उत्पत्ति 15
15
याहवेहजी अब्रामने बाछा फैब
1च लिउँइँ याहवेह अब्राम ङाँर म्रोंयुसि चने बिइ,
“अब्राम, क्हि आङ्हिंन्,
क्हिए ढाल ङन् ग;
ङइ क्हिलाइ बेल्ले थेबै इनाम पिंब्मुँ।”
2दिलेया अब्रामइ बिइ, “ओ याहवेह परमेश्वर, क्हिजी ङ तो पिंइमुँ रो? तलेबिस्याँ ङल प्हसे घ्रि या आरे, तारे ङए धिंर्बै क्ल्हे दमस्कसर्बै एलीएजर तब्मुँ। 3क्हिजी ङलाइ प्हसेमैं आपिंइमुँ। छतसि ङए धिंर फिबै केब्छैंन् ङए धिंर्बै क्ल्हे तब्मुँ।”
4दिलेया “च एलीएजर बिबै केब्छैं क्हिए धिंर्बै क्ल्हे तरिब आरे, तलेबिस्याँ क्हिए च्हन् क्हिए धिंर्बै क्ल्हे तब्मुँ,” बिसि याहवेहजी बिबै ताँ धबै अब्रामइ थेइ। 5खीजी चलाइ बैरु बोसि बिइ, “मुउँइँ ङ्योद्! मुर्बै मुसारमैं च्योल् खाँम् उ आखाँ? क्हिए प्हसेमैं या मुसारा धोंलेन् ल्हें तब्मुँ।”#रोम ४:१८; हिब्रू ११:१२
6छबिमा अब्रामइ याहवेहजी बिबै ताँ क्वेंइ। चइ खीजी बिबै ताँ क्वेंबइले याहवेहजी चलाइ ठिक ठर्दिइ।#रोम ४:३; गला ३:६; याक २:२३
7खीजी धबै चने बिइ, “चु ह्युल क्हिलाइ पिंबर कल्दिमैंए ऊरउँइँले क्हि पखबै याहवेह ङन् ग।”
8दिलेया अब्रामइ खीने “ओ याहवेह परमेश्वर, ङ चु ह्युलए क्ल्हे तल् योंम् बिसि ङइ खैले सेल् खाँम्?” बिसि ङ्योएइ।
9खीजी चने बिइ, “ङए ल्हागिर सोंदिंर्बै म्ये घ्रि, सोंदिंर्बै र, सोंदिंर्बै क्यु, तोंगु घ्रि नेरो परेवाए प्हसे घ्रि पखो।” 10अब्रामइ च ताँन् सैमैं खी ङाँर पसि थोइ। धै म्हाँजोर ङ्हिंबाँ लसि ओंसों थेंमिंइ नमेंमैं बिस्याँ ङ्हिंबाँ आल। 11छले थेंमा च सियाबै खेदो नेरो नमेंमैं फिर क्व्रेमैं ह्वाखमा अब्रामइ चमैं ल्हाइ।
12त्हिंयाँ लियामा अब्राम बेल्ले न्हरु च्हुइरिल। छले न्हरु च्हुइरिमा ङ्हिंन् ङ्हाँबै मिछु खैबइ च हुवाइ।#अयू ४:१३-१४ 13च लिउँइँ याहवेहजी अब्रामने बिइ, “क्हिए प्हसेमैं आगुए ह्युलर बसैं ह्यासि टिब्मुँ, च ह्युलर्बै म्हिमैंए केब्छैंमैं तब्मुँ, छले प्लिब्ब्रा बर्ष समा चमैंइ ल्हें दुःख योंल् त्हुब्मुँ बिसि खैलसेया मैंथेंन्।#प्रस १:१-१४; चिब्मैं ७:६ 14दिलेया क्हिए प्हसेमैं खाब् ह्रेंमैंए केब्छैं तब्मुँ, च ह्रेंर्बै म्हिमैंलैया ङइ निसाफ लब्मुँ। लिउँइँ चमैं त्होंखमा ल्हें मारा-मुइ किंसि खब्मुँ।#प्रस १२:४०-४१; चिब्मैं ७:७ 15क्हि बिस्याँ खेब् तन् समा शान्तिले सोसि सिब्मुँ धै पाब्मुँ। 16पुस्ता प्लि लिउँइँ क्हिए प्हसेमैं चुर्न एखब्मुँ, तलेबिस्याँ एमोरीमैंए आछ्याँबै के तोगो समा आखाँइमुँ।”
17त्हिंयाँ लियाबै लिउँइँ म्हुँइँस तमा मिखु त्होंबै मिए पु घ्रि नेरो लुँरिबै मिए प्हैं घ्रि सेए चौटामैंए म्हाँजोउँइँले त्होंयाइ। 18च त्हिंइर्न याहवेहजी अब्रामने छ बिसि बाछा फैइ, “मिश्र ह्युलर्बै स्योंउँइँले यूफ्रेटिस बिबै थेबै स्यों समार्बै चु ताँन् ह्युलै या ङइ क्हिए प्हसेमैंलाइ पिंइमुँ।#चिब्मैं ७:५ 19केनि, कनज्जी, कदमोनि, 20हित्ती, परिज्जी, रपाइ, 21एमोरी, कनानी, गिर्गाशी नेरो यबूसीमैंए ह्युलमैं ताँन् ङइ क्हिए प्हसेमैंलाइ पिंइमुँ।”
Voafantina amin'izao fotoana izao:
उत्पत्ति 15: GCMB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2020, Wycliffe Bible Translators, Inc. All rights reserved.