Yowannisi 8
8
Shunoon Maabee Yecheti Ure
1Aroochee Yesuusi Zayitee Michi guudooch hammiye. 2Haree maaddoona wotta yaafee kexooch wotteꞌi hammiye. Asheenaꞌo bulli bi waan waaheete. Koteꞌinoo boonoshich dojjiye. 3Dojjii bi beetaa, Muusichi Sheeree dojjechinaꞌonaa Fariseenaꞌona shunoon maabee yecheti ureen deebiyeete; biinoo daggooch neechiꞌi, 4Yesuusin “Dojjechocho, hini ure shunoon maabee danaꞌa yechetine. 5Muusiyoo bi sheeroochaa ebiyoomminaꞌon ‘Xaqqoona yexi wuxibote’ iꞌi gettitone.#Lew. 20:10 Newochi ama gettenne?” iyeete. 6Ishichii boonoshi ito, bi toommoochee mooyon daneree biin taggeya boonoshi qaawitoyichiye.
Tunebaani Yesuusi yittiꞌi bi yapheroona showee toommooch kooriye. 7Wochii wochiꞌi biin boonoshi echemmona, kaameꞌi, “Ittoshi daggoochee axaaxaallo xaqqoona shiichi biin yexe” iye. 8Wotta yittiꞌi bi yapheroona showee toommooch kooriye.
9Boonoshiyoo ishin waayeꞌi geeneenaꞌoochee tiijjiꞌi ikkikkeebee bulli kechiyeete. Yesuusi arooch bi ikkeeto echehe; ureyoo arooch neexaa beehan. 10Yesuusi kaameꞌi ureen “Haane, neen taggetinaꞌo aayeete? Ne toommooch nallito aalle?” iꞌi echehe.
11Ureyoo “Ta doonocho, koniyoona aalloone” iyan.
Yesuusiyoo “Tawoo wotta ne toommooch nallaache. Hambe; ebiyee damba guttinnoon axaaxoon shuuneyaahine” iye.]
Yesuusi Alemee Bekko Bi Tuno
12Wotta Yesuusi asheenaꞌoyich “Ta alemee bekko taane; taan dabbimmoyich kashoon immemmi bekko bekkehalli, cir manderoona shaꞌeyaachemmone” iꞌi gettiye.
13Ebich Fariseenaꞌo “Ne, ne qellichon miixehine; ne miixo iberoo toonoone” iyeete.#Yowa. 5:31
14Yesuusi wochiꞌi boonoshich ishichiye: “Ta, ta qellichon amoonolla ta miixetaa, amoochee ta waato gaata, amooch ta hammemmo gaata ariibeeto taane; ebich ta miixo gibeneetone. Tunetaa ittoshi amoochee ta waato gaata, amooch ta hammemmo gaata ariyaachote. 15Ittoshich ashi gaboommon nalliyote; ta, ta qelloona koni toommoochona nallaache. 16Taan wocheti Nihoo Yeeri taanna tookkiinalli ta ikkeeto toono taane; ebich ta nalligaata, ta nalloo iberoone. 17Ittoshi sheeree daggooch wotta ‘Gutte asheenaꞌo miixammi miixo manjoone’ getaa kooreetone.#Yibba. 19:15 18Ta, ta qellichon miixaabeeto taane; wotta taan deejjiti Nihoo Yeeri taachon miixee beetone” iye.
19Ebich boonoshi “Ne nihoo aabiichiye?” iꞌi echeheete.
Yesuusi wochiꞌi, “Taan woyee ta Nihoon ariyaachote. Taan ittoshi ariito gaata, ta Nihoon wotta ariyesho ittoshine” iye. 20Yesuusi eboshi bullin bi gettito, yaafee kexooch beeti gijjee kicee qiicee gaꞌoochaa dojjiibeeniye. Tunebaani bi aabo shagaano bi tunetoyich, koniyoona biin yeshaanoone.
Yesuusi Echeyoo
21Yesuusi wochinnoon boonoshich “Ta hammemmo taane. Taanoo qaawemmo ittoshine; tunetaa ittoshi axaaxoona qitemmo ittoshine; ta hammaa beetooch hamon hakkaachemmo ittoshine” iye.
22Ebich Ayihudee ukkireenaꞌo boonoshinaa boonoshina “ ‘Ta hammaa beetooch hamon hakkaachote’ bi ii beeto, amoyichiye? Bi hajjee kishoona qitiya tunehe?” iyeete.
23Yesuusi “Ittoshi hiniixo ittoshine; tunebaani ta damba shimaayeexo taane. Ittoshi hini alemeexo ittoshine; ta hini alemeexo toono taane. 24Ittoshich ‘Ittoshi axaaxoona qitemmo ittoshine’ iyoye. Ebiyo, ta koni ta gaata ta tunoon ariiꞌi iberiyoo ittoshi qayigaata, ittoshi axaaxoona qitemmo ittoshi tunetoyichiye” iye.
25Boonoshiyoo “Ne koni neene?” iꞌi echeheete.
Yesuusiyoo “Shiichaa ittoshich ta gettetoommon taane. 26Ittoshich ta gettemmo, ittoshi toommoochoo ta nallemmi wodde mooyo beetone; tunetaa taan deejjito ibere moochechone; tawoo bi waanee ta waayeton alemoyich gettoye” iye.
27Arooba waayeti asheenaꞌo Nihoo Yeerichon boonoshich bi geton shalligaaneenaꞌone. 28Ebich Yesuusi boonoshich “Ashi Bushoon kichii ittoshi yoodiyooba, ta aroo ta tunoon, wotta ta gettaabeeto ta Nihoo gettiton baachalli, ta qelloona amoonolla ta tuniyee qayon arooba ariyemmo ittoshine. 29Taan deejjito taanna tookkii beetone; biin emirikkii beeton bulli aaboon ta tuniyaa beetoyich, ta ikkeeton dufaanoone” iye. 30Ebin bi getaa, waayetinaꞌo daggoochee meetinaꞌo boonoshi mulloon bi toommooch tooꞌiiheete.
Axaaxee Guuchittinoochee Keyo
31Yesuusiyoo boonoshi mulloon bi toommooch tooꞌiiti Ayihudeenaꞌon “Ta qaaroona ittoshi beegaata, iberoon ta dabboo ittoshine; 32iberoonoo ariyemmo ittoshine; iberoo guuchittinoochee ittoshin kichemmone” iye.
33Boonoshiyoo wochiꞌi, “Abrahamichi yaroo noone; konichona cir guuno tuneyaano noone. ‘Guuchittinoochee kechemmo ittoshine’ iyaꞌa aabichaꞌa noon gettenne?” iyeete.
34Yesuusi ishichiꞌi boonoshich wochiye, “Iberoon ittoshich gettoye: Axaaxoon shuuneebeeto bulli axaaxee guunone. 35Guuno bushoo tuno bi qajjitoyich, bulli yemeenoon tookki beetaachemmone; tunebaani bushoo bulli yemeenoon tookki beeyemmone. 36Illa Bushoo ittoshin guuchittinoochee bi kichigaata, iberoon guuchittinoochee kechemmo ittoshine. 37Abrahamichi yaroo ittoshi tunoon ariibeeto taane; tunebaani ta getteti qaaroon iberiyoo ittoshi qajjitoyich, taan wuxoyich qaawiyote. 38Ta, ta Nihoo waanee ta beeggeton gettoye; ittoshiyoo wotta ittoshi nihoo waanee ittoshi waayeton tuniihote” iye.
39Boonoshiyoo wochiꞌi, “No nihoo Abrahamine” iyeete.
Yesuusiyoo “Abrahamichi bushiishoo ittoshi tuneto gaata, Abrahami shuunetoommon shuunesho ittoshine. 40Andoo Yeer waanee ta waayeti iberoon ittoshich getteto taane; tunebaani taan wuxoyich qaawiyote. Abrahami ebiyoommon shuuneyaanoone. 41Ittoshi, ittoshi nihoo shuunetoommon shuuneebeeto ittoshine” iye.
Boonoshiyoo “No aricheyaani nihoona shiijjeyaano noone. Ikke Nihoo baachiye nooch beeto; aroo Yeerine” iyeete.
42Yesuusiyoo boonoshich ishichiye: “Ta Yeer waaneeniye ta waato. Ebich Yeeri ittoshi Nihoo gaata, taan shunnesho ittoshine. Bi taan wochetenalli, ta, ta aalla waataano taane. 43Ta gettaa beeton amoyich shalligaachote? Ta qaaroon waayo ittoshi mawiitoyichiye. 44Ittoshiyoo, ittoshi nihoo daabiloosichi bushiishoo ittoshine; ittoshi nihoochi qaatoon ceechoon shunniyote. Biyoo shiichiꞌi kashee kichechone; iberoo bi maacooch bi aalletoyich, iberee gommooch neexeyaanoone. Biyoo kootecho, kooto bullichi nihoone; ebich kootoon bi gettii beegaata, bi mullooch beeton gettiye. 45Tunetaa ta iberoon gettaabeeto ta tunetoyich, taan iberiyaachote. 46Ittoshi daggoochee taan ‘Axaaxoon shuuneto neene’ gettemmo aabine? Iberoon gettaabeeto ta tunegaata, ittoshiyochi amoyich taan iberiyaachote? 47Yeericho tuneto, Yeerichi qaaroon waayehe; tunebaani Yeericho ittoshi tuno qajjitoyich, bi qaaroon waayeyaachote” iye.
Abrahamiyee Aaf Yesuusi Beemo
48Ayihudeenaꞌo wochiꞌi, “Shamaarecho ne tunoon, yinnoo ne toommooch beemon no geto iberoo toone?” iyeete.
49Yesuusiyoo ishichiꞌi wochiye: “Ta toommooch yinno aalloone; ta Nihoon oogiibeeto taane; tunebaani ittoshi taan giishiihote. 50Tunetaa ta ‘Asho taan oogiibe’ getaache; taan oogiiya qaawiibeeto beetone; aroo taach nallii beetone. 51Iberoon ittoshich gettoye: Ta gettaa beeton ceechiibeeto koniyoona bi beegaata, cir qitaachemmone” iye.
52Ayihudeenaꞌo “And ne toommooch yinno beemon xiishaa ariito noone. Abrahami qititone; wotta keemechinaꞌoo qititinaꞌone. Tunetaa ne ‘Ta gettaa beeton ceechiibeeto koniyoona bi beegaata, cir qitaachemmone’ ii beetine. 53Iberoon ne no nihoo Abrahamiyee beshenne? Bi qititone; keemechinaꞌo wotta qititinaꞌone; ne koni taane iiniye ne beeto?” iyeete.
54Yesuusi ishichiꞌi boonoshich wochiye: “Ta, ta qelloon ta oogiigaata ta oogo duuboone. Taan oogiibeeto, ittoshi ‘No Nuggishoone’ ii beeti ta Nihoone. 55Biin ariyaano ittoshine; tunetaa ta ariibeeto taane. ‘Biin ariyaano taane’ ta getigaata, ittoshichoommon kootecho tunesho taane; tunebaani biin ariibeeto taane; bi gettitonoo ceechaabeeto taane. 56Ittoshi nihoo Abrahami ta woyemmi aaboon bi beeggitoyich oogichii emiriye; beeggiꞌinoo emiroona wucwucciye” iye.
57Ayihudeenaꞌoo “Batt aache natt bedaachine. Abrahamin amoochaa beeggenne?” iyeete.
58Yesuusiyoo “Iberoon ittoshich gettoye: Abrahami shiijjoyee aaf, ta beeto taane” iye. 59Ebich biin xaqqoona yexiree wuxiya iꞌi xaqqoon tiijjiyeete. Tunetaa Yesuusi boonoshich tuusheehe; yaafee kexoocheenoo kechiꞌi hammiye.
Šiuo metu pasirinkta:
Yowannisi 8: KBRC
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
SIM International, 2020.