Genesis 4
4
CAB. IV
1As bione da Adam Eve e ven, as ren ee giennaghtyn, as dymmyrk ee Cain, as dooyrt ee, Ta mee er gheddyn lhiannoo mac veih yn Chiarn. 2As reesht dymmyrk ee e vraar Abel; as v’ec Abel ymmodee shioltaneyn keyrragh, agh va Cain cur rish obbyr hallooin. 3As haink eh gy-kione, lurg earish, dy dug Cain lesh jeh mess y thallooin son oural gys y Chiarn. 4As hug Abel lesh myrgeddin jeh toshiaght e hioltane, as y chooid s’riurey. As ren y Chiarn soiaghey jeh Abel as e oural. 5Agh jeh Cain as jeh e oural cha ren eh soiaghey: as va Cain feer jymmoosagh, as va groam er e eddin. 6As dooyrt y Chiarn rish Cain, Cre’n-fa t’ou jymmoosagh? as cre’n-fa t’ou jeeaghyn cha groamagh? 7My t’ou jannoo dy mie, nagh bee soiagh jeant jeed? as mannagh vel oo jannoo dy mie, ta peccah lhie ec dty ghorrys: bee eshyn fo dty viallys, as nee oo reill harrish. 8As va focklyn eddyr Cain as Abel e vraar, as haink eh gy-kione, tra v’ad ’sy vagher, dy dirree Cain seose noi Abel e vraar, as varr eh eh.
9As dooyrt y Chiarn rish Cain, Cre vel Abel dty vraar? As dreggyr eh, Cha s’aym: nee mish oaseir my vraarey? 10As dooyrt eh, Cre t’ou er n’yannoo? ta coraa fuill dty vraarey geamagh hym’s veih’n ooir. 11As nish t’ou fo mollaght er y thalloo, t’er vosley e beeal dy ghoaill fuill dty vraarey veih dty laue. 12Tra t’ou laboragh y thalloo, cha jean ee, maghey shoh, gymmyrkey dhyt’s e niart; dty yoarree, as dty wagaantagh vees oo er yn ooir. 13As dooyrt Cain rish y Chiarn, Ta my cherraghey ny s’trimmey na oddym gymmyrkey. 14Cur-my-ner, t’ou er my imman jiu veih eaghtyr y cheer shoh: as veih dty enish bee’m er my eiyrt, as bee’m er my yiooldey magh, as my wagaantagh er yn ooir: as hig eh gy-kione, dagh unnane nee m’y gheddyn magh, dy stroie eh mee. 15As dooyrt y Chiarn rish; Quoi-erbee, er-y-fa shen, varrys Cain, bee kerraghey shiaght filley er ny ghoaill er. As hug y Chiarn cowrey er Cain, nagh jinnagh unnane erbee harragh ny raad, eh y stroie.
16As hie Cain magh veih fenish y Chiarn, as ren eh cummal ayns cheer Nod, shiar jeh Eden. 17As bione da Cain e ven, as ren ee giennaghtyn as gymmyrkey Enoch: as hrog eh ard-valley, as denmys eh yn ard-valley Enoch, lurg ennym e vac. 18As da Enoch v’er ny ruggey Irad: as hooar Irad Mehujael: as hooar Mehujael Methusael: as hooar Methusael Lamech.
19As ghow Lamech huggey daa ven: as va ennym y derrey yeh Adah, as ennym yn jeh elley Zillah. 20As ren Adah gymmyrkey Jabal: she eshyn va’n chenn-ayr ocsyn ta beaghey ayns cabbaneyn, as ta troggal ollagh. 21As va ennym e vraar Jubal: she eshyn y chenn-ayr ocsyn ta kiaulleeaght er y chlaasagh, as er yn organ. 22As ren Zillah myrgeddin gymmyrkey Tubal-Cain, fer-ynsagh dy chooilley obbree ayns prash as yiarn. As shuyr Tubal-Cain va Naamah. 23As dooyrt Lamech rish e vraane Adah as Zillah, Clasht-jee my choraa, shiuish vraane Lamech, eaisht-jee rish my raa: son ta mee er varroo dooinney gys my hrimshey, as dooinney aeg gys my assee. 24My vees kerraghey shiaght filley er ny ghoaill ersyn varrys Cain, dy firrinagh bee kerraghey shiaght-jeig as three-feed er ny ghoaill son Lamech.
25As bione da Adam reesht e ven; as ren ee mac y ymmyrkey, as denmys ee eh Seth: son dooyrt ee, Ta Jee er choyrt dou lhiannoo elley, ayns ynnyd Abel, ren Cain y varroo. 26As da Seth myrgeddin va mac er ny ruggey; as denmys eh eh Enos: eisht ghow deiney toshiaght dy enmys ad hene lurg ennym y Chiarn.
Voafantina amin'izao fotoana izao:
Genesis 4: BIB1819
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© British and Foreign Bible Society 1819, 2019