Pe eya 12
12
MAANA GE ABRAHAM NE
(12:1—25:18)
Tolla ge Abram ne
1Bage ɗiŋnedin jan Abram go: «Ya̰ mo suwal, ne mo kon twala ma, ne yàl ge mo bá ne, mo mbo ge suwal ge mbi ne mbo ŋgay mo ya ya#Tkm 7:2-3, Ibr 11:8.. 2Mbi mbo saŋge mo pehir naa ge ɓase gḛ ma, mbi mbo e wak busu mo pal, mbi mbo pate mo. Naa mbo ɓol wak busu dḛ da ne mo ta. 3Mbi mbo e wak busu ge naa ge a ne e wak busu mo pal ma pal, mbi mbo vḛne mbi wak ge naa ge a ne vḛne wak mo pal ma pal. Ne mo ta, pehir ge ne suwar pal ma pet a mbo ɓol wak busu#18:18, 22:18, 26:4, Tkm 3:25, Gal 3:8-9..»
4Abram ɗage mbo dimma ne Bage ɗiŋnedin ne jya̰ na go. Lot mbo poseya ne na me. Swaga ge Abram ne ɗage ne suwal Haran go, ka da ne del wara ɓyalar para anuwa̰y 5Abram wan na gwale Saray ne Lot ge na sá, abe na kaŋ gan ma pet, ne na mo̰r ge na ne ɓó ne suwal Haran ya ma pet, a ɗage mbo suwal Kanan. A det ya suwal Kanan go. 6Abram kale suwal pal digi ɗiŋ det ya uwara Chen ge swaga sḭḭm More ge ne suwal Sichem go. Swaga mbe go, Kanan ma ne katɗa ne suwal mbe go.
7Bage ɗiŋnedin dyan tene Abram ta, jan na go: «Mbi mbo hon mo pehir suwal mbe no go.» Abram sin twal tuwaleya swaga mbe go ne Bage ɗiŋnedin pe, na ge ne dya̰ tene na ta. 8Ne swaga mbe go, gwan mbyare mbo njal ma pe ya, Betel le ge ham ya, mbo ɗur na gur ge suwal Betel ma ne Ay buwal zi, Betel gá na le sya, Ay kat na le ham me. Sin twal tuwaleya swaga mbe go ne Bage ɗiŋnedin pe, gá kaɗeya ne dḭl ge Bage ɗiŋnedin ne. 9Abram ka gwan zwagre zḛ zḛ, ɗiŋ det mbo le mbii ya.
Baktar yan Abram mbo suwal Masar
10Baktar det suwar pal. Ne jo̰ kyamal mbe ka gḛ ɗe, Abram ɗage mbo kat mbay suwal Masar ya. 11Swaga ge ne gá gwa wat suwal Masar diŋ ɗe, jan na gwale Saray go, mbi kwa kwa go mo kale gḛ ge be to. 12Swaga ge Masar ma ya kwa mo ya, a ma jan ta go: «A na gwale ne!» A ma hun mbi, a ya̰ mo. 13Mbi kaɗe mo, jya̰ nama go, mo mbi ná vya ge gwale ne, go no, ne mo pe, a ba ke mbi kwaɗa, ne mo pe me, a ba ya̰ mbi kat ne ndwara.
14Swaga ge Abram ne dé ya suwal Masar go, Masar ma kwar go na gwale kale gḛ ge be to. 15Naa ga̰l ge temel ge Faraon ne ma kwa na, a mbo dore na Faraon ta. A gene na ya Faraon diŋ. 16Ne na pe, Faraon ke Abram kwaɗa, hon na gii ma, ne nday ma, ne kwara ma, ne jambal ma, ne dore ma, ne kale ma me. 17Amma Bage ɗiŋnedin iyal Faraon ma ne na yàl ne mbogom ge ɓaŋlaŋ ne Saray ge Abram gwale pe. 18Faraon tol Abram ya, jan na go: «Kyaɗa mo ba ke mbi go! Kyaɗa mo ba jan mbi go, na mo gwale ne to ɗaa? 19Kyaɗa mo ba jan go, na mo ná vya ne ɗaa? Mbi ame na gwale no bàŋ ɗar! Ndi, mo gwale no, ame na, mbo!» 20Faraon hon na naa na wak go, nama ya̰ Abram ma ne na gwale, ne na kaŋ kwaɗa ma pet mborra.
Currently Selected:
Pe eya 12: FGN2013
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
La Bible en langue Kim © Alliance Biblique du Tchad, 2013.