู_ ปี ดูโดะ บือซามา ฌางัน เกา. กาลา ญา ลีฮัจ จะ_ ญา บือโปรจ ดัฮ_ ญา บือเลฮ มือฌัฮ กะ กู. บรี ตูฮัด บือซัยํ เดะ อาตัซ_ กรัจ ฮูโกบ ลาฆู นะ กีตา จะ_ ฌาดี ลาฆู ซาลัฮ นะ เกา_ เฆอ จะ_ ฌาดี ลาฆู ซาลัฮ นะ กู”_ ญา จะ.
6ตาปี อับราม มือเลา ฌางัน ซารัย จะ_ “ลีฮัจ เลอ_ ปราโซฮ นีบีนี นะ เกา_ ญา อาดา เดะ บาวัฮ ฮูโกบ นะ เกา. กือนา บูวัจ เลอ_ ตูโรจ บือกะ ฮาตี นะ เกา ลีฮัจ จะ_ บือฆูนา ดัฮ.” กะฆีเตอ_ ซารัย มูซัยํ อูจะ กะ ฮาฆา_ บูวัจ บรี ญา ลารี ปี ลือปัซ เดะ มูคา นะ ญา.
7กะฆีเตอ ฮูลู บาลัก นะ ตูฮัด บือซัยํ เดะ อาตัซ ดาปัจ ฮาฆา_ เดะ ตือปัจ มาตา อาเย ซือบุยํ_ เดะ ปาดัก ตานัฮ ตูโฮยํ นู ลือฆา_ เดะ ตืองัฮ ฌาลัด นู ปี กะ นังฆรี ชูระ. 8ฮูลู บาลัก ญา ตาญา จะ_ “ฮาฆา_ ปราโซฮ นะ ซารัย เออ. เกา มาแรฮ ดาตัก ปัจ ดีฮา?_ เกา นะ ปี โซะ ดีฮา?”
ฮาฆา ตีกัฮ จะ_ “กู ลารี_ บรี ลือปัซ เดะ ซารัย_ ตกเก นะ กู.”
9ฮูลู บาลัก นะ ตูฮัด บือซัยํ เดะ อาตัซ_ มือเลา จะ_ “เกา บาลิ ปี ปาเระ เลอ_ ปี ซารี ตกเก นะ เกา. กือนา มือนีงัย กะ ปือมือเลา นะ ญา เลอ.” 10ฮูลู บาลัก อีตู_ มือเลา ฌางัน ญา ลาฆี จะ_ “กู นะ บูวัจ บรี บือแนฮ นะ เกา_ บือตามัฮ บาญะ_ กีรา ฮอย เตด ตือตู.” 11ฮูลู บาลัก นะ ตูฮัด บือซัยํ เดะ อาตัซ ญา มือเลา ลาฆี จะ_
“นี เลอ_ เกา บือโปรจ ดัฮ_ นะ ดูโดะ เดะ อาปี นานะ กีลากี
นะ ตืองะ ปือนามา จะ_ อิซมาเอน
ซาเบะ ตูฮัด บือซัยํ เดะ อาตัซ ญา ดืองัยํ ดัฮ
บือเลฮ ตาฮู ดัฮ จะ_ นู เกา ซูซัฮ ปายัฮ กะฆีนี. #16.11 ปือนามา จะ “อิซมาเอน” ฌาดี จะ “ตูฮัด ญา ดืองัยํ”.
12นานะ นะ เกา_ นะ ฌาดี ซือมียา_ นู ซือรูปา บือกะ กูดา ฮูตัด บาซา ดือมิ.
ญา นะ บือลาวัด_ ฌางัน ซือมียา ซือมูฮา.
โกะ ซือมียา ซือมูฮา นะ บือลาวัด_ ฌางัน ญา.
ญา นะ ดูโดะ รือมัก โซะ ฮือลด มูคา โกะ นะบรานะ นะ ญา ซือมูฮา”_ ญา จะ.
13กะฆีเตอ_ ฮาฆา บลาโลก ปือนามา นะ ตูฮัด บือซัยํ เดะ อาตัซ_ นู มือเลา ฌางัน ญา จะ_ “ตูฮัด เออ_ เกา ฌาดี ตูฮัด นู ฮัจลีฮัจ กู.” ซาเบะ ญา มือเลา จะ_ “ซูโงฮ เฆอ_ ตือปัจ อีนี_ กู บือเลฮ ลีฮัจ ตูฮัด_ ญา นู ฮัจลีฮัจ กู?#16.13 กู บือเลฮ ลีฮัจ ตูฮัด_ ญา นู ฮัจลีฮัจ กู บาซา ฮีบรู ญา มือเลา กะฮามี ซูโงฮ โกะ ซือมียา ปานัย โปด_ เตด ตือตู. ซือตืองัฮ จะ_ ญา ซือรูปา กู บือเลฮ ลีฮัจ ตูฮัด_ ตาปี ซูดัฮ ลีฮัจ อาดา ฮีโดะ ลาฆี.” ญา จะ. 14กะฆีเตอ_ ตลาฆา อีตู_ อาดา ปือนามา จะ_ ตลาฆา ลาฮัย-รอย.#16.14 ปือมือเลา “ตลาฆา ลาฮัย-รอย”_ ฌาดี จะ_ ตลาฆา นะ ตูฮัด นู ฮีโดะ_ นู ฮัจลีฮัจ กู. ตลาฆา อีตู_ อาดา เดะ ตืองัฮ ตูโปะ คาเดด_ ฌางัน ตูโปะ เบเรด.
15กะฆีเตอ_ ฮาฆา ดูโดะ เดะ อาปี_ บือเลฮ นานะ กีลากี บรี กะ อับราม. อับราม ญา ตืองะ ปือนามา กะ นานะ_ นู ฮาฆา ดูโดะ เดะ อาปี ดัฮ_ จะ_ อิซมาเอน. 16กาลา ฮาฆา ดูโดะ เดะ อาปี นานะ อีตู_ อับราม อูมอยํ ลาปัด ปูโลฮ นัม (86) ตาโฮด ดัฮ.
Currently Selected:
ลามูลา 16: ULBIBLE
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo