San Mateo 1
1
Jesús aipãi pa'isina mamia'me
(Lc 3.23-38)
1Aperʉmʉ pa'isina Jesucristo aipãi paasina mamire kʉajʉ tochasi'ea'me ie. Davina'me Abraham repaʉ aipãi paniasome.
2Abraham mamakʉ Isaac paniasomʉ.
Isaac mamakʉ Jacob paniasomʉ.
Jacob mamachĩi Judana'me repaʉ cho'jechĩi paniasome.
3Judá mamachĩi Farena'me Zara paniasome. Repana pʉka'ko Tamar paniasomo.
Fares mamakʉ Esrom paniasomʉ.
Esrom mamakʉ Aram paniasomʉ.
4Aram mamakʉ Aminadab paniasomʉ.
Aminadab mamakʉ Naasón paniasomʉ.
Naasón mamakʉ Salmón paniasomʉ.
5Salmón mamakʉ Booz paniasomʉ. Pʉka'ko Rahab paniasomo.
Booz mamakʉ Obed paniasomʉ. Pʉka'ko Rut paniasomo.
Obed mamakʉ Isaí paniasomʉ.
6Isaí mamakʉ David paniasomʉ, pãi jainʉkore chʉ̃'ʉsi'kʉ.
David mamakʉ Salomón paniasomʉ. Repaʉ pʉka'ko chuenisõsi'kʉ Urías rʉ̃jo paniasomo.
7Salomón mamakʉ Roboam paniasomʉ.
Roboam mamakʉ Abías paniasomʉ.
Abías mamakʉ Asa paniasomʉ.
8Asa mamakʉ Josafat paniasomʉ.
Josafat mamakʉ Joram paniasomʉ.
Joram mamakʉ Uzías paniasomʉ.
9Uzías mamakʉ Jotam paniasomʉ.
Jotam mamakʉ Acaz paniasomʉ.
Acaz mamakʉ Ezequías paniasomʉ.
10Ezequías mamakʉ Manasés paniasomʉ.
Manasés mamakʉ Amón paniasomʉ.
Amón mamakʉ Josías paniasomʉ.
11Josías mamachĩi Jeconíana'me repaʉ cho'jechĩi pa'irʉmʉna Babilonia cheja cana sani Israelpãi chẽa repana pa'ichejana sasõasome.
12Repanare sasõsirʉmʉ pa'isina Jesús aipãi mamia'me ie:
Jeconías mamakʉ Salatiel paniasomʉ.
Salatiel mamakʉ Zorobabel paniasomʉ.
13Zorobabel mamakʉ Abiud paniasomʉ.
Abiud mamakʉ Eliaquim paniasomʉ.
Eliaquim mamakʉ Azor paniasomʉ.
14Azor mamakʉ Sadoc paniasomʉ.
Sadoc mamakʉ Aquim paniasomʉ.
Aquim mamakʉ Eliud paniasomʉ.
15Eliud mamakʉ Eleazar paniasomʉ.
Eleazar mamakʉ Matán paniasomʉ.
Matán mamakʉ Jacob paniasomʉ.
16Jacob mamakʉ José paniasomʉ, María ʉ̃jʉ pa'isi'kʉ. Repao María, Jesús, pãi ũcuanʉkore chʉ̃'ʉa'kʉ chini Dios Raosi'kʉ chiicojñokʉ pʉka'ko paniasomo.
17Abraham pa'irʉmʉpi David pa'irʉmʉjatʉ'ka repaʉ Abraham jojosina catorcerepana paajʉ saniasome. Ũcuachi'a David pa'irʉmʉpi Israelpãi Babilonia cheja chẽa sacojñorʉmʉjatʉ'ka David jojosina catorcerepana paajʉ saniasome. Ũcuachi'a Israelpãi repana Babilonia cheja chẽa sacojñorʉmʉpi Dios Raosi'kʉ Cristo'te jñaarʉmʉjatʉ'ka repana paasina catorcerepana paajʉ saniasome.
Jesucristo'te jñaasi'ere kʉamʉ
(Lc 2.1-7)
18Jesucristo'te jñaasi'e ija'cheasomʉ: María repaʉ pʉka'ko Josere pasa chiikojeko so'opi paniasomo. Jã'ata'ni repana chuta'a veja kueñe pa'imarʉmʉna María te'eo pa'ikoji Dios Rekochoji jo'kaʉna chĩi sʉniasomo. 19Repaoji chĩi sʉnisõona José repao'te paara chiikʉ re'okʉjekʉ, “Pãipi repao chĩi sʉ'isi'e asa cu'ache i'kajanaa'me repao'te”, chini cuasa chekʉnare pãi kʉa jñauma'ñe repao'te rope'e jo'kasõʉache cuasaasomʉ. 20Jã'aja'ñe cho'ora chini cuasakʉta'ni repaʉ ʉokãisirʉmʉna ángel, Dios raosi'kʉ rani ija'che i'kaasomʉ repaʉ'te:
—José, David jojosi'kʉ, María'te paavajʉchʉma'ñe veja paajʉ̃'ʉ. Repao sʉ'ipʉ chĩipʉ Dios Rekochoji jo'kaʉna sʉ'imo repao. 21Chĩiva'ʉre ʉmʉva'ʉni paaja'mo repao. Repao María chĩiva'ʉre jñaasirʉmʉ Jesure ve'ojʉ̃'ʉ repava'ʉre. Pãi cu'ache cho'osi'e jũni ro'ikaijaʉjekʉ jã'aja'ñe ve'eja'mʉ repaʉ —chiniasomʉ ángel repaʉ'te.
22Peore jã'a Diopi i'kaʉna aperʉmʉ Repaʉ chʉ'o kʉasi'kʉ kʉakʉ tocha jo'kasi'epi ũcuarepa ti'jñesi'kʉa'mʉ.
23Ija'che chiimʉ repaʉ kʉakʉ tocha jo'kasi'e:
Romichĩio ʉmʉʉ'terejẽ'e ja'me kãima'kopi chĩi sʉni, chĩiva'ʉre ʉmʉva'ʉni paaja'mo.
Repava'ʉre pãi, Emanuelre ve'ojanaa'me,
chiimʉ. (“Emanuel” chiiche “Dios maina'me pa'imʉ” chiimʉ.)
24Ũcuarʉmʉ José repaʉ kãni vʉisirʉmʉ ángel Dios raocojñosi'kʉ chʉ̃'ʉ jo'kasi'e cho'okʉ, María'te paara chini vejaasomʉ. 25Jã'ata'ni repana vejasirʉmʉ, chĩiva'ʉre jñaañejatʉ'ka ja'me kãima'ñe paniasome. Repaʉ rʉ̃jo chĩiva'ʉre jñaasirʉmʉ José ángel repaʉ'te ra kʉasi'ere mami, Jesure ve'oasomʉ repava'ʉre.
Voafantina amin'izao fotoana izao:
San Mateo 1: coe
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2009, Wycliffe Bible Translators, Inc. All rights reserved.