Gẹnẹsisi 24
24
1ABLAHAM sọ whén, bo pòyònho to gbèzán etọn mẹ: OKLUNỌ ko dona Ablanam to onú lẹpo mẹ. 2Ablaham sọ dọ hlan devi mẹhopete whèdò etọn ton, mẹhe dugán do onú he é tindo lepo ji, dọmọ, Yẹn vò we, yi alọ towe do asapada ṣie glọ: 3yẹn nasọ hẹn we whlé gbọn OKLUNỌ, Jiwheyẹwhe olọn po aihọn po tọn dali, dọ hiẹ ma na mọ asi na visunnu síe to viyọnnu Kenani tọn lẹ mẹ, to yé mẹhe ṣẹnṣẹn yẹn to ninò lẹ mẹ gba. 4Ṣigba hiẹ na yi otò ṣie mẹ, podọ to hẹnnumẹ ṣie lẹ de, bo mọ asi na Isaki visunnu ṣie.
5Devi lọ sọ dọ hlan ẹn, dọmọ, Eya yọnnu lọ ma yín ojlonọ nado hodo mi jẹ aigba he ji, bé yẹn do na hẹn visunnu towe gọ̀yì aigba he ji hiẹ tónsọn wá?
6Ablaham sọ dọ hlan ẹn, dọmọ, Hiẹ ni payi, na hiẹ hẹn visunnu ṣie gọ̀yì finẹ blo. 7OKLUNỌ Jiwheyẹwhe olọn tọn, he ko dè mi sọn owhé otọ ṣie tọn gbè, sọn aigba ajitẹn ṣie tọn ji, bo sọ dọ hlan mi, bo ko sọ whlé hlan mi, dọmọ, Yẹn na aigba he okún towe; ewọ nasọ do angẹli etọn hlan nukọn towe, hiẹ na mọ asi sọn finẹ na visunnu ṣie.
8Eyín yọnnu lọ ma yín ojlonọ nado hodo we, bé whenẹnu hiẹ na gán sọn whiwhlé ṣie he mẹ: ṣigba hiẹ ma na hẹn visunnu ṣie gọ̀yì finẹ gba.
9Devi lọ sọ yí alọ etọn do asapada Ablaham klunọ etọn tọn glọ, bo sọ whlé nẹ na ohó helẹ tọn wutu.
10Devi lọ sọ yí kanklosọpoawenọ ao, sọn kanklosọpoawenọ klunọ etọn tọn mẹ, bo yì; na alọ etọn mẹ wẹ agbàn klunọ etọn tọn lẹpo te: é sọ fọ́n, bo yì Mesopotamia, to otò Naholi tọn mẹ. 11E sọ hẹn kanklosọpoawenọ etọn lẹ jẹklo to otò lọ godo to odòtò de dali to ojlẹ whèjai tọn mẹ, to ojlẹ he mẹ yọnnu lẹ nọ tòn te nado dà osìn.
12Ẹ sọ dọmọ, OKLUNỌ, Jiwheyẹwhe Ablaham otò ṣie tọn, yẹn vẹ̀ we, hùn ali dagbe na mi egbé, bo sọ wà dagbe hlan Ablaham klunọ ṣie. 13Dayi e go, yẹn to ote to ofi to asisá osìn tọn kọ̀n; viyọnnu otò lọ tọn lẹ to tintọ̀njẹgbonu ja osìn dà gbe; 14bo gbọ é ni jọ dọ, awhli he yẹn na dọ hlan, dọmọ, Yẹn vè we, zlọn tọ̀zén towe dai, na yẹn ni nù; bọ ewọ nasọ dọmọ, Nù, yẹn nasọ dà na kanklosọpoawenọ towe lẹ nù ga; ewọ lọ we ni yín asi lọ he hiẹ ko dè na devi towe, Isaki; gbọn ehe mẹ yẹn na yọnẹn dọ hiẹ do dagbe hia hlan OKLUNỌ ṣie.
15E wá jọ, whẹpo ewọ na dó dọhó lọ vọ̀, wẹ dayi e go, Lebeka tọ́njẹgbonu, mehe yè ji hlan Bẹtueli, visunnu Milka ton, asi Naholi tọn, nọvisunnu Ablaham ton, otọ̀zén etọn tin to abọ́ etọn jí. 16Áwhli lọ yọ̀nwhanpẹ talala na pinpọ́n, awhli de, sunnu he ko yòn ẹn de ma tin: é sọ jẹte yì tòsisá mẹ, bo gò otọ̀zẹ́n etọn, bo sọ gòwá yìaga.
17Devi lọ sọ dowezun nado yì pé e, bo dọmọ, gbọ yẹn ni nù, yẹn vẹ̀ we, osìn vude sọn tòzén towe mẹ. 18Ewọ sọ dọmọ, Nù, klunọ ṣie; é sọ yawu zlọn otòzén etọn do alọ mẹ, bo na ẹn nù, 19Whenuena é sọ na ẹn nù vò, é dọmọ, Yẹn na dà na kanklosọpoawenọ towe lẹ ga kaka yé nado nù vò. 20E sọ yawu, bo kọ̀n tọ̀zẹ́n etọn do odla lọ mẹ, bo sọ lẹ̀ po wezun po yì odòtòpa nado dòn osìn, bo sọ dà na kanklosọpoawenọ etọn lẹpo. 21Dawe lọ to pínpòn ẹn, bo sọ bọnukun do e go to pìnpòn nado yònẹn eyín OKLUNỌ hẹn gbejizọnlin etọn yín yínyòn, kavi devo.
22E sọ wá jọ, le kanklosọpoawenọ lẹ ko nù osin vọ̀, dawe lọ yí sika tómẹnu dadawe ṣekẹli jijlẹ tọn, po àlọgàn awe sika tọn po na alọ etọn he jlẹ ṣekẹli ao; 23bo sọ dọmọ, Viyọnnu mẹnu tọn wẹ hiẹ? Yen vẹ́ we, dọ na mi. Otẹn sọ tin to owhé otọ̀ towe tọn gbè bọ mí na jẹ e mẹ?
24E sọ dọ hlan ẹn, dọ, Oviyọnnu Bẹtueli tọn, viyọnnu Milka tọn, he é ji na Naholi, wẹ yẹn. 25E sọ dọ hlan ẹn dogọ́, dọmọ, Míwlẹ tindo zìnkán po kanlinmahúhú susu po, po otẹn po na jẹ e mẹ.
26Dawe lọ sọ dẹ́ ota etọn bo sẹ̀n OKLUNỌ. 27E sọ dọmọ, Donanọ wẹ OKLUNỌ Jiwheyẹwhe Ablaham klunọ síe tọn, he ma gbọ̀ dagbewanyi etọn po nugbo etọn po hlan klunọ ṣie dali: na yẹn tọn wẹ, OKLUNỌ ko do mi to aliho ji hlan owhé mẹmẹsunnu klunọ ṣie lọ tọn gbè.
28Awhli lọ sọ dowezun, bo yì dọ onú helẹ na whégbènu onọ etọn tọn lẹ. 29Lebeka tindo nọvisunnu de, oyín etọn nọ yín Labani: Labani sọ dowezun jẹgbonu yì dawe lo de je tòsisá lọ kòn. 30E sọ wá jọ, whenuena é mọ tómẹnu po alọgàn po to alọ nọviyọnnu etọn tọn mẹ, bọ é sọ sè ohó Lebeka nọviyọnnu etọn tọn dọ, Lewẹ dawe lọ dọ hlan mi; wẹ é wá dawe lọ de; bo dayi e go, é tote to kanklosọpoawenọ etọn lẹ de to tòsisá lọ tó. 31Ewọ sọ dọmọ, Biọ whégbè, hiẹ donanọ sọn OKLUNỌ de; etéwutu wẹ hie nọte to gbonu? yẹn ko sènúdo to whégbè podọ tẹnmẹ na kanklosọpoawenọ lẹ. 32Dawe lọ sọ biọ owhé lọ gbè: bo tún kanklosọpoawenọ lẹ, bo na zinkan po kanlinmahúhú po kanklosọpoawenọ le, po osìn po nado klọ afọ etọn, po afọ mẹhe gò nẹ̃ lẹ tọn po ga.
33E sọ zé núdùdù do nukọn nẹ̃ nado dù, ṣigba ewọ dọmọ, Yẹn ma to onú na dù kaka yẹn nado dowẹn ṣie pó. E sọ dọmọ, To hódọ.
34Ewọ sọ dọmọ, Devi Ablaham tọn wẹ yẹn. 35OKLUNỌ sọ dona klunọ ṣie talala; ewọ sọ lẹzun mekiklo: é na lẹngbọ ẹ, po oyín po, po fataka po, po sika po, po devisunnu po, po deviyọnnu po, po kanklosọpoawenọ po, po kẹtẹkẹtẹ po. 36Sala asi OKLUNỌ ṣie tọn sọ ji visunnu de hlan OKLUNỌ ṣie whenuena ewọ ko poyònho vò; ewọ wẹ é yí onú he é tindo lẹpo na. 37OKLUNỌ ṣie sọ hẹn mi whlé dọmọ, Hiẹ ma na mọ asi na visunnu ṣie sọn viyọnnu Kenani tọn lẹ mẹ gba, aigba mẹhe tọn ji yẹn te: 38ṣigba hiẹ ni yì owhé otò ṣie tọn gbè, podọ hẹnnu ṣie lẹ de, na a ni mọ asi na visunnu ṣie. 39Yẹn sọ dọ hlan OKLUNỌ ṣie, dọmọ, Eya yọnnu lọ ma na hodo mi. 40E sọ dọ hlan mi, dọmọ, OKLUNỌ, mẹhe nukọn yẹn to sọnlinzin te, na do angẹli etọn hlan hẹ we, bo nasọ jla aliho towe do; hiẹ nasọ mọ asi na visunnu ṣie sọn hẹnnumẹ ṣie lẹ de, podọ sọn owhé otọ́ ṣie ton gbè: 41whenẹnu wẹ hiẹ na gán sọn whiwhlé ṣie he mẹ, whenuena hiẹ wá hẹnnumẹ ṣie lẹ de; eyín yé ma yí mẹde na we, hiẹ gán sọn whiwhlé ṣie he mẹ. 42Yẹn wá tòsisá kọ̀n to egbé, bo dọmọ, OKLUNỌ, Jiwheyẹwhe Ablaham klunọ ṣie tọn, eyín hiẹ hẹn aliho he yẹn gbọn dinvie he yọ̀n: 43dayi e go, yẹn to tote to odòtòpa; bo gbọ é ni jọ, dọ awhli he tọ́njẹgbonu wá nado dà osìn, mẹhe yẹn na dọhlan, dọmọ, Na mi, yẹn vè we, osìn vude sọn otòzén towe mẹ nado nù; 44bọ é na dọ hlan mi, dọmọ, Hiẹ ni nù, yẹn nasọ dà na kanklosọpoawenọ towe lẹ ga: gbọ é ni yín asi he OKLUNỌ ko dè na visunnu OKLUNỌ ṣie tọn. 45Whẹpo yẹn ko gbọ hódọ to ayiha ṣie mẹ, dayi e go, Lebeka tònjẹgbonu wá, podọ otòzén etọn tin to abò etọn ji; ewọ sọ jẹte yì o tòsisá mẹ, bo dà osìn: yẹn sọ dọ hlan ẹn, dọmọ, Gbọ yẹn ni nusìn, yẹn vẹ̀ we. 46E sọ yawu, bo zlọn otòzén etọn sọn abò etọn ji, bo dọmọ, Nù, yẹn nasọ dà na kanklosọpoawenọ towe lẹ nù ga. 47Yẹn sọ kanbiọ ẹ, dọmọ Viyọnnu mẹnu tọn wẹ hiẹ? E sọ dọmọ, Viyọnnu Bẹtueli tọn, visunnu Naholi tọn, he Milka ji hlan ẹn: yẹn sọ yí tómẹnu lọ do awọntin mẹ nẹ̀, po alọgàn lẹ po do alọ etọn mẹ. 48Yẹn sọ dẹ́ ota ṣie, bo sẹ̀n OKLUNỌ, yẹn sọ dona OKLUNỌ Jiwheyẹwhe Ablaham OKLUNỌ ṣie tọn, he hẹn mi gbọn ali jíjlọ ji nado yí viyọnnu nọvisunnu OKLUNỌ ṣie tọn na visunnu etọn. 49Bé dinvie, eyín mìwlẹ na basi dagbewanyi po nugbo po hlan OKLUNỌ ṣie, mì dọ na mi; eyín é ma sọ yín mọ, mì dọ na mi: na yẹn ni gò do adusi pawhe kavi do amiyọn.
50Whenẹnu wẹ Labani po Bẹtueli po gblọn, bo dọmọ, OKLUNỌ de wẹ onú lọ sọn wá: míwlẹ ma sọgan dọhó dagbe kavi ylankan hlan we gba. 51Dayi e go, Lebeka tin to nukọn towé, yí i bo yì, na ewọ ni yín asi visunnu OKLUNỌ towe tọndile OKLUNỌ ko dọhó do.
52E sọ wá jọ dọ whenuena devi Ablaham tọn sè ohó yetọn, é dẹ́ ede do aigba hlan OKLUNỌ. 53Devi lọ sọ de núzinzán fataka tọn, po núzinzán sika tọn po jegbonu, po avọ̀ po jẹgbonu, bo yí yé na Lebeka: é sọ yí núnina akuẹgegenu tọn ga na nọvisunnu etọn po onọetọn po.
54Yé sọ dù bo nù, ewọ pó mẹhe tin to e de lẹ po, yé sọ jẹ finẹ to ozán lọ mẹ; yé sọ fọ́n to afọnnu, é bo sọ dọmọ, Mì do mi hlan OKLUNỌ ṣie de. 55Nọvisunnu etọn po onọ etọn po sọ dọmọ, Gbọ awhli lọ ni nòhẹ mí azán vude, hò azán ao mọ: enẹgodo é na yì. 56Ewọ sọ dọ hlan yé, dọmọ, Mì hẹn mi dote blo; na OKLUNỌ ko hẹn ali ṣie yòn dagbedagbe wutu; mì de mi tón, na yẹn ni yì OKLUNỌ ṣie de. 57Yé sọ dọmọ, Mí na ylọ awhli lọ, bo kanbiọ sọn onù etọn. 58Yé sọ ylọ Lebeka, bo dọ hlan ẹn, dọ, Hiẹ na yì hẹ dawe he? é sọ dọmọ, Yẹn na yì.
59Yé sọ do Lebeka viyọnnu yetọn hlan po anénọ etọn po, po devi Ablaham tọn po, po omẹ etọn lẹ po. 60Yé sọ dona Lebeka, bo dọ hlan ẹn, dọ, Viyọnnu mítọn, yín onọ fọtọ́nfọtọ́n donu fọtọ́nfọtọ́n ao tọn, bo gbọ okún towe ni tindo hòngbo mẹhe gbẹwanna yé lẹ tọn.
61Lebeka sọ fọ́n po awhli etọn lẹ po, yé hẹ́ kanklosọpoawenọ lẹ ji, bo hodo dawe lọ: devi lọ sọ yí Lebeka bo yì.
62Isaki ko wá jugbọn zùngbo Bẹeli-la-hai-loi tọn mẹ; na aigba Hùwàji tọn dali wẹ ewọ nọnọ̀. 63Isaki sọ jẹgbonu nado yì, lẹnayihamẹpèn to dangbo to whèjai: é sọ zé nukun etọn daga bo mọ, dayi e go, kanklosọpoawenọ lẹ ja. 64Lebeka sọ zé nukun etọn daga, whenuena é mọ Isaki, é jẹte sọn kanklosọpoawenọ ji. 65E sọ dọ hlan devi lọ, dọmọ, Dawe tẹwẹ ehe to zọnlinzin to danji nado pé mí? devi lọ sọ dọmọ, OKLUNỌ ṣie wẹ: ewọ sọ yí nukunmẹ ṣinyọnvọ etọn, bo ṣinyọn ede.
66Devi lọ sọ dọ onú he é ko wà lẹpo na Isaki. 67Isaki sọ hẹn ẹ wá ogohò Sala onọ etọn tọn mẹ, bo sọ yí Lebeka, bọ ewọ sọ lẹzùn asi etọn: é yíwán nẹ; Isaki sọ zùn mẹmiọnhomẹna to okú onọ etọn tọn godo.
Voafantina amin'izao fotoana izao:
Gẹnẹsisi 24: BWL23
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Holy Bible in Gun-Alada © Bible Society of Benin and Bible Society of Nigeria, 1923.