Luka 19
19
Yesu Ni Zaxeo
1Gi Yesu eti eku ní Yerixo o, xe azɛɛza ɛ, 2Babɔgyɔ ba ɔka ɔtɔ eze níklɔ gi yɛ linyi lize Zaxeo, eze oxonete. 3Azeekeni edi si yimɔ ɔniliɛ klɔ gi Yesu onu i, pɔ̀ eze ɔnɔ kpekpe lɛ ɔ́tani Yesu kumɔ kɔkpɛ linɔkpi le loso o. 4Nite si ese ekú ɔtɔ kí linɔkpi le lɛ azeemu ni ose ɔtɔ mɛ si yimɔ Yesu gi atrága niklɔ ɛza ɛ.
5Agi Yesu ana niklɔ ɛ, emuni aŋu na lɛ asi Zaxeo si, “Kɔsi tɔ ple, Zaxeo, lɛ ese linu si wɔ kepea mɛ mátraze omono o.” 6Zaxeo akɔsi eple ní ose lo me, lɛ azɛ yɛ ni isami i.
7Banama pɔ́ gi bɛmɔ lɛ ɛ, bekpese kutɛ si, “Onyime liɛ ya atrɛ edzì ɔbaba ɛki onyime gi onu ɔnɔ zimizi i!”
8Pɔ̀ Zaxeo ayɔ ɔlɛɛ, lɛ asi Ɔkaɛ si, “Ta kutu, Ɔkaɛ! maakɔ mɛ bidɔ mɔmɔ ʋɛ mɛ kulɛlɛɔ kapɛ aki bazianete ba, lɛ xe memi ɔnutɔ akpɛ fɛ ɛ, Maadzini kidiliɛ klɔ ede tene kutsa ki yɛ.”
9Yesu asi yɛ si, “Kubúbú kwiba kepea lia mɛ omono, lɛ ese linu si onyime liɛ fɛ ɛ, onu Abraham yɛ osobi. 10Ɔnɔɛ Yebi ye aba si yipɛ tɔ yibu banama gi bɛlila ɛ.”
Abee Ní Sika Kibɔ Su u
11Gi banima bɛzɛɛta yɛ kutu i, Yesu ebu abee aki ba. Yesu eti apɔni Yerusalem lɛ bezeegyo edi si Aya yɛ Kaʋaŋaa kiaba kpekpemi i. 12Lɛ asi ba si, “Ɔka ʋidi ɔtɔ eze gi azaatrɛ ní kese katɔ aʋa gi bɛtredu ye kukusi i, xe adzi ba a. 13Xe aasɛ ɛ, axwa yɛ banɔsumu liɔfɔ ba lɛ akí ba mɛ ɔkakaa sika kibɔ tile lɛ asi ba si, ‘Mlakɔ kɛ akpɛ axwɛwawa mɛ,’ tɔ mledi kidiliɛ gi mlamɔ trɔ xe masɛ ɛ.”
14“Pɔ̀ yɛ akɔanɛ ma bápɛ yɛ liboe, lɛ loso e, bɛkpɛ banɔ ní yɛ kude tɔ basɛ okusi ʋidi ye si, ‘Kúpɛ onyime liɛ si oze blɔ okusi.’
15“Pɔ̀ kyɛ ɛ, bedu ye kukusi yo xe edzì aba. Lɛ aki si bɛxwa yɛ banɔsumu ba ɛmani yɛ klɔ si tɔ yitè kidiliɛ gi bɛmɔ ɛtrɔ ní kibɔɛ liɛ gi yɛ aki ba aʋa ɛ.
16“Ɔtɔpu yɛ aba lɛ apani si, ‘Ɔkaɛ, mamɔ sika bibɔ liɔfɔ kɔpɔni kiliɛ klɔ gi wɔ kimɛ ɛ.’
17“Asi yɛ si, ‘Wɔbitɛ mumɔ, wonu ɔnɔsumu gbã! Agi wodo anukwarɛ ni eboe sisami na mɛ ɛ, Maakɔ wɔ odu ni imaʋidi liɔfɔ onu.’
18“Ɔnɔsumu ʋlaɛ fɛ aba lɛ apani si, ‘Ɔkaɛ, mamɔ sika bibɔ tutsu kɔpɔni kiliɛ klɔ gi wɔ kimɛ ɛ.’
19“Lɛ asi iliɛ ya si, ‘Wɔaze ní ima ʋidi titsu onu.’
20“Ɔnɔsumu dzedze aba lɛ apani si, ‘Ɔkaɛ, imɔ wɔ sika yɛ kibɔɛ; mabla kɛ ní kavlɔʋi mɛ. 21Mazeesé wo, lɛ ese linu si wonu onyime gagla. Wuzɛɛkɔ kidiliɛ gi kínu wɔ kinɛ ɛ, lɛ wuzɛɛkɔ bidɔ gi wɔ́kpɛ ɛ.’
22“Yɛ ɔkaɛ asi yɛ si, ‘Wɔ ɔnɔsumu litukpo me gagla onete! Maakɔ wɔtutɔ wɔ eboe la bu wɔ lipɔ! Wote si menu ɔnɔ gagla, mizɛɛkɔ kidiliɛ gi kínu mɛ kinɛ ɛ, lɛ mizɛɛkɔ bidɔ gi mákpɛ ɛ. 23Agi wote nite e, ege lɛ loso wɔ́kɔ mɛ kibɔɛ ɔkpɛ ní kibɔɛ ɔbla klɔ ɔ; atɔ xe medzi i, maazi kɛ ni kitrɔtrɔ ɛ?’
24“Lɛ asi banama gi bɛlɛɛ niklɔ si, ‘Mlazi sika yɛ kibɔɛ ní yɛ awla tɔ mlakɔ kɛ aki ɔnɔsumu liɛ gi bibɔ liɔfɔ bɛ bilɛ ní yɛ awla ɛ.’
25“Pɔ̀ bɛsi yɛ si, ‘Ɔka, bibɔ liɔfɔ bilɛ ni yɛ awla kooko!’
26“Ebu le onu si, ‘Mɛɛsi mlɔ si, ɔnɔ kakaa awla gi kidɔ kilɛ ɛ, biapɔnɔ ɔki yɛ; pɔ̀ ɔniliɛ klɔ awla gi kididɔ kima ɛ, kisisami iliɛ gi kilɛ yɛ awla ɛ, biazɛ kɛ. 27Pɔ̀ mɛ ahwafianɛ ma gi bápɛ si mize ba okusi i, mlagbani ba amanɔ tɔ mleye ba ní mɛ aŋu mɛ.’ ”
Yesu Eti eku ní Yerusalem
28Gi Yesu apani eboa la ya pɔ́ ɛ, eze ní ba ɔtɔ gi bɛzɛtrɛ ní Yerusalem i. 29Agi beti apɔni Betfage ni Betania níklɔ gi bizɛxwa si Kumu yɔ ise le ketokpaa su i, akpɛ yɛ badɔkpasi ba mɛ tiaʋa ní yɛ ɔtɔ nɔ, lɛ asi ba si, 30“Mlatrɛ ní kamamia ní mlɔ ɔtɔ nɔ mɛ; xe mleti iku i, mlaamɔ tedzi obi gi bɛkpɛ ogbe no me e, gi ɔnɔnɔ ɔ́trɔ ní yɛ aʋa ódi i. Mleble ye amani niya. 31Xe ɔnutɔ aaʋi mlo si ege lɛ loso mleeble ye na ɛ, mlasi yɛ si Ɔkaɛ yɛ aziã yɛ.”
32Bekú kudeo me lɛ bɛmɔ kidɔ kakaa ŋwisi kiliɛ ɖii gi Yesu asi ba kinɛ ɛ. 33Agi bezeeble tedzi obi ye e, yɛ benete ba beʋi ba si, “Ege lɛ loso mleeble ye e?”
34Bebú le onu si, “Ɔkaɛ yɛ aziã yɛ.”
35Lɛ bɛgbani tedzi obi ye mani Yesu i, lɛ bɛkɔ ba ewu la ɛtrɔ ní ɔgaɛ aʋa lɛ bɛpɔni Yesu xe emu atrɔ ɛ. 36Agi azɛɛkpɛ yɛ atsinɔ ɛ, banima bene bá ewu la ɛplɛ ní kudeo me.
37Agi eti apɔni Yerusalem i, ni niklɔ gi kudeo kwikyi ple ní Olif ye ise le ketokpaa su i, yɛ badɔkpasi ba likpi le likpese Aya ɖase kudo ni kukpɔ̀kpɔ̀ ni ozi gagla ní eboe ʋidi glegle ala la gi bɛmɔ su i si, 38“Aya ɔkrira okusi ye klɔ gi atrába ní Ɔkaɛ linyi ne me e! Kusuyɔ ní lifunu ne ni kusudra kí Aya!”
39Lɛ Farisianɛ batɔ ní ɔha lɔ̀ kusi i, bɛpani kí Yesu si, “Ɔdɔbasɛ yɛ, kpɛ ɔsã kí wɔ badɔkpasi ba tɔ bagɔ tsriɖi!”
40Yesu ebu le onu si, “Mɛɛsi mlɔ si xegi bɛgɔ tsriɖi i, akla na ɔtutɔ aakpɛ ozi lo.”
Yesu Ebemi ní Yerusalem Litukpo
41Agi eti apɔnɔ xe amɔ ɔma ʋidi no e, ebemi ní lɔ litukpo. 42Lɛ apani si, “Atɛsi mlete omono kidiliɛ gi kízia ɛki mlɔ kusuyɔ ɛ! Pɔ̀ abla ɛ bekpo ke ní mlɔ su. 43Lipoe le litraba gi mlɔ ahwafianɛ ma biaklani mlɔ lɛ biatsí mlɔ bede ʋa, lɛ biapɔ́ mlɔ ɔkpɛ ní kapɛ kakaa. 44Biayaʋi wɔ petee lɛ biaye banama gi balɛ ɔma nɔ mɛ ɛ, batráyurɔ likla ɛtɔtɔ ní lɛ ozeklɔ ɔ, lɛ ese linu si mlamɔ lipoe lɛ klɔ gi Aya aba si yibu mlo o!”
Yesu Atrɛ ní Yerusalem Lisɔligba lɛ Mɛ
45Lɛ Yesu eti eku Yerusalem Lisɔligba lɛ mɛ ɛ, lɛ ekpese badɔda ba kukpikpinɔ dono e, 46asi ba si, “Bɛŋwlimi kpɛ ní Liboe le me si, Aya apani si ‘Mɛ Ligba lɛ ɛ, biaxwa lɛ si Aya lixwa Gba.’ Pɔ̀ mlekyi le ɛbitɛ beze ba òkpò kɔ́ ɔ!”
47Liwe kakaa Yesu abasɛ bidɔ ní Yerusalem Lisɔligba lɛ mɛ. Kusumu yo baka ba, ɔsã nɔ badɔbasɛ ba, ni banɔtsitsi ba bɛpɛ si beeye ye, 48pɔ̀ bámɔ kudeonu xe biaye ye, lɛ ese linu si banima pɔ́ bezeenu yɛ eboe la a, lɛ bápɛ si liboeboe lidɔ ba ɛza a.
Voafantina amin'izao fotoana izao:
Luka 19: avn
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc