San Juan 11
11
Ndabeꞌen Lázaro
1Beꞌe naa xii biꞌin Lázaro ko anto beniꞌi xa, ko rajnee xa diꞌin Betania, xrajeꞌo rajnee María ko Marta, xan choo Lázaro. 2Ko xrajeꞌo María jiꞌi thi kuinthjithe ndaxrajni ngataꞌa ruthee Jesús ko binchexemanxin kunixin xrajaa. 3Kayui nchrii mee ruaꞌan nchra juajna ngain Jesús ko ndachro nchra:
—Nchana, xi thjueꞌe suixin niꞌi xa.
4Are Jesús kuiꞌin jiꞌi, ndachro:
—Chin jiꞌi senxinꞌa Lázaro, chin jiꞌi ruxraguxin juachaxiin Ndo Dio ko thi juachaxin chunda jaꞌan, thi Xeꞌen ndo.
5Ko Jesús anto bathjueꞌe Marta, María ko Lázaro. 6Ko maski Jesús kunuꞌe ixin Lázaro beniꞌi, jeꞌe xra tabithuꞌe iyoo nchaꞌon nthi̱ꞌa̱ thi beꞌe. 7Kuthimejan ndachro Jesús ngain ni bakao:
—Chjin ná Judea inaa.
8Ko thi chujni bakao ndachro na̱:
—Suixin ke tjaago, chujni judío xra seꞌa binao na̱ naruguenxon na̱ suixin kunixin xro, ¿ko xra rinao tsji nthi̱ꞌa̱ inaa?
9Jesús ndachro:
—¿Anduaꞌa ixin nchaꞌon nchengasaan theyoo hora? Thi chrji are jii nchaꞌon tunthengixinꞌa ixin jii xruii nchaꞌon, 10aro thi chrji thie tunthengixin ixin xruꞌin xruꞌi jii.
11Ko Jesús xra ndachro:
—Lázaro, xi jian dakjiꞌo ná, tajijua xa aro jaꞌan tsji sinthaxingamaa xa.
12Kuthimejan ni bakao Jesús ndachro na̱:
—Nchana ná, ja̱ tajijua xa, a tuin tsuxrueꞌen xa.
13Aro thi binao Jesús rundachro, mee ixin Lázaro undadigeꞌen. Ko kain chujni bakao Jesús xraxaon na̱ ixin jeꞌe jinichja ixin ndua jeꞌo tajijua Lázaro. 14Kuthimejan Jesús nduaxin ndachro ngain na̱:
—Lázaro undabeꞌen. 15Ko jaꞌan chaꞌna ixin bariꞌa nthi̱ꞌa̱, ixin jañaa jaꞌa ra sithikaon ra ngajin na. Aro chjin ná sitsjeꞌe ná Lázaro.
16Kuthimejan Tomás, thi banchegiꞌin na̱ xan Kuata, ndachro ngain icha chujni bakao Jesús:
—Chjin ná kai ixin seꞌen ná ngain Jesús.
Jesús thi nchexechon chujni
17Are biji Jesús nthi̱ꞌa̱, jeꞌe kuiꞌin ixin Lázaro ubechunda noo nchaꞌon jixrabaa. 18Rajna Betania beꞌe nii kilómetro ngain rajna Jerusalén. 19Mexinxin tsjé chujni judío bitsjeꞌe Marta ko María ixin binchesuji na̱ nchrii teꞌi ixin beꞌen Lázaro, xichoo nchra. 20Are Marta kunuꞌe ixin Jesús jithii, jeꞌe bachrjexin nchia ixin bichuenxin Jesús ngatja nthiꞌá, aro María ndabithuꞌe ngaxiꞌin nchia. 21Ko Marta ndachro ngain Jesús:
—Nchana, ja̱ suixin rugariꞌi nthiꞌi, rugenꞌa xan chian. 22Aro jai nuna ixin kain thi Suixin sanchieꞌe Ndo Dio, jeꞌe ndo ruchjaa ndo.
23Jesús ndachro:
—Xan choo rukjan xan sechon xan.
24Ko Marta ndachro:
—Jaꞌan nuna ixin rukjan xan sechon xan are ruxechon kainxin ni ndadigeꞌen, ngain thi nchaꞌon are ndatsjexin nunthe.
25Ko Jesús ndachro:
—Jaꞌan thi ruxechunxin kainxin chujni, ko jaꞌan thi nthakjan na̱ inaa chujni narua. Thi chujni dithikaon na jaꞌan, maski ndadigeꞌen na̱, jeꞌe na̱ ruxechon na̱. 26Ko kain chujni jichon ko dithikaon ngajin na, chujni mee rukjan na̱ inaa chujni narua ko xruꞌin nchaꞌon tsjexin. ¿Adithikaon jiꞌi?
27Marta ndachro:
—Nchana, jaan dithikaꞌon ixin Suixin thi Cristo, thi Ndo Dio ndachro ixin rukii ngataꞌa nunthe ko thi kai Xeꞌen ndo.
Jesús tsjanga ngakee chinthiꞌi Lázaro
28Are Marta juexin ndachro jiꞌi, kjui bigaye̱e María, ko jimao ndachro ngain María:
—Xi tjaago, nthiꞌi jii xa ko dayaꞌa xa.
29Are María kuiꞌin jiꞌi, jaikua bingathjen ko kjui bitsjeꞌe Jesús. 30Jesús xra bithuꞌe ngadeꞌe rajna, thi betanxin Marta. 31Are ni judío bikon na̱ ixin María jaikua bingathjen ko bachrje, thi ni tate nthi̱ꞌa̱ ixin jinchesuji na̱, ruee na̱ María ixin xraxaon na̱ ixin María sarukji ngain thi jixrabaa Lázaro ixin rutsjangaxin xan nthi̱ꞌa̱.
32Are biji María thi jii Jesús, bethuxin ngakee ruthee Jesús, ko ndachro:
—Nchana, ja̱ suixin rugariꞌi nthiꞌi, xan chian rugenꞌa xan.
33Are Jesús bikon ixin María ko kain chujni judío bikao tetsjanga na̱ kai, Jesús bechiin ko anto suji juachjaon kunuꞌe ngain anseen. 34Kuthimejan Jesús banchiangi ko ndachro:
—¿Thinoo kjuabaa ra Lázaro?
Ko jeꞌe na̱ ndachro na̱:
—Xrakui, sitsjeꞌe.
35Ko Jesús tsjanga. 36Ko ni judío ndachro na̱:
—Tsjexin ra, kexreen anto thjueꞌe xa Lázaro.
37Ko ikanxion na̱ ndachro na̱:
—Xii jiꞌi binchexrueꞌen jmakon thi xii bagikonꞌa, ¿unda xruꞌin bincheꞌe xa ixin rugenꞌa Lázaro?
Lázaro xechon
38Jesús kjan kunuꞌe juachjaon, ko jeꞌe kunchieꞌen ngain thi jixrabaa Lázaro, ngain naa thi dikinchrjadoꞌo na̱ jna ko jiree naa xro. 39Jesús ndachro:
—Dinthjian ra xro.
Ko Marta, nchri choo Lázaro, ndachro nchra ngain Jesús:
—Nchana, uchunda noo nchaꞌon jixrabaa xan ko uxra xan.
40Aro Jesús ndachro:
—¿Andathjoꞌa ixin ja̱ sithikaon ngajin na, jaꞌa sikon juachaxiin Ndo Dio?
41Kuthimejan binthjian na̱ xro mee. Ko Jesús tsjeꞌe ngajni ko ndachro:
—Suixin Ndudana, thexruxiꞌan ixin kuiꞌin thi jaꞌan ndachrjan. 42Jaꞌan nuna ixin kainxin nchaꞌon thiꞌin thi jaꞌan ndachrjan, aro ndachrjan jiꞌi ixin chujni te nthiꞌi sithikaon na̱ ixin Suixin ruaꞌan na jaꞌan.
43Ko are Jesús juexin ndachro jiꞌi, jeꞌe kuyao suji:
—¡Lázaro, dachrjexin yaa!
44Ko jeꞌe bachrje ko nguixin raa ko ruthee jisiandajin naa manta, ko ngakon jisia inaa manta. Ko Jesús ndachro:
—Dantsjeꞌe ra manta ko tanchrjanda ra satsji.
Chujni kjuathexin na̱ ixin suen na̱ Jesús
(Mt. 26:1-5; Mr. 14:1-2; Lc. 22:1-2)
45Tsjé chujni judío beꞌe ngain María bithikaon na̱ ngain Jesús ixin thi bincheꞌe jeꞌe. 46Aro ikanxion na̱ kjui na̱ ngain xi fariseo ixin kuekiin na̱ xa thi bincheꞌe Jesús. 47Kuthimejan xi fariseo ko xi daana thetuꞌen icha xi daana baye̱e xa kain chujni ncheꞌe jie̱ ko binthendachro xa:
—¿Keꞌe sinthoꞌo ná? ¡Xii jiꞌi atho tsjé thi naꞌa dikunxin ni ncheꞌe xa! 48Ja̱ tsanchrjanda ná xa xra sincheꞌe xa jañaa, kainxin chujni sithikaon na̱ ngain xa. Ko tsii ni romano ko tsuxanthe na̱ ningua ná ko suen na̱ kain chujni nuntheꞌa ná.
49Aro naa xi daana icha renthe ko baketuꞌan ngain nano mee biꞌin Caifás ko jeꞌe xa ndachro xa:
—Jaꞌa ra xruꞌin nuꞌa ra. 50¿Anuaꞌa ra ixin icha jian ixin seꞌen nakua xii ke seꞌen kainxin chujni nuntheꞌa ná?
51Aro Caifás ndachroꞌa jiꞌi ixin jeꞌo xraxaon, thi kuꞌen ixin jeꞌe kjui xi daana icha renthe ngain nano mee, mexinxin Ndo Dio binchenichja jeꞌe ko jañaa nichja ixin Jesús rugeꞌen ixin chujni judío. 52Ko jeoꞌa ixin chujni judío, kai ixin chujnii ndo dichjekee nguixin nunthe. 53Ko ngain nchaꞌon mee kuexinxin kjuathexin ni thetuꞌan ixin naruguenxon na̱ Jesús.
54Mexinxin Jesús ibakjiꞌa ngayee ni judío ko bachrjexin rajna Judea ko sakjui chiaon ngain naa jna xruꞌin jii, chiaon ngakee rajna diꞌin Efraín, thi bithuꞌe jeꞌe kunixin kain chujni bakao.
55Are uchiaon rukii kiee ni judío diꞌin pascua, tsjé chujni jejee rajna sakjui na̱ Jerusalén ixin bakurua na̱ ngain Ndo Dio. 56Ko kjuee na̱ Jesús, ko are tate na̱ ngain niꞌngo banchiangiꞌi choo na̱:
—¿Keꞌe xraxaon ra? ¿Atsii Jesús ngain kiai jiꞌi?
57Xi fariseo ko kain xi daana baketuꞌan ngain icha xi daana ukuetuꞌan xa ixin kexeꞌo chujni rukunuꞌe thinoo jii Jesús, rukjaago na̱ ixin rutse na̱ Jesús ko rukiaxiꞌin na̱.
Voafantina amin'izao fotoana izao:
San Juan 11: plsNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2017, Wycliffe Bible Translators, Inc. All rights reserved.