San Lucas 19
19
Jesús ko Zaqueo
1Kuthimejan Jesús kunixin chujnii biji na̱ rajna Jericó ko kuexiꞌin na̱ bathugaꞌa na̱ rajna. 2Ko nthi̱ꞌa̱ beꞌe naa xii biꞌin Zaqueo, xi baketuꞌen kain chujni datse tumii César ko anto tsjé tumi bechunda xa. 3Ko Zaqueo binao rugikon kensen Jesús. Aro chroꞌa bikon ixin anto tsjé chujni tethji, ko Zaqueo jiniꞌa beꞌe. 4Kuthimejan Zaqueo kuinga bitaon nthiꞌá ixin nchao rugikon Jesús, ko kuani ngagaꞌa naa nthaa diꞌin sicómoro chiaon thi rugatho Jesús. 5Are Jesús batho no nthi̱ꞌa̱, jeꞌe tsjeꞌe nui thi jii Zaqueo ko ndachro:
—Zaqueo, jaka danianxin yaa ixin jai jaꞌan rinaꞌo sithuna nchiandui.
6Kuthimejan Zaqueo daka bania ko anto chee ixin Jesús rukji nchianduꞌa. 7Are chujni bikon na̱ jiꞌi, kain na̱ chrjuinꞌa nichja na̱ ko ndachro na̱ ixin Jesús kjui bigithuꞌe ngain nchianduꞌa naa xii ncheꞌe jianꞌa. 8Kuthimejan Zaqueo bingathjen ko ndachro ngain Jesús:
—Tsjexin Suixin, jaꞌan ruchjaꞌa chujni nua ngusinenxin thi richunda. Ko ja̱ chrujan chujni binthayaa ko kuemaa tumii, jaꞌan tsunkjañaa chujni mee noo nthiꞌa icha tsjé thi jaꞌan kuemaa na̱.
9Ko Jesús ndachro ngain Zaqueo:
—Jai Ndo Dio rinao sinthakjan inaa chujni narua jaꞌa ko chujnia, ixin jaꞌa ndua chujnii Abraham. 10Ixin jaꞌan, thi Xii juixin ngajni, juiꞌi bikjee ko nthakjan inaa chujni narua thi chujni ndabitjaan.
Thi the ni ncheꞌe xra
(Mt. 25:14-30)
11Are chujni xra tethiꞌin na̱ thi jindachro Jesús, jeꞌe kuekin inaa thi kuꞌen ixin uchiaon tediji na̱ Jerusalén, ko chujni xraxaon na̱ ixin thi thetuꞌan Ndo Dio tuin rukexiꞌin. 12Mexinxin Jesús ndachro ngain na̱:
—Beꞌe naa xii anto renthe ko sakjui kjín ngain inaa nunthe ixin bigayee juachaxin ixin kjan rey, kuthimejan sakjan ngain nuntheꞌe. 13Aro saꞌo baye̱e the ni ncheꞌe xree xa ixin bajon xa ngain na̱ nanaa tumi anto renthe, ko ndachro xa ngain na̱: “Nchencheꞌe ra xra tumi jiꞌi tsija nchaꞌon are jaꞌan rukjan na.” 14Aro chujni rajnee xa baningakuꞌen na̱ xa, ko ruaꞌan na̱ chujni ixin bikao na̱ juajna ixin rinaoꞌa na̱ ixin xii jiꞌi tsetuꞌan xa. 15Aro jeꞌe xa bayée xa juachaxin tsetuꞌan xa, ko are kjan xa rajnee xa baye̱e xa thi the chujni binchegayee xa tumi ixin tsunuꞌe xa kejaꞌin bacha nanaa na̱. 16Ko kunchieꞌen thi saꞌo ko ndachro: “Thi naa tumia chjana bacha ithe tumi.” 17Jeꞌe rey mee ndachro: “Jaꞌa anto jian ni ncheꞌe xra. Jaꞌa bayakuꞌen thi tsjéꞌa tumi, mexinxin jai jaꞌan ruchjaꞌa juachaxin tsetuꞌen the rajna.” 18Kuthimejan kunchieꞌen inaa ko ndachro: “Thi naa tumia suixin chjana bacha inaꞌo tumi.” 19Ko xi rey mee kai ndache chujni jiꞌi: “Jaꞌa tsetuꞌen naꞌo rajna.” 20Kuthimejan kunchieꞌen inaa xa ko ndachro xa: “Nthiꞌi jii tumia chjana suixin. Jaꞌan kuenchjiꞌan tumi ngaa naa paniito 21ixin jaꞌan xraguꞌan ixin suixin naa xii anto cha ngain anseen, ko dantsjeꞌe chujni thi chjeꞌa na̱, ko datsiin thi thengaꞌa.” 22Kuthimejan xi rey mee ndachro: “Jaꞌa ni ncheꞌe xra jianꞌa ixin thi ndachro jaꞌa sinthaꞌa jie̱. Ja̱ ubenuꞌa ixin jaꞌan anto cha ansenna, ko dantsjaa chujni thi jaꞌan dajonꞌa ko thjejo thi jaꞌan thengaꞌa, 23mexinxin, ¿unda bikanꞌa tumi ngain naa thi dechjian tumi ixin jañaa jaꞌan rugayaa thi dacha tumi are rukjan na nchiania?” 24Ko ndachro xi rey ngain thi chujni te nthi̱ꞌa̱: “Dantsjeꞌe ra xa tumi ko dajon ra tumi ngain xi bacha the tumi.” 25Ko jeꞌe na̱ ndachro na̱: “Aro chujni mee uchunda the tumi.” 26Xi rey mee ndachro: “Jaꞌan ndathjo ra ixin thi chujni uchunda, sayée na̱ icha, aro thi chujni xruꞌin chunda, sachrjeꞌe thi nchion chunda na̱. 27Ko kai chujni ningakunna ko binaoꞌa ixin jaꞌan ruketuan na̱, sikuꞌna ra na̱ nthiꞌi ko naduenxon ra na̱ ngathexin kon na.”
Jesús bigaꞌa rajna Jerusalén
(Mt. 21:1-11; Mr. 11:1-11; Jn. 12:12-19)
28Kuthimejan, are Jesús juexin nichja jiꞌi, jeꞌe ruee nthiee ko sakjui no Jerusalén. 29Ko are uchiaon jidiji rajna Betfagé ko Betania, chiaon jna diꞌin Ntha Olivo, Jesús ndachro ngain yoo chujni bakao:
30—Thji ra ngain rajnanchjan jii ngathexin kon ná, ko are saso ra nthi̱ꞌa̱ sinchii ra naa kuluchuchjan jichrua ba ko xra xruꞌin chujni detaꞌa ba. Tunxindangeꞌe ra ba ko sikoo ra ba. 31Ko ja̱ chrujan chujni sanchiangiꞌa ra ixin unda tetunxindangeꞌe ra ba, jaꞌa ra ndachro ra, Nchaa ná, rugundeꞌe ba.
32Ko kayui ni kuinchieꞌe Jesús sabinthekji na̱ ko kuꞌen inchin ndachro Jesús. 33Ko are utetunxindangeꞌe na̱ kuluchuchjan mee, ni kuluchuꞌe ndachro na̱:
—¿Unda tetunxindangeꞌe ra kuluchuchjan yaa?
34Ko ni tetunxindangeꞌe ba ndachro na̱:
—Nchaa ná rugundeꞌe ba.
35Kuthimejan sabikao na̱ ba ngain Jesús, ko nthi̱ꞌa̱ jeꞌe na̱ kjuajiꞌin na̱ ba thi luntho tetsaa na̱ ko bincheꞌe na̱ ixin Jesús betaꞌa kuluchuchjan mee. 36Ko are Jesús icha kunchiaon ngakee rajna Jerusalén, chujni kuingo na̱ nguii ngaa nthiꞌá thi luntho tetsaa na̱ ixin rugatho Jesús. 37Ko are uchiaon tediji na̱ thi xinkajinxin na̱ ngain jna Ntha Olivo, kain chujni jiruee ko bithikaon Jesús, kuexiꞌin na̱ kuyao na̱ ixin anto chee na̱ ko binchesayeꞌe na̱ Ndo Dio ixin bikon na̱ anto tsjé thi jian bincheꞌe Jesús. 38Ko ndachro na̱:
—¡Ndo Dio sinchenchaon thi Rey juii kunixin juachaxiin Ndo Dio! ¡Thi chrjuin tunuꞌe ni jii nthi̱ꞌa̱ ngajni! ¡Ko kain chujni sinchesayeꞌe na̱ ndo!
39Kuthimejan kanxion xi fariseo te nthi̱ꞌa̱ ngayee chujni binthendachro xa ngain Jesús:
—Suixin ke tjaago, nchesatheꞌe chujnia teꞌi.
40Aro Jesús ndachro ngain xa:
—Ja̱ chujni teꞌi rutenkua na̱, xro tsuyao xro.
41Are Jesús biji chiaon Jerusalén, jeꞌe bikon rajna ko tsjangaxin rajna, 42ko ndachro ngain rajna:
—¡Ja̱ chujnia rukinxin na̱ jai ixin ruchjaꞌa na̱ thi chrjuin rukunuꞌe ngain anseen na̱! Aro jai mee tabema, ko chroꞌa tsinxin na̱. 43Tsii nchaꞌon anto tangi ixin jaꞌa ra, are chujni ningakuꞌan ra sinthe na̱ xraa thjarioꞌo nguixin ngandajin jaꞌa Jerusalén, ko nguixin ngandajin jaꞌa sinthendajin na̱ ko sixiꞌin na̱ ixin suen na̱ chujnia. 44Ko nasuenxon na̱ chujnia, ko xruꞌin xro tsinthueꞌa na̱ ngajin ngataꞌa inaa xro. Ko jiꞌi tsuꞌen ixin chujnia bithikaonꞌa na̱ thi nchaꞌon are Ndo Dio juii ndo bitsjaꞌa ra ndo.
Jesús bincherua niꞌngo icha jié
(Mt. 21:12-17; Mr. 11:15-19; Jn. 2:13-22)
45Kuthimejan Jesús bixiꞌin niꞌngo icha jié ko nthi̱ꞌa̱ bengixin kain chujni tenchekji ko theꞌna. 46Ko ndachro ngain na̱:
—Ngain Xruen Ndo Dio ndachro: “Nchiania nchia tjauxin ni Ndo Dio.” ¡Aro jaꞌa ra ndadinchechjian ra nchianduꞌa xi cheꞌe!
47Kain nchaꞌon Jesús bakjaago ngain niꞌngo, aro kain xi daana baketuꞌan ngain icha xi daana, kain xi bakjaago ley ko kain xi baketuꞌan ngain rajna kjuee xa kexreen sincheꞌe xa ixin nasuenxon xa Jesús. 48Aro chroꞌa bagireꞌe xa kexreen runcheꞌe xa jamee, ixin kain chujni bakiꞌin na̱ jian thi banichja Jesús.
Voafantina amin'izao fotoana izao:
San Lucas 19: plsNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2017, Wycliffe Bible Translators, Inc. All rights reserved.