San Juan 9
9
Jesús binchexrueꞌen naa xii bagikonꞌa
1Are jidatho Jesús bikon naa xii bagikonꞌa ixin jañaa guan xa. 2Ko chujni bakao Jesús banchiangiꞌi na̱ ko ndachro na̱:
—Suixin ke tjaago, ¿kensen bincheꞌe jianꞌa, a jeꞌe xa o ni nduꞌa xa ixin chroꞌa dikon xa?
3Jesús ndachro:
—Jeꞌa jeꞌe xa bincheꞌe xa chrujan thi jianꞌa o ni nduꞌa xa. Jañaa guan xa ixin ngain xa ruxraguxin thi nchao ncheꞌe Ndo Dio. 4Are xra jii nchaꞌon, rugunda sinthoꞌo ná xree thi ruaꞌan na nthiꞌi, ixin utsii thie are chujni ichroꞌa sincheꞌe na̱ xra. 5Ko ixin jaꞌan xra riꞌi nthiꞌi ngain nunthe, jaꞌan thi xruꞌi na nchengasaan nguixin nunthe.
6Are juexin ndachro Jesús kain jiꞌi, jeꞌe kuinthji ndathee ngataꞌa nunthe ko binchechjian nchetjaꞌo, ko kuinga nche nganito kon thi xii bagikonꞌa. 7Kuthimejan ndachro Jesús ngain thi xii mee:
—Thji ngain thi diꞌin Siloé, thi jiria jinda, ko tunthi nda ngakon.
(Ko Siloé ruchro “Thi ruaꞌan na̱”).
Thi bagikonꞌa mee kjui ko bikunthi jinda, ko are kjan, unchao bikon. 8Kuthimejan kain chujni bechunxin ko ni bagikon ixin jeꞌe bagikonꞌa, binthendachro na̱:
—¿Ajeꞌa xii jiꞌi xi baganchiagaꞌa tumi?
9Kanxion na̱ ndachro na̱:
—Jaan, jeꞌe xa.
Ikanxion na̱ ndachro na̱:
—Naꞌi, jeꞌa xa, aro inchin jitsjeꞌe xii mee, jitsjeꞌe xii jiꞌi.
Aro xi bagikonꞌa ndachro xa:
—Jaan, jaꞌan.
10Kuthimejan kjan ndachro na̱:
—¿Kexreen bincheꞌe ixin jaꞌa unchao dikon?
11Jeꞌe xa ndachro xa:
—Thi xii diꞌin Jesús binchechjian xa nchetjaꞌo ko kuinga xa nche nganito kon, ko ndachjejin na xa: “Anchee, thji ngain thi diꞌin Siloé thi jiria jinda ko tunthi nda ngakon.” Mexinxin jaꞌan kjui, ko are kunthi nda, jaꞌan unchao bikon.
12Kuthimejan ndachro na̱:
—¿Thinoo jii xii yaa?
Ko jeꞌe ndachro:
—Nunaꞌa.
Xi fariseo tsjé banchiangi xa ngain xi bagikonꞌa
13Kuthimejan bikao na̱ jeꞌe thi bagikonꞌa ngain xi fariseo, 14ixin Jesús binchechjian nchetjaꞌo ko binchexrueꞌen kon thi xii bagikonꞌa ngain thi nchaꞌon nchejugaꞌa ni. 15Mexinxin xi fariseo kai banchiangiꞌi xa jeꞌe thi xii bagikonꞌa ixin kexreen jeꞌe unchao dikon. Ko jeꞌe ndachro:
—Kuinga xa nchetjaꞌo nganito kon, ko kunthi jinda ko unchao dikon.
16Ko kanxion xi fariseo ndache choo xa:
—Xii jiꞌi jeꞌa Ndo Dio ruaꞌan xa ixin nchesayeꞌa xa nchaꞌon nchejugaꞌa ni.
Ko ikanxion xa ndachro xa:
—¿Kexreen naa xii ncheꞌe jianꞌa nchao sincheꞌe xa thi bukon ná?
Mexinxin bagithikauenꞌa choo xa thi bandache choo xa. 17Ko kjan xa banchiangiꞌi xa inaa jeꞌe thi bagikonꞌa, ko ndachro xa:
—¿Ko jaꞌa keꞌe ndachro ixin thi xii binchexrueꞌen kon?
Ko jeꞌe ndachro:
—Jaꞌan ndachrjan ixin xii mee naa thi dayée juajnee Ndo Dio.
18Aro chujni judío bagithikaonꞌa na̱ ixin xii mee bagikonꞌa xa ko ixin jai unchao dikon xa, mexinxin baye̱e xa ni nduꞌa jeꞌe thi xii bagikonꞌa, 19ko banchiangi xa:
—¿Ajiꞌi xi tsiꞌa ra, xi jaꞌa ra ndachro ra ixin are kunkjiꞌi xa bagikonꞌa xa? ¿Ko kexreen jai unchao dikon xa?
20Ko ni nduꞌa xii mee ndachro na̱:
—Nuna ná ixin jiꞌi xi tsiꞌna ná ko bagikonꞌa xan are kunkjiꞌi xan, 21aro nunaꞌa ná kexreen jai unchao dikon xan ko nunaꞌa ná kensen binchexrueꞌen jmakon xan. Danchiangiꞌi ra xan, uchunda xan tsjé nano ko jeꞌe xan unchao rundathjo ra xan.
22Ni nduꞌa thi bagikonꞌa jañaa ndachro na̱ ixin baxraguen na̱ ni judío, ixin ni judío udikjauthexin choo na̱ ixin kexeꞌo chujni rundachro ixin Jesús thi Cristo ko Ndo Dio ruaꞌan, chujni jiꞌi sengixin na̱ ngaxiꞌin niꞌngo. 23Mexinxin ni nduꞌa jeꞌe thi bagikonꞌa ndachro na̱: “Utsjé nano chunda xan, danchiangiꞌi ra xan.”
24Ko xi fariseo kjan baye̱e xa thi xii bagikonꞌa, ko ndachro xa:
—Ndachjejin ni ra thi ndua ngathexin kon Ndo Dio ixin jaꞌan ná nuna ná ixin xii yaa ncheꞌe xa thi jianꞌa.
25Ko thi bagikonꞌa ndachro:
—Ja̱ ncheꞌe xa jianꞌa, yaa jaꞌan nunaꞌa, jaꞌan jeꞌo nuna ixin jaꞌan bagikonꞌa ko jai udikon.
26Ko jeꞌe xa kjan xa banchiangi xa inaa ko ndachro xa:
—¿Keꞌe bincheꞌe xa ngajin? ¿Kexreen bincheꞌe xa ixin binchexrueꞌen xa jmakon?
27Jeꞌe thi bagikonꞌa ndachro:
—Undathjo ra, aro thinꞌa ra thi ndathjo ra, mexinxin, ¿unda rinao ra ixin rukjan rundathjo ra inaa? ¿Akai rinao ra rukjan ra chujni ruee jeꞌe xa?
28Kuthimejan jeꞌe xa chrjuinꞌa nichja xa ngain jeꞌe thi bagikonꞌa mee, ko ndachro xa ngain:
—Jaꞌa rueꞌe xii yaa, aro jaꞌan ná dithikaꞌon ná Moisés. 29Jaꞌan ná nuna ná ixin Ndo Dio nichja ndo ngain Moisés, aro xii yaa nunaꞌa ná thinoo juixin xa.
30Thi xii bagikonꞌa ndachro xa:
—Jiꞌi thi chrjuin, ixin jaꞌa ra nuaꞌa ra thinoo juixin xa, aro jaꞌan binchexrueꞌen xa jmakon na. 31Jaꞌan ná nua ná ixin Ndo Dio thinꞌa ndo chujni ncheꞌe jianꞌa, aro jaan thiꞌin ndo chujni nchesayeꞌe ko ncheꞌe thi rinao ndo. 32Xruꞌin nchaꞌon kuiꞌin ni ixin naa chujni nchao runchexrueꞌen jmakon naa chujni bagikonꞌa ixin jañaa kunkjiꞌi. 33Ja̱ xii jiꞌi jeꞌa ngain Ndo Dio rukixin xa, jeꞌe xa chroꞌa runcheꞌe jiꞌi.
34Ko xi fariseo binthendachro xa:
—Jaꞌa kunkjiꞌa ngakjan thi jianꞌa, ¿ko jai rinao sinchekuanna ni ra ixin Ndo Dio?
Ko bengixin na̱ ngain niꞌngo.
Chujni chunthiaꞌa Cristo te na̱ inchin thi dikonꞌa
35Jesús kunuꞌe ixin bengi na̱ thi xii bagikonꞌa mee, ko are betan ndachro ngain:
—¿Adithikaon jaꞌa ngain Xeꞌen Ndo Dio?
36Ko jeꞌe thi bagikonꞌa mee ndachro:
—Ndachjejin na kensen mee, ixin jaꞌan sithikaꞌon ngain.
37Jesús ndachro:
—Jaꞌa ubikon, ko mee thi ritjao.
38Kuthimejan jeꞌe thi xii bagikonꞌa bethuxin nthajuchjiꞌi ngain Jesús ko ndachro:
—Nchana Jesús, jaan dithikaꞌon ngajin.
39Kuthimejan ndachro Jesús:
—Jaꞌan juiꞌi ngain nunthe jiꞌi ixin sinthaꞌa jie̱, ko chujni dikonꞌa nchao sikon na̱, ko chujni dikon isikonꞌa na̱.
40Ko nthi̱ꞌa̱ binthe kanxion xi fariseo ngain Jesús ko are kuiꞌin xa jiꞌi, bintheganchiangi xa ko ndachro xa:
—¿A jaꞌan ná kai dikonꞌa ná?
41Jesús ndachro ngain xa:
—Ja̱ jaꞌa ra rugikonꞌa ra, xruꞌin thi jianꞌa runcheꞌe ra. Aro ixin jaꞌa ra ndachro ra ixin dikon ra, mexinxin jaꞌa ra xra ncheꞌe ra thi jianꞌa.
Voafantina amin'izao fotoana izao:
San Juan 9: plsNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2017, Wycliffe Bible Translators, Inc. All rights reserved.