Jenesis Nuarin-tas alupas 1.
Nuarin-tas alupas 1.
1 Natupun u nohatag im nobohtan, 3 inlah, 6 nauanohatag, 9 inpece im injap, 11 er ika yi ededel itai an nobohtan, 14 nagesega, im inmohoc, im, niji moijeuv, 20 num u im inman, 24 niji itai eklim edo irai pece, 26 natimi an nalmui Atua. 29 Er ati nitai hegaig.
1IS ago nohatag a Atua im nobohtan itu acen.
2Is tup upudupud nobohtan, im ti itai iran; is ataluopni narasin jap napat. Is aibuthan wai a Nesgai Atua.
3Is ika a Atua, Etmu eteuc inlah: is um lah.
4Is almoi inlah a Atua, mika is upene: is atiakoai inlah im napat a Atua.
5Is anvi nidan lah a Atua par ika Nadiat, um lep anvi nidan napat par ika Nepig. Is adiat uhup injupura im nuhialeg.
6Is ika a Atua, Etmu eteuc nuarin lah juju irai iblai wai, par atiakoai wai.
7Is ati nuarin lah a Atua, um atiakoai wai ithan nuarin lah im incopda u nuarin lah ijinies: is um uce.
8Is anvi nidan nuarin lah a Atua par ika nauanohatag. Is adiat sekunt injupura im nuhialeg.
9Is ika a Atua, Uhmu asjapicnaig niji wai ithan nohatag an nuarin yi ethi ache, etmu lep ateucrad nobohtan: is um uce.
10Is anvi nidan nobohtan a Atua par ika Inpece; is lep anvi nidan nasjapicnaig ui wai aien par ika Injap: is almoi a Atua mika is upene.
11Is ika a Atua, Etmu ededel nefelelicai an nobohtan, im inceslum amen nesgan iran, im nauicai yi pinid nohuun nohwan, et lep amen numta iran: is um uce.
12Is ededel nefelelicai an nobohtan, im inceslum amen nesgan iran, im nauicai is pinid nohuun nohwan, is lep amen numta iran: is almoi a Atua mika is upene.
13Is adiat dirt injupura im nuhialeg.
14Is ika a Atua, Etmu eteuc niji itai lah an nohatag par atiakoai nadiat im nepig; um asjaaicnaig irai iji opan, im niji lidija, im niji adiat, im niji mesese:
15etmu amen itai lah iji igki an nohatag va yi pu lah nobohtan vaig: is um uce.
16Is ago nitai lah alupas is ero a Atua; nitai lah esjilid uri nadiat, im nitai lah haklin uri nepig: is lep ago moijeuv aien.
17Is ikni an nohatag a Atua mika yi lah nobohtan vaig,
18um lep esjilid an nadiat, im nepig, um itai atiakoai inlah im napat: is almoi a Atua mika is upene.
19Is adiat ford injupura im nuhialeg.
20Is ika a Atua, Etmu eteuc niji obotpot itai umumoh an jap um ahinag, im niji obotpot man ijinies an nauanohatag.
21Is ago niji yau alupas a Atua, im niji obotpot itai umumoh an jap is ahinag, im niji obotpot man ae: is almoi a Atua mika is upene.
22Is tas upene vaig a Atua, um ika, Etmu ectaig numu um ahinag, um ohua injap vaig, etmu lep ahinag niji man an nobohtan.
23Is adiat fifd injupura im nuhialeg.
24Is ika a Atua, Erumu amen an nobohtan niji obotpot itai umumoh, nikavaig, niji itai eklim edo irai pece auata upene, im niji obotpot itai atahas, im niji obotpot itai eklim edo irai pece aleg: is um uce.
25Is ago niji obotpot itai eklim edo irai pece aleg a Atua, im niji obotpot itai eklim edo irai pece auata upene, im niji obotpot itai atahas an uobohtan: is almoi a Atua mika is upene.
26Is ika a Atua, Intaijmu ago natimi an nalmuitaij akataij yi idivaig cataij: erumu esjilid ara irai iji mu an jap, im niji man an nauanohatag, im niji itai eklim edo irai pece auata upene, im niji itai atahas asega et atahas an nobohtan, im nobohtan asega.
27Is ago natimi a Atua an nalmun, is ago yin aien an nalmui Atua; is ago rau aien natamaig im natahig.
28Is acis yi alwai rau a Atua, is ika ehele rau a Atua, Arumu asvalav aijaurau yi ahinag, erumu terim-terim ara an nobohtan, um atimarid iran: erumu esjilid ara irai mu an jap, im niji man an nauanohatag, im niji itai umumoh asega et amen an nobohtan.
29Is ika a Atua, Ek mun idim alupai caurau ainyak niji obotpot ceslum asega an nobohtan asega, et amen nesgan iran, im niji obotpot cai oho asega et amen nohwan iran; inyi itai hegaig incamia nitai iji igki.
30Ek mun lep alupai itai eklim edo irai pece umumoh asega ainyak nefelelicai asega et ededel incara, im inman an nauanohatag asega, im niji itai atahas asega an nobohtan: is um uce.
31Is almoi niji itai asega a Atua is ago aien, mika is idim upene: is adiat siksd injupura im nuhialeg.
Voafantina amin'izao fotoana izao:
Jenesis Nuarin-tas alupas 1.: ABO
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)