Joha 9
9
UJesu uvula amehlo esiphofu
1Wathi edlula, wabona umuntu oyisiphofu kusukela ekuzalweni kwakhe. 2Abafundi bakhe bambuza bathi: Mfundisi, ngubani owonayo, lumuntu ingabe abazali bakhe aze azalwe eyisiphofu na? 3UJesu waphendula wathi: Konanga lumuntu loba abazali bakhe, kodwa ukuze kubonakaliswe imisebenzi kaNkulunkulu kuye. 4Kufanele sisebenze imisebenzi yongithumileyo kusesemini; ubusuku buyeza lapho kungesebenze muntu. 5Ngisekhona emhlabeni ngiyikukhanya komhlaba.#Mat 5:14; Joha 8:12 6Esetshilo lokhu wakhafulela phansi, wenza udaka ngamathe, waninda amehlo aso ngodaka. 7Wathi kuso: Hamba uyegeza echibini laseSilowama, okutsho ukuthi oThunyiweyo; sasesihamba, sageza, sabuya sesibona. 8Ngakho abakhelene laso lalabo ababesibonile ngaphambili singumphanzi bathi: Kasuye lo owayehlala ephanza na? 9Abanye bathi: Nguye; labanye bathi: Atshi, kodwa ufana laye. Yena wathi: Nginguye. 10Basebesithi kuye: Pho, avulwe kanjani amehlo akho na? 11Waphendula wathi: Umuntu othiwa nguJesu wenze udaka, waninda amehlo ami, wathi kimi: Hamba uye eSilowama, ugeze. Ngasengihamba, ngageza, ngabona. 12Bathi kuye: Ungaphi yena na? Wathi: Kangazi.
13Basebemletha kubaFarisi lowo owayekade eyisiphofu. 14KwakuyiSabatha mhla uJesu esenza udaka, evula amehlo akhe. 15AbaFarisi bambuza futhi ukuba ubone kanjani. Wathi kibo: Waninda amehlo ami ngodaka, ngageza, sengibona. 16Ngakho abanye babaFarisi bathi: Lumuntu kaveli kuNkulunkulu, ngoba kagcini iSabatha. Kodwa abanye bathi: Umuntu oyisoni angazenza kanjani izibonakaliso ezinje na? Kwaba khona ukwahlukana phakathi kwabo. 17Baphinda bathi kuso isiphofu: Wena uthini ngaye, lokhu evule amehlo akho na? Wathi: Ungumprofethi. 18Kodwa abaJuda kabakholwanga ngaye ukuthi wayekade eyisiphofu wazuza ukubona, baze babiza abazali bakhe lowo osebona. 19Bababuza bathi: Lo uyindodana yenu elithi yazalwa iyisiphofu na? Pho, isibona njani khathesi na? 20Abazali bakhe baphendula bathi: Siyazi ukuthi lo uyindodana yethu lokuthi wazalwa eyisiphofu; 21kodwa ukuthi usebona kanjani khathesi kasikwazi, lokuthi ngubani ovule amehlo akhe kasikwazi; mbuzeni, usekhulile, uzakuzikhulumela yena. 22Abazali bakhe batsho lokhu, ngoba besaba abaJuda. Ngoba abaJuda basebevumelene ngokuthi, uba ekhona ovuma ukuba unguKristu, kakhutshwe esinagogeni. 23Kungakho abazali bakhe bathi: Usekhulile, mbuzeni. 24Bambizake ngokwesibili lowomuntu owayeyisiphofu, bathi kuye: Dumisa uNkulunkulu; thina siyazi ukuthi lowomuntu uyisoni. 25Yena wasephendula esithi: Loba eyisoni kangazi; kunye engikwaziyo, ukuthi bengiyisiphofu, khathesi sengibona. 26Bathi kuye futhi: Wenzani kuwe na Wavula kanjani amehlo akho na? 27Wabaphendula wathi: Sengilitshelile, kodwa kalizwanga; lifunelani ukuzwa futhi na? Liyafisa lani ukuba ngabafundi bakhe na? 28Basebemthuka besithi: Nguwe ongumfundi wakhe, kodwa thina singabafundi bakaMose. 29Siyazi ukuthi uNkulunkulu wakhuluma kuMose, kodwa lumuntu kasimazi lapho avela khona. 30Yena waphendula wathi: Lokhu kuyisimanga ukuthi kalimazi lapho avela khona, kanti uvule amehlo ami. 31Siyazi ukuthi uNkulunkulu kazizwa izoni, kodwa uba umuntu engokhonza uNkulunkulu, esenza intando yakhe, uNkulunkulu uyamuzwa lowo. 32Kulokhu kwadatshulwa umhlaba kakuzanga kuzwakale ukuthi kukhona owavula amehlo omuntu owazalwa eyisiphofu. 33Uba lumuntu ebengaveli kuNkulunkulu, ubengenze lutho. 34Basebemphendula besithi: Wena wazalelwa esonweni impela; wena uyasifundisa na? Basebemkhupha esinagogeni.
35UJesu wezwa ukuthi bamkhuphile; kwathi esemfumene, wathi kuye: Uyakholwa eNdodaneni yomuntu na? 36Yena waphendula wathi: Ingubani, Nkosi, ukuze ngikholwe kuyo na? 37UJesu wathi kuye: Usuyibonile; yiyo ekhuluma lawe. 38Wasesithi: Nkosi, ngiyakholwa. Wamkhonza. 39UJesu wathi: Mina ngizele ukuthonisisa kulumhlaba, ukuba abangaboniyo babone, lalabo ababonayo babe yiziphofu. 40Labo kubaFarisi ababelaye bezwa lokhu, bathi kuye: Lathi njalo siyiziphofu na? 41UJesu wathi kibo: Uba beliyiziphofu, ngabe kalilaso isono. Kodwa ngoba lisithi: Siyabona; isono senu simi.
Šiuo metu pasirinkta:
Joha 9: BE1978
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Bible Society of Zimbabwe 1978