SAN LUCAS 23
23
Jesusta Pilatoman pusanku
(Mt 27.1-2, 11-14; Mr 15.1-5; Jn 18.28-38)
1Chaypacha tukuyninku oqharikorqanku, Jesustataj Pilatoman pusarqanku. 2Chaypitaj ch'ataykuyta qallarerqanku, nispa: Kaytaqa taripayku runasta ch'ajwachishajta; manataj munanchu kamachejman impuestota qonata. Pay kikintaj nin Cristo reytaj kasqanta.
3Pilatotaj taporqa: Qanchu kanki judiospa reynin?, nispa.
Jesustaj kuticherqa: Arí, qan ninki, nispa.
4Pilatotaj kuraj sacerdotesman, runasman ima nerqa: Mana ima juchatapis tarinichu kay runapeqa.
5Paykunataj astawan atipakusharqanku nispa: Tukuy runasta Judeapi ch'ajwachishan, Galileamanta qallarispa kaykama chayamun.
Jesusqa Herodespapi
6Pilatotaj kayta uyarispa taporqa paykunata, cheqatachus chay runa Galileamanta kasqanta. 7Arí, Galileamanta nejtinkutaj, kacharqa kamachej Herodesman. Paypis Jerusalempi chaypacha kasharqa. 8Herodestaj Jesusta rikuytawan mayta kusikorqa; imaraykuchus unayña rejsiyta munasharqa, paymanta imaymana parlasta uyarisqanrayku; munarqataj milagrota ruwajta rikuyta. 9Chayrayku ashkha kutita taporqa; Jesustaj mana imatapis kutichikorqachu. 10Chaypi kashallarqankutaj kuraj sacerdotes, leymanta yachachejkuna ima, ch'ataykuytapuni munaspa. 11Herodestaj soldadosninwan khuska payta qhesacharqa, asipayayta munaspataj uj reyta jina sumaj p'achaswan p'achallicherqanku. Chaymantataj kachaporqa Pilatoman. 12Chay p'unchaypi Pilatowan Herodeswanqa, phiñanasqa kasqankumanta allinyakaporqanku.
Jesusta wañunampaj juchachanku
(Mt 27.15-26; Mr 15.6-15; Jn 18.39–19.16)
13Chaypacha Pilatoqa kuraj sacerdotesta, kamachejkunata, tukuy runasta ima tantacherqa. 14Paykunamantaj nerqa: Kay runata pusamuwarqankichej, runa cha'jwachejta jina, ñaupaqeykichejpi tapusqayman jinaqa mana ima juchatapis tarinichu, chay juchata tumpasqaykichejmanta. 15Nillataj Herodespis tarinchu juchata, chaynejta kutichimullantaj. Yachankichej jina, mana ima juchampis kanchu wañunampaj jina. 16Jasut'isaj, chaymantataj kacharipusaj. [ 17Sapa Pascuapi kacharejpuni kanku uj presota.]
18Chayrayku tukuyninku ujllata qhapariyta qallarerqanku: Ama chaytaqa kachariychu, Barrabasta kacharipuy!, nispa.
19Barrabastataj presochasqanku, runasta llajta ukhupi ch'ajwachisqanmanta, runata wañuchisqanmanta ima. 20Chaywampis Pilatoqa ujtawan parlarqa, Jesusta kacharipuytapuni munaspa. 21Paykunataj astawan sinch'ita qhaparerqanku: Chakatasqa kachun, chakatasqa kachun!, nispa.
22Kinsa kutikama Pilatoqa nerqa: Chantá, imatapunitaj ruwarqari? Juchata mana paypi tarinichu wañunampaj jina; jasut'isaj, chaymantataj kacharipusaj, nispa.
23Paykunaqa qhaparillarqankupuni, chakatachinanta munaspa; chay jinatapuni paykuna qhaparerqanku sacerdotesninkutapis atipanankukama. 24Pilatotaj kamacherqa paykunaj mañasqankuman jina ruwanankuta. 25Kachariporqataj pitachus mañasqankuta. Chay runaqa carcelpi karqa runata ch'ajwachisqanmanta, runata wañuchisqanmanta ima. Jesustataj paykunaman entregarqa munasqankuta ruwanankupaj.
Jesusta chakatanku
(Mt 27.32-44; Mr 15.21-32; Jn 19.17-27)
26Jesusta chakatanankupaj pusashaspataj Cirenemanta Simón sutiyoj runawan tinkorqanku, campomanta jamushajtin; paywantaj cruzta apacherqanku, Jesuspa qhepanta.
27Ashkha runastaj qhatisharqanku, jinallatataj warmispis mayta waqaspa, qhaparispa ima paymanta. 28Jesustaj chay warmista qhawarispa nerqa: Jerusalén warmis, ama noqamanta waqaychejchu, manachayqa qankuna kikiykichejmanta waqaychej, wawasniykichejmantawan. 29P'unchaykuna chayamonqanku. Chaypacha nenqanku: Kusikuyniyoj kanqanku, mana nacichikojkuna, mana wijsallikojkuna, jinallataj mana ñuñuchejkunapis. 30Chaypachamá runasqa orqosta niyta qallarenqanku: Pataykuman urmaykamuwayku; lomastataj: P'ampaykuwayku, nispa. 31Sichus q'omer sach'awan kay imasta ruwanku chayqa, imatapunitaj ruwanqanku ch'aki sach'awanri?
32Pusallarqankutaj iskay suwasta Jesustawan chakatanankupaj. 33T'ojlu nisqa cheqaman chayaytawantaj, Jesusta chakatarqanku. Iskay suwastapis chakatallarqankutaj, ujninta pañanman, ujnintataj lloq'enman. [ 34Jesusqa nerqa: Tatáy, juchasninkuta pampachay; imaraykuchus mana yachankuchu imatachus ruwasqankuta, nispa.]
Soldadostaj suertesta choqarqanku Jesuspa p'achasninta rak'inakunankupaj. 35Chaypi kasharqanku chay runasqa qhawasharqanku; kurajkunapis asipayasharqanku: Wajkunata salvarqa; kunanqa payñataj kacharikuchun, sichus cheqamanta pay Diospa ajllasqan Cristo chayqa, nispa.
36Soldadospis Jesusta asipayashallarqankutaj; qayllaykuspataj vinagreta jaywarqanku. 37Nerqankutaj: Sichus qan judiospa reynin kanki chayqa, qan kikiykita salvakuy.
38Uman patapitaj karqa uj escribisqa [griego parlaypi, latimpi, hebreopi ima,] kay jina: Kayqa judiospa Reynin.
39Ujnin kaj suwataj chakatasqapacha, Jesusta k'amisharqa: Manachu qanqa Cristo kanki? Qan kikiykita salvakuy; noqaykutapis salvallawaykutaj, nispa.
40Ujnin kajrí paytañataj k'amerqa: Manachu Diosta manchachikunki; qampis kikin wañuyllapitaj kashaspa? 41Noqanchejqa juchanchejmanta kaypi kashanchej, imaraykuchus sajra ruwasqasninchejmanta ñak'arishanchej; payrí mana ima sajratapis ruwarqachu.
42Jesusmantaj nerqa: Yuyarikuwanki ari noqamanta, reinoykiman chayaspa.
43Jesustaj chaypacha kuticherqa: Cheqamanta niyki, kunampacha noqawan paraisopi kanki.
Jesuspa wañuynin
(Mt 27.45-56; Mr 15.33-41; Jn 19.28-30)
44Chaupi p'unchay jinaña karqa. Chantá tukuynin jallp'ataj laqhayaykorqa samay horakama. 45Intitaj laqhayaykorqa. Templopi cortina warkhusqapis iskayman llik'ikorqa. 46Chaypacha Jesusqa sinch'ita qhaparerqa: Tatáy, makisniykiman espirituyta saqeni, nispa.
Chayta nispataj wañuporqa.
47Chantá capitantaj chayta rikuspa, Diosta yupaycharqa: Cheqamanta kay runaqa cheqan runa karqa, nispa.
48Tukuy runas chaypi kajkunataj, chayta rikuspa, riporqanku pechonkuta takakuspa. 49Jesuspa tukuy rejsisqasnintaj, Galileamantapacha qhatejkuna warmis ima, karupi qhepakuspa kay imasta qhawasharqanku.
Jesusta p'ampanku
(Mt 27.57-61; Mr 15.42-47; Jn 19.38-42)
50Uj runa karqa k'acha, cheqantaj, José sutiyoj, Judeapi Arimatea llajtamanta. Payqa judiospa juntankumanta ujnin karqa. 51Kay Joseqa suyasharqa Diospa reinonta; chaynejta mana arí nerqachu juntaj yuyasqanta, nitaj ruwasqantapis. 52Pilatoman rispa Jesuspa ayanta mañarqa. 53Cruzmanta uraykuchimuspataj, sabanawan mayt'uykuspa uj chhankapi ruwasqa sepulturaman churaykorqa, maypichus manaraj pitapis churarqankuchu, chayman. 54Pascua wakichina p'unchay karqa; samarina diataj qallarikusharqaña.
55Galileamantapacha Jesuswan jamoj warmistaj rerqanku sepulturata watukoj, yachanankupaj imaynatachus Jesuspa ayanta churasqankuta. 56Wasinkuman kutirispataj, wakicherqanku q'apaj jampista, jawinastawan. Chantá samarikorqankutaj, samarina día kasqanrayku, kamachisqaman jina.
Voafantina amin'izao fotoana izao:
SAN LUCAS 23: QCHSB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Qheshwa Biblia DC © Sociedades Bíblicas Unidas, 1986.