Sélimɛ 6
6
Siɛnnɛ kapiʔile ke 'Kulocɛliɛ biɛn
1Bà siɛnnɛ pe séli nɛ̀ sii nɛ niʔɛgi dàala nɛ̄ lè, a pe 'pìcapigele sii, 2a Kulocɛliɛ pìile pe 'siɛnnɛ pe pórilo nyaa bèle cɛ̀nminɛ, a pe 'fali nɛ pe líi nɛ waa cɛlilɛ a ŋìi cé pe dɛ́ni wè.
3A Yewe 'jo: «Mi Pìle niǐ ga tíi kò siɛn nī lɛ̀lɛ ó lɛ̀lɛ nīʔ; nɛ́ ki cɛ́n, siɛn muɔ nɛ nyaʔa wè, wi bé ba kùu wī. Siɛn wi sìi yiʔɛlɛ kiyě tóri yiʔɛlɛ tekɔlini (120) nɛ̄ʔ.»
4Kire lɛ̀lɛ lire nī, siɛnkpaʔajɛnminɛ pe 'puu nɛ tíin bile dàala nɛ̄ lè, nɛ́ míɛni kire kàduʔumɛ gè yi 'puu bile. A Kulocɛliɛ pìile pe pɛ́nì sínɛ nɛ́ siɛnnɛ pórilo ní bèle a pe 'pìile sii pe nɛ̄. Peli pe 'puu nàgaliriye yè nyàa yi 'puu nɛ́ ŋɔri ní dè faʔa gè, nɛ́ ní míʔɛfɔlilɔ bèle.
5A Yewe pɛ́nì ki nyaa siɛnnɛ pe kakpiʔiligele kiyē nɛ piʔi nɛ waa dàala nɛ̄ lè, á pe funzɔngirɔ ní dè nɛ waa cɛngɛ ó cɛngɛ kapiʔile kɔli mɛ́ gè. 6Á ki tɔ̀ni nɛ̀ Yewe biɛn a wi 'ki nyaa wire sì yé yɛli bè siɛn faanʔ, a ki 'wi fungo cúʔɔ gè. 7A Yewe 'jo: «Siɛnnɛ bálì mi 'faan bèle, m'bé pe cúʔɔ bè yige dàala nɛ̄ lè péwu, peli nɛ́ nyàʔayɛrɛ nɛ́ yajuuro ní dè, nɛ́ yafulolido ní dè, nɛ́ yafinide ní dè, nɛ́ ki cɛ́n ki tɔ̀ni nɛ̀ mi biɛn bɛ̀ mi 'siɛnnɛ nɛ́ yɛrɛ dáà ti mìɛni faan dè.»
8Nɛ̀ ki yaʔa Nɔwe cé kpuʔɔrɔ taa Yewe mɛ́.
Kulocɛliɛ wi 'ki yɛ̀gɛ bè duniya cúʔɔ wè
9 Nɔwe nɛ́ wi pìile siɛnrɛ dī dàa dè: Nɔwe 'puu siɛnsinwɛ nɛ́ ní dìgire fùn wi lɛ̀lɛ siɛnnɛ nī bèle; wi 'puu nɛ tári nɛ́ Kulocɛliɛ ní wī. 10Nɔwe 'nàgabigele taanri sii, peli pe 'puu bàli bèle: Sɛmi, nɛ́ Kami, nɛ́ Jafɛti.
11Nɛ́ ki yaʔa duniya wi yé tɔ̀ni nɛ̀ cúʔɔ Kulocɛliɛ yiʔɛ mɛ́, nɛ́ ki cɛ́n siɛnnɛ pe mìɛni 'puu fungbɛnyɛfɔlilɔ.
Nɔwe 'kɔ́rikpuʔɔ kpíʔile
12A Kulocɛliɛ 'duniya wéli wè nɛ́ ki nyaa duniya wiī cúʔɔwɔ; siɛnnɛ pe mìɛni tánʔagɛnmɛ yé pii nɛ̀ pɛ́nì tóri dàala nɛ̄ lè.
13A Kulocɛliɛ sí fali nɛ̀ juu Nɔwe ní nɛ́ jo: «Mi nyɛ́nì ki kɔ̀rirɔ bè siɛnnɛ pe mìɛni sìi yérige wè, nɛ́ ki cɛ́n siɛnnɛ pe fungbɛnyɛ yi nyɛ́nì dàala nyì lè. Kire nɛ̄ mi je pe cúʔɔ nɛ́ dàala ní lè. 14Muɔ wè, ma kɔ́rikpuʔɔ káà kpíʔile nɛ́ gofɛri#6.14 gofɛri: Tiige káà felige ki 'puu gàa pe puu nɛ líi nɛ kɔ́riyɔ kpínʔini yè nɛ́ ki tiire ní dè. Wiyè ki felige cɛ́nʔ. tiire ní, má saapigele kɔ̀n kɔ̀n ki laamɛ nī bè, má tiire kùro tíʔɛ ma ki tiin ki laamɛ nī bè nɛ́ kpànʔanɛ gè. 15Kɛnmɛ báà pire nɛ̄ muɔ 'yɛli bè ki kpíʔile: kɔ́rikpuʔɔ ki tɔnigɛnmɛ pi 'yɛli pi‑ puu kabuunyiʔɛnɛ sirakeli dabataan (300), ki píɛlɛgɛnmɛ pi 'yɛli pi‑ puu kabuunyiʔɛnɛ togosiin nɛ́ kpɔrigɔ, ki kpàʔalagɛnmɛ pi 'yɛli pi‑ puu kabuunyiʔɛnɛ togo nɛ́ kpɔrigɔ. 16Muɔ bé yatɔngɔ kpíʔile kɔ́rikpuʔɔ ki naamɛ gè, gàa ki kpàʔalagɛnmɛ pi bé puu kabuunyɛni nigbe. Muɔ bé wìile kɔ̀n kɔ́rikpuʔɔ ki kayɔbigɔ káà nɛ̄. Muɔ bé ki faan ki‑ puu saataʔaliyɛ taanri: kàa‑ puu táanmɛ, kàa‑ puu sunʔɔmɔ ní, kàa‑ sí puu naamɛ gè. 17Mi wè, mi je kàsakpiile cáan bè dàala tɔ́n lè, bè siɛnnɛ nɛ́ yawiire ti mìɛni cúʔɔ dàala nɛ̄ lè; yɛgɛ ó yɛgɛ gī dàala nɛ̄ lè#6.17 Eburu siɛnrɛ nī dè, ki 'jo: nyìʔɛnɛ láara; ki bé gbɛ̀ jo: dàala nɛ̄ lè. sìi yɛgɛ gè, ti mìɛni bé kùu. 18Muɔ wè, m'bé sí mi nyuɔ kún gè kɛn muɔ mɛ́.
«Muɔ wè, muɔ bé jíin kɔ́rikpuʔɔ nī gè, muɔ nɛ́ muɔ cuɔ ní wè, nɛ́ muɔ jaala ní bèle, nɛ́ muɔ jaala pe cɛlilɛ ní bèle. 19Muɔ bé yawiire ti mìɛni feliye nyɔ́gɔ kɔ́rikpuʔɔ nī gè, siin siin, nàguɔ nɛ́ cɛliwɛ, kire ga buu ti‑ kòri sìi nɛ̄ nɛ́ muɔ ní. 20Nyàʔayɛrɛ nɛ́ yajuuro ti mìɛni feliye, nɛ́ yafulolido ní dè ti mìɛni feliye, nɛ́ yafinide ní dè ti mìɛni feliye, siin siin, nàguɔ nɛ́ cɛliwɛ, ti bé pɛn muɔ mɛ́ bè ba kòri sìi nɛ̄. 21Muɔ wè, muɔ bé yaliire ti mìɛni feliye líɛ bè tɛ́ngɛ mìɛ táanni, dàa dī siɛnnɛ wori dè nɛ́ yawiire wori dè.» 22A Nɔwe 'ki kpíʔile. Gàa ki mìɛni Kulocɛliɛ cé juu nɛ̀ gbɛ̀ngɛ wi mɛ́ wè, a wi 'ki mìɛni kpíʔile bɛ̀.
Voafantina amin'izao fotoana izao:
Sélimɛ 6: sev
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© (Active), Wycliffe Bible Translators, Inc. All rights reserved.