Génesis 39
39
José ex aju t-xu'jil Potifar
1Tponlen k'i'n José max tuj Ejipt cyu'n aj Ismael, xi cyc'ayin te Potifar aju aj Ejipt. Ate xjal lu ajbeltok te Faraón ex nejeneltok cye soldad cwentil te. 2Atzunte Kman attok tuc'il José, ex ba'n e'la tk'ij tuj tja tpatrón aju aj Ejipt. 3El tnic' tpatrón ti'j attok Kman tuc'il, ex tcyakilju in tbincha'ntok, ba'ntok nne'la. 4Cyja'tzun tten o tzalaj Potifar ti'j José, oc tk'o'n te ajbel te ex te tmayordom tuj tja, ex xi tk'o'n toclen ti'j tcyakilju attok tuc'il. 5Tej tcyaj tk'o'n Potifar tcyakil ak'untl ex tcyakilju attok te tuj tcwent José, o cub tcy'iwlan Kman nok tu'n tlaj José, ex tc'am t-xtalbil Kman tuj tja ex ti'j ttx'otx'. 6Cyaj tk'o'n tuj tcwent José tcyakilju attok te. Tu'ntzun jlu minti'tl o bisun Potifar ti'j tak'un, nok o'cx ti'j twa.
Tbanilxix que'yin twitz José, ax icx t-ximlal. 7Tejtzun tel k'ij, aju t-xu'jil Potifar oc tk'o'n twitz ti'j José, ex xi tma'n te cyja':
—Tancuya wuc'ile, chi xu'j.
8Atzunte José minti' o tajbe, ex xi tma'n te t-xu'jil tpatrón cyja':
—Bintza, minti' in baj tc'u'j npatrone wi'je ti'j tcyakilju at tuj tja ex o tzaj tk'o'n tuj ncwente tcyakilju at te. 9Tuj ja lu mi a'l juntl mas ma' toclen nwitze, ex minti' in cub t-xc'ayin jun ti'xti weye, nok o'cx aya tu'nju aya t-xu'jil. ¿Tza'ntzun tten tu'n nbinchanteye matij il lu ex tu'n nbinchanteye il twitz Dios? Chi José.
10Cycyakil k'ij in xi tma'ntok te José tu'n tcub tan tuc'il ex tu'n tcub ten ttxlaj. Atzunte José minti' xi tk'o'n ambil te. 11At jun k'ij ocx José tuj ja tu'n tbant tak'un, ex mi a'ltok jun xjal at tuj ja. 12Tzyet José ti'j t-xbalun tu'n xu'j ex xi tma'n te cyja':
—Tancuya wuc'ile, chi xu'j.
Atzunte José etz ojkelan, ex ax cyaj ten t-xbalun tuj tk'ab xu'j. 13Tejtzun tlonte xu'j otok tz'etz ok José ex ax cyaj ten t-xbalun tuj tk'ab, 14e tzaj ttxco'n ke majen ate'tok tuj tja ex xi tma'n cye cyja':
—Cybintze, tzaj ti'n nchmile jun aj Hebrey tu'n t-xmayin ki'j. Soctz wi'je tu'n tcub tan wuc'ile; atzun weye ẍin jaw sch'ine cyuw wen. 15Tejtzun ẍin jaw sch'ine, sex ok, ex ax xcyaj tz'ak t-xbalun wuc'ile, chi xu'j.
16Cub tk'o'n t-xbalun José ttxlaj tejxi tpon tchmil. 17Tej tpon tchmil ax yol xi tma'n te, ex chi cyja': Aju majen aj Hebrey tzaj ti'na, soctz wi'je tu'n tcub tan wuc'ile. 18Tejtzun ẍin jaw sch'ine sex ok, ex ax xcyaj tz'ak t-xbalun wuc'ile. 19Cyja'tzun ma tbincha tmajena wi'je, chi xu'j te tchmil.
Tejtzun tbinte tpatrón José tcyakilju otok tzaj tma'n t-xu'jil, tzaj nimxix tk'oj. 20Tzajtzun tzyu'n José tu'n tpatrón ex ocx tk'o'n tuj tjayil tze' jatum ate'tok ke pres otok che ocx tk'o'n rey. Axtzun cyaj ten tuj pres. 21Atzunte Kman attok tuc'il José, tzaj k'ak'an tc'u'j ti'j, ex o tz'onin ti'j tu'n tel ba'n tuj twitz nejenel cyibaj ke pres. 22Cycyakil ke pres ate'tok tuj tjayil tze' lu, e cyaj tk'o'n nejenel tuj tcwent José, ex ate José o k'mante tcyakil ak'untl in banttok cyxol. 23Minti'tltok tbis nejenel ti'j tu'n tbaj tque'yin aju attok tuj tcwent José, tu'nju attok Kman tuc'il José ex o tz'onin ti'j, cyja'tzun, tcyakil aju in bant tu'n ba'n nne'la.
Currently Selected:
Génesis 39: MAMH
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Mam del Norte © Sociedades Bíblicas Unidas 1993