Yowannisi 9
9
Aaf Doogoon Yesuusi Wodiyoo
1Yesuusi gommona hammiibee, aaf doogo tuneꞌi shiijjeti uroon beeggiye. 2Yesuusichi dabbeenaꞌo “Dojjechocho, hini uro aaf doogo tuneꞌi bi shiijjeto, koni axaaxoon shuunetenane? Biinee biin shiyitinaꞌone?” iꞌi echeheete.
3Yesuusiyoo ishichiꞌi wochiye: “Hini uro aaf doogo tuneꞌi bi shiijjeto, Yeerichi shuunoo biinna bi bekkemmoyichalli, bi woyee biin shiyitinaꞌo axaaxoon shuunetoyich toonoone. 4Areddoo beetaa, taan wocheti Yeerichi shuunoon tuniyoo nooch qaawiihe; koniyoona shuunoon hakkaachemmi xumo woyemmone. 5Alemooch ta beemmi wottoon, alemoyich bekko taane” iye.
6Ishichiꞌi tiyii showooch cuddiꞌi bi dengiiti dengoon aaf doogo aafooch huuttiye. 7Aroochee uroon “Hamiree Silohami kote aacoochaa machebe” iye. Silohami geto wocheeto getone. Ebich uro hammiꞌi machehe; aroochee bi aafo ciinaa wotteꞌi bi kexooch hammiye.
8Arooba bi giyeenaꞌonaa aaf gommooch koteꞌi bi qollee beetaa beeggitinaꞌona “Hini uro gommooch koteꞌi gijjoon qolleebeeti uro toone?” iyeete.
9Ikkikkeenaꞌo biine iyeete; tunetaa bareenaꞌo “Biin shaahiyalli, bi toonoone” iyeete.
Biyoo taane iye.
10“Ishigaata, ne aafo aabichiꞌi ciinniye?” iyeete.
11Biyoo wochiꞌi, “Yesuusi getteebeeti uro dengoon dengiiꞌi ta aafooch huuttiichii, ‘Siloham hamiree machebe’ iye. Ebina hammaa ta machetaa, ta aafo ciinniye” iye.
12Asheenaꞌo “Are urochi aaye?” iyeete.
“Ta ariyaache” iye.
Woditi Uroon Fariseenaꞌo Echo
13Asheenaꞌo aaf doogo tuneꞌi beebee echeti uroon yechiꞌi Fariseenaꞌo waan daammiyeete. 14Yesuusi dengoon dengii huuttiꞌi bi aafoon bi ciichiiti aabo shambetoone. 15Ebich Fariseenaꞌo wotta bare asheenaꞌochoommon aabichiꞌi bi ciinnito gaata echeheete. Biyoo “Aroo ta aafooch dengoon huuttiye; aacona macheho; andoo ta aafo ciinnii beetone” iye.
16Fariseenaꞌo daggoochee ikkikkeenaꞌo “Hini uro shambetoon oogiyaache; ebich Yeer waanee waato toonoone” iyeete.
Tunetaa bareenaꞌo “Axaaxechi asho ebiyoommon malleteenaꞌon aabichiree tuniyoon hakkehe?” iyeete. Boonoshi daggooch shaco giyiye.
17Ebich Fariseenaꞌo wochiꞌi uroon “Ne aafoon ciichiiti uroochon ama gettenne?” iyeete.
Biyoo “Keemechone” iye.
18Ayihudee ukkireenaꞌo bi nihoonaa bi indeenon boonoshi ceeggimmi wottoon, and ciinniibeeti uro aaf doogo tuneꞌi beebee echeto bi tunoon iberiyaaneenaꞌone. 19Boonoshinoo “Hini ittoshi bushoone? ‘Aaf doogo tuneꞌi shiijjete’ ittoshi ii beetone? Andochi aabichiꞌi ciinniye?” iꞌi echeheete.
20Bi nihoonaa bi indeena wochiꞌi, “Hini uro no bushoo bi tunoonaa aaf doogo tuneꞌi bi shiijjoonon ariibeeto noone. 21Tunebaani and aabichiꞌi bi ciinnito gaata, wotta bi aafoon koni ciichiito gaata ariyaano noone. Biin echebote; aroo ooge uroone; aroo bi qellichon geton mawiyaachemmone” iyeete. 22Biin shiyitinaꞌo ishichito, Ayihudee ukkireenaꞌon boonoshi shattitoyichiye. Ebiyoo Ayihudee ukkireenaꞌo “Yesuusi aroo Kiristoosine” iꞌi miixemmo bi danegaata, aroon Ayihudeenaꞌo kiceebeeti kexoochee boonoshi yookkemmoyich echee boonoshi itoyichiye. 23Ebich biin shiyitinaꞌo “Aroo ooge uroone; biin echebote” iyeete.
24Ebich aaf doogo tuneꞌi beebee and ciinniti uroon wochinnoon ceeggiꞌi, “Yeerichi oogoyicha getiree iberoon yibbaatebe; hini uro axaaxecho bi tunoon no ariibeeto noone” iyeete.
25Biyoo wochiꞌi, “Axaaxecho tuneba tunaaya ta ariyaache. Aaf doogo ta tunoon, tunebaani and ta ciinon, ebi ikke mooyon baach ariihoye” iye.
26Boonoshiyoo daakkiꞌi, “Neech amoon halliye? Aabichiꞌi ne aafoon ciichiihe?” iyeete.
27Biyoo wochiꞌi, “Shiichaꞌa ittoshich getteto taane; ittoshi waayeyaachote; amoon halliya wochinnoon waayoyich qaawii beetote? Ittoshiyoo wotta bi dabboon tunoon qaawii beetote?” iye.
28Boonoshiyoo biin naaggiibee, “Ne bi dabboo neene; tunetaa no Muusichi dabboo noone. 29Yeeri Muusich bi geton no ariibeeto noone; tunebaani hini uro amoochee bi waato gaatoona ariyaano noone” iyeete.
30Uroo ishichiꞌi wochiye: “Amoochee bi waato gaata ittoshi ariyee qayo worganikkiti mooyone; tunebaani bi ta aafoon ciichiitone. 31Yeerin shattii beetochi, bi daaggoonoo tunii beetochi qolloon Yeeri waayehalli, axaaxoon shuuneebeeti asheenaꞌochi qolloon bi waayee qayon ariibeeto noone. 32Yeeri alemoon bi hallitoochee tiijjiꞌi, koniyoona ‘Aaf doogo tuneꞌi shiijjeti ashi aafoon ciichiitone’ getaa waayeyaanoone. 33Hini uro Yeer waanee bi tuneyaan gaata, amoonolla tuniyoon hakkaacheshone” iye.
34Boonoshiyoo wochiꞌi, “Hini axaaxoona qoqqaanneeꞌa shiijjetocho, nooch dojjiya qaawaa beetine?” iyeete. Aroochee Ayihudeenaꞌo kiceebeeti kexoochee biin kichiyeete.
Boonoshi Mullo Doogo Tuneti Asheenaꞌochon Yesuusi Geto
35Yesuusiyoo uroon Ayihudeenaꞌo kiceebeeti kexoochee boonoshi kichoon waayehe. Biin daneꞌi, “Ashi Bushoo toommooch ne mulloon tooꞌiyenne?” iꞌi echehe.
36Biyoo wochiꞌi, “Ta doonocho, bi toommooch ta mulloon ta tooꞌiyemmoyich, aroo konine?” iye.
37Yesuusiyoo “Biin beeggeto neene. Andoo neenna tookkii yibbaateebeeto aroo taane” iye.
38Biyoo “Ta Doonocho, ta mulloon ne toommooch tooꞌiito taane” iꞌi biich goyinnehe.
39Yesuusiyoo “Ciinaaneenaꞌo ciinaa, ciinnii beetinaꞌo doogaa, nalloona boonoshi barbaremmoyich, ta hini alemooch waato taane” iye.
40Biinna tookkii arooch beetinaꞌo daggoochee ikkikke Fariseenaꞌo ishin waayeꞌi, “No wotta aaf doogo noone?” iꞌi echeheete.
41Yesuusi wochiꞌi, “Aaf doogo ittoshi tuneto gaata, axaaxoo ittoshich tuneyaacheshone. Tunebaani and ‘Ciinnaabeeto noone’ iyote; ebich axaaxoo ittoshi toommoochee wohaachemmone” iye.
Šiuo metu pasirinkta:
Yowannisi 9: KBRC
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
SIM International, 2020.