Genesis 2
2
CAB. II
1Myr shoh va ny niaughyn as y thalloo er nyn groo, as ooilley ny va ayndoo. 2As er y chiaghtoo laa scuirr Jee veih yn obbyr v’eh er chroo; as ghow eh fea er y chiaghtoo laa veih ooilley e obbyr v’eh er chroo. 3As vannee Jee yn chiaghtoo laa, as ren eh eh y chasherickey, er-y-fa dy nee er (y laa shen) v’eh er scuirr veih ooilley e obbyr va Jee er chroo, as er n’yannoo.
4Shoh coontey jeh toshiaght ny niaughyn as y thalloo, tra v’ad er nyn groo, er y laa ren y Chiarn Jee yn thalloo as ny niaughyn y chroo, 5As dy chooilley villey jeh’n vagher roish my row ad er yn ooir, as ooilley lossreeyn y vagher roish my daase ad; son cha row yn Chiarn Jee foast er choyrt fliaghey er yn ooir, as cha row dooinney ayn dy laboragh y thalloo. 6Agh hrog kay seose veih yn thalloo, ren gushtaghey slane eaghtyr ny hooirey. 7As ren y Chiarn Jee dooinney y chroo ass joan ny hooirey, as heid eh ayns ny stroanyn echey ennal y vea; as haink dooinney dy ve ny annym bio.
8As ren y Chiarn Jee soiaghey garey my-hiar ayns Eden: as ayns shen hug eh yn dooinney v’eh er chroo, 9As magh ass y thalloo hug y Chiarn Jee er dy chooilley villey gaase ta pleasal da’n thooill, as mie son beaghey; yn billey dy vea myrgeddin t’ayns mean y gharey, as y billey dy hushtey jeh mie as sie. 10As roie awin trooid Eden dy ushtaghey yn gharey; as veih shen ve er ny rheynn ayns kiare banglaneyn. 11Ta ennym yn chied awin Pison: shen eh ta combaasal slane cheer Havilah, raad ta airh. 12As ta airh y cheer shen mie: shen y raad ta’n bdellium, as y chlagh onyx. 13As ennym y nah awin Gihon: yn awin cheddin ta combaasal slane cheer Ethiopia. 14As ennym y trass awin Hiddekel: eh ta roie shiar lesh Assyria. As y chiarroo awin Euphrates. 15As ghow yn Chiarn Jee yn dooinney, as hug eh eh ayns garey Eden, dy obbraghey as dy reayll eh. 16As hug y Chiarn Jee sarey da’n dooinney, gra, Jeh mess ooilley biljyn y gharey foddee oo dy arryltagh gee: 17Agh jeh’n billey dy hushtey jeh mie as sie, cha negin dhyt gee: son er y laa ee-ys oo jeh, bee oo dy shickyr fo briwnys baase.
18As dooyrt y Chiarn Jee, Cha vel eh mie yn dooinney dy ve ny-lomarcan: neem’s sheshey da son cooney cooie er e hon. 19As jeh’n ooir chroo yn Chiarn Jee ooilley beiyn y vagher as ooilley eeanlee yn aer, as hug eh lesh ad gys Adam, dasyn dy choyrt ennym orroo: as cre-erbee yn ennym hug Adam er dagh cretoor bio, shen va’n ennym echey. 20As hug Adam ennym er ooilley’n maase, as er eeanlee yn aer, as er ooilley beiyn y vagher: agh er son Adam, cha row cooney cooie er ny gheddyn. 21As hug y Chiarn Jee cadley trome dy huittym er Adam, as ren eh cadley: as ghow eh unnane jeh ny asnaghyn echey, as laanee eh seose yn eill ’syn ynnyd echey. 22As jeh’n asney, va’n Chiarn Jee er ghoaill ass dooinney, ren eh ben y chummey; as hug eh lesh ee gys y dooinney. 23As dooyrt Adam, Shoh nish craue jeh my chraueyn, as feill jeh m’eill: bee ee enmyssit ben, er-yn-oyr dy row ee er ny ghoaill ass dooinney. 24Er-yn-oyr shoh faagee dooinney e ayr as e voir, as bee eh er ny lhiantyn gys e ven: as bee ad un eill. 25As v’ad ny-neesht rooisht yn dooinney as e ven: as cha row oyr nearey orroo.
Voafantina amin'izao fotoana izao:
Genesis 2: BIB1819
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© British and Foreign Bible Society 1819, 2019