Joha 8
8
1Kodwa uJesu waya entabeni ethiwa iOliveti.
Owesifazana obanjwe ephinga
2Ekuseni kakhulu wabuya weza ethempelini; bonke abantu beza kuye; wahlala phansi, wabafundisa. 3Ababhali labaFarisi baletha owesifazana owayebanjwe ephinga; bammisa phakathi kwabo, 4bathi kuye: Mfundisi, lowesifazana ubanjwe esoqotsheni lokuphinga. 5Emlayweni uMose wasilaya ngabanje ukuba bakhandwe ngamatshe. Pho, wena uthini?#Levi 20:10; Dute 22:22–24 6Batsho lokhu bemlinga, ukuze bammangalele. Kodwa uJesu wakhothama, waloba ngomunwe phansi. 7Kwathi bephikelela ukumbuza, walulama, wathi kibo: Ongelasono phakathi kwenu kaqale ukumjikijela ngelitshe. 8Wabuya wakhothama, waloba ngomunwe phansi. 9Bathi ukuzwa lokhu, baphuma ngamunye, kuqala kwabadala, uJesu wasala yedwa lowesifazana emi phambi kwakhe. 10UJesu waselulama, wathi kuye: Mama, bangaphi na? Kakho okulahlayo na? 11Wathi: Kakho, Nkosi. UJesu wathi: Lami kangikulahli. Hamba, ungabe usona futhi.]
Ukukhanya komhlaba
12UJesu wakhuluma labo futhi wathi: Mina ngiyikukhanya komhlaba; ongilandelayo kasoze ahamba emnyameni, kodwa uzakuba lokukhanya kokuphila.#Mat 5:14; Joha 9:5 13Ngakho abaFarisi bathi kuye: Uyazifakazela wena; ubufakazi bakho kabulaqiniso.#Joha 5:31 14UJesu wabaphendula wathi: Uba ngizifakazela mina, ubufakazi bami buqinisile, ngoba ngiyazi ukuthi ngivela ngaphi lokuthi ngiya ngaphi; kodwa lina kalazi ukuthi ngivela ngaphi lokuthi ngiya ngaphi. 15Lina lisola ngokwenyama, kodwa mina kangisoli muntu. 16Kodwa uba ngisola, ukusola kwami kuqinisile, ngoba kangingedwa, kodwa yimi longithumileyo. 17Emlayweni wenu kulotshiwe ukuthi ubufakazi babantu ababili bungobuqinisileyo. 18Mina ngingozifakazelayo; loBaba ongithumileyo ufakaza ngami. 19Ngakhoke bathi kuye: Ungaphi uYihlo na? UJesu waphendula wathi: Kalingazi mina; loBaba kalimazi. Uba belingazi mina belizakumazi loBaba laye. 20Wakhuluma lamazwi engasesitsheni somnikelo efundisa ethempelini; kakho owambambayo, ngoba isikhathi sakhe sasingakafiki.
UJesu ulaya abaJuda ngesikhathi esesabekayo esizayo
21Wasesithi kibo futhi: Ngiyahamba mina, lizakungifuna, kodwa lizakufela esonweni senu; lapho ngiya khona mina, lingeze leza lina. 22AbaJuda basebesithi: Uzakuzibulala yini? Nangu esithi: Lapho ngiya khona mina lingeze leza lina. 23Wathi kibo: Lina lingabavela phansi, mina ngingovela phezulu; lina lingabomhlaba lo, mina kangisuye owalumhlaba. 24Ngakhoke ngithe kini: Lizakufela ezonweni zenu; uba lingakholwa ukuthi nginguye lizakufela ezonweni zenu. 25Basebesithi kuye: Wena ungubani na? UJesu wathi kibo: Kambe ngikhulumelani lani na? 26Ngilezinto ezinengi engilokuzikhuluma ngani lokulisola ngazo, kodwa ongithumileyo uqinisile, lami ngikhuluma emhlabeni lokho engikuzwe kuye. 27Kabaqedisisanga ukuthi ukhuluma kibo ngoYise. 28Ngakho uJesu wathi kibo: Nxa seliyiphakamisile iNdodana yomuntu, kung’khona lizakwazi ukuthi nginguye lokuthi kangizenzeli lutho ngokwami, kodwa ngikhuluma njengalokhu uBaba engifundisile. 29Yena ongithumileyo ulami, kangitshiyanga ngedwa, ngoba ngihlala ngisenza lokho okuthandeka kuye.
UJesu uphendulana labaJuda ngoAbrahama
30Esakhuluma lokhu, abanengi bakholwa kuye. 31Ngakho uJesu wathi kubaJuda abakholwe kuye: Uba lihlala elizwini lami, lingabafundi bami isibili; 32lizakulazi iqiniso, leqiniso lizakulikhulula. 33Bamphendula bathi: Siyinzalo kaAbrahama thina, kasizanga sibe yizigqili zamuntu; pho, utsho kanjani ukuthi: Lizakuba ngabakhululekileyo, na?#Joha 5:31 34UJesu wabaphendula wathi: Ngiqinisile, ngiqinisile ngithi kini: Ilowo lalowo owenza isono uyisigqili sesono. 35Isigqili kasihlali kokuphela ekhaya; kodwa indodana ihlala kokuphela. 36Ngakhoke uba iNdodana ilikhulula, lizakuba ngabakhululekileyo impela. 37Ngiyazi ukuthi liyinzalo kaAbrahama; kodwa lifuna ukungibulala, ngoba ilizwi lami kalilandawo kini. 38Ngikhuluma lokho engikubonileyo mina kuBaba; lanike lenza lokho elikuzwileyo kuyihlo. 39Bamphendula bathi: Ubaba nguAbrahama. UJesu wathi kubo: Uba belingabantwana bakaAbrahama, belizakwenza imisebenzi kaAbrahama. 40Kodwa khathesi lifuna ukungibulala mina muntu olitshele iqiniso, engilizwe kuNkulunkulu; uAbrahama kakwenzanga lokho. 41Lina lenza imisebenzi kayihlo. Bathi kuye: Kasizalwanga ngobufebe thina; silobaba munye, uNkulunkulu. 42UJesu wathi kubo: Uba uNkulunkulu ubenguyihlo, belizakungithanda mina, ngoba ngifike ngivela kuNkulunkulu; ngoba kangizizelanga ngokwami, kodwa yena ungithumile. 43Kungani lingaqedisisi inkulumo yami na? Kungoba kalilakulizwa ilizwi lami. 44Lina lingabakayihlo uSathane, lithanda ukwenza inkanuko zakhe. Yena wayengumbulali kusukela ekuqaleni, kemi eqinisweni, ngoba iqiniso kalikho kuye. Nxa eqamba amanga, ukhuluma njengesimo sakhe, ngoba engumqambi wamanga loyise wamanga. 45Kodwa mina, ngoba ngikhuluma iqiniso, kalingikholwa. 46Nguwuphi kini ongangilahla ngesono na? Uba ngilitshela iqiniso, kalingikholwa ngani na? 47Yena ongokaNkulunkulu uyawezwa amazwi kaNkulunkulu; kungakho lina lingezwa ngoba kalisibo abakaNkulunkulu.
48AbaJuda bamphendula bathi: Kasiqinisile yini ngokuthi ungumSamariya lokuthi ulomoya omubi na? 49UJesu waphendula wathi: Kangilaye umoya omubi. Kodwa ngiyadumisa uBaba; lina liyangigcona. 50Minake kangizifuneli olwami udumo; ukhona olufunayo lothonisisayo. 51Ngiqinisile, ngiqinisile ngithi kini: Uba umuntu egcina ilizwi lami, kayikukubona ukufa lanini. 52AbaJuda bathi kuye: Khathesi sesisazi ukuthi ulomoya omubi; uAbrahama wafa, labaprofethi; kodwa wena uthi: Uba umuntu egcina ilizwi lami, kayikukuzwa ukufa lanini. 53Wena umkhulu yini kulobaba uAbrahama osewafa labaprofethi asebafa na? Uzenza bani wena na? 54UJesu waphendula wathi: Uba ngizidumisa mina, udumo lwami luyize; nguBaba ongidumisayo, elitsho ngaye ukuthi unguNkulunkulu wenu. 55Kodwa kalimazanga; mina ngiyamazi. Uba ngisithi kangimazi, ngizakuba ngumqambi wamanga njengani. Kodwa mina ngiyamazi, ngiyaligcina ilizwi lakhe. 56Uyihlo uAbrahama wajabulela ukubona usuku lwami; walubona, wathokoza. 57AbaJuda basebesithi kuye: Kawukabi leminyaka engamatshumi amahlanu, wake wambona uAbrahama na? 58UJesu wathi kubo: Ngiqinisile, ngiqinisile ngithi kini: UAbrahama engakabi khona, ngangivele ngikhona mina. 59Basebedobha amatshe ukuba bamkhande. Kodwa uJesu wasithela, waphuma ethempelini.
Šiuo metu pasirinkta:
Joha 8: BE1978
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Bible Society of Zimbabwe 1978