Yoosuwa 13
13
ABBIXE WEEN BAAXO
1Yoosuwa kaxxam idooliteh yan saaku YALLI kaak iyyeemih, «Atu a saaku idoolitteh tani'mmay, ahak sarra uxih mango baaxoy tabbixoonu waytaanahiyya raqteh tan. 2-3Inkih yan *Filistiin rasu kee Gasur deqsitta baaxo kee, gabbi-qaxat raqta baaxoy Qawwim deqsita mari elle yani uxih mabbux mali. Tohum, Sicor dabba deqsita aracay Masri cuduudul geytimahiyyak xabba haanamaay kilbat le kabuk Ekron cuduuduh amma 'yaanam tan baaxo kee, Filistiin malikwa elle tan Gaada kee Asdood kee Askalon kee Gat kee Ekron deqsitta magaaloolik ten. A baaxoy Kanqaanal yaaxigeenihiyya inkih uxih mabbux mali. 4Tohuk kalah kaadu, Maqara deqsitta magaalay Sayda deqsita mari dabaaqah elle yanik xabba haanamaay Afeek deqsitta magaalay Amoorâ-marih cuduudut raqtahiyya fan tan baaxo mabbaxinniton. 5Gabal deqsita marih baaxo mabbaxinniton. Ayrô-mawqa le kabut raaqa Lubnaan rasu kaadu uxih mabbaxinniton. Tohumuu, Baqal-Gaad magaalay Cermon qalek gabbi qaxat raqtahiyyak xabba haanamaay Camat deqsita daabah amma 'yaanam tan baaxok ten. 6Abbixe'kal tanin baaxot, Sayda akak iyyan marih baaxo edde tan. Tohumuu, qaleela le baaxoy Lubnaan qaleela kee Misrafot-Mayim deqsita aracal fanal geytimtahiyyak ten. Israayil mari gutuqak fooca fanah elle yamaateenimil, anu a mara baaxok ayyaaqeyyo. Tonna'mmay ta baaxoy anu keenih abbaxu waahiyya atu a waqdiik keenih ixigaay ken xexxar keenih waris. 7Tama baaxo Israayilik sagla kedo kee Manasseh yooboke marak kedok garabay raaqehiyyah a waqdiik ixigaay ken xexxar keenih waris» kaak iyye.
ORDONUK AYRÔ-MAWQA LE KABUT RAQTE BAAXO ELLE KUREN INNA
8Ruuben kee Gaad kee Manasseh yooboke marak garabah, YALLIH naqasuh yen Muusa, dumal elle, baaxo kureh suge. Tohumuu, Ordon weeqaytuk ayrô-mawqa le kabut raaqa aracak ten. 9Cuduud keenik Qarooqer magaalay Arnon golok amol tanihiyya fanah gufak yen. Woo golok gudet tan magaala kee Medaba kee Dibon deqsitta mandarwak fanal tan booxah tan baaxo inkih ken baaxo tekke. 10Tohuk kalah cuduud keenik Qammon marih baaxok cuduud edde idiyya iyya ikke fanah gufak yen. Amoorâ-malikiy Sicon deqsitak yeneeh dabaaqah Cesbon deqsitta magaalal sugehiyya elle ackamuk yen magaaloolih agantah keenih kure. 11Gilqad rasu kee Gasur kee Maqka kee Cermon qaleh dariifal enna 'ta baaxo kee, Basan deqsitta baaxok Salka deqsitta magaalah amma 'yaanam tan baaxo Muusa inkih keenih yecee. 12-13Qoog deqsita malikiy Qastarot kee Adraqi deqsitta namma magaalal abbah sugehiyya malikih elle suggu 'ye baaxoy Basan deqsittahiyya inkih kenim tekke. A malikii, Rafaayim akak axcuk yenen marak saaboh raaqe numuk yen. Muusa kee Israayil mari, Gasur kee Maqka deqsita maray a saaku fanah wokkel elle yanihiyyak kalih marak qeebil yeyseeniih; baaxok ken eyyeqqaay baaxo keenik raaqissa heen.
14Muusa Leewih yooboke marah baaxo maacanna. Toh akah abemii, YALLAY Israayil doore Dagelta kinnihiyya Muusak iyyemii, «Leewih yooboke mari cado akak carrisan sadgatay yoh abaanahiyyak raqtem baaxoh aftok keenih ixig» 'yaanam iyyeh yen.#Qagsen Xinto 18:1
15Muusa Ruubenik rade marah kulli gulubuh mangah yakkeenih gidel baaxo yecee. 16Baaxo keenik Arnon golok amol tan magaalay Qarooqer deqsittahiyyak xabba haanamaay woo golok gudel tan magaala kee Medaba deqsitta magaalak dariifal tan booxaaxah tan baaxo inkih kenimik ten. 17Cesbon deqsitta magaala kee tet dariifal tan magaalooliy booxaaxah tan baaxo geytimtahiyya kenim tekke. Tohumuu, Dibon kee Baamot-Baqal kee Beet-Baqal-Maqam kee 18Yahax kee Kadeemot kee Mefaqat kee 19Kiryatyim kee Sibma kee, Xeret-Sacar deqsitta magaalay daqar addal tan koomah amol tanihiyya kee, 20Beet-Faqor kee inkih tan Fisgâ-qale kee, Beet-Yasimot deqsitta magaalah agantah keenih yecee. 21Booxal-enna 'ta magaalooli kee Malik-Sicon malikih elle enna axcuk yen baaxo keenih yecee. Sicon Amoorâ-marih malikik yeneeh; dabqah Cesbon magaalal suge. Muusa ta malik kee Miidiyan marih abbobtik inkih yeyseh, baaxo keenik raaqise. Too maray Sicon gubal abbootan luk yenehiyya migaaqah Awi kee Rekem kee Xuur kee Cuur kee Rebaq deqsitak yenen. 22Israayil mari qide marih addat ramli qidak suge Balqam deqsita num edde yen. Balqam abba Baqor deqsita numuk ten. 23Ruubenih yooboke marih baaxo ayrô-culma le kabuk cuduuduh Ordon gufak ten. Ruubenik rade marah gulub-gulubuh yeceen magaalooli kee gaandoodi tama gidek ten.
24Wohuk kalah kaadu, Muusa Gaadah yooboke marah baaxo yeceeh; too baaxo Ruubenih yecee baaxok kilbat le qaxat raqta baaxok ten. 25Yaqder deqsitta magaala kee, Gilqadal enna 'ta magaalooli kee, Qammon marih baaxok Qarooqer deqsitta magaalay Rabba deqsitta magaalak ayrô-mawqa le kabut raqtahiyyah amma 'yaanam takke baaxo inkih too kedoh yecee. 26Rasi keenik Cesbon magaalak Raamot-Mixfa kee Batonim deqsitta namma magaalak fan akkuk yeneeh; tonnah kaadu, Macanaayim deqsitta magaalak xabba haanamaay Lodabar deqsita aracah amma 'yaanam tan baaxo inkih kenim tekke. 27Cesbon magaalal yen malik Sicon baaxok raqqa 'tem inkih keenih yecee. Ayrô-culma le kabuk cuduud keenik Ordon weeqaytih garil tan baaxoy Galiil badah amma 'yaanam fan takkehiyya gufak yen. Ordon weeqaytih dariifal tan magaaloolik Beet-Haram kee Beet-Nimra kee Sukkot kee Safon kenim tekke. 28Gaadah yooboke marah gulub-gulubuh yeceen magaalooli kee gaandoodi tama gidek ten.
29-30Muusa, Manasseh yooboke marak kedok garabah Macanaayim deqsitta magaalak kilbat le kabuk tan baaxo yeceeh yen. Tohumuu, inkih yan Basan rasu kee, woo baaxol sugte lactam magaalay Yaaqir wohuk naharat qeebit yibbixeh sugehiyya inkih keenih yecee. Tohuk dumal a baaxok abbah sugtem, Qoog deqsita maliki. 31Tonnah kaadu, Gilqad rasuk garab takke baaxo kee, Qastarot kee Adraqi deqsitta namma magaalay Qoog deqsita malik dabaaqah elle yene kenim abe. Ta baaxoy tikki 'tahiyya inkih Manasse-Makirik rade marak garabah yecee.
32Muusa, Mooyab rasul gubbih yan aracal, baaxo ummatah elle kurem, tama innak ten. Too arac Yerikô-magaala kee Ordon weeqaytuk ayrô-mawqa le qaxat raaqa aracak ten. 33Takkay immay Leewih yooboke marah baaxo maacanna. YALLAY Israayil doore Dagelta kinnihiyya kaak iyyemii, «Leewih yooboke mari, baaxoh aftok yoh baahan sadgat ikoytah lon» 'yaanam iyyeh yeneeh; tohuk gexxaamah keenih maacannon.
Voafantina amin'izao fotoana izao:
Yoosuwa 13: NKM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra