Mataio' 3
3
Mono' Noso Holo-ngedaa' Ive Zohane' Gamazi've Gizine'
(Maleko' 1:1-8; Luka' 3:1-18; Zohane' 1:19-28)
1Ido' a'mine gameneu' nene mono' noso holo-ngedaa' ive Zohane' nene api' ogo Zudaia misubou' ebe' hadivela soto' ogo 2gamazi ti' lo lo ngeme ngeme' o'mo ani': O'moso'mi gizebou' vo holoso' gamene mo alitaze. Lutine di velepe' izilo lo lo-ngeme'mo ani'. 3Ido' gozopo' ma mino O'moso'mo line' gamazi lo soto' oga' ive polohete Isaia' aza O'moso'mo line' gamazi ma ti' lo gizine':
Ebe' hadivelati' evene' mali'mo asi naba ma ti' lo nolive:
Guvelesi ve alingumu' ve li aka've di va'va' igi lutine di lisihe' i-dilo.
Ne'mine lo line' nene Zohane'nimu' line' ve.
4Ido' a'mine Zohane' oko'nolo' inite' nene kamela' ize zopovodunu' amuzo molo vine' lili' ani' nene ngolo ido' ize losuvodunu' lili' ani' leti nesi gopololo' izo ma'nabusosi himoni neti novozo nesi naa' ine' ve. 5Ido' evene' muki' nene Zudaia misubou' Zelusalemi numuno ebekutikisi ido' a'mine misubou' numuno ebe' muki' netikisi ido' Zodani noso gahevela minani' numuno ebe' mukikutikisi nene Zohane' neida vi 6lihime'ine li soto' ikevo Zodani nosou' noso holo-ngidine'.
7Holo-ngidine'za Zuda veti mono' mulise ato ato' minanguti' evene' linge ma Halisaio' mono' gilaa' ave ido' linge ma Sadukaio' mono' gilaa' ave muki' noso hilalisa navo ningo ti' lo lo-ngidine': Lingine Satali'mi izipahala goloso mene O'moso'mo lihime lengemelinguti' ha olovo' ilisave lo ve mali'mo lo-lengemavosa olovo' ilisa nahe. 8Nemu' nene lingine a'minguti' olovo' olone lii ma lingine lu'ine di velepe' lamine' izaveti monovo nene di mini inite' lamine' gihilevo' nene igi mili minilo. 9Ido' gililo. Lingine laza Abalahamu' a'vopilemo' O'moso'mo no'noho' ize-ledelesuve live nounako O'moso'mo lihime lemo do goloso o-ledamivo laminekovo' ha minelesune li lutingu' gilamilo. Naza ma lo-lengemeloze. Lengi' nene do hulosa O'moso'mo Abalahamu'ni lo huko-dine' gamazi do gihile izelesa Abalahamu' a'vopilemo' gohi ma do soto' o-delove lo gilidiniko geheni nevote Abalahamu' a'vopilemo' lili' adine. Nemu' nene lingine laza Abalahamu' a'vopilemo' nounako lihime lemamoloseive li gilamilo. 10O'moso'mo idise lihime lemo mo lebelelesa do nene ogo mino evene' za belelesa za monovola luno bai gamuno' oga' neine' ne'mine o neive. Za muki' gihile lamine' izamani' nene mono' gilamani' aleve ne'minosa nenako huko oloku' gizeleseive. 11Naza nene mono' noso holo-ngede'mo vo nouvoni' nene lutine di velepe' izangumu' nene haza nosodunu' holo-lengede'mo vo nouvoni'za alinge' ne'meto nave nene dizo mino nezesi nivile' goloso o-nedosa neive nenako naza a'ne'mine'mine limi minavelite daa' ani' gono nesi do-do suu've nesi ngelo do-do vamolosuve. Ido' a'mine ve ne'mo noso holo-lengedeline' nene O'moso'mi Sikalahukisi olokisi ne neive. 12Ee, a'mine ve nene evene' laminekisi golososi do gizeka' olosa do nene ogo mino ve ma viti gihilesi losuvosi gopo igi minani' nene do kegeselesa gono daa' inite've do anau' ogo do nene ogo minaa' neine' ne'mine o neive. Aza viti gihile losuvosi minanguti' a'mine vai' nene do lamino ize' molo naa' inite' nene do nubo ogo numu'veuko molo losuvo nene lovo' lovo' ogo minaa' neine' oloku' nene gizeleseive.
Izesu' Mono' Noso Holani' Gamazi Gizine'
(Maleko' 1:9-11; Luka' 3:21-22)
13Ido' Izesu' aza Zohane' mono' noso holo-nedelive lo nGalilaia misubo hulo Zohane' neida Zodani nosola vine'. 14Vo hetelo noso holo-delingumu' lavo Zohane' aza naza a'ne'mine ve'mine holo-deloni' nene edamoloseive lo gelo o've lo-delesa ti' lo line': Gei' neke, neni' noso holo-nedelinido' o neine' nenako neni' holo-nedelive lo nenita nanimu' nane. 15Lavo Izesu' a'mido' lo-imine': Lamine' laine'za ne'mine olosivetise O'moso'mo lido' olosine' nenako nemu' o've lamozo. Ne'mine lavo gele emo mono' noso holo-dine'. 16Mono' noso holo-davo Izesu' aza geto nosouti' dizo ningine' nene, ee, Okulumo' ngolo' lavo O'moso'mi Sikalahu' ne'mo nama viluso ne'mino ezela lemo navo ningine'. 17Ningavo Okulumokuti' gamazi ma ti' lo limine': Aza mene vo'nelo' gipe'ne hamo' nene neive. Ezemu' nene mo mulu'neu' lamine' nogiluve.
Currently Selected:
Mataio' 3: aso
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2013, Wycliffe Bible Translators, Inc. All rights reserved.