Luke 23
23
Jesu unosumikilisiwa mbeli kwa Pilato
(Matewu 27:1-2, 11-14; Mako 15:1-5; Johani 18:28-38)
1Kudwapo gubungano lose le bathu likamilika likan'yisa kuna Pilato. 2Ngono bakatangisa kuntilika nlandu beti, “Tawana nlume iwoyu edzimidza itjaba tjedu, kakale etidzibisa kulipa lukhetho kuna Kaisara, kati ndiye Mesiya ali mambo.”
3Ndizo Pilato kabhuzwa Jesu kati, “Apa ndiwe mambo we Bajuta kene?”
Jesu kashandula eti, “Waleba.”
4Ngono Pilato kadwa bapirisiti bakulu ne mbunga we bathu kati, “Anditobona nlume iwoyu nlandu.”
5Koga bakasimisa beti, “Unodzonga bathu mu Judiya yose nge kudiya kukwe. Wakatangisa ku Galili, kadzina kawoti muno.”
Jesu eyisiwa kuna Herode
6Kukati Pilato ehwa ikoku, kabhuzwa kuti kene nlume iwoyu ate N'galili. 7Kukati ehwa kuti Jesu unodwa mu ntuthu unobusiwa ndi Herode, kantumila kuna Herode, wakabe ali mu Jerusalema mu nsi iyeyo 8Herode kati ebona Jesu, kashatha kwazo, ngobe kuli kwetjinga kwaakayemula kumbona. Muna tjaakabe ahwa nge kukwe, wakabe egalabgwe kuti unowombona eyita matjenamiso. 9Ndizo kambhuzwa bhuzo njinji kwazo, koga Jesu kasishandule ne ing'ompela yadzo. 10Bapirisiti bakulu ne badiyi be nlayo, bakabe bali mile ipapo bentilika nlandu bakasimisa. 11Ipapo Herode ne babhayani babe bakanlingila pasi ben'dadila. Bakaambadza hazu yakanaka kwazo, bakambgwiliza kuna Pilato. 12Ngono zhuba ilelo Herode na Pilato bakabe bazwalani, ngobe kutanga bakabe bakabengana.
Jesu unotilikwa nlandu kuti abulawe
(Matewu 27:15-26; Mako 15:6-15; Johani 18:39—19:16)
13Pilato kakubunganya bapirisiti bakulu ne batungamili ne bathu, 14ngono kati ku bali, “Mandizhisila nlume iwoyu muti unodiyila bathu ntome. Ndambhuzwisisa mbeli kwenyu, ngono andizowana ali nlandu muna zose zwamunoleba. 15Kose na Herode dumbu aazombona nlandu, ngobe wanshandusila ku tili. Akuna tjaakatjinya iwoyu nlume tjaangabulayigwa. 16Ndizo, ndowonloba, ansunungula.”#23:16: Dzimwe hwalo dza ntolo dze Bhaibhili dzopapha ndimana 17: “Nge tjilenje, Pilato wakabe akafanila kubasunungulila mmwe we basungwa nge nsi we Nzano we Kupinda pezhugwi.”
18Bathu bose bakamimila beti, “ngaabulawe nlume iwoyu! Mutisunungulile Bharabhasi!” 19Bharabhasi wakabe asungigwa kubulaya ne kumusa phandu mu nzi nkulu.
20Ngoyemula kusunungula Jesu, Pilato kabakumbila kakale, 21koga bakamimilila mbeli beti “Mumbambule! Mumbambule!”
22Gwe butatu kati ku bali, “Nge kutini? Watjinyani? Andizombona nlandu, waangabulayigwa. Ndizo ndowonloba, ansunungula.”
23Koga bakabe besimisa nge mahwi apezhugwi kuti abambugwe, ngono abo mahwi kakunda. 24Pilato kabadwa kati kuthamwe sekwa bakabe beshaka. 25Kasunungula nlume wakabe asungigwa pandusa bathu ne kubulaya, iye wabakabe beshaka, ngono kabapa Jesu kuyita tjabanoda.
Jesu ebambugwa
(Matewu 27:32-44; Mako 15:21-32; Johani 19:17-27)
26Babhayani bakati beyenda na Jesu bakashangana na Simoni unodwa ku Sirene, wakabe engina edwa kuzhe kwe nzi nkulu, bakampikisa tjileyanyo ali shule kukwe.
27Ngono bathu banji bakantobela, kose ne bakadzi bakabe bekuwa benlilila. 28Koga Jesu katendebuka, kati ku bali, “Bakololokadzi be Jerusalema, musindililile, koga muzwililile, imwi ne bana benyu. 29Ngobe misi inowozha bathu yabanowoti, ‘Bakakombolegwa seni bakadzi basingathame bana ne zwibumbilo zwisakatongo senga, kose ne mazhamu asakatongo mwisa!’ 30#Hoseya 10:8; Zumbunulo 6:16Ipapo banowoti ku matombo, ‘Mutiwile,’ bakati ku matuthu ‘Mutivukidzile!’ 31Ha bathu beyita ikoku mu nti nnyolo, kowoyitikalani ha nti wawoma kene?”
32Balume babili be zwigebeng'a, bakatogwabo kang'ompela naye kunobulawa. 33Bakati beswika pathu panodang'wa Ipepe tje Nsholo, bakambambula, kose ne zwigebeng'a, tjimwe ku luboko gwe luji tjimwe ku luboko gwe lumeshwe. 34#Njimbo 22:18Ngono Jesu kati, “Tate, mubazwiibhatigwe, ngobe abatoziba tjabanothama.”
Bakakobana zwiambalo zwizwe nge kukandila. 35#Njimbo 22:7Bathu bakama bakalingilila, koga bakulu be Bajuta bakankuwelela bakati, “Wakatjidza bamwe, ngaazwitjidze, ha ali Mesiya we Ndzimu, Nshalugwa wawo.”
36 #
Njimbo 69:21
Babhayani na ibobo ngono bakan'dadila. Bakampa nkumbi wakatyorowa, 37ngono bakati, “Ha uli Mambo we Bajuta, uzwitjidze.”
38Kwakabe kuna nkwalo wakakwagwa tjapezhugwi kukwe unoti, “OYU NDI MAMBO WE BAJUTA.”
39Mmwe we zwigebeng'a zwakabambugwa mu tjileyanyo kantuka, kati, “Apa ate uli Mesiya kene? Uzwitjidze naswi utitjidze bo!”
40Koga mmwe kantjemela eti, “Apa autotja Ndzimu se walobgwa shamu inofanana ne yaalobgwabo kene? 41Iswi kwakatilulwamila tolobgwa, ngobe towana mbhayilo wakafanila mishingo yedu. Koga nlume iwoyu akuna tjaatjinya.” 42Ipapo kati, “Jesu, mundikumbule ha muswika mu bushe gwenyu.”
43Jesu kanshandula kati, “Ndolebesa ndoti, nasi unowobe nami mu Paradaisi.”#23:43 Paradaisi: Kodwiwa pathu panowotogwa bagalimoyo bakafa bali muna Jesu Kirisiti; Kodwiwa gudzo; kene kudzimu (Luke 23:43; 2 Bakorinta 12:3).
Lufu gwa Jesu
(Matewu 27:45-56; Mako 15:33-41; Johani 19:28-30)
44 #
Kufuluka 26:31-33
Kwakabe kuli tjibaka tje masikati makulu, ngono kukabe zhalima mu shango yose kuswikila tjibaka tje matewuko, 45ngobe zhuba lakabe lati zwi. Tjisitili tje Bugalo gwe Ndzimu tjikapaluka pakati kudwa pezhugwi kunoti pasi. 46#Njimbo 31:5Jesu kadanilila nge hwi gulu eti, “Tate, ndolonga meya yangu mu maboko enyu.” Kukati aleba ikoku kapela.
47Kukati nlauli we babhayani bali zana ebona tjayitikala kakudza Ndzimu eti, “Tjoselele, iwoyu nlume wakabe asina nlandu.”
48Kukati bathu bose bakabe bakubunganila kuwobona ikoku bebona tjashingikala, bakazhala buyendasi ngono bakayenda ku mizi yabo bakapuna mimoyo. 49#Luke 8:2, 3Koga bose bakabe benziba kose ne bakadzi bakabe bantobela kudwa ku Galili, bakama thambgwana, bakalingilila zwithu izwezwi.
Mbiganyo ya Jesu
(Matewu 27:57-61; Mako 15:42-47; Johani 19:38-42)
50Ngono ngwenu kukabe kuna mmwe nlume unoyi Josefa wakabe edwa mu nzi we Arimateya, wakabe ali mmwe we makulukota e Bajuta,#23:50 makulukota e Bajuta: Batungamili be Tjijuta beshangana bali makumi ali tendeka kusumikilisa mu zwithu zwe bugalimoyo. Ntungamili wabo wakabe ali Mpirisiti Nkulu. ngono ali nlume wakalulwama ana malebeswa. 51Iye wakabe asadumana nge nkumbulo nenge nshingo wabo. Wakabe akalindila bushe gwe Ndzimu. 52Nlume iwoyo wakayenda kuna Pilato ngono kakumbila Itumbu tja Jesu. 53Ipapo katjitulula, katjipetela nge jila katjilonga mu ikumbu tjakakopogwa mu shongwe, tjisina wakatongo biganyiwa mutjili. 54Lakabe lili Zhuba le Kubiganyidza, ngono Sabata labe lotangisa.
55Bakadzi bakabe bazha na Jesu kudwa ku Galili bakatobela ngono bakabona ikumbu tja Jesu kose ne kubiganyiwa kukwe. 56#Kufuluka 20:10; Matama 5:14Ipapo bakabgwilila kanyi kunolulwamisa motsha ne mafuta anonuhwa zwakanaka.
Koga bakanyaluluka nge Sabata kuyendidzana ne nlayo.
Currently Selected:
Luke 23: KBTP
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Kalanga Bible © Bible Society of Botswana, 2008, 2018.