Luka 18
18
Abee ní Ɔtrɛtrɛ yedze Nì Otsixwa yɛ su
1Lɛ Yesu ebu abee aki yɛ badɔkpasi ba tɔ yikɔ ɛbasɛ ba si liziã si bazɛxwa Aya lipoe kakaa tɔ ba ina nɛ ikí gbɔ̀ ɔ. 2Apani si “Otsixwa ɔtɔ eze ní ɔma ɔtɔ mɛ gi óse Aya a, lɛ ɔ́kɔ lɛ mɛ ɔ́ki ɔnɔnɔ ɔ. 3Ɔtrɛtrɛ ɔtɔ yedze fɛ eze ní ɔma lɔ klɔ mɛ gi azɛɛba yɛ klɔ nì kugyodi si tɔ ɔtsa litsi ɔki yɛ ɛ, Apani si, ‘Tsa litsi kí mɛ ní mɛ nì ɔnɔ gi apɛ si yitafa mɛ kusi i!’
4“Pɔ̀ kɔki lipoe gblamadzaɛtɔ ɛ, otsixwa yɛ ɔ́wa lixwɛxwɛ ní lɛ su. Gɔgɔɛ asi isu ya si, ‘Lilɛ lɛ mɛ si meʋíse Aya loo kɔ lɛ mɛ ɛki ɔnɔnɔ ɔ, 5pɔ̀ kɔkpɛ kunugu yo gi ɔtrɛtrɛ yedze liɛ ɛɛkpɛ mɛ loso ɛ, maadi lɛ aʋa si matsa litsi gyɔgyɔ aki yɛ ɛ. Xe aníte e, yɛ mɔklɔ kubaba lipoe kakaa ɛ, kwikpɛ mɛ kupepe.’ ”
6Lɛ Ɔkaɛ atrɛ ní lɛ aʋa si, “Mlenu liboe lɛ gi otsixwa nyani nyani liɛ klɔ apani i. 7Kɔ Aya ɔ́tratsa litsi kí yɛ ɔtutɔ yɛ banima gi beebemi ikí yɛ elesi nì kemize kí kupɔnɔ na a? Ɔ́trakɔsi xe aapɔni ba na a? 8Mɛɛsi mlɔ si, aakɔsi aatsa litsi kiba. Pɔ̀ xe Ɔnɔɛ Yebi ye aaba kesea aʋa ɛ, aamɔ kuziŋa na?”
Abee Ní Farisiɔnɛ Ni Ɔbɔgyɔɛ Su
9Yesu ebu abee akí banama gi bɛka ní isu ya aʋa si bɛɛpɛ ɛ, pɔ̀ xe bɛɛplɛ banɔgɔgɔ ba kesea ɛ. 10“Liba lɛ mɛ si benyime tiaʋa bemu itrɛ ní Lisɔligba lɛ mɛ Aya ɔxwa kɔ: tole eze Farisiɔnɛ, lɛ ɔʋlaɛ eze ɔbɔgyɔ ɔ.
11“Farisiɔnɛ ebu isu ya lidze lɛ ɔlɛ kedu ya xe axwa Aya si, ‘Medo wɔ́ Aya ɖase e, si kuŋazi kúma mɛ mɛ̀ ɛ, katafa kama mɛ mɛ̀, lɛ ménu ɔhasinɛ ɛ, ŋwisi banɔ gɔgɔ ba kinɛ ɛ. Medo wɔ ɖase si máma ŋwisi ɔbɔgyɔ liɛ kɔlɔ kinɛ ɛ. 12Mizɛɛnya onugu taʋa ní ogle no me, lɛ mizɛɛki wɔ mɛ bidɔ mɔmɔ ʋɛ kapɛ liɔfɔa a.’
13“Pɔ̀ ɔbɔgyɔɛ alɛɛ ní ɔdzage no lɛ ómu ni yɛ aŋu mɛ lifunu ne kyɛ ɛ, pɔ̀ azɛɛsa awla yɛ kakɔa mɛ lɛ apani si, ‘Aya, di me asigaga, mɛ ɔnɔ zimizi ye e!’
14“Lɛ Yesu atrɛ lɛ aʋa si Mɛɛsi mlɔ si, aní Farisiɔnɛ pɔ̀ ɔbɔgyɔɛ yɛ liboe ligyɔ ní Aya kɔ ɔ, xe bɛsɛ ɛtrɛ ní kepea mɛ ɛ. Lɛ loso ɔnɔ kakaa gi izeemu ni isu ya ɛ, biapleni ye, lɛ ɔnɔ kakaa gi izeepleni isu ya ɛ biamuni ye.”
Yesu Akrira Banuvɔ ba
15Banɔ batɔ bɛmani ba bebi ba ní Yesu klɔ tɔ ɔtrɔ awla ní ba aʋa, tɔ ɔkrira ba. Agi badɔkpasi ba bɛmɔ nite e, bɛtɛni ba, 16pɔ̀ Yesu axwa banuvɔ ba amani yɛ isu ya lɛ apani si, “Mlaki tɔ banuvɔ ba baba mɔklɔ lɛ mlakítsi kudeonu aki ba a, lɛ ese linu si Aya yɛ Kaʋaŋaa ɛ, ba elu kanɛ kenu. 17Mɛɛsi mlɔ si! Ɔnɔ kakaa gi ɔ́zɛ Aya yɛ Kaʋaŋaa ŋwisi ɔnuvɔ kinɛ ɛ, ɔ́tratiku ka mɛ liwewe e.”
Oxonete Ɔʋaŋa yɛ
18Yuda ɔnɛ ɔka ɔtɔ eʋi Yesu si, “Ɔdɔbasɛ gbã ɛ, ege maabitɛ xe maamɔ ligbã́ moblo le e?”
19Yesu eʋi ye si, “Ege lɛ loso wɔɛxwa mɛ si ɔgbã a? Ɔ́nɔnɔ ónu ɔgbã, Aya ko. 20Wote isã nɛ: ‘Wukísɛ ádzɛ ni enyimeboe e; wukíye ɔnɔ ɔ; wukízuru u; wukisɛ asia ɛkpɛ ɔnɔ awla a; kpɛ kubùbù ní wɔka ni wone su.’ ”
21Onyimee ebu le onu si, “Dɔni mɛ kunuvɔ mɛ ké mɛɛbitɛ ni isã nɛ pɔ́ aʋa a.”
22Agi Yesu enu liboe lɛ ɛ, asi yɛ si, “Kigɔ́ kidɔ tile dzɛ gi lilɛ si bitɛ ɛ. Da wɔ bidɔ mɛ petee tɔ kɔ kibɔe kí bazianete ba, tɔ wɔamɔ exo ní lifunu ne; lɛ kede e, bá tɔ gaze ni mɛ kude e.”
23Pɔ̀ gi onyimee enu liboe le e, Líku ye isami i, lɛ ese linu si oxonete ʋidi onu. 24Yesu edi ye lɛ apani si, “Liaaze gagla xe bexonete ba biati uku ní Aya yɛ Kaʋaŋaa mɛ ɛ! 25Sugba ɛ, liaze plɔplɔ ɛki kposɔɛ si ɔga trɔ̀ni yɛ liwu le me odo sani si oxonetee oti oku Aya yɛ Kaʋaŋaa mɛ.”
26Banama gi benu liboe le e, beʋi ye si, “Kɔ, nyaŋwɛ aamɔ kubúbú i?”
27Yesu ebu le onu si, “Kidiliɛ gi ɔnɔ ɔ́tratani kubitɛ ɛ, kilɛ plɔplɔ ɛki Aya yɛ kubitɛ.”
28Lɛ Petro apani si, “Dí! Kwiyurɔ kidɔ kakaa xe kwikuni wɔ kude e.”
29Yesu asi ba si, “Sugba mɛɛtrɔ likla ní lɛ aʋa ɛki mlɔ si ɔnɔ kakaa gi ayurɔ yɛ kepe loo yedze loo beneminyime loo bapɔnɛ loo bebi kɔkpɛ Aya yɛ Kaʋaŋaa loso e, 30aamɔ bidɔ glegle sanɔ ni abla kelea mɛ kɔpɔni ligbã moblo le ní kelea lia gi kiaba mɛ ɛ.”
Yesu Apani Dzɛ Ní Yɛ Kutseo Su
31Yesu ebú badɔkpasi liɔfɔ ni tiaʋa ba kuka lɛ asi ba si, “Mlata kutu! Kwitrɛ ni Yerusalem niklɔ kidɔ kakaa gi beboedoplɛ ba bɛŋwlimi ni Ɔnɔɛ Yebi ye su i, kiaba kɛ mɛ. 32Biakpɛ yɛ awla ki banama gi bénu Yudanɛ ɛ, gi biakpɛ yɛ kakpaa, biakpini ye, lɛ biabu sita bali yɛ aʋa a. 33Biafiaʋi yɛ litam lɛ biaye ye e, pɔ̀ ewe tata kede e, aadzi ligbã́.”
34Pɔ̀ badɔkpasi ba bénu la ya litɔtɔ ese e; eboe la ese kununu yo kwikpo ba, lɛ béte kidiliɛ su gi Yesu azɛɛpani i.
Yesu Ayɔni Kaŋupo Ɔdɔʋi ye
35Gi Yesu eti apɔni Yerixo e, kaŋupo atɔ keze ní kudeo su, gi keze eʋi bidɔ ɔ. 36Gi enu linɔkpi le onu gi lizɛza ɛ, eʋi si, “Liboe woli liiba a?” 37Bɛsi yɛ si, “Yesu Nazaret Ɔnɛɛ yɛ ɛɛza.”
38Lɛ akpɛ ozi si, “Yesu! Dawid Yebi ye! Di me asigaga!”
39Banama gi beze ni ɔtɔ nɔ ɛ, bɛtɛni yɛ lɛ bɛsi yɛ si ɔgɔ tsriɖi. Pɔ̀ akpɛ ozi lo gagla asanɔ si, “Dawid Yebi ye! Di me asigaga!”
40Lɛ Yesu alɛɛ xe aki si bagbani kaŋupoa mani yɛ ɛ. Gi eti apɔni yɛ ɛ, Yesu eʋi ye si, 41“Ege wɔpɛ si mibitɛ kiwɔ ɔ?”
Ebu le onu si, “Ɔkaɛ, mapɛ si mimɔ dzɛ.”
42Yesu asi yɛ si, “Kɔlɔ mɔ! Wɔ kuziŋaa kwiyɔ ni wɔ.” 43Onyimee bimbi ʋe bidra kyɔŋ lɛ ekuni Yesu kude e, gi azɛɛkpɔ̀ Aya a. Gi linɔkpi le limɔ nite e, ba pɔ́ bɛkpɔ̀ Aya.
Voafantina amin'izao fotoana izao:
Luka 18: avn
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc