OHÚTU 29
29
Ujékɔ̄pu gaajɛ, ɔlɛ́ Ulában
1Ujékɔ̄pu le yɛ gɔbū ipú iyāwu kú nū ā, anɔ́ɔ ó ga ajɛ kú ācɛ ɛnɔ̄ɔ̄cī ā á. 2Ó gaá fu obugā éyi nɛ̄ ígwu kú aálá ɛtá gwutá pī ɔ̄ ajɛ abɔ́ɔ. Abɔ́ɔ nēé gē kpó éŋkpɔ̄ lɛ aálá ā gwá á. É le ɛcɔ̄ nɛ̄hi éyi gwū okónu obugā ā. 3Eko dúú nɛ̄ odúúdú aálá ā gaá le túbá abɔ́ɔ, ācogbāálá ā gē míya ɛcɔ̄ ā ŋmá okónu obugā ā kéē lɛ éŋkpɔ̄ kpó lɛ aálá ā gwá. Ācogbāálá ā gē je ígbɛ́cɔ̄ ā míya ce okónu obugā cīgbīhi ɛgiyí nū. 4Ujékɔ̄pu le ɔ̄kā da ācogbāálá ā kahíníī, “Aóklóbīya um, iní nɛ̄ aá ŋmá āa?” Anɔ́ɔ é tóohi kahíníī, “Alɔ ŋmá Uháran.” 5Ó da uwá ɔ̄kā kahíníī, “Aá jé Ulában, ɔyɔ́ɔ́yí kú Unáhɔ?” É tá ɔ̄ ohi kahíníī, “Alɔ jé ɔ̄.” 6Ó da uwá ɔ̄kā kahíníī, “Ó yɔ̄ lɔhi?” É tá ɔ̄ ohi kahíníī, “Ó yɔ̄ lɔhi. Kōō má Urécɛ̄lu, ɔyí nū nɔ̄nyā éyi yɔ̄ ī wā mɛ́mla aálá abɔ́ɔ ā.” 7Ujékɔ̄pu da uwá kahíníī, “Ɛnɔ kwu icō nɛ̄hi kpɔ́ ɛ́ɛ́, eko nēé ī tú aálá bá ā í yá ɛ́ɛ́ ŋ́, aá lɛ éŋkpɔ̄ kpó lɛ aálá ā gwá kú aá lɛ uwá kpó nyɔ̄ í lé ácí.” 8Amáŋ, é tóohi kahíníī, “Alɔ í yá lɛ ā glá ŋ́, n táafu ŋ́, eko nɛ̄ odúúdú aálá ā le túbá tɔ̄há nēé lɛ ɛcɔ̄ ā míya ŋmá okónu kú obugā ā, ɛ́ɛ́ nɛ̄ alɔ lɔfú kpó éŋkpɔ̄ lɛ aálá ā gwá glá á.” 9Abɔ̄ Ujékɔ̄pu yɔ̄ ī kɛlā mla uwá ā, Urécɛ̄lu, nōo gē gbō aálá kú ádā nū ā gā mla aálá āa. 10Eko nɛ̄ Ujékɔ̄pu le Urécɛ̄lu, ɔyínɔ̄nyā kú Ulában, ɔyínɛ́ ɛ́nɛ́ nū ā, má mla aálá kú Ulában ā, ó gaá le ɛcɔ̄ ā míya ŋmá okónu obugā ā, klla le éŋkpɔ̄ kpó lɛ aálá kú Ulában le gwá. 11Ujékɔ̄pu le Urécɛ̄lu kwú bɔ́ɔ́tū, yɔ̄ ī jikwū kú éeyē gbōmgbōm. 12Ujékɔ̄pu da Urécɛ̄lu ka anúɔ wɛ ɔmáapú ádā nū. Ó ka anúɔ klla wɛ ɔyí Urebéka. Anɔ́ɔ Urécɛ̄lu le inya kwu gaá le ka lɛ ádā nū á.
13Eko nɛ̄ Ulában le ɔ̄kā kú Ujékɔ̄pu, ɔyí kú ɔyínɛ́ nū nɔ̄nyā ā pó ā, ó le inya kwu gaá jīla ɔ́ ɔwɛ, le ɔ́ kwú bá ɔtū. Anɔ́ɔ ó le ɔ́ bī wā ɔlɛ́ nū á. Ujékɔ̄pu le ɔdā dóódu nōo yá ā kpó ka lɛ Ulában. 14Anɔ́ɔ Ulában da ɔ́ kahíníī, “Īī, ɔkwɔ̄ɔ̄kwɛ̄yi ami mɛ́mla awɔ wɛ oyī ékpónú nɛ.” Anɔ́ɔ Ujékɔ̄pu yɔ̄ abɔ́ɔ mla anú ɔyā éyi á.
Ujékɔ̄pu kwɛ̄hɔ̄cī lɛ Ulában ohígbū Urécɛ̄lu mɛ́mla Ulɛ́ya
15Anɔ́ɔ Ulában da Ujékɔ̄pu kahíníī, “Á gáā yúklɔ́ ga um icííci abɔ̄ a wɛ ɔyí kú ɔyínɛ́ um ā ŋ́. Da um ɔdā nōo géē wɛ ulé kú uwɔ ā?” 16Ulában lɛ ayínɔ̄nyā ɛpa. Iyē kú ɔnyākwɔ́cɛ ā lé ka Ulɛ́ya, iyē kú ɛnɛ̄ŋcɛ́ ā lé ka Urécɛ̄lu. 17Ulɛ́ya lɔhi īkpēyī, amáŋ Urécɛ̄lu lɔhi klla jɛ ɔ́ncɛ́nyā fíyɛ́ á. 18Urécɛ̄lu le he Ujékɔ̄pu ɔtū, anɔ́ɔ ó kahíníī, “N géē kwɛ̄hɔ̄cī gā uwɔ iháyí ahāapa ohígbū Urécɛ̄lu kóō kwú pīya ɔnyā um.” 19Ulában tá ɔ̄ ohi kahíníī, “Ó lɔhi ká n je ɔ́ gā uwɔ fíyɛ́ ɛ̄nɛ̄ n géē je ɔ́ lɛ ɔ̄cɛ ɔhá. N cɛ̄ lɛ ā, klá mla um mɛ́ɛnɛ.” 20Anɔ́ɔ Ujékɔ̄pu le úklɔ́ yá iháyí ahāapa ohígbū Urécɛ̄lu á. Amáŋ ó wɛ eko kpií tū ɔ̄, ohígbū ka Urécɛ̄lu le he ɔ́ ɔtū.
21Ujékɔ̄pu da Ulában kahíníī, “Kwú ɔnyā um, Urécɛ̄lu ú gā um mɛ́ n, ká n gbo mɛ́mla anú. Ohígbū ka ɛ̄cī nɛ̄ a tū um ā le jīla ɛɛ́.” 22Anɔ́ɔ Ulában le odúúdú ācɛ kú abɔ́ɔ túbá lɛ ucɛ yá lɛ uwá á. 23Amáŋ, ɔ̄nɔ̄ɔ̄nɛ̄ kú ícíícɛ ɔ́ɔmā, ikɔɔkɔ nōó í bī Urécɛ̄lu gé lɛ Ujékɔ̄pu ā, ó gbēyī kú ajɛ kóō kwú dobū kpó, anɔ́ɔ ó kwú Ulɛ́ya ú bī gé lɛ ɔ́ á. 24(Ulában kwú ɔfiyɛ nɔ̄nyā kú nū, Usílpa ú lɛ adá nū, Ulɛ́ya kóō cɛ̄ ɔ̄ ɛhɔ̄). 25Ɔ̄cɔ̄ɔ̄cī ā, Ujékɔ̄pu le má ka Ulɛ́ya nōó je lɛ anúɔ á, anɔ́ɔ Ujékɔ̄pu da Ulában ɔ̄kā kahíníī, “Ɔdí nɛ̄ a yá um yɔ̄ ā? Ń yúklɔ́ gā uwɔ ohígbū Urécɛ̄lu ŋ́ nɛɛ? Ɔdíyā ɛ́ɛ́ nɛ̄ a plla um āa?”
26Ulában tóohi kahíníī, “Ó wɛ ucē kú alɔ amānyā kú ɔyínɔ̄nyā nɛ̄ŋcɛ́ kóō lɛ ɔbá gbɔbū lɛ ɔnyākwɔ́cɛ kú nū ŋ́. 27Lɛ aláadi éyi kú uculo kú ɔnyā ō lɛ yá mla ɛ̄nyā ɛ́ɛ́. Cɛ́ɛ́ a klla kwɛ̄hɔ̄cī iháyí ahāapa ɔhá, cɛ́ɛ́ n kwú Urécɛ̄lu ú gā uwɔ dúú.”
28Ujékɔ̄pu cɛ̄, abɔ̄ ó lɛ aláadi kú ogwéeyē kú ɔnyā ō lɛ ā yá āa, anɔ́ɔ Ulában kwú Urécɛ̄lu ú lɛ ɔ́ kóō wɛ ɔnyā nū. 29(Ulábān kwū ɔfiyɛ nɔ̄nyā kú nū, Ubílha ú lɛ Urécɛ̄lu kóō cɛ̄ ɔ̄ ɛhɔ̄.) 30Anɔ́ɔ Ujékɔ̄pu le gbo mla Urécɛ̄lu dúú á. Ihɔtū nōó lɛ lɛ Urécɛ̄lu ā fíyɛ́ ɛ̄nɛ̄ ó lɛ lɛ Ulɛ́ya á. Anɔ́ɔ ó klla kwɛ̄hɔ̄cī lɛ Ulában iháyí ahāapa ɔhá á.
Ayínɔ̄nyīlɔ nēé ma lɛ Ujékɔ̄pu ā
31Eko nɛ̄ Óndú ā má ka Ujékɔ̄pu í lɛ ihɔtū lɛ Ulɛ́ya bɛ̄ɛka Urécɛ̄lu ā ŋ́ mā, ó le ɔ́ yá tɔ́ɔtɛ́ lɛ Ulɛ́ya kóō ma ɔyí, amáŋ Urécɛ̄lu wɛ ɔdɔma. 32Ulɛ́ya le ipú yɔ̄ le ɔyínɔ̄nyīlɔ ma. Ó kahíníī, “Óndú ā le unwalu kú um má ɛɛ́. Abālɔbányā ɔbá um géē yíhɔtū tá um mɛ́ɛnɛ.” Anɔ́ɔ ó hī iyē nū ka Urúbɛn#29.32 Urúbɛ̄n: Iyē nyā gbla ɛlā kú okónu Uhíbru nēé ka ka “má ɔ̄, ɔyínɔ̄nyīlɔ” mɛ́mla “ó le unwalu kú um má ɛɛ́.” 33Ó klla le ipú yɔ̄ kpɔ́ anɔ́ɔ ó klla le ɔyí ɔ̄cɛnyīlɔ ɔhá ma á. Anɔ́ɔ ó kahíníī, “Óndú ā klla kwú ɛ̄nyā ú gā dúú, ohígbū koó le pó ka ɔbá um í yá ihɔtu tá um ŋ́.” Anɔ́ɔ ó hī iyē nū ka Usímīyɔn#29.33 Usímīyɔn: Iyē nyā gbla ɛlā kú Uhíbru nōo wɛ “pó”. 34Ó klla le ipú yɔ̄ igbɔ́hɔ́ le ɔyí ɔ̄cɛnyīlɔ ɔhá ma, anɔ́ɔ ó kahíníī, “Ɛ̄nyā géē gbō ami mɛ́mla ɔbá um bɔ́há ká mɛ́ɛnɛ, ohígbū ka n le ayí nɔ̄nyilɔ ɛtá ma lɛ ɔ́ ɛ́ɛ́.” Anɔ́ɔ ó hī iyē nū ka Ulífāyi#29.34 Ulífāyi: Iyē nyā gbla ɛlā kú Uhíbru nōo wɛ “ɔdōbɔ́há” 35Anɔ́ɔ ó klla le ipú yɔ̄ kpɔ́, le ɔyí ɔ̄cɛnyīlɔ ɔhá ma. Anɔ́ɔ ó kahíníī, “Igbɛ́ɛ̄nyā ā n géē cɛ̄tra Óndú ā.” Anɔ́ɔ ó hī iyē nū ka Ujúda#29.35 Ujúda: Iyē nyā gbla ɛlā kú Uhíbru nōo lɛbɛ̄ɛka “ocɛ̄tla”. Anɔ́ɔ ó klla ma ɔyí ɔhá gɛ ŋ́ má.
Voafantina amin'izao fotoana izao:
OHÚTU 29: IFBCL
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra