GENESA 4
4
Ta Kayini na Avele.
1Adamu a tiva Evha, nsati wa yena, kutani a tika nyimba, a veleka Kayini, a ku: “Ndzi kumile munhu ha Yehovha.” 2A engeta a veleka ndzisana ya yena Avele; Avele a a ri murisi; Kayini, yena, a a rima misava. 3Endzhaku ka masiku man'wana, Kayini a humesela Yehovha nhlengo wa mihandzu ya misava. 4Avele a humesa, na yena, mativula ya ntlhambi wa yena, ni mafurha ya wona. Kutani Yehovha a khensa Avele ni nhlengo wa yena, 5kambe a nga langutanga hi ku tsaka Kayini, ni nhlengo wa yena; kutani Kayini a kariha ngopfu, ni mombo wa yena wu khanyana. 6Kutani Yehovha a byela Kayini, a ku: “Xana u karihela yini, ni mombo wa wena wu khanyana ha yini? 7Loko u endla swinene, xana a u nga ti khensiwa xana? Kambe loko u nga endli swinene, vudyoho byi tshamile enyangweni; ku navela ka byona ku ta ku wonga; kambe wena, u fanele ku byi hlula.”
8Kutani Kayini a vulavula na Avele, ndzisana ya yena; kutani, kuteloko va ri emasin'wini, Kayini a pfukela Avele, ndzisana ya yena, a n'wi dlaya.
9Kutani Yehovha a ku eka Kayini: “Makwenu Avele, u kwihi?” Yena a ku: “A ndzi n'wi tivi. Xana hi mina mulanguteri wa makwerhu-ke?”
10Kambe Yehovha a ku: “U endle yini? Rito ra ngati ya makwenu ri huwelele emisaveni, ri ta eka mina. 11Sweswi, u ta rhuketeriwa hi misava leyi nga ahlamisa nomu wa yona, yi amukela ngati ya makwenu hi voko ra wena. 12Kutakuloko u rima misava, yi nga ka yi nga ha ku nyiki mihandzu ya yona; u ta va la pepetsekaka ni la fambafambaka emisaveni.”
13Kutani Kayini a ku eka Yehovha: “Ku biwa ka mina kukulu, ku tlurisa lexi ndzi nga xi pingaka. 14Waswivo, u ndzi hlongole namuntlha ehenhla ka misava, ndzi ta va ndzi hambene ni mombo wa wena, kutani ndzi ta va mupepetseki ni mufambi emisaveni, kutani mani na mani loko a ndzi kuma, u ta ndzi dlaya.”
15Kutani Yehovha a ku eka yena: “Kungakuloko munhu a dlaya Kayini, Kayini u ta rihiseriwa kantlhanu na kambirhi. Kutani Yehovha a fungha Kayini, hileswaku un'wana ni un'wana la n'wi kumaka a nga ti n'wi dlaya.” 16Kutani Kayini a suka emahlweni ka Xikwembu, a ya tshama etikweni ra Nodo, evuxeni bya Edeni.
Ta Vana va Kayini.
17Kutani Kayini a tiva nsati wa yena; kutani a tika nyimba, a veleka Enoko; endzhaku, a aka muti, a thya muti lowu hi vito ra n'wana wa yena Enoko. 18Kutani Irada a velekeriwa Enoko; kutani Irada a va tata wa Mehuyaele; Mehuyaele a va tata wa Metuxaele; Metuxaele a va tata wa Lameke. 19Kutani Lameke a teka vasati vambirhi, vito ra un'wana a a ri Ada, ni vito ra un'wana a a ri Sila. 20Ada a veleka Yabala; hi yena loyi a nga tata wa lava hanyaka emitsongeni va ri ni mitlhambi. 21Vito ra ndzisana ya yena a a ri Yubala, hi yena loyi a nga tata wa hinkwavo lava yimbaka magupu ni tinanga. 22Sila na yena a veleka Tubala-Kayini, loyi a tshameke a fula mitirho ya nsuku ni nhumbu. Makwa wa xisati wa Tubala-Kayini a a ri Naama.
23Kutani Lameke a byela vasati va yena, a ku: “Ada na Sila, twanani rito ra mina! Vasati va Lameke, yingisani ku vulavula ka mina! Ndzi dlele munhu hikwalaho ka mbanga ya mina, ni jaha hikwalaho ka felangati ra mina. 24Kayini u rihiseriwa kantlhanu na kambirhi, yena Lameke, eka ntlhanu wa makume ni makume mambirhi, na ntlhanu na mambirhi!”
25Adamu a engeta a tiva nsati wa yena, kutani a veleka n'wana wa wanuna; a n'wi thya vito ra Seta (ku veka), a ku: “Hi leswi Xikwembu xi nga ndzi vekela vana ematshan'weni ya Avele, loyi a nga dlawa hi Kayini.” 26Seta na yena a veleka n'wana wa wanuna, loyi a n'wi chulaka vito ra Enosi. Hi wona nkarhi lowu va sungulaka ku khongela vito ra Yehovha.
Currently Selected:
GENESA 4: TSO29
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.