MATEO 5
5
Jirkachow predikeynin
1Atska nunakunata rikárirnam, jirkaman witsarqan; i tákuriptinna, shayámorqan peyman disípulunkuna. 2I qalleykorqan, yachatsiyarnin nishpa:
Kushikiykuna
3“Kushikíyoqmi waktsakuna espirituchow, peykunapam syelukunapa reynun.
4“Kushikíyoqmi waqaqkuna, peykunam chaskiyanqa shoqeyta.
5“Kushikíyoqmi manshukuna, peykunam chaskiyanqa patsata erensyapa.
6“Kushikíyoqmi justisyapeq mallaqaq i yakunaqkuna, peykunam teqñashqa kayanqa.
7“Kushikíyoqmi ankupákoqkuna, peykunam tariyanqa ankupákiyta.
8“Kushikíyoqmi limpyu shonquyoqkuna, peykunam rikáyanqa Dyosta.
9“Kushikíyoqmi manshuyátsikoqkuna, peykunam qayashqa kayanqa Dyospa tsurinkuna.
10“Kushikíyoqmi qatikacheyta jipaqkuna justisyapa kawsanreykur, peykunapam syelukunapa reynun.
11“Kushikíyoqmi kayanki kawsáreykur ashayáshuptiki i qatikacháyáshuptikiy, i tukiy mana allikunata niyaptin qamkunapa kontreykikuna, ulikurnin. 12Kushikuyey i kushikacháyey, premyiykikunaqa jatunmi syelukunachow; tseynowmi qatikacháyarqan qamkunapa punteykikuna kaq profetakunata.
Patsapa kachin i mundupa aktsin
13“Qamkunam kayanki patsapa kachin, peru kachi qamláriptinqa, ¿imawanraq kachitashqa kanqa? Manam ni imapaq sirwinnatsu, sinowqa jaqman jitarishqa kananpaq i nunakunapa jarushqa.
14“Qamkunam kayanki mundupa aktsin; juk marka jirkachow rurashqa manam ratakiyta pwedintsu. 15Ni sendintsiktsu aktsita juk kajonpa rurinman churanápaqtsu, sinowqa kandilerumanmi, i aktsin wayichow llapan keykaqkunata. 16Tseynow aktsitsun aktsikikuna nunakunapa nowpanchow, alli rureynikikunata rikáyánanpaq, i glorifikáyánanpaq syeluchow keykaq Teyteykikunata.
Leyta rasonpa kumpli
17“Ama pensayeytsu leyta ó profetakunata ushakátseq shamonqáta; manam ushakátseqtsu shamorqó, sinowqa kumplinápaqmi. 18Tseqeypam niyaq syelu i patsa pasarenqanyaq, ni juk jota ni juk asentullapis pasanqatsu leypa, llapan kumplikanqanyaq.
19“Tseynow karqa meyqanpis jarukunman juknin key kamatsikiykunapa ichikninllatapis, i tseynow yachatsinman nunakunata, ichikllan nishqam kanqa syelukunapa reynunchow; meyqankunapis ruranqa i yachatsenqa, keymi jatun nishqa kanqa syelukunapa reynunchow. 20Niyaqmi qamkunapa justisyeykikuna manatsun mas jatun kanqa judyukunapa leynin yachatsikoqkunapita i farisewkunapita, manam yeykuyankitsu syelukunapa reynunman.
Piñakiypaq
21“Wiyayarqonkinam qollanankuna niyanqanta: Ama wanutsikiytsu; meyqanpis wanutsikoqqa fisyumanmi churashqa kanqa. 22Peru noqam niyaq meyqanpis wawqinpa kontran piñaqqa, fisyumanmi churashqa kanqa; i meyqanpis neqqa: Wawqinta, upa, juntaman apashqa kanqa; i meyqanpis neqqa: Mana báleq, infyernu ninamanmi eywanan.
23“Tseyreykur, qareynikitatsun apamunki altarman, i tseychow yarpakurkunkiman wawqikipa kapunman imallapis qampa kontreyki, 24altar nowpanchow qareynikita jaqirir, eywey, puntata wawqikiwan amishtakiy, tseypitana shamiy i qareynikita presentey.
25“Chikishoqnikiwan raslla arregluman yeykiy, nánillachowraq peywan keykarnin, paqtataq chikishoqniki fesman qoykushunkiman, i fesna wardyaman, i karselchow llawishqa kanki. 26Tseqeypam neq tseypita manam yarqunkitsu, ultimu sentábuta paganqeykiyaq.
Olteronkeypita
27“Wiyayarqonkinam nishqa kanqanta: Olteron keyta ama rurankitsu. 28Peru noqam niyaq meyqanpis rikanman juk warmita munaparnin, olteron keyta rurashqanam peywan shonqunchow. 29Tseyreykur, sitsun derécha kaq nawiki ishkitsishunkiman, jorqariyki, i qampita; jitari, allim kanman kwerpikipita juk partin oqrakaptin, llapan kwerpiyki infyernuman jitashqa kanqanpita. 30Sitsun derécha kaq makiki ishkitsishunkiman, roquriykiy i qampita jitari; allim kanman kwerpikipita juk partinta oqraptiki, i llapan kwerpiki infyernuman jitashqa kanqanpita.
31“Jina nishqam karqan: Meyqanpis warminta qarqoqqa, diborsyu kartan qotsun. 32Peru noqam niyaq warminta qarqoqqa, lluta wátanakiypa kawsanreykur, ruran pey olteronyananpaq; i qarqushqawan kasakoqqa, olteron keytam ruran.
Ulikiypaq
33“Wiyayarqonkinam qollanankuna niyanqanta: Ama ulikur jureytsu, sinowqa Señorta kumpli juramentiykikunata. 34Peru noqam niyaq: Ama jurayeytsu ni imanowpa; ni syelupa, Dyospa trónun kaptin; 35ni patsapa, chakinkunapa jarunan kaptin; ni Jerusalenpa, jatun Reypa markan kaptin. 36Ni peqeykipaqpis jureytsu, manam pwedinkitsu rureyta yulaq o yana juk aqtsata. 37Peru parleynikikuna katsun: ‘Awmi’, ‘awmi’; ‘manam’, ‘manam’; keypita mas kaqqa, shamun mana allipitam.
Bengakiypaq
38“Wiyayarqonkim nishqa kaqta: Nawi nawiwan, i kiru kiruwan. 39Peru noqa niyaqmi: Ama rechasayeytsu mana allitaqa; masbyenqa meyqanpis derécha qaqlleykichow laqyashuptiki, juknintapis kameykapiy; 40pleytuman churashiyniki i túnikeykita qochishiniki munaqtaqa, aqshuneykitapis jaqipeykiy; 41sitsun meyqanpis obligashunki juk míllapa qepi apaneykita, peywan eywey ishkeykama. 42Mañashoqnikita, qoykiy; qampita prestádu tsari munaqta, ama manam nitsu.
Chikikiypita
43“Wiyayarqonkinam nishqa kaqta: Nuna mayikita kuyanki, i chikishoqnikita chikinki. 44Peru noqa niyaqmi: Chikiyashoqnikikunata kuyayey, maldisiyashoqnikikunata bendisiyey, allita rurayey chikiyashoqnikikunata, i Dyosman mañakuyey ultrajayashoqnikikunapaq i qatikachayashoqnikikunapaq; 45syelukunachow keykaq Teyteykikunapa tsurinkuna kayáneykipaq, intintapis yarqatsimun allikunaman i mana allikunaman, i tamyatsimun justukunaman i mana justukunaman. 46Sitsun kuyayanki kuyayashoqnikikunallata, ¿ima rantinraq kayápushunki? ¿Manaku tseynowlla rurayan publikánukunapis? 47I sitsun saludayanki wawqikikunallata, ¿ima allitataq rurayanki? ¿Manaku tseynowlla rurayan gentilkunapis? 48Qamkuna, kayey, paqweypa alli, syelukunachow keykaq Teyteykikuna paqweypa alli kanqannow.
Voafantina amin'izao fotoana izao:
MATEO 5: QUEAN
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Quechua Ancash New Testament © Peruvian Bible Society, 1992.