ลามูลา 7
7
อาเย อาโปฮ ดือนียา
1กะฆีเตอ_ ตูฮัด บือซัยํ เดะ อาตัซ_ ญา มือเลา ฌางัน โนอา จะ_ “กู ลีฮัจ จะ_ เกา เลอ_ นู ฌาดี ซือมียา บาฌิ ตือปัจ เดะ กาลา อีนี. กะฆีเตอ_ เกา มาโซะ ปี กะ ดาลับ กาปัน บือซัยํ อีนี_ ซา เกา ฌางัน นะบรานะ นะ เกา ซือมูฮา. 2กือนา อาเมด บือปี ซามา_ โกะ บือนาตัก นู จรัฮ บาฌิ_ ซือมาจับ ตูโฌฮ ฆู_ อายา บาปา. โกะ บือนาตัก นู ตะอารัฮ_ ซือมาจับ ซือฆู_ อายา บาปา. 3โกะ บูโรก เดะ ลาแงะ_ ซือมาจับ ตูโฌฮ ฆู_ อายา บาปา. กะฆีเตอ_ นะ บูวัจ บรี โกะ บือนาตัก อาดา บือแนฮ ลาฆี_ ราตา เดะ ดือนียา_ ฮอย เตด นะ มาตี ปี ฮาบิฮ” ตูฮัด ญา จะ. 4“ซาเบะ จะ_ อาดา ตูโฌฮ อารี ลาฆี_ กู นะ บูวัจ บรี ฮูฌัด ตูโตฮ เดะ ดือนียา_ ปัจ ปูโลฮ อารี_ ปัจ ปูโลฮ มาลับ. บือนา ฮีโดะ ซือมูฮา_ นู กู บือฌาดี ดัฮ เตอ_ บือนา อีตู เลอ_ กู นะ บูวัจ บรี ฌาฮานัม_ ฮาบิฮ เดะ ดือนียา” ตูฮัด ญา จะ. 5กะฆีเตอ_ โนอา บูวัจ ตูโรจ กะ ปือมือซัด นะ ตูฮัด บือซัยํ เดะ อาตัซ_ ซือมูฮา.
6กาลา อาเย อาโปฮ ดือนียา_ โนอา อูมอยํ นะ ญา_ นัม ราตุซ (600) ตาโฮด ดัฮ. 7กะฆีเตอ_ โนอา ฌางัน อานะ บีนี นะ ญา_ ฌางัน มือนาตู นะ ญา ซือมูฮา เตอ_ กูญา ปาคัจ ปี มาโซะ กะ ดาลับ กาปัน_ นะ บรี ลือปัซ เดะ อาเย อาโปฮ เลอ. 8โกะ บือนาตัก นู จรัฮ บาฌิ_ โกะ บือนาตัก นู ตะอารัฮ เตอ_ โกะ บูโรก โปด_ โกะ บือนาตัก มือรากะ เดะ ตานัฮ เตอ_ 9ญา มาแรฮ อายา บาปา ซือมูฮา_ ซือฆูๆ_ มาโซะ กะ ดาลับ กาปัน ฌางัน โนอา_ บือกะ ตูฮัด เดะ อาตัซ_ ปือซัด กะ โนอา ดัฮ. 10อาดา ตูโฌฮ อารี ลาฆี_ อาเย นะ อาโปฮ ดือนียา.
11ตานา โนอา อูมอยํ นัม ราตุซ (600) ตาโฮด ดัฮ_ เดะ บูลัด ดูวา_ อารี ตูโฌฮ บือลัซ เตอ_ อารี อีตู เลอ_ มาตา อาเย เดะ บาวัฮ ตานัฮ เตอ_ ญา ซือบุยํ อาเย ตรือเบะ บาญะ. เดะ อาตัซ ลาแงะ โปด_ บูกา จือลัฮ ดัฮ. 12อาดา ฮูฌัด ตูโตฮ เดะ ดือนียา_ บาญะ_ ปัจ ปูโลฮ อารี_ ปัจ ปูโลฮ มาลับ. 13เดะ อารี อีตู เลอ_ โนอา ฌางัน อานะ บีนี นะ ญา_ นานะ กีลากี นะ ญา_ เชม_ ฮาม_ ฌางัน ยาเฟด_ ฌางัน มือนาตู ตีฆา อูรัก นะ ญา ฌูฆา_ กูญา ปาคัจ มาโซะ กะ ดาลับ กาปัน.
14ลูมอฮ กูญา_ ฌางัน กาวัด บือนาตัก เดะ ฮูตัด_ บือกะ บือแนฮ นะ ญา ซือมูฮา เตอ_ กาวัด บือนาตัก นู นะ ซูโรฮ บือกรือฌา_ บือกะ มาจับ นะ ญา ซือมูฮา_ กาวัด บือนาตัก มือรากะ เดะ ตานัฮ_ บือกะ บือแนฮ นะ ญา_ กาวัด บูโรก_ บือกะ บือแนฮ นะ ญา ซือมูฮา_ ฌาดี จะ_ บือนาตัก อาดา ซายะ_ ราตา มาจับ เตอ_ 15กูญา ซือมูฮา ปาคัจ มาโซะ กะ ดาลับ กาปัน_ ฌางัน โนอา. บือนาตัก ซือมูฮา_ นู บือญาวา บือเลฮ เตอ_ ญา มาโซะ ซือกาลี ซือฆูๆ. 16อาดา อายา บาปา_ ราตา มาจับ เตอ_ ญา มาโซะ ปี_ ตูโรจ บือกะ ปือมือซัด นะ ตูฮัด_ นู บือเลฮ ปือซัด ดัฮ. กะฆีเตอ_ ตูฮัด บือซัยํ เดะ อาตัซ_ ญา ตูโดก ปีตู กาปัน ดัฮ.
17กะฆีเตอ_ อาเย อาโปฮ ดือนียา ปัจ ปูโลฮ อารี_ พรัด บาญะ_ พรัด บาญะ_ บรี กาปัน อีตู ตีโมน ตีงี เดะ ตานัฮ. 18อาเย โปด_ อาโปฮ ดัฮ_ เดะ อาตัซ ดือนียา_ พรัด บาญะ_ พรัด บาญะ_ ฌู กาปัน อีตู ตีโมน เดะ อาตัซ อาเย. 19อาเย อาโปฮ_ พรัด บาญะ_ พรัด บาญะ_ ตือดะ บูเกะ นู ตีงี เดะ กาวัด_ ตาลับ_ ราตา ซือมูฮา ดัฮ. 20อาเย อาโปฮ ตีงี เดะ บูเกะ อีตู_ ลีมา บือลัซ ตก. 21กะฆีเตอ_ โกะ บือนาตัก นู ฮีโดะ เดะ ดือนียา มาตี ซือมูฮา_ โกะ บูโรก เตอ_ โกะ บือนาตัก บือเลฮ ซูโรฮ โปด_ โกะ บือนาตัก เดะ ฮูตัด_ โกะ บือนาตัก นู มือรากะ เดะ ตานัฮ ซือมูฮา_ มาตี ฮาบิฮ ดัฮ. ลูมอฮ ซือมียา ซือมูฮา โปด_ มาตี ฌูฆา. 22บือนา ซือมูฮา เดะ ดือนียา_ นู บือญาวา ฌางัน ฮีโดก เตอ_ มาตี ฮาบิฮ ดัฮ เลอ.
23กะฆีเตอ_ ตูฮัด บูวัจ บรี บือนา ฮีโดะ ซือมูฮา เดะ ดือนียา ฌาฮานัม ฮาบิฮ ดัฮ_ โกะ ซือมียา เตอ_ โกะ บือนาตัก โปด_ โกะ บือนาตัก มือรากะ ฌูฆา_ โกะ บูโรก เดะ ลาแงะ เตอ_ ลูมอฮ อีนี ซือมูฮา_ ฌาฮานัม ฮาบิฮ_ เดะ ดือนียา ดัฮ. อาดา ซา โกะ โนอา_ ฌางัน โกะ ลูมอฮ นู ดูโดะ บือซามา ฌางัน ญา_ เดะ ดาลับ กาปัน เตอ_ ลือเบฮ ซา กูญา อีตู เลอ_ นู ลือปัซ เดะ อาเย อาโปฮ ดัฮ. 24กะฆีเตอ_ อาเย อาโปฮ ดือนียา_ เตด กริก_ รอจ กะ ซือราตุซ ลีมา ปูโลฮ (150) อารี.
Currently Selected:
ลามูลา 7: ULBIBLE
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo