Madius 6
6
1Akumu jim ago nedo upene unyimia aijaua an nuhup o atimi, mika eri alum caua ara: el eka ago nedo ineigki aijaua, inyi ti alupai caua nimtan a Etmamia an nohatag. 2Na wit ahtai niji itai tup ahtai aiek, jim ahlai intoho um uhup iram, et idivaig ilpu atimi efaifa, era ago nedo ineigki ara irai eom alaigaheni, im lep irai efalaig, mika eri imyiahpas ra natimi. Et inivaijec ineig ek asaig ehelemia ainyak mika, Era mun leh nimtan imi ra ara. 3Na wit ahtai niji itai tup ahtai aiek, etmu jim ato nikmam inmoum nitai ineig et ago inmatam: 4va uhpu adenaig niji itai tup ahtai unyum vai atimi: etpu idim alupai euc nimtan a Etmam et alum itai aieu an nuarin adenaig o un, um eti adenaig.
5Na wit alaigaheni aiek, jim idivaig ilpu atimi efaifa: era merit ara natidaivaig um alaigaheni irai eom alaigaheni, im lep irai ihtag u efalaig, mika eri alum ra natimi. Et inivaijec ineig ek asaig ehelemia ainyak mika, Era mun leh nimtan imi ra ara. 6Na wit alaigaheni aiek, apan anliin neom unyum um atapanes iram, um alaigaheni vai Etmam et adenai yin aien; etpu alupai euc nimtan a Etmam et alum itai aien an nuarin adenaig o un, um eti adenaig. 7Aku wit alaigaheni aijaua, jim ecilpat asan tas et idivaig ilpu atimi aupat: era aktaktai ara mika uhpu atahaijeg ra vai intas ahinag ura. 8Akumu jim idivai ra aijaua: et mun upyi ato a Etmamia nitai iji eigki et upene vai caua, ja eka par ugni yin vaig aijaua. 9Etmu ucce nalaigaheni unyimia aijaua:
Ak Etmama an nohatag, Etmu itaup nidam. 10Etmu yetpam nelcau unyum. Uhmu imyiaiji intas unyum an nobohtan, et idivaig an nohatag. 11Alaama aiek nitai caig incama an nadiat ineig. 12Um jim aru tah nedo has unyima aiek, et idivaig ecra eti aru tah nedo has o atimi vai cama aijama. 13Um jim atau irama an nedo oop aiek, jam imyiatamaig cama va niji itai has. Et idim unyum aiek nelcau, im nemda, im nimyiahpas, irai iji mesese. Emen. 14El eka eti aru tah nedo has o atimi vai caua aijaua, inyi ti aru tah nedo has unyimia a Etmamia an nohatag: 15ja el eka aru tah nedo has o atimi vai caua aijaua, etpu lep aru nedo has unyimia a Etmamia.
16Im lep ineig, aku wit atwakam aijaua, jim imtimlai va nesganimtamia aijaua um idivai ilpu atimi efaifa: era auahas nesganimtara ara, mika eri ika atimi era atwakam ara. Et inivaijec ineig ek asaig ehelemia ainyak mika, Era mun leh nimtan imi ra ara. 17Na wit atwakam aiek, aspi nipek unyum an naraki, um ehperegdei nesganimtam; 18mika eri jim ato natwakam unyum atimi, ja Etmam ache an nuarin adenaig o un: etpu alupai euc nimtan a Etmam et alum itai aien an nuarin adenaig o un, um eti adenaig.
19Jim ikni inpadiaig imi caua aijaua an nobohtan, etpu ages, um epera, um has; erupu lep ahtaijhan neom a ilpu atimi ehneg itai um ahneg: 20jam ikni niji itai upene imi caua aijaua an nohatag, inyi ti ages, um eti epera, um eti has; eri ti lep ahtaijhan neom a ilpu atimi ehneg itai um ahneg: 21etpu amen inliinmopomia aijaua an nuarin ineig, et amen inpadiaig unyimia iran. 22Et itai lah u nohuja nesganimtaija: el et weilah nesganimtam aiek, etpu lah upene nohum asega. 23Ja el et aplan nesganimtam aiek, etpu aupat nohum asega. El et aupat inlah unyum, etpu esjilid acen naupat unyum!
24Et ehka vaig tah natimi nahecavaig u natimi alupas ero: etpu acen inliinmopon aien vaig et ethi, um aiyu inliinmopon vaig et ethi; etpu apol iran et ethi aien, um amcel vaig et ethi. Et ehka vai caua nahecavaig o Atua im Mamona. 25Va nitai ineigki ek asaig ehelemia ainyak mika, Akumu jim aktaktai numumoh unyimia aijaua, im nitai caig unyimia, im nitai umni unyimia; um jim aktaktai nohumia, im nitai aso caua. Et esjilid numumoh unyimia aijaua irai itai hegaig, im nohumia irai itai aso caua. 26Alum man an nauanohatag aijaua: era eti ahoai itai ara, um eti asjapicnai itai, um eti ikni irai eom ikni itai; ja et alaa ra nitai caig a Etmamia an nohatag. Eka esjilid ira ra aijaua. 27Et eti emda tah iramia par ika yi lep yetpan an tah nadiat aien va naktaktai o un. 28Eka auri aijaua par aktaktai alupas nitai aso caua? Alum tisiai cai an nobohtan aijaua, im nedel iran; et eti auritai, um eti ahod itai: 29ja ek asaig ehelemia ainyak mika, Is eti yecrei yin a Solomon an natimi alupas o un um idivaig tah nitai iji eigki. 30El et ucce nedo o Atua, va nefelelicai an nobohtan, et umoh inpeig, ja er erekhaigjai an cop an tak apnyin, etpu idim aso caua aien, et tintin nimyiisjis ninivaijec unyimia. 31Jim aktaktai alupas aijaua, um ika, Ti caig inhe akaija? ti umni inhe akaija? ti aso caija akaija anhe? 32(era ahilek nitai iji eigki asega a ilpu atimi aupat:) et ato a Etmamia an nohatag nitai iji eigki asega et upene vai caua. 33Akumu upyi hup aijaua, um ahilek nelcau o Atua im nedo atoh o un; uhpu alupai caua nitai iji eigki asega. 34Jim aktaktai alupas aijaua vaig imraig: uhpu aktaktai imraig va niji itai iran. Et eteuc niji itai has irai iji adiat.
Voafantina amin'izao fotoana izao:
Madius 6: ATY1863
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
historic text maintained by the British and Foreign Bible Society