San Lucas 20
20
Juachaxin chunda Jesús
(Mt. 21:23-27; Mr. 11:27-33)
1Naa nchaꞌon are Jesús tajii ngaxiꞌin niꞌngo icha jié ixin jinchekueꞌen chujni ixin Ndo Dio ko jindache na̱ ixin thi jian juajna, binthegiji kanxion xi daana baketuꞌan ngain icha xi daana, kanxion xi tjaago ley ko kanxion xi thetuꞌan ngain niꞌngo mee. 2Ko binthendachro xa ngain Jesús:
—Ndachjejin ni ra keꞌe juachaxin chunda jaꞌa ixin ncheꞌe kain jiꞌi. ¿Ko kensen chjaa juachaxin?
3Kuthimejan Jesús ndachro ngain xa:
—Jaꞌan kai sanchiangiꞌa ra: 4¿Kensen ruaꞌan Juan ixin banchegithe chujni? ¿A Ndo Dio o chujni?
5Aro kuexiꞌin xa banchiangiꞌi choo xa ko ndachro xa:
—¿Keꞌe rundachro ná? Ja̱ rundachro ná ixin Ndo Dio ruaꞌan Juan, jeꞌe rundathjo ná: “¿Unda bithikaonꞌa ra remee?” 6Ko ja̱ rundachro ná ixin chujni thi ruaꞌan Juan, kainxin chujni nasuenxon ná na̱ kunixin xro ixin jeꞌe na̱ ndua bithikaon na̱ ixin Juan banichja juajnee Ndo Dio.
7Ko jeꞌe xa binthendachro xa ixin nueꞌa xa kensen ruaꞌan Juan. 8Kuthimejan Jesús ndachro ngain xa:
—Kai jaꞌan rundathjoꞌa ra keꞌe juachaxin nthaxin kain jiꞌi.
Ni ncheꞌe xra jianꞌa
(Mt. 21:33-44; Mr. 12:1-11)
9Kuthimejan Jesús kuekiin chujni naa thi kuꞌen ko ndachro:
—Naa thi bechunda jié jngi kjuenga ntha uva, kuthimejan xi jngiꞌi bajon xa jngi ngain kanxion thi ncheꞌe xra ko ni ncheꞌe xra rukjengeꞌe na ꞌna xi nthatuchjuiin ko jeꞌe xa sakjui xa kjín tsjé nchaꞌon. 10Ko are ukunchiaon nchaꞌon are urukaade na̱ tho uva, thi jngiꞌi ruaꞌan ni ncheꞌe xree ngain ni bithueꞌe ntha uva ixin ruchjee na̱ tho jikininxin rugayee. Aro jeꞌe thi ni kuaa jngi mee kuaxin na̱ nthaa thi ruaꞌan xi najni mee ko bengi na̱ ko xruꞌin chjee na̱. 11Kuthimejan xi najni ruaꞌan xa inaa ni ncheꞌe xree xa, aro kai bintja na̱, chrjuinꞌa nichja na̱ ixin jeꞌe xa ko bengi na̱ ko xruꞌin chjee na̱. 12Xi najni mee kjan xa ruaꞌan xa inaa thi ncheꞌe xra, aro kai bincheniꞌi na̱ ko bengi na̱ ko xruꞌin chjee na̱.
13’Kuthimejan xi najni mee ndachro xa: “¿Keꞌe sinthaꞌa? Jaꞌan ruruaꞌan thi xanꞌna, xan anto thjuaa. Ko are jeꞌe na̱ sikon na̱ xanꞌna jiꞌi, jeꞌe na̱ jaan, sithikaon na̱ ngain xan.” 14Ko ni bithueꞌe ntha uva are bikon na̱ biji xeꞌen xi najni, jeꞌe na̱ ndache choo na̱: “Jiꞌi thi sithueꞌe nguii nunthe jiꞌi. Nasuenxon na̱ xan ko jaꞌan ná sithuaa ná nguixin jngi.” 15Kuthimejan bantsjegaxin na̱ xan ngain jngi mee ko naguenxon na̱ xan.
Kuthimejan Jesús banchiangi ko ndachro:
—Are tsii thi jngiꞌi, ¿keꞌe sincheꞌe ngain ni bithuꞌe ntha uva? 16Jaꞌan ndathjo ra ixin are tsii xa nasuenxon xa chujni mee ko sajon xa jngiꞌi xa ngain ujee chujni.
Are binthekiꞌin na̱ jiꞌi, jeꞌe na̱ binthendachro na̱:
—¡Ndo Dio tsjengijna ná!
17Aro Jesús tsjeꞌe ngain na̱ ko ndachro:
—Mexinxin, ¿keꞌe ruchro thi jitaxin Xruen Ndo Dio?
Thi xro ke banchegundaꞌa xi thethe nchia,
xro mee xro icha jian keꞌe nchia.
18Ko kexeꞌo thi setsinga ngataꞌa xro, ndasaaña xro nthauꞌe. Ko ja̱ chrujan thi setsingataꞌa xro ndaruxanthe chringindeꞌe xro.
Tumi xenge ꞌna César
(Mt. 21:45-46; 22:15-22; Mr. 12:12-17)
19Kain xi daana baketuꞌan ngain icha xi daana ko xi tjaago ley binao xa rutse xa Jesús ixin kuinxin xa ixin Jesús nichja ixin jeꞌe xa. Aro xraguen xa kain chujni. 20Mexinxin jeꞌe xa ruaꞌan xa kanxion chujni ixin tsayeꞌe na̱ Jesús ko ni teꞌi xraa anto jian bancheꞌe na̱, ko jañaa runchenichja na̱ Jesús chrujan thi nduaꞌa ko nchao rukjangiꞌi na̱ ngain xi gobernador. 21Ko ni tetsayeꞌe Jesús banchiangiꞌi na̱ jeꞌe ko ndachro na̱:
—Suixin ke tjaago, jaꞌan ná nuna ná ixin suixin nichja ko nchekueꞌen chujni thi ndua, ko suixin dincheꞌa thi ncheꞌe icha chujni ko ndua dinchekueꞌen chujni nthiee Ndo Dio. 22Ndachjejin ni ra: ¿Anchao tsjenga ná ꞌna ngain xi thetuꞌan o naꞌi?
23Aro Jesús ukunuꞌe thi jianꞌa texraxaon na̱, ko jeꞌe ndachro ngain na̱:
—¿Unda rinao ra sincheyana ni ra? 24Tjaguꞌna ni ra naa tumi. ¿Kensen ngakon jinganito tumi jiꞌi ko kexreen diꞌin?
Jeꞌe na̱ binthendachro na̱:
—Ngakon César.
25Kuthimejan ndachro Jesús ngain na̱:
—Mexinxin chjeꞌe ra César thi jikininxin jeꞌe, ko chjeꞌe ra Ndo Dio thi jikininxin jeꞌe ndo.
26Ko Jesús xruꞌin jianꞌa nichja ngathexin kon chujni ko chroꞌa tse na̱, ko anto kuiseꞌen na̱ ixin jian bagatheꞌe.
Chujni danchiangi kexreen ruxechon ni
(Mt. 22:23-33; Mr. 12:18-27)
27Kuthimejan kanxion xi saduceo binthekunchieꞌen ngain Jesús. Ko xi saduceo bagithikaonꞌa xa ixin chujni ndadeꞌen ruxechon na̱, mexinxin ndachro xa ngain Jesús:
28—Suixin ke tjaago, Moisés kuinthuna ná xroon jitaxin ja̱ naa xii chunda chriꞌi ko ndadeꞌen xa ko xruꞌin chjan binchian chriꞌi xa, xichoo xi ndabeꞌen rugunda sekaꞌo xa nchri gaꞌan ko ruchunda nchra chjan ko chjan mee, rukjan xan xraa xeꞌen thi ndabeꞌen. 29Ko binthe yaato xii choo xan. Xan saꞌo bekaꞌo xan chriꞌi xan aro ndabeꞌen xan ko xruꞌin chjan kuinthuꞌe xan. 30Ko kai xan yuxin bekaꞌo xan nchri gaꞌan mee aro kai ndabeꞌen xan ko xruꞌin chjan kuinthuꞌe xan. 31Ko xrajeꞌo kuꞌen xan ninxin ko jañaa kuꞌen kain xan ko biji ngain xan yatuxin ko kain xan beꞌen xan ko xruꞌin chjan kuinthuꞌe xan. 32Kuthimejan kai ndabeꞌen nchri gaꞌan mee. 33Mexinxin are ruxechon na̱, ¿kexeꞌe thi yaato xii teꞌi tsji xixiꞌi nchra?, ixin kain xan bekaꞌo nchra.
34Kuthimejan ndachro Jesús ngain xa:
—Ngain nunthe jiꞌi, xii ko nchrii thutheꞌe na̱. 35Aro chujni jikininxin ruxechon ko tsji ngajni thutheꞌa na̱ ko isajonꞌa na̱ xeꞌen na̱ ixin tsutheꞌe xan, 36ko isenꞌa na̱, ko rukjan na̱ inchin angeel Ndo Dio ko uxeꞌen Ndo Dio na̱, ixin jeꞌe na̱ xechon na̱. 37Ko ixin thi ndadeꞌen ni ko ruxechon ni, Moisés kjuaago are bikon xruꞌi ngagaꞌa kanchaꞌa, are ndachro ixin Ndo Dio, Dioe Abraham, Isaac ko Jacob. 38Ixin Ndo Dio jeꞌa Dioe ni ndadigeꞌen, Ndo Dio, Dioe ni techon. Ko mee ruchro ixin ngathexin kon Ndo Dio kain chujni techon na̱.
39Kuthimejan kainxion xi tjaago ley binthendachro xa:
—Nchao ndachro, Suixin ke tjaago.
40Ko ixruꞌin ni banchiangi icha ngain Jesús.
Kensen ni nduꞌa Jesucristo
(Mt. 22:41-46; Mr. 12:35-37)
41Ko Jesús ndachro ngain chujni te nthi̱ꞌa̱:
—¿Unda chujni ndachro ixin Cristo bachrjeninxin David? 42Ixin jeꞌe David ndachro ngain Xruen Salmos:
Ndo Dio ndache Nchana:
“Dariꞌi ngain rajianxin na,
43are jaꞌan sakeja kain ni ningakuꞌan chringiꞌi ruthea.”
44Mexinxin, ja̱ David ndache Cristo, “Nchana”, ¿kexreen rundachro ra ixin xeꞌen?
Jesús nchesatheꞌe xi tjaago ley
(Mt. 23:1-36; Mr. 12:38-40; Lc. 11:37-54)
45Ko ngathexin kon kain chujni, Jesús ndachro ngain chujni bakao:
46—Tsjeꞌe ra ixin ncheꞌa ra inchin ncheꞌe xi tjaago ley ixin jeꞌe xa nchexruxiꞌin xa chrji xa kunixin luntho icha jinjini, ko rinao xa ixin chujni sajon na̱ juajna ngain xa ko tsusayeꞌe xa ngain ndaasin, ko ngaxiꞌin niꞌngo jeꞌe xa thjee xa thi ntha xintaon icha renthe ixin dinthetaꞌa xa, ko are thji xa dijine xa jeꞌe xa rinao xa seꞌe xa ngain ntha icha renthe. 47Kai dantsjeꞌe xa nchri gaꞌan nchianduꞌa nchra, ko ixin xruꞌin chujni ruxraxaon thi jianꞌa ncheꞌe xa, jeꞌe xa anto see nichjee xa Ndo Dio. Aro xi teꞌi icha tangi tsuꞌen xa.
Voafantina amin'izao fotoana izao:
San Lucas 20: plsNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2017, Wycliffe Bible Translators, Inc. All rights reserved.