OHÚTU 41
41
Ujósɛ̄fu ka ɛyí ɔ̄na kú ɔcɛ́
1Eko nɛ̄ iháyí ɛpa le yɛ ā, Uféro le ɔ̄na nā abɔ̄ ó háyī okónu ísu kú Unáyilu ā. 2Anɔ́ɔ ó má aɛ́na ahāapa, ojɔ̄kwū mlɔ́mlɔ́ ā le bɛ̄cɛ ŋmá ipú ísu kú Unáyilu ā, anɔ́ɔ é gbɔɔ́ ō lé ácí. 3Anɔ́ɔ aɛ́na ahāapa ɔhá le pɛ́ bɛ̄cɛ ŋmá ipú ísu ā. É le nyinyi gányá gányá ā. É gaá háyī pī aɛ́na ojɔ̄kwū ahāapa ā okónu ísu ā, 4anɔ́ɔ aɛ́na onyinyi gányá gányá ā, kwú aɛ́na ojɔ̄kwū ā ú kpó lé ŋmá ajɛ. Anɔ́ɔ ɔcɛ́ ā le héyī ŋmá iyɔ̄lā á. 5Anɔ́ɔ Uféro kwú iyɔ̄lā ī gbo kpɔ́, anɔ́ɔ ó le ɔ̄na ɔhá nā kpɔ́ á. Ipú ɔ̄na ā, ó má ɛyí kú igwu o cɛyí nɛ̄hi ahāapa bá ī jɛ̄ kwú ɔcí igwu ékpónú. 6Anɔ́ɔ ɛyí kú igwu ɔhá klla le bū wɛ̄ɛcɛ ɛgiyí uwā, owu kú ipú ígbíli cɛ̄ lɛ aɛ́nyā kwú pīya igbóngbō. 7Anɔ́ɔ ɛyí kú igwu nōo wɛ igbóngbō ā kwú ɛyí kú igwu o cɛyí nɛ̄hi ā í kpó mlɛ ŋmá ajɛ á. Uféro le héyī ŋmá iyɔ̄lā anɔ́ɔ ó le jé ka ɔ̄na nɛ̄ anúɔ hímáyī nā á. 8#Udan 2.2Ɔ̄cɔ̄ɔ̄cī ā, ɔtū nwula nwula yá ɔ̄ nɛ̄hi, anɔ́ɔ ó le ɛhɔ̄ tū fu odúúdú ācoyímabɔ̄ mɛ́mla odúúdú ācojēeyī kú ajɛ kú Íjīpiti á. Ó le ɔ̄na nōó nā ā kpó ka lɛ uwá. Amáŋ odóódu kú uwā í ka ɛyí ɔ̄na ā lɛ ɔ́ glá ŋ́.
9Anɔ́ɔ ɔ̄cɛ nōo gē je ejé lɛ ɔcɛ́ ā kahíníī, “N lɛ okónu cɛ̄ ɔdōbɔ̄bí kú um ícɛ. 10Eko nɛ̄ a cɔ̄nū kpó ami mɛ́mla otrɛ̄yí kú ācoyíigbō ā tū agbá ɔlɛ́ kú otrɛ̄yí kú ācogbāajɛ ā. 11Alɔ nɔ̄na tɔ̄há otú ékpónú, ɔ̄na kú ɔnyɔɔnyɛ kē lɛyí ɛyɛ́ɛyɛ́yí. 12Ó le ɔyípóklóbīya kú Uhíbru éyi nōo yɔ̄ abɔ́ɔ mɛ́mla alɔ. Ó wɛ ɔ̄cocɛ̄hɔ̄ kú otrɛ̄yí kú ācogbāajɛ ā. Alɔ le ɔ̄na kú alɔ kpó ka lɛ ɔ́, anɔ́ɔ ó le ɛyí nū kpó ka lɛ alɔ á. 13Ɛ́gɛ́nɛ̄ ó ka ɛyí kú ɔ̄na ā lɛ alɔ lɛ ā, ɛ́gɔ́ɔmā nōó kē le yá kpɛ́mm á. A le um cīgbīhi wā āhɔ̄ kú um, anɔ́ɔ é kē le otrɛ̄yí kú ācōyíigbō ā tū olī á.”
14Anɔ́ɔ Uféro ā lɛ ɛhɔ̄ tū fu Ujósɛ̄fu, anɔ́ɔ é lɛ ɔ́ bī bɛ̄cɛ bōōbū ŋmá agbá. Eko nōó le ɔnwū agba plla klla le īlī kú nū pīyabɔ̄ ā, ó gā iyɔ̄bū kú Uféro. 15Uféro da Ujósɛ̄fu kahíníī, “N le ɔ̄na nā, ɔ̄cɛ dúúmā í kē yɔ̄ nōo lɔfú ka ɛyí nū gā um ŋ́. N pó ka, eko nēé lɛ ɔ̄na ka gā uwɔ, a gē ka ɛyí nū glá.” 16Anɔ́ɔ Ujósɛ̄fu tá Uféro ohi kahíníī, “Ó wɛ ami ŋ́, amáŋ Ɔwɔicō géē lɔfú ka ɛyí nū gā uwɔ á.”
17Anɔ́ɔ Uféro da Ujósɛ̄fu kahíníī, “Ipú ɔ̄na kú um ā, n háyī pī ísu kú Unáyilu, 18ɛ́ɛ́ nɛ̄ aɛ́na ahāapa nēe wɛ ojɔ̄kwū iyē mlɔ́mlɔ́ ā le pɛ́ bɛ̄cɛ ŋmá ipú ísu kú Unáyilu bá ī lé ácí. 19Anɔ́ɔ aɛ́na ahāapa ɔhá le pɛ́ bɛ̄cɛ. É le nyinyi gányá gányá ā, ɛdɔ ɛ̄nɛ̄ ń má ajɛ kú Íjīpiti jéjéē ɛ́ɛ́ ŋ́. 20Anɔ́ɔ aɛ́na nēe nyinyi gányá gányá ā kwú aɛ́nɛ̄ e jɔ̄kwū mlɔ́mlɔ́ ahāapa kú aflɛ́yí ā ú kpó lé á. 21Amáŋ eko nɛ̄ é kwú uwā ú kpó lé ā, ɔ̄cɛ dóódu í lɔfú jé ka ɔdā dúúmā tá ipú kú uwā ŋ́, ohígbū keé le gányá gányá ɛ́gɛ́nɛ̄ é tɛtɛ lɛ ā. Anɔ́ɔ n le héyī á. 22N klla nɔ̄na má ɛyí kú igwu o cɛyí nɛ̄hi ahāapa nēe yɔ̄ ī jɛ̄ ŋmá ɔcí igwu ékpónú. 23N klla má ɛyí kú igwu ahāapa ɔhá, nɛ̄ owu kú ígbíli kwú uwā ú pīya igbóngbō. 24Anɔ́ɔ ɛyí kú igwu nēe wɛ igbóngbō ā kwú ɛyí kú igwu nēe cɛyí nɛ̄hi ahāapa ā ú kpó mlɛ á. N le ka lɛ ācoyímabɔ̄ kú ɔlɛ́ um ā, amáŋ ɔ̄cɛ dúúmā kú uwā í yɔ̄ nōo lɔfú ka ɛyí ɔ̄na ā gā um glá ŋ́.”
25Ujósɛ̄fu da Uféro kahíníī, “Ɛyí kú ɔ̄na ɛplɛ́ɛpa ā wɛ ékpónū. Ɔdā nɛ̄ Ɔwɔicō gáā yá ā nōó mafú á. 26Aɛ́na ojɔ̄kwū ahāapa ā mɛ́mla ɛyí kú igwu o cɛyí nɛ̄hi ahāapa ā, wɛ iháyí ahāapa. Ɔnā ā le ɛyí ékpónú. 27Aɛ́na onyinyi gányá gányá ahāapa ā mɛ́mla ɛyí kú igwu ahāapa nēé cɛyí ŋ́ mā, nɛ̄ owu kú ipú ígbíli je ɔ́ pīya igbóngbō ā wɛ iháyí ahāapa kú ɔkpɛtā. 28Ɛ́gɛ́nɛ̄ n da uwɔ lɛ ā ka ɔdā nɛ̄ Ɔwɔicō gáā yá ā nōó mafú gā uwɔ á. 29Iháyí ahāapa kú ɔdā kú ɛhɔ̄ ō cabá géē yɔ̄ odúúdú ajɛ kú Íjīpiti. 30Amáŋ, igbīhi iháyí ɛ̄nyā ā, iháyí ahāapa kú ɔkpɛtā géē gbɔɔ́, nɛ̄ ācɛ géē je mlanyī odúúdú iháyí kú ɔdɛ̄hɔ̄ ō cabá ā ohígbū ka ɔkpɛtā ā géē je ajɛ kú Íjípiti yíífi. 31Ācɛ í je mlanyī eko kú ɔdɛ̄hɔ̄ ō cabá ā ipú ajɛ nyā, ohígbū ka ɔkpɛtā nōo gaá kwúcē eko ɔ́ɔmā ā géē bɔ̄bí nɛ̄hi. 32Ɔdā nōo yá ɛ́ɛ́ nɛ̄ a nɔ̄na igbɛpa gboce iyī uwā ā wɛ ka Ɔwɔicō le ɔdānyā miya táajɛ gbɔbū ɛɛ́, ó kē í má kóō le yá piíí ɛ̄cɔ̄bū nōó ligbó ŋ́. 33Ɛlā kú um abālɔbányā wɛ ka Uféro kóō lɛ ɔ̄cojééyī nɛ̄hi éyi fu, kóō leyīkwu ajɛ kú Íjīpiti. 34A í fu aígabɔ̄ ɔhá nēe leyīkwu ajɛ ā, é kē í mīyɛ ɛga eyí ŋmá ɛga ɛhɔ̄ kú ɔdɛ̄hɔ̄ dóódu nōo í yá ɛplá iháyí ahāapa kú ɔdɛ̄hɔ̄ ō cabá ā. 35Da uwá kéē le ɔdōlé kú aíháyí olɔhi nēe yɔ̄ ī wā ā kpó, a klla í je íkwú lɛ uwá kéē lɛ ɔdɛ̄hīcō kpó tū ipú inu ipú aígelī cɛ́ɛ́ kéē gbō ɔ̄. 36Ɔdōlé ɔ́ɔmā géē wɛ ɔdōlé ō gbɛ̄yí kú ajɛ ā ohígbū iháyí ahāapa kú ɔkpɛtā nēe géē wā ipú ajɛ kú Íjīpiti, cɛ́ɛ́ kú ɔkpɛtā kóō je ācɛ ā kpó yíífi ŋ́.”
E kwú Ujósɛ̄fu í yá igbómína kú Íjīpiti
37Ufēro mɛ́mla odúúdú aígabɔ̄ kú ɔlɛ́ nū ā, cɛ̄ ka ɛlā kú Ujósɛ̄fu ɔ́ɔ lɔhi. 38Anɔ́ɔ Uféro da aígabɔ̄ kú ɔlɛ́ nū ā kahíníī, “Alɔ í gáā má ɔ̄cɛ ɔhá dúú fíyɛ́ ɔ̄cɛ ā nɛ̄ alelékwū kú Ɔwɔicō yɔ̄ ipú nū ā glá ŋ́” 39Uféro da Ujósɛ̄fu kahíníī, “Abɔ̄ Ɔwɔicō le odúúdú ɔdā nēe bá ā mafú gā uwɔ ā, ɔ̄cɛ dúúmā ɔhá í yɔ̄ nōo lɔhi klla jíjéeyī bɛ̄ɛka awɔ ā ɛ́ɛ́ gɛ ŋ́. 40#Ācot 7.10N géē je uwɔ pīya otrɛ̄yí kú ajɛ ɔlɛ́ um. Odúúdú ācɛ ɔlɛ́ um géē mīyɛ ɔ́da ŋmá abɔ̄ kú uwɔ. O ka n ce akpa kú ɔcɛ́ ā nɛ̄ n bī le fíyɛ́ uwɔ á. 41Anɔ́ɔ Uféro da Ujósɛ̄fu kahíníī, “N kwú uwɔ ú yá igbómína kú odúúdú ajɛ kú Íjīpiti.” 42#Udan 5.29Uféro kwú eliká nōo ī bī le bá ɔkpá ā ú plla ŋmá abɔ̄ kú nū, anɔ́ɔ ó kwú ɔ̄ ú wu Ujósɛ̄fu abɔ̄, klla kwú awulú ahilíki ú wu ɔ́ iyē, kwú agbá kú oje ɔdɔ (ugóolu) ú tū ɔ̄ ɔkɔ. 43Ó kwú úgbɔ́ɔnya kú ɔlɛ́ ɔcɛ́ ɔ́mpa ā ú lɛ ɔ́, anɔ́ɔ ācɛ nēe gē gbō ɔ̄ le gbɔbū lɛ ɔ́, bá gē dɛ̄gba kahíníī, “Aá lɛ ɔwɛ tá lɛ ɔ́!” Anɔ́ɔ Ujósɛ̄fu kwú pīya igbómína kú Íjīpiti á.
44Uféro da Ujósɛ̄fu kahíníī, “Ami wɛ Uféro á, ɔ̄cɛ dúú í yɔ̄ ipú odúúdú ajɛ kú Íjīpiti nōo í je abɔ̄ ámāŋ ka ikpó gicō nōó gáā mīyɛ ɛga ŋmá abɔ̄ kú uwɔ gbɔbū ŋ́ nɛɛ ŋ́.” 45Uféro kwú iyē kú ācɛ Íjīpiti éyi ce ɔ́, nōo lé ka Usafénāt Upanéya. Ó klla kwú Asɛ́nāt, ɔyínɔ̄nyā kú Upɔtiféra, nōo wɛ ɔ̄cogwɛ́ɛya ipú igelī kú Uheliyopólisi ā ú lɛ ɔ́ kóō wɛ ɔnyā nū.
46Ujósɛ̄fu wɛ iháyí ofucigwó eko nōó gbɔɔ́ ō cɛ̄ Uféro kú Íjīpiti ɛhɔ́ ā. Ó nyɛ̄ɛ̄ ŋmá agbla kú ɔcɛ́, anɔ́ɔ ó le odúúdú ajɛ kú Íjīpiti ā kpó jila bilíbilí á.
47Eko kú iháyí ahāapa kú ɔdōlé ō cabá nɛ̄hi ā, ajɛ ā yá ɔdɛ̄hɔ̄ nɛ̄hi. 48Ujósɛ̄fu le odúúdú ɔdōlé dóódu kú iháyí ahāapa ɔ́ɔmā ā, kpō tū ipú inu ipú aígelī. Ipú igelī dóódu ó le ɔdōlé nōo yɔ̄ ā kpó tū ipú inu ŋmá ɛhɔ̄ nōo yɛ abɔ́ɔ jīlatá biílí ā. 49Ujósɛ̄fu le igwu ā tīkwū bá nɛ̄ɛ̄nɛ̄hi bɛ̄ɛka ɔjɛ kú okónū ísu ā. Ó kpótū jāā gbéeko nōó tōō miya igbīhāajɛ ā gɛ ŋ́.
50Gbɔbū ɛ́ɛ́ kú iháyí kú ɔkpɛtā ā kóō wā ā, Ujósɛ̄fu lɛ ayínɔ̄nyīlɔ ɛpa, nɛ̄ ɔnyā nū, Asɛ́nāt, ɔyínɔ̄nyā kú Upɔtifɛ́ra, ɔ̄cogwɛ́ɛya kú Uhɛliyopɔ́lis ā ma lɛ ɔ́ ā. 51Ujósɛ̄fu hī iyē kú ɔ́kplá nū ā ka, Umanásɛ, ohígbū kóó kahíníī, “Ɔwɔicō le yá kú n̄ kwú mlanyī odúúdú ōwē kú um, mɛ́mla ákú ɔlɛ́ ádā um ɛɛ́,” 52Ó hī iyē kú ɔyí nū ɔ́mpa ā ka, Ɛ́frem, “Ohígbū ka Ɔwɔicō cɛ̄ gā um le ma nyīla ajɛ kú ōwē kú um.”
53Iháyí ahāapa kú ɔdɛ̄hɔ̄ ō cabá ā le ŋmɛ́yí ajɛ kú Íjīpiti. 54#Ācot 7.11Anɔ́ɔ iháyí ahāapa kú ɔkpɛtā gbɔɔ́ ɛ́gɛ́nɛ̄ Ujósɛ̄fu ka ā. Ɔkpɛtā ā yɔ̄ ajɛ dóódu, amáŋ ɔdōlé yɔ̄ ajɛ kú Íjīpiti ā. 55#Ujɔ́n 2.5Eko nɛ̄ ɔkpɛtā ā gbɔɔ́ ō ŋmó ajɛ kú Íjīpiti ā, ācɛ ā le ikwū je klá Uféro ohígbū ɔdōlé. Anɔ́ɔ Uféro da odúúdú ācɛ kú Íjīpiti ā kahíníī, “Aá nyɔ̄ ɛgiyí Ujósɛ̄fu, ɔdā dóódu nōó ka lɛ aá, aá yá ɔ̄.” 56Eko nɛ̄ ɔkpɛtā ā le nyīla ga ɛga dóódu ā, Ujósɛ̄fu lɛ ɔwɛ kú inū nēé kpó ɔdōlé tū ā nwūla, anɔ́ɔ ó gbɔɔ́ ō je ɔdōlé lá lɛ ācɛ kú Íjīpiti ohígbū ka ɔkpɛtā le nwuné nɛ̄hi ajɛ abɔ́ɔ. 57Ofíyɛ́ dúú ā, odúúdú āce kú ɛcɛ gē wā ajɛ kú Íjīpiti, ɛgiyí Ujósɛ̄fu gaá lá igwu, ohígbū ka ɔkpɛtā ā yɔ̄ odúúdú ɛcɛ.
Voafantina amin'izao fotoana izao:
OHÚTU 41: IFBCL
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra