Matiyu, echî 4
4
Egae nji Satan a karê Jisos
(Mak 1.12-13; Luk 4.1-13)
1Obhasi Ebhare Ntʉgantʉ a kô mân Jisos a jak ka etə́m, Satan a gaé yê.#Ibru 2.18; 4.15. 2Jisos a kâ nsam i mfín ébháe, atʉ́ na efín, édî á ka dí, njaé a róghe yê eyámám. 3Satan a bhâ sə́re yê se, “Ájoé we a ri Mmon Obhasi, yim atáé mmá á kpíghí édî ó kó, ó dí.”
4Kən Jisos a táme se, “Á séŋe sê,
‘Édî asík átíŋ nâ é kára nne ekpin,
kən ekpin í nne é kí dʉ fə́ne ka nchot Obhasi.’ ”#Otira 8.3.
5Satan a kô mân Jisos a jak ka Eték Achot Obhasi. Á gyʉ̂t á gyími ta ka ńchí ókʉ́rí achot Obhasi. 6A sə́re Jisos se, “Ájoé we a ri Mmon Obhasi, nyə̂p gbo ka nsi, ka á séŋe sê,
‘Tîk Obhasi a káre wâ ka obhô baénjel abhê,
á kí fi wâ ka abhô ka abhô,
ó bhó sum kpe ekát ejâ ka ntáé yə́t.’ ”#Nkôn 91.11-12.
7Jisos a táme se, “Á séŋe fə́ne sê,
‘Deê o kâ gáe Ńtâ Obhasi nnyo a fonê wâ.’ ”#Otira 6.16.
8Satan a kpô kó yê á jak ka ósô ekpatə́m egúí etat, a jî tóŋe yê nték i ngun chénchén na ono ábho. 9A sə́re yê se, “Ó təm arúŋ ka nsi o jíghi ə̂m, tîk n káre wâ iyîm mbí chénchén.”
10Kən Jisos a nyân yê se, “Satan, duî ə̂m ka ochî. Á séŋe sê,
‘Jíghi Ńtâ Obhasi nnyo a fonê wâ.
Tʉ̂k yê átíŋ.’ ”#Otira 6.13.
11Satan a bhâ mághe mân Jisos, baénjel á bhâ jíghi yê.
Jisos a róghe etûm ejê ka Gariri
(Mak 1.14-15; Luk 4.14-15)
12Ebhú Jisos a yúghi se á kak Jon ka ókúmí, a mághe a jak ebhat í Gariri.#Mat 14.3; Mak 6.17; Luk 3.19-20. 13Á ka kumí Nasaret, kən a jak ka Kapanom. Kapanom a ri ka mkpe aya Gariri ka ebhat í Seburun na Natari.#Jon 2.12. 14Ńji é fábhe, é yîm nchot nnyi nkara-otîp Obhasi éməné nnyo á kamá se Asaya, a joé ka echî. Asaya a chorê se,
15“Nsi Seburun na Natari,
nték nnyi o kí ji mbâ aya, njəm aya Jodan,
ebhat i Gariri, nték ane mba á ká məŋé Obhasi!
16Ane mba mbôp nnyí á rî ka ejírim,
á yen ekpatə́m ebhát.
Ebhát é gbo mbâ ane mba ekʉ̂ é ko ábho osʉ́ŋ.”#Asa 8.23—9.1.
17É róghé ka ebhú áji, Jisos a jená a sə́rá ane se á yóŋé ḿbə́ŋé, á mághe obhí, ka otúi Obhasi ó bha.#Mat 3.2.
Jisos a sâŋ ayúá-osí ánî á jóe ágbán abhê
(Mak 1.16-20; Luk 5.1-11)
18Nji Jisos a kí jen ka mkpe aya Gariri, a yên ayúá-osí ábháe, a ri abhon-í-nnyen atem. Yót á kamá se Simun nnyo á bhíŋa fə́ne sê Pita. Mmon-i-nnyen owe á kamá se Andru. Ábho mbá ábháe á rî á yúa osí ka aya na ntûfúk. 19Jisos a sə́re ábho se, “Tôp ên ə̂m. Tîk m kpî ên noŋ o kí yim ên ane á tóp ə̂m.” 20Ka ngyím ányi, á mághe ntûfúk ábho á tôp Jisos.
21Jisos a kpô ji ochî, a jî yên abhon-í-nnyen mba tat ábháe, Jems na Jon, abhon í Sebedi. Á rî na ńsé ábho ka okpi á tʉrá atû-ofúk ábho. Jisos a bhîŋ ábho. 22Ka ngyím ányi, á mághe ńsé ábho ka okpi, á tôp Jisos.
Jisos a kí kpi ane achot Obhasi, a yimá ane emaŋé á soná
(Luk 6.17-19)
23Jisos a jená a fará nték i Gariri, a kpík ane ka óchâm Obhasi, a sə́rá otîp ogyebhá-ḿbə́ŋé otúi Obhasi, a yimá ane-emaŋé ka mkpak ka mkpak á soná.#Mat 9.35; Mak 1.39. 24Esə́re ejê é jábhe ebhát í Siriya ndə́m. Ka obhô mbí, ane á kəna ane-emaŋé ábho á bhak se a yim ábho á sôn. Ane mba ojê ó kára oseŋe, mba á gbôk ichʉk, abhə́né, mba á fóne bimaŋé ka mkpak ka mkpak, Jisos a yîm ábho á sôn. 25Ane ka nkam ka nkam, á tôp yê. Ane mbá á dʉ̂ nnyi Gariri, mba tat ebhat í Ntek Ofo, mba tat eték í Jerusarem, mba tat ebhat í Judiya na ebhat í njəm aya, ngûm i Jodan.
Currently Selected:
Matiyu, echî 4: ETUNT
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Ejagham New Testament © Bible Society of Nigeria and Bible Society of Cameroon, 1996.